Kangpokpi District kilom: District hi mipi kilungto jeh’a imu’u ahi : MLA...

Kangpokpi District kilom: District hi mipi kilungto jeh’a imu’u ahi : MLA Nemcha Kipgen

354
0
SHARE

Kaybie Chongloi,
Kangpokpi, Dec.20 (ET): “Kum 40 valset nunga district ihinmu uhi thildang jeh ahipon, Pathen phattheiboh ichanjal’u le mipi ikilungtojeh’u ahibouve”, tin Kangpokpi AC MLA Nemcha Kipgen in tunia Kangpokpi AC hop’a Kangpokpi District lopna kin’a aphongdoh in ahi. District delnan lam saotah ihinjot un, atamjo gim hesohna jeng ahin, alen aneo, ateh akhang, numei pasal ibon chauvin taona toh thon pan ilasoh keijun, tun ikilungto jallun thusim ma umjing ding kum 40 val district ihindel’u chu imutauvin, ibon chauvin chanvou ineisoh keijui tinjong MLA nun aseije. MLA ho jeh jong ahipoi, MDC ho jeh jong ahipoi, JAC ho le CSOs chule mipi changtum jeh jong ahideh poi, Songchan Songpi atheh banga ihung kitheh touva, ibonchauva ipan nathei cheh uva kilungtoh tah’a chimtih le choltih neilouva pan ihinlah jal uva district hi imu’u ahin hijehchun mipi jouse thalheng hinan mi mama kajana salaam kape’e tin local MLA nun aseibei. Jana sangtah neipum’in mipite jouse jong adih dohsah in, District movement a ahinkho anaphaldoh (L).Seikeng Haokip, Phoibih village, (L). Lhingdei Khongsai, Lhungjang, (L). Lamminlen Sitlhou, Keithelmanbi, (L). Krishna Maya, Charhajare le (L). Hari Maya, Charhajare geldohna le jana vetsahnan a insungmiteu ‘Saipikhup’ khatcheh MLA nun asilpeh in ahi. Ahoulim banjom’in, MLA Nemcha Kipgen in district neiding hi kalungtup le election kahin tet lona ajeh pipen jong ahi tia aphondoh tolhonin MLA kahi sunga district ihin mu’u hi keijong vangpha kakisah lhehjeng’e ati. Tun district imu tauvin, khantou machal nadin keivang kaki gotai, nangho (mipi) naki got tah uvem, khantou machalna din alhaidin kakigo chaitai, nangho (mipi) nahung lhaidiu hinam, district pilhing masa hotoh kibah’a, amaho khel teitei din keivang kakigo tai, nangho nakigot u hinam tinjong mipi tilkhouna le chouna aneijin ahi. Aman aseibena a chun, Education (Themjilna) hi khantou na le imalam jousea dia angaikhohpen le apoimopen ahitolhonin education gelkhoh cheh’a masot chehdin temna jong aneijin chule district khantou machal lam’a ana pilhing masa district dang ho toh kibang le kheltei ding lunggel neicheh din jong MLA nun tilkhouna aneijin ahi. Kigon kipat masang chun Kpi AC sunga nute makainan, MLA Nemcha Kipgen, Chairman, ADC Sadar Hills Haokholal Hangshing le JAC Sadar Hills Convener Nehthang ‘Talai’ ja apu uvin Brig. Thomas Ground avel piuvin stage chan’a athahlut un ahi. Kangpokpi AC hopsunga MDC ho Lamkholen Kipgen, EM(Tujang DCC), Seikhosat Kipgen, EM(Tujang Vaichong DCC), Bhumi Prasad Vikas, EM(Irang Pt.-II DCC), Lamminthang Kipgen (Keithelmanbi DCC), Sagar Gewali (Irang Pt.-I DCC), Milan Pradhan, Nominee (Kalapahar DCC) le Seilen Lhoujem (Wakotphai DCC) in jong pan alauvin hinlah H. Khangba Thangal(Kalapahar DCC) le P. Rocky Rangtaina (Mayangkhang DCC) in pan ala lhonpon ahi. Kangpokpi AC sunga Chief Association ho thalhengin Kangpokpi Town Committee Chairman Chonkam Kipgen in MLA Nemcha Kipgen, ADC Sadar Hills Chairman Haokholal Hangshing, JAC Convener Nehthang le MDC ho Saipikhup khatcheh asilpeh in pachatna le kipathu jong aseitolhonin japi toh kithon thongjejun kipana asam’un ahi. District neipa tia jong seithei, ADC Sadar Hills Chairman, Haokholal Hangshing in ahoulimna’a, Sadar Hills mite din kho avah tai, Pathen in ilamkai hou le mipi phatthei eiboh’un district pilhing imutauve tin Pathen thangvahna le akipana aphongin ahi.Aman aseibena’a, 1972 kum’a Manipur in Statehood ahinmu jouvin ADC Sadar Hills jaonan Autonomous District Council gup district pilhinga phondoh ding chu adangse ana kiphongdoh in Autonomous District Council hi dalhah in ana um masapenin hitichun aban ban in dalhah in ahung um umin kum 40 valset nungin ihin muthei uve ati.District pilhing ihin mu’u tolhonin Department tampi hung umbe ding, tohmun tampi hung kilading, khantou machalna ding jong tampi hung umding ahitah jeh in asunga chengkhom mite hi kilungkhat tah’a MLA nun aseima banga district pilhing masa hotoh kibang le kheltei nadia ikigot chehdiu ahi ati. “Phatsottah lukhap ding le tongapding chajong neilouva in bahara a ina-um nungun tuhin eiho in nah iumthei thei tauvin, hiche hi eiho Kangpokpi AC mite thalhenga tahsan’a inasot’u MLA nu doi le tup chule khohsahpen jong ahin, ivangpha uve” tin Hemang Singsit, Chief Agent, 50-KPI AC Central Committee in aphongdoh in ahi. Japi in Maicham atokhom tolhonin Rev. J. Lunkim, Chairman Kangpokpi Town Churches Fellowship makaina noija District Lopna kin thupi chu mipi amangin chule ama lamkainan Kangpokpi AC hopsunga Reverend jousen stage chunga dilsu pumin Pathen thangvahna le makho’a district sunga cham le lungmonga khosa pum’a khantou machalna lamjot jing theina din lamkai chengle, mipi chule gam le nam a din taokhomna aneijun ahi. Mizoram Aizawl khopi akon Michael Vanlal Sailouva chule adang dang Pathen vahchoilasa minthang Esther Sitlhou, Nemsemhoi, Golden Choir Keithelmanbi hon Pathen vahchoila oijin mipi ana sulip lheh un chule Kanggui Youth Union, Haijang Cultural Troupe, Nepali Cultural Troupe honjong lam vetnom umtah tah avetsah un ahi.Gl. Lamlunmang le Ng. Deinou in kilomtah’a Kangpokpi Districthood Lopna kin (Noon Session) amakai lhon chu lolhingtah in khumkha anahi. Evening Session (Concert) hi T. Ranjit Singh, IAS, Deputy Commissioner, Kangpokpi District, Col. GV Raghavan, CO 38 AR (Jwalamukhi) Lairouching chule H. Balram Singh, MPS, SP Kangpokpi District in opna aneidiu ahi.Evening session a hi lasathem minthang tampi le Actor Sadananda le MANIWOOD akon’a adang jaona’a Anggu Sings It Band in pan alahdiu ahi.