Kangleipak a Kukiland umthei louding ahi tia Haomee Federation in sei

Kangleipak a Kukiland umthei louding ahi tia Haomee Federation in sei

110
0
SHARE

Kangleipak a Kukiland umthei louding ahi tia Haomee Federation in sei

Imphal, May 23(ET): Gamdang (foreign) a um thingnoi kiloikhomna KNO/KNA noiya Kangleipak a Kuki ho dinga gam atum a semdoh nadinga sorkar toh kihouna ngah dinga Federation of Haomee hon asei uvin ahi.

State sorkar chule India sorkar in thingnoi kiloikhomna akisei toh ‘suspension of operation’ asem angah dinga organization in temna jong anei uvin ahi. Achesa May 18 nikho a KNF 33rd Raising Day nikho a KNF/KNO Defence Secretary Thongsei Haokip in ahoulimna a July 2020 kah a Kangleipak a Kukiland atum a semdoh nadinga India sorkar in phatsahna (approved) apeh ahitai, tia ahoulimna thu aseiyin, hiche chungchang sorkar in aganna thei pen a asuhchen dinga organization in temna aneibe uvin ahi.

Tribal Forum Manipur in May 17 ni a Chief Minister henga lekhathot apeh nauva, State Tourism department in Chandrakirti Memorial Park asahna Indo-Myanmar gamgi Behiang noiya um Chibu lhang hi Meilhei leng vaipohna noi ahipon, Lushai haosa kivaipohna noi ahi, tia aseiyu jong Haomee in aseiyin ahi. Hiche mun a kon King Chandrakirti memorial stone lahdoh dinga Tribal Forum in ngehna anei ahi. Chiobu song a thil kisun/kijih hi Manipur Ancient and Historical Monument and Archeological Sites and Remains Act, 1976 noiya kivekol ahijeh a kiladoh theilou ding ahi, tin Haomee in aseiyin chule Chief Minister in hiche thu akhohsah dinga temna aneibe uvin ahi.

Gamdang a um Manipur Academician hon CM henga COVID 19 douna dinga ngaidan aneihou seiyu

Imphal, May 23(ET): India gam chom chom a um institution hoitah tah a natong Manipur gam mi academician hon gamsunga Covid-19 nat vetkol nadinga lampi pha achom chom Chief Minister N Biren Singh henga ngaidan ape uvin ahi.

CM lamkai thepna chule ‘frontline worker ho natoh hetpehna anei uvin, natna chungchang adeh a khopi len len a kon hung kile ho thu, district jouse a ‘quarantine centre’ a hahsatna umho thu asei uvin ahi. Kal khat valjep sunga gamsunga Covid 19 case hi hatah a kal ahi’in, adeh a gamdang a kon hung kile holah a tam ahi.

Tuchan a Manipur gam a natna a kon damdoh a hospital a kon kisoldoh teni tilouva Covid 25- active case alhompen a 25 record ahitai. May 21 nikho a Chief Minister henga lekhathot apeh nauva, administrator chule frontline worker hon abolthei kalval a pan alah vanga ‘policy’ toh kisai boina aumin, hiche hi gamsunga natna hatah a akalding vendoh nadinga apet pet a khohsahna pehding ahi, tin asei uvin ahi.

Institutional quarantine le testing bol tei dinga ‘academician group’ hon asei uvin ahi. Ni 14 lhing hi institutional quarantine a ahung kile ho umsah tei ding chule ama ama kho ajot masang uva test bol tei ding ahi. District COVID-19 committee hon notification aso angahsah diuvin aseiyun chule test bol louva koima in akile ding aphal peh lou diuvin ngaidan asei uvin ahi.

Quarantine centre a ‘Monitoring body’ koidinga jong asei uvin ahi. Thinglhang district a um Institutional quarantine centre atamjo hi ‘standard protocol’ beiya kipo ahi. Mun phabep a hiche quarantine centre a um hon lhangphong tah a neh le chah, thenna, nen kipaina, physical distancing thu a kiphinna aneiyu ahi. Centre phabep a quarantine kibol ho insung miten neh (bu) athah diu kiphal peh ahi. Natna achal louna dinga hiche ho vetup ding monitoring body ngai ahi’in, body hi Chief Medical officer (CMO) ahiloule State COVID 19 Committee vetkolna noitah a umsah thei ahi, ati.

