Kaani (Poppy) lei ho kisumang pan ding; State force ho panlah na...

Kaani (Poppy) lei ho kisumang pan ding; State force ho panlah na Kuki Civil Org. in tosot’a kithopi na peh ding’a Kuki Civil Org. jouse leh Haosa ho kiphatsah

231
0
SHARE

Kaani (Poppy) lei ho kisumang pan ding; State force ho panlah na Kuki Civil Org. in tosot’a kithopi na peh ding’a Kuki Civil Org. jouse leh Haosa ho kiphatsah

B.Lalboi Gangte

CCpur, Sept.5 (ET):  Manipur gamsung adeh’a thinglhang gam Churachandpur District lhumlam leh solam gamkai ho’a pahcha jat khat akon kiladoh gunei Kaani (Poppy) “King of Narcotics” tia vannoi in amisah nam khat sumang thei ahi jeh in vannoi leiset’a nam jousen ama ama gamsung kivaipoh na dungjui cheh in daan (Act) jong akisem cheh uvin ahi. Hiche Kaani (Poppy) chung’a India injong “Narcotics Drug and Psychotropic Substances Act” asemdoh in hiche Act dungjui in Kaani po ahilou le atu kimat doh’a themmo akichan (convicted) na ahileh ama chung’a alhom pen’a kum 10 songkul tang ding chuleh Case let le neo dungjui’a Dk. Lakh 1 jong leu ding ahi.

Hetthei khat chu hiche Kaani hi CCpur District sung thinglhang gam atamjo’a sum mu nan anei uvin chuleh zalen tah’a Kaani leilhou kum seh in jong akibe jing in ahi. Hiche khamnathei akon khangdong tam tah hinkho setna alhut tah toh lhon in Kuki National Organisation (KNO) in achesa 2016 kum akon chu aleilho ding jong ana kham uvin ahi. Chuleh kum 3 sung Civil Organisation ho panna’a kham jing ahi naban’a Kaani tuphat laitah ahitoh lhon in alei kilho namun ho suset leh suhbei nading chung thu’a kihoukhom na ananei’u tuni jinglam nidan 11:00 in M.Songgel Community Hall mun’a Kuki Inpi Churachandpur lamkai nanoi in achelha in ahi. Kaani leilho thu’a giltah’a kihoukhom na’a chun Kuki Inpi-CCpur noi’a kiloikhom na’a bahkhai Kuki Chief Association, Kuki Women Union, Kuki Students’ Organisation-CCpur, Thadou-Kuki Students’ Union-GHQ akon lamkai ho, Kuki National Organisation (KNO) akon PS Haokip, President KNO, T. Samuel Haokip, Home Secretary KNO chuleh gamsung’a Kaani in asuhkhah na Kho Haosa 32 in pan anala uvin ahi.

Hiche toh lhon’a kingon phatsung’a PS Haokip, President KNO in houlimna aneina’a achesa 2016 kum akipat KNO in Kaani leilho hi gamsung Haosa hotoh kham ding’a kithulhut na anakinei toh lhon in Kum 3 alhing tan ahi. Chuleh Govt. in twi lah na anah lang’a song, thing, Kaani leilho ho bol  tah lou ding injong thuphon leh hetsah na gam neiho ananei naban’a hiche suhthip nading’a Govt. heng’a  Kaani leilho na gam ho’a Govt. sepai mun 3 a busah sah ding tin ngeh na jong akinei in ahi. Kum dang dang chun sepai Kaani vatchai ding’a hung kon ho kinung sol ahi in hin tukum vang sepai ho kikou tho ding ahitai ati. Aman aseibe na’a hiche natoh kinei lo na ajeh pi pen hi kho nung ding gelkhoh naleh Kuki Nam mipi te Kaani jeh’a amanthai ding deilou najeh’a pan kila ahi. Kaani leilho kha ding’a Kum 3 sung giltah’a anakisei khom ahi tah toh lhon’a tukum akon State Security Force leh Civil society toh kithokhom nanoi’a kikhah ding ahitai. Chuleh Haosa leh thingnoi Kaani leilhou, Tax dong jong aum in chuleh Non SoO group Kaani Tax dong jong aum’e nati utoh lhon’a KNO sung’a chapang hitobang Kaani Tax kilah leh ahung thum aum leh kin tah’a lamkai ho naki jah matpi uva amaho chu dan dungjui’a gotna kipe ding ahi. KNO in gang group gamsung’a suhbei nading’a natoh akinei toh lhon in gang group sum hol’a vah ho jong amanchah hou matdoh peh ahi tan ahi.