Phase wise a ahung kile ho lahlut ding jong asei uvin ahi. Gampam a kon hung kile atamval jeh a District Quarantine centre a amaho umsah nading a amijat tam jeh a thinglhang district a administration le state legislator atamjo in hahsatna ato ahi. Ahung kile tam a chule test kibol thei jat hi alhom jeh a phase a amaho nungpui ding pha asah nau thu asei uvin ahi. Hiche hi district administrator le institutional quarantine centre a lungkhamna olna jong hiding chule natna ajal louna dinga avetup jong hiding ahi, ati.

Fund allocation chungchang thu jong asei uvin ahi. State in ‘quarantine centre’ ho fund apeh ahi’in, atamjo in amu lou chule angaichatna sang ahi. Khosunga kikoi centre hohi kivaipo ahitan, Covid 19 nat douna a lungtup molso nadinga tosotna lhingset peh ngai ahi. Tengbang hi mi tamtah dinga olna ahivanga amu dinga lom amulou um nalai ahi. Chule natoh na neilou ho dinga ‘one time relief’ hi lhing joulou ahi’in, gamsunga lepui ding ngah a gamdang a tangden ho kithopina peh ding ahi, tin asei uvin ahi.

Mao Gate le Jiribam Railway Station a Covid 19 lab test koiding: Pandemic hi kichai vah louding ahijeh a hiche mun a healthcare facility hi phatah a manchah peh a upgrade bol ngai ahi. Mao Gate a Sub-district hospital a hi COVID 19 test bolna thei laboratory, natong ding mi alhing a koiding chule angaicha dang dang jong peh ding ahi, tin lunggel aseibe uvin ahi.

Achesa May 2 nikho a Guwahati a kon atangden batch masapen mi 84 hung kile ahi’in, tuchan geiya bus ahiloule train a mi 12,000 val gamsung hunglhung ahitai. Saturday nikho chan a Jiribam, Manipur a agom a train 9 hunglhung ahitai.

Manipur a nikhat sunga Covid 19 positive athah 3 kihetdoh be; Natna nei mi 2 Negative ahitoh lhon a hospital akon discharged hita 

Imphal, May 23(ET): Saturday nilhah a Thoubal district a kon hi pasal ni Covid 19 positive ahi hetdoh be ahitoh kilhon a case athah 3 aumbe in ahi.

Hiche toh kilhon a gamsunga natna neiya agom a mi 29 alhingtan, hiche lah a active case 25 um ahi. Pasal teni hi kum 19 le 26 cheh ahi lhonin Virus Research and Diagnostic Laboratories (VRDL) a Saturday nikho a test abol uva, positive ahi lhon hetdoh ahi jouva COVID 19 Care Canter, Regional Institute of Medical Sciences (RIMS) Hospital, Imphal a aum lhon tai, tin Additional Director, Dr K Sasheekumar Mangang in aseiyin ahi.

Dr Mangang in asei dungjuiya, athah a natna anei kihedoh pasal teni hi Delhi a kon bus chom chom a hung kile lhon ahi. ‘Containment’ le ‘contact tracing’ ho apan tauvin ahi. Nikho kipat til a Imphal West a kon hiya kum 26 a upa pasal khat jong positive ahi kihedoh ahi. Mipa hi Chennai a kon train a hung kile ahi.

Alangkhat a, achesa May 16 ni a Covid 19 positive ahi kihedoh a kum 75 a upa minu khat le kum 48 a upa achapa RIMS a kal lhunga akijen jouva test abol kit nauva negative ahi lhon tan RIMS akon tunin discharged akibol lhon tan ahi. Moreh a cheng amani nu cha hi Mumbai a kijen ding ache lhon a May 13 ni a private bus a hung kile u ahi. Mumbai a kon May 8 ni a Bus le Ambulance a hung kipan doh passenger 36 holah a pang lhon ahi’in, Imphal alhun uva RD Wing Complex, Lamphelpat a ‘quarantine’ abol u ahi.

Amani negative ahi kit toh kilhon a Manipur a COVID 19 a kon damdoh a mi 4 lhing ahitan, ‘recovery rate hi 13.79% a um ahi. Atamjo gamdang a kon hung kile holah a covid 19 positive akal cheh cheh toh kilhon a sorkar in kivenna akhousah cheh tauvin ahi. Chief Minister N Biren Singh in Friday ni a thuso miho akihoupi na a, gamdang a kon hung kile hon ni 14 lhing ‘quarantine period’ kipe ajui tei diuvin aseiyin, ajuilou ho jail a koi dinga gihna jong anei ahi. Quarantine protocol palkeh hohi National Disaster Management Act, 2005 noiya achungthu kisei ding ahi, tia CM in asei ahi.

Tuchan geiya Jiribam a special train 9 hunglhung ahitai. Gamdang a tangden ho apuidoh pan uva kon mi 12,000 val hi bus le train a gamsung hung lhung ahitai.

Justice A Noutuneshwari in Lhukhosei Zou ‘bail’ apeh dan dih salou hon thudoh neiyu

Imphal, May 23(ET): Special Judge, ND&PS Aribam Noutuneshwari in khamnathei tamtah toh kiman ADC Chandel chairman anahi Lhukhosei Zou ‘bail’ apeh hi ‘legal practitioner’ chule case a ‘investigating officer’ hon thudohna tamtah anei uvin ahi.

Zou hi achesa May nisim 21 nikho a court in ‘Medical ground’ a bail a alhadoh ahi. “Mijouse hi themmo akichan kah a themmona neilou ahi. Hiche jeh a achungthu kisei nalai ADC hi themmo akichan kah a keiya dinga themmona neilou ahi”, tia Justice A Noutuneshwari in ‘bail’ thumna hearing anei nauva asei ahi.

Case Investigating Officer jong hi a Additional SP, NAB, Thounaojam Brinda Devi in ama Facebook post a Narcotics Drugs and Psychotropic Substance Act hin ama themmona aphotchen ahi. Dan in akha thil ho ama a kon akimudoh jeh a themmona neiya kikoi ahi’in, aman themmona aneilou aphotchen kah a themmona nei ahi, tin thu tamtah aseiyin ahi.

Legal practitioner khat in thuso miho akihoupi na a Cholescystectomy bol nadinga Lhukhosei Zou ‘medical ground’ a bail akipeh hi ajeh kitup ahipoi, ajeh chu hitobang kijenna ahiloule surgery hi ‘custody’a umpet a jong chelha thei ahi, tin aseiyin ahi. “Emergency ahiloule surgery khohtah tah le kijenna hohi Covid 19 pandemic kisei pet a jong government hospital a kigong ahi’in, hitobang hi khamnatheiya kivei khat dinga jong bol thei ahi”, tin amin koi ahi kisei louva aseiyin ahi.

Hetthei khat chu 2018 kum a Lhukhosei Zou hi hitobang dinmun ma ma a ‘bail’ a kilhadoh a, hospital a kon kiholmo ahi. 2020 kum a court a ama le ama akipehlut kit chan a hi ajam ahitai, tia phondohna um ahi.

Assam a Covid 19 case 329 lhingta; Saturday nikho bouva case athah 70 kihet doh be

Guwahati, May 23: Assam gam a Saturday nikhon COVID 19 case athah 70 hetdoh ahitoh kilhon a nikhat sunga natna akalna asan na pen ahitan, tuchan geiya natna neiya agom a 329 lhing ahitai, tin Health Minister Himanta Biswa Sarma in aseiyin ahi.

Assam gam a Friday nikho a case athah 49 hetdohna um ahi. Case athah 10 akisei kit toh kilhon a May 23 chan a Assam gam a natna nei agom a 329 lhing ahitai. Case 10 holah a mi 4 hi Morigaon a kon, 2 hi Nalbari a kon chule Nagaon, Hojai, Golaghat le Jorhat a mikhat cheh hi ahi. May nisim 70 nikho a bou Assam gam a case athah 70 kiseibe ahi.

Nikho kipat til a case athah 60 kisei ahi. Hiche case 60 holah a Sarusajai Quarantine Centre a case 44, Dima Hasao district a 7 chule Cachar district a case 2 ahi. ALangkhat a Hojai a case 6 kisei hohi Sarusajai quarantine centre a um ahi’in chule mikhat hi Dhubri ho ahi. Case agom a um 329 lah a mi 54 damdoh ahitan, active case 268 um ahi. Assam gam a natna jeh a thi mi 4 hiya chule mi thum hi agam a kile ahitai.