Alangkhat’a kihoukhom na phatsung’a kithulhuh na anei ho Onkhopao Haokip in phondoh na aneina’a Kaani kha nading’a Manipur Govt. in ima jouse’a kithopi ding ti ahi toh lhon’a Govt. in amaho deina bang tah’a pan alah ding, gamsung athen di deina jeh’a Govt. natoh tosot ding, eiho deilou toh kitoh jong leh tosot napeh’a gamsung suhtheng ding, khochaga Kaani jeh’a  hahsat naleh genthei thoh ho Civil Organization in don lou ding, Civil Org. in Kaani jaona thu’a boina hihen hahsat na toh ho boipi lou ding chuleh kikum lou ding, gam nei Haosa ho jousen Kaani leilhou ho min list alah khom uva Houbung lamkai ho vet’a akoi ding, Houbung jousen Kaani akon Hop 10 hung lut ho asanpeh lou ding, Govt. akon song poh nading permits neiho jong khapeh ding ti ho ahi. Hiche natoh hi Govt. in hapta khat kah’a hung chelha pan ding in DC akon Order jong asoh doh tan ahi. Hiche nikho leh Kaani toh kimat’a daan kisem ho toh kitoh’a mat khah, voh khah, suhkhah, akisu kha aum leh Civil organization in kiboipi lou ding chuleh don jong kidon lou ding ahi. Agam leiset nei Haosa chung’a jong action daan dungjui’a ahi lah ding’u ahi.

State Level Teachers’ Day kimang; CM in jilkung 8 State Teachers’ Award pehdohna nei

Imphal, Sept 5(ET): Chief Minister N. Biren Singh in society a chonchan pha beiya khantouna umlou ding ahi, tin Manipur State Film Development Society, Palace Compound, Imphal khopi a State Level Teachers’ Day Celebration 2019 kin aman nauva aseiyin ahi.

Chief guest a pang Chief Minister in ahoulimna a, tuni a iphah u dinmun hi jilkung ho jeh ahi, tin aseiyin chule Teacher’s Day kiman na athupi pe hi jana vetsahna ding, kipapina chule pan alah u hetpehna ding ahi, ati. Jilkung hon kiphinna kibolna a ho a simlai hon pan alah louna ding uva pan alah dinga temna aneiyin, simlai ho dinga lekha simna phat hi lhom chule chomcha bou ahi, ati. Chule sorkar in gamsung thu ahiteng pan alah ding ahi, tin jong aseiyin ahi.

Sorkar in government school ho khantou sah ding, simlai ho themjilna pha peh ding gelkhohna anei ahi, tin CM in aseiyin, hiche a dinga sorkar in ‘School Fagathansi’ leh ‘Lairik Tamhanlasi’ kiti mission achepi ahi, ati. Tukum a government school a BOARD exam a pass percentage hi atampen na ahi’in, 74.6 percent lhing ahi. Achesa kum ni sunga government school a kai simlai position a pang jong kal ahi. Hiche hohin education section khantou nadinga sorkar in pan alah aga aum’e ti avetsah ahi, ati.

Insung tamtah in achate private school a asol joulou jeh a sorkar in government school khantou sah ding agelkhoh ahi, tin aseiyin ahi. ‘Lairik Tamhanlasi’ mission chungchang thu CM in aseiyin, tuchan geiya hiche mission noiya lekha sim lhung lou simlai 1000 hi avel a government school a admission kibol peh ahitai, ati. School Fagathani mission noiya akilheng school 60 a pre-nursery class kihong ding, hostel, residential school adang dang hi thinglhang gamChingai, CCpur, Mao leh mun dang danga kisa ding ahi. School a angaicha thil ho semhoi nadinga budget a dangka crore 17.50 kikoi ahi’in, jilkung ho dinga transit accommodation 19 vel jong thinglhang gam a kisa ahi, ati. Gamsung pumpi akhantou nadinga anoipen a kipat ngai ahi, tin CM in aseiyin chule tua sorkar in achepi GTV, GTH, CMHT leh adang dang hin gamsung miho hin dan akhel ahi, ati. Private school leh coaching centre kisemdoh ho vettup nadinga sorkar in The Manipur Private School (Registration and Regulation) Bill leh Manipur Coaching Institute (Control and Regulation) Bill phatsahna anei ahi, tin aseibe in ahi.

Kikhopna a Education Minister Th Radheshyam injong houlimna aneiyin, gamsung sem nading chule simlai ho lungtup molso nadinga jilkung hon pan thupi tah alah ahi, ati. Jilkung tailou natoh pha adang umlou ahi, tin aseiyin chule jilkung ho kiphalna jal a education section a machalna um ahi, ati. School jousen Saturday nikho seh leh No School Bag Day ajui diu, hiche nikho teng simlai class I a kon VIII kikah hohi extracurricular activity, games and sports leh adang dang ho ahild iu ahi, tin aseibe in ahi.

Kin gon a Chief Minister in jilkung 8 State Teacher’s Award pehdohna aneiyin ahi. Award sang hohi Waikhom Ritabai Chanu, Arambam Rajmata Devi, Ayekpam Sangeeta Devi, Aribam Indubala Devi, Longjam Manglembi Devi, Hemam Rajen Singh, Hena Singsit leh Mayanglambam Manglem Singh ahiuve.

Kin gon a Commissioner (SCERT) H. Gyan Prakash, Commissioner (Higher and Technical Education) Kh. Raghumani Singh, Commissioner (School Education) T. Ranjit Singh, Director (Schools) Th. Kirankumar, Director (Higher and Technical) W. Malemnganba, Education Department official holeh simlai hojong apang uvin ahi.

Meghalaya police hon Manipur mi 6 panna a khamnathei a kivei mi 9 leh Khamnathei Dk. crore 4 val man mandoh u

Shillong, Sept 5: Meghalaya police hon Shillong leh Guwahati khopi a kon khamnathei a kivei (drug racket) numei ni panna a mi 9 aman uvin, heroin dangka crore 10 val aman uvin ahi.

SPDO (Sardar) Jagpal Singh lamkaina a Anti-Narcotic Task Force (ANTF) hon thuguh ajah utoh kilhon a Shillong a kon mikhat amat uva, chule ama thudohna anei uva hiche jouva Assam Police hotoh September 2-3 nikho a Guwahati khopi a operation abol u ahi. Akiman holah a mi 7 hi Manipur gammi hia, mi ni Shillong gam mi chule mikhat Assam gam mi ahi.

Akiman hohi- Genesis Th (35), Shipfiimai, Manipur, N Sashikant Singh (40), Lamlong, Manipur, Temba Kh (36), Lamlai, Manipur, M Kahiminlin (42), Churachandpur , Manipur, Gracy Harvernar (37), Senapati, Manipur, Kimneichong Haokip, Zalenbung, Manipur, Alberto Raplang (27), Lower Mawprem, Joehanan Shullai (29), Lower Mawprem, Joehanan Shullai (29), Lower Mawprem chule Abhi Das (35), Nalbari, Assam ahiuve.

East Khasi Hills Superintendent of Police, Claudia Lyngwa in ‘drug supplier group’ kiman ahi’in, dangka crore 4-5 kikah vel man khamnathei gram 1,195 kiman ahi, tin aseiyin ahi. Police hon Manipur gam a kon drug kipohna lamlen akha jou jeh uva khamnathei a kivei hohin khamnathei apoh nau lampi akhel got u ahi, tin aseibe in ahi.