May 22 ni a case 44 akisei hi agamsunga natna akal na pen anahi ahi. Friday nilhah a Sarusajai Quarantine Centre a um mi 26 hi ‘positive’ ahi kihedoh ahi. Assam gam a achesa May 21 ni a case athah 23 kiseiya, hiche chan a hi natna nei agom a 200 val ahi. Ni 4 sunga case 100 kihetdoh be ahi. Case akisei atamjo hi gamdang a kholjin khan gen hi ahi. Assam a laboratory 7 um ahi’in, agom a sample 55,791 test abol u ahitan, hiche lah a 266 positive hiya chule 50,450 hi negative hi ahi. Adang hi result anga nahlaiyu ahi. Gamsung miho natna a kon kivenna dinga in a aumtup diuva Health Minister in temna aneiyin, mipi moh kichat louva dan ajui joh diuva asei ahi.

Union Health Ministry website dungjuiya, India gam a Covid 19 positive case 1,25,101 lhing a chule natna jeh a mi 3,720 thi ahitai. India a active case agom a 69,597 um ahi’in, mi 51,783 hi damdoh a hospital a kon asoldoh u ahitai.

May 25 a kon Bir Tikendrajit International Airport a ‘flight service’ kipan tading

Imphal, May 23(ET): Lha ni lhing lenna ho akilen sah lou jouva ‘domestic flight’ ho May nisim 25 nikho a kon lengthei kit tadinga India sorkar in notification asodoh ahi.

Imphal International Airport tia kisei Bir Tikendrajit Airport injong Saturday nikho a kon lenna lensah pat nadinga kigotna anei ahitai.MM Ansari, Director, Airport Authority of India, Imphal in asei dungjuiya, kigotna lhingset um ahitai. May 25 a kon lenna angaiya leng ding chule Imphal International Airport injong service peh nadinga kigotna anei ahi, ati.

Hetthei khat chu Imphal International airport hi Guwahati Airport ban a Northeast a dinga airport lenpen ani channa ahi.

Gamgi ho a viral hospital le Rapid testing Lab semdoh ding a MP RK Ranjan in hetsah na nei

Imphal, May 23(ET):  Lok Sabha MP Dr RK Ranjan in state sung hunglut na gamgi Moreh, Mao, Jiribam le Behiang ho a Viral Hospital le apid testing Lab agan na thei pen a semdoh angaidan hetsah na ana nei in ahi.

PMO le Health Ministry thupeh dungjui a a gamsung phabep a um quarantine centre ho vetlhah na ananei toh lhon a Chief Minister ang a hetsah na ana nei dan le Chief Minister in jong  quarantine centre hop hate a vetsui ding apoimo dan tahlang na an anei ho hetsah na ana nei in ahi. MP pa in quarantine centre ho a daan juiding phate a semding dan hetsah na an anei toh lhon in Chief Minister pa in centre lahdung a kivenna nein a dig a natoh chelhah ding dan le state sung a medical staff lhom toh lhon a contract basis a kilah be ding dan thu jong tahlang na ana nei in ahi. MP pa in Union Health minister ang ah State sung a viral hospital semding a hetsah na anei tah dan jong tahlang na ana nei in ahi.

Gamdang a tangden Jiribam hunglhung Kangpokpi miho po dinga Kangpokpi a kon bus 6 kipan doh ta

Kangpokpi, May 23(UNA): Ahung lhung ding ni phabep sunga Jiribam railway station hung lhung dinga gamdang a tangden Kangpokpi miho poh nadinga Kangpokpi police hon bus 6- Emmanuel, mooching, Kainou, Jehovah Jaire, Biswas le Bibi Sangboboi Friday nikhon asucheh tauvin, Saturday jingkah nidan 7.40 don a Jiribam jon dinga bus ho akipan doh tan ahi.

Addl. SP (Ops) Lalminlen Misao, MPS lamkaina le OC Kangpokpi, Inspector KHogen le 2nd OC Minboi Vaiphei panlahna a Kangpokpi police hon Friday jan hi bus gup holna a aman u ahi. Bus hi aneiho henga District Headquarter a aum vanga Lockdown jeh a Kangpokpi bus driver jouse ama ama kho a cheu ahi tahjeh a bus lah hi natoh bailam hilou ahi.

Jan nidan 8.30 don a bus lahna dinga thu amu uva, Saturday jingkah nidan 10 kah a Langjing, Imphal a bus ho lhung tei dinga thupeh aneiyu ahi. Vaigei tah a thu amu vang uva pan sangtah alah uva KYU le District Administration staff ho kithopi na a apet pet a pan alah u ahi. Hengjang, Saparmeina police station kom a kon Kangpokpi District Headquartr chan police hon ahin holkhom uva, achaina a tuni jingkah nidan 7 a Kangpokpi DHQ a asuhto u ahi.

Nidan 7.40 don a Kangpokpi police check post, IR Road a kon bus 6 asoldoh u ahi’in, Kangpokpi police hon thao apeh u ahi. Driver le handymen ho abon uva Kangpokpi police hon Personal Protection Kit lhingset a ape uvin, chule OC Kangpokpi in akichihthei diuvin jong thuhilna aneiyin ahi. Gari hol na a hahsatna sangtah katoh uvin, ahin, gari neiho le driver chule handymen hon dinmun ahetthem uva mipi ngaichat pet a pan alah jeh uvin achung uva kipana sangtah kaneiye, tin Inspector Khogen, OC Kangpokpi in aseiyin ahi.

Lockdown kipat a kon gari ho lhai talou chule driver le handymen ho ama ama kho a kivahna ding natoh dang hol a kileu ahitai, tin bus neihon asei uvin chule nikhat beh phat kimu hile gari, driver le handymen hi hahsa louva kipe theiding ahi, tin asei uvin ahi. Gari phabep akitol louna asot jeh a battery ho boiya, Kangpokpi police hon phabep hi akipat doh nadinga asot tho ujong um ahi.

Alangkhat a Chennai a kon hung kile a Kangpokpi mi 84 ho Jiribam a kon Kangpokpi district headquarter jon dinga bus thum a ahung kile tauvin ahi.

Nagaland Naga numei khat inlang ahin jotna a train chunga thi

Kohima, May 23 (NE): Tulhut kha in aseina achun Naga numei khat Haryana gamsung Gurugram akon Kohima hin jotna a train sung ah amuollem in ama hi Nchineileu Disuang kum 23 mi ahi in Nagaland gamsung Peren district, Beisumpuikam kho akon ahi ati. A insungmi ho seidan in amanu hi natna neisa ahi in Bangalore kom a munkhat a teacher a pang ahi in, Ningkum Christmas jou chun Himachal Pradesh a resort khat a natong ding in akigong in hinlah lockdown jeh in atongthei pon, hichephat chun aloiho heng a umding in Delhi ajon in HImachal Pradesh ajot gon lai chun adamtheina jong ahoipon hinlah themkhat aphatdom phat in akipandoh e ati.

Thina tohnu chu Kanpur railway station ah alalha uvin post mortem leh achung a ngaito ding chom chom umjeh in aladoh uvin chule mi 2 aboipi ding in akipedoh uvin ahi. Nagaland Zeliang Students’ Welfare Delhi (NZSWD) in thuso abolna achun Beisumpuikam Students’ Union a President in thuso khat aphohchetna achun amanu hi Modern Diagnostic & research centre, Gurugram a test ana kibolna achun thinnat nei ahiden hetdoh ahi ati. Khol ajin pet a jong hi lou aneh jing ahi in chule Kanpur a alongdamsa boipi ding a kipedoh teni leh amuollem nu hi Covid-19 test bol ahi in athum uvin a result negative ahi in Ambulance mangcha a Nagaland ahin jot ding u ahithu jong thulhut in asei in ahi.

Haryana government in agamsung uva tangden ho a inmun u ajot theina ding uvin special train agonpeh uvin Northeast miho chu Friday nikho jan 6:00 in Gurugram railway station akon Dimapur lhung din gin mi 1345 hochu ahung kipandoh uvin ahi. Nagaland mi 426 ajao uvin, Arunachal Pradesh mi, Meghalaya chule Assam mi jong ajoa uvin hiche train hi May 24 jingkah 5:40 don leh Dimapur railway station lhungding ahi.