Alberto hi Viewpoint, Umiam a kon kiman ahi’in, savon bom a kikoi dan in aphal lou khamnathei bom 40 poh ding ago e ti thulhut kimu a kholna kinei ahi. Ahin, khamnathei apoh akimudoh pon, ahivanga ama phone a hitobang thil abol nau photchenna kimu ahi. Alberto akimat jouva team ho Guwahati khopi a Abhi Das inmun a um Sashi man ding ache nauva ama a kon heroin gram 124 amat kit u ahi, tin SPDO (Sardar) Jagpal Singh in aseiyin ahi.

Hiche jouva Sashi in ANTF team ho Guwahati khopi a khamnathei hin polut a akivei ho umna hotel a apui ahi. Hiche mun a khamnathei a kivei mi thum amat uva, gari jong amat peh u ahi. Hiche jouva Sashi in lodge a um Gracy thu aseidoh ahi’in, ama room police hon akholna a heroin gram 694 kiman kit ahi, tin Singh in aseiyin ahi. Tuesday nikho a operation kipan kit a team hon michom chom mi 5 thu adoh uva achaina a Laitkor a kon heroin gram 277 amat be kit ahi.

Babysana apa in akiman JAC member ho khel a ama leh ajinu amat diuva ngehna nei

Imphal, Sept 5(ET): Ningthoujam Babysana thi thu a kisemdoh JAC in thuso phabep a state sorkar in ngehna anei toh kilhon a Babysana case Central Bureau of Investigation (CBI) in khol dinga nopna anei uve, tia kisei atahsan lel nau thu asei uvin ahi.

CBI hon case alatai, kitina document akimu kahse a kiphinna bol jom dinga JAC hon Thursday nikhon asei uvin ahi. Alangkhat a police hohi Babysana insung mite chule JAC member ho hol a kingoh ahi’in, ajeh akihet louvanga Babysana case CBI in alahding a niseh thuso phabep a kisei hi police honjong ginchat lelna anei uvin, Babysana apa ahol jing nalai uvin ahi. Ahivanga police hohin Babysana apa Ningthoujam Tomchou ‘statement’ lah ding bou kagot u ahi, tia aseiyu ahi.

Ahivanga kichat jeh a Tomchou leh JAC member hon thuso miho toh kimuto nading mun hi Thursday nikho a thumvei lhing akhel uvin chule thuso miho akihoupi nauva aumnau mun aseidoh lou diuvin jong ngehna anei uvin ahi. Babysana apa Ningthoujam Tomchou in thuso miho akimupi na’a sorkar vaipo hon police hon amat JAC member ho khel a ama leh ajinu amat diuvin ngehna aneiyin ahi.

Chule statement thu a Tomchou in, ‘ling magistrate’ a kon ahi a chule ama statement hi Magistrate umna a record bol ding ahileh peh ding kanom e, tin aseiyin chule Babysana thi thu a thudih kholdoh ding thumna neijeh a kiman ho alhadoh diuvin temna aneibe in ahi. JAC member holeh insung miten CBI henga case pehlut ahi kahse a kiphinna bol jom dinga jong asei uvin ahi.

Ni masa ni thuso a CBI hon mipi ding gelna a Babysana case lahding nopna anei uvin, Special Crime Branch, CBI Kolkata in case atuh ding tahsanna aum thu jong kisei ahi. Ahivanga state sorkar in CBI hon phatsahna anei uve ti thu aphondoh loulai ahi. Imphal Times thulhut in CBI hon case alahna dinga process phabep juiding aumjeh a ni phabep lut ding ahi, tia asei ahi’in chule boina aum louleh athu hi phondohna anei vah diu ahitai, tia jong thulhut in asei ahi.