Delhi akon gamsung mi ho train a hung kipat ta; KSO in neh ding hoppeh

Imphal, May 23(ET): Manipur government in Covid-19 lockdown jeh a India sung mun chom chom a Manipur mi tangden ho puidoh nadong tohgon dungjui a train agonpeh a gamsung miho apuidoh jing toh lhon in Delhi a tangden gamsung miho tuni nilhah lam nidan 5:30 chun Special Shramik Train a New Delhi Railway Station akon ahung kipatdoh tauvin ahi.

KSO Delhi & NCR Information & Publicity Secretary, Seiminthang Haokip in aseina ah tuni hung kipatdoh ding ho lah a Eimi mi 250 tobang ajao uvin chule inlam hinjon ding jouse KSO Delhi & NCR nehthei, twi, mask ho akihoppeh in ahi. Chule ahung kipatdoh ho lah a min list a jaolou atou doh aum thu akijan khunung le boina aum khah le KSO Delhi & NCR in mopohna anei louding ahi ati ban ah maban a ding ho jong min list a jaolou hon chedoh got teitei bol louding tiem na aneiyin ahi.

Tuni KSO in thil ahopna a InSIDE-North East ho akithopi nao chunga kipana thu asei in chule ahung lhung ding 25th May, 2020 niteng jongle KSO Delhi & NCR neh le chah kihom kit ding ahi jong ati.

Sikkim gamsung ading a Covid-19 vei masapen kimudoh; SGDWA in mipi ho moh kichat lou ding’a sei

Gangtok, May 23: Director General-cum-Secretary Health, Dr. P.T. Bhutia in aseina achun tuni chun Sikkim gamsung a ding a Covid-19 vei masapen aki mudoh e ati.  Akimudoh pa hi kum 25 mi ahi in South Sikkim a cheng ahi ati. Ama hi New Delhi akon May 17 nikho a chun Private bus a Siliguri ahin jot ahi in SNT bus mangcha in Melli checkpost khokhel in May 19 nichun achepai e ati. South distict a quarantine centre munkhat a um ahi. Natna veipan aseina achun bus achun mi 12 katou uvin mi thum chu South district akon ahiuvin, chule midang 9 chu West district akon ahi ati. May 21 nichun akhosih thu asei in akintheipen in May 22 jingkah chun STNM hospital a covid-19 test bolding in ana podoh uvin ahi. A sample test akibl in a result chu positive in ahung sohdoh in ahi. Chule North Bengal Medical College and Hospital, Siliguri a RTPCR test ding a a sample athot kit uvin tuni nilhah 3:30 don chun a result asohdoh in positive ma in asohdoh in ahi.

DG-cum-Secretary in aseibena achun positive ahi akihet phat in bus a hin toupi ho jouse kholdohna ding in pan akilapai in chule ahin toupi ho jouse jong quarantine centre aum u ahithu akihe in chule bus driver pa jong aki houpi in test bolding in akisepeh e ati. Tua nata veipa hi khuti lomlom a gimse ahipon tuhin ama hi Isolation ward a kikoi ahi.  SGDWA (Sikkim Govt Doctors Welfare Association) mipi ho heng a mohkichat jeng lou ding in asei uvin ahi.

HPC-D in Reformation Day leh C-in-C  (L) Lalropui Famhoite thi kal kum 1 lhin geldoh nanei

B.Lalboi Gangte

CCpur. May 23 (ET) : Hmar People’s Convention-Democratic (HPC-D) General Headquarter in Commander-in-Chief lui leh United People’s Front (UPF) a Chairman lui (L) Lalropui Famhoite thikal kum 2 lhin nikho leh HPC (D) Reformation Day kiti janni (May 22) jinglam nidan 11:00 in Rengkai mun’a ananei uvin ahi. Kingon achun Alan Hmar, Defence Secretary, HPC(D), General Headquarter in Reformation Day kipatdoh dan tahlang na anei in chuleh LK. Hmar, C-in-C, HPC (D) General Headquarter in HPC(D) tup-le-doi atahlang naban’a (L) Lalropui Famhoite kivuina mun’a Hmar Ponlap khaidoh naleh jana salam bohna jong ananei uvin ahi.