ATRPFM in Tribal Affairs dept. a natoh kipeh na toh kisai a CM heng’a memorandum pelut

Imphal, Sept 5(ET):  All Tribal Rights Protection Forum Manipur(ATRPFM) in Directorate for Tribal Affairs Hills and Scheduled Caste Development, Manipur a Deputy Director 3 ho lah a senior pen   N. Kaikho Mao chunga thinglhang gam a natoh kibol ding ho akipeh lou na chunga Chief Minister ang a memorandum ana pelut uvin ahi.

Hiche natohna kipeh na a dan kijui ding deisah na anei dan ule seniority ahi lou le ana toh pat na uva kon nikho ho jong sim jing a tohding kipeh na aum na dingin jong kiloikhomna in tahlang na ananei uvin ahi. HoO le DDO a natoh na kihop na a Kaikho sanga kum 9 lam a junior khat natoh na pehding a minister khat in phatsah na anei na chunga kiloikhomna in deilou umtah ahi dan le gamsung kithet na le mi kimu nem na alut dan hetsah na ahin nei uvin ahi.

Hiche thu toh kisai a akisaipi Addl. Chief Secretary in achesa nisim 29.07.2019 a court thupeh le Final Inter se-Seniority List jong vet pum a programme officer ho natoh na apeh ding uvin hetsahna jong kiloikhomna in ana nei uvin ahi. Government in hitabang kivai hop khel nahi ahin suh dih uva nam le nam kikah a kivet na ho suhbei na ding tohgon anei ding uvin jong kiloikhomna in hetsah na ahin nei uvin ahi.

Saman khomite dia donding twitheng kilhasam

Imphal, Sept 5(ET): Social Welfare Educational and Cultural Association in Keirao A/C, Imphal East, noiya um Saman khomite hi donding twitheng akilhasam taove tin aseiyin ahi. Amaho hin, Waithoupat Water Supply a konna twi amu jiu ahin, tunvang akha peh taovin ahi.

Chanam Sanayaima, Secretary, Social Welfare Educational and Cultural Association, a kon thulhut kimu dungjui in, hiche khosunga hi achesa kum 2006 kumma chu Waithou Chiru, Saijin Palak, Saman Tangkhul, Thiyam Konjin ho cheng twlam a konna twi kilon lutsah ding, dondong chuleh loubolna dia twi kipe ding ahi tin kitepna aumvang in alolhing poi tin aseiye.

Kum 2010-2011, sunga natoh akichai phat in kumkhat twi alongin, atang kit tan, mipi ten kiphinna anei uvin ahileh, pipe aumloujeh ahi atiuvin, Chief Minister, N. Biren in jong Tangjeng, Thoubal District, sunga August nisim 19, 2019, nichun Waithoupat Water Supply Scheme noiya water supply khat ahong doh kit in.

Sanayaima in water supply akisem doh loujeh in gojuh lai le twi alen jin, phailei asuse jitai hijeh chun sorkar in pipeline kituptah asah doh louleh khosung mipi ten kiphinna kinei ding ahi tin asei bei.

STDCM in kiphinna ding tohgon ho alahdoh diuva CM in temna nei 

Imphal, Sept 5(UNA): Scheduled Tribe Demand Committee Manipur in Meitei nam mi te ST a lutsah dinga ngehna ana nei utoh kisai a kiphinna bol ding phondoh na ana nein a chunga uva tuni in Manipur Chief Minister N Biren in MFDS a state level teachers day kiman na kingon a thuso miho toh akihou limna a hiche thu hi vetlhah na kinei jing ahi toh lhon a kiloikhomna in kiphin na anei ding ho u avoh hai ding uvin temna ana nei in ahi. Meetei nam mite ST a lut ding thu hi government in ana kive chil jing in state sunga chang nam chom chom ho lunggel jong lah khom na kinei a chuteng centre ang a hetsah na kinei ding ahi ati.

Hetthei khat chu Schedule Tribe Demand Committee Manipur (STDCM) in jani a ahunglhungding September nisim 6 akon a kiphinna