Hiche toh lhon’a kingon phatsung’a Defence Secretary Alan Hmar in HPC (D) Reformation Day kiti man ding poimo asah dungjui’a achesa 2018 kum a Rengkai ah HPC(D) Council Meeting a anakipom naban’a HPC(D) hi HPC (D) General Headquarter leh HPC(D) Manipur Region tia seni anakiso nailou ahi ati. Nam chom chom in jong hitobang’a Reformation Day, Raising Day leh adang dang minsah’a thupi tah’a kilom ji ahi jeh’a hitobang’a HPC(D) ading’a nikho khat nei’a hiche nikho leh Organisation tup le-doi athah’a kihetsah thah na nikho’a man ding deisah nanei’a kimang ahi ati. Aman aseibe na’a May nisim 22 hi HPC (D) General Headquarter ah C-in-C (L) Lalropui Gamhoite thi nikho toh akito naban’a Organisation kiphudoh akipat damsung chan’a phatah’a Organisation ahin vetkol jing het jing nading’a kimang ding chuleh amahi  “Father of the HPC(D)” minsah ding chan’a kilom ahi ati.Chuleh Nam Sepai hon jong Nam ading’a akipeh doh naoho athah beh’a apodoh’a Nampi thiltup apilhin na ding’a toh le-tham’a kipeh lut nathah neiding hi poimo ahi tinjong aphongdoh in ahi.

Bangalore a tangden Manipur mi inlam hung kile ding ho InSIDE North East leh KSO-B in neh ding hoppeh

Imphal, May 23(ET): Lockdown jeh a Bangalore apat Manipur gamsung hinjon ding ho train sung a nehding in InSIDE North East leh Kuki Students’ Organisation Bangalore in aneh ding u athon in agonpeh uvin ahi. Director InSIDE North East Hejang Misao in aseina achun nehding ho hi Smile Project (Mercy Mission) ho sponsored na noiya kibol ahi in hiche thil kibol hi ngailut najal a kibol ahi. Ahung kile ho hi genthei hahsatna lentah pum a hung kinungle ahiu vin konkhat chun anatoh nauva kon a hai sum le pai neilou jong aum uvin, sum nei jongleu nehding ho chohding jong kimu joulou ahina a, ngailut leh khotona neitah akibol peh ahi ati.

Alangkhat ah Delhi apat hung kinungle mi 1600 ho jong chu KSO volunteer hon nehding ho aboipeh un chule screening bolna ding a boina tohho jong akithopi uvin ahi.

Rongmai Welfare Association, Bengaluru a lamkai Agun Pamei in aseina achun KSO (Bangalore) ho chung a kipathu aphong in chule InSIDE North East ho chung ajong sangtah in kipathu aphongkit in ahi. Agun in aseina achun kiloikhomna a lamkai hon kithopina amite heng a abolpeh uhi haimil thei ding gol ahi pon, chule chile nam khen louva mijouse ngailutna neitah a abol ujong hi ngaisan umtah ahi ati.

AI toh kisai technique ho akon COVID-19 kiting jou ding ahi: NERIST

Imphal, May 23 : India sung a Covid-19 natna achesa nidan 24 sung a case 6,600 a ana pun be toh lhon in NERIST akon kholchil na nei mi 2in artificial intelligence toh kisai technique ho akon a coronavirus tin thei le doudal thei ahidan tahlang na ahin nei lhon in ahi. North Eastern Regional Institute of Science and Technology (NERIST) kiti Arunachal Pradesh akon centre in fund abol institute a assistant professor  Dr Santosh Kumar Tamang, Department of Mechanical Engineering, Pukhrambam Devachandra Singh, Department of Electrical Engineering le Assistant Professor, NIT, Yupia, Arunachal Pradesh, Dr Brajagopal Datta ho in asei na uva hitabang AI technique chu USA, France, UK chuleh India a jong akijah dan hetsah na ana nei uvin ahi.

Hiche technique chung chang a kholchil na kinei chu  Environmental Science and Management (GJESM) global journal ah “Forecasting of Covid-19 cases based on prediction using artificial neural network curve fitting technique” kiti thupi noi in ana kikoi in ahi. Hiche kholchil na lolhing tah a kinei na chung a kholchil na nei ho chun Prof H S Yadav, Director NERIST le Prof P Lingfa (Dean Student Affairs) chung a kipa thuseina ana nei uvin ahi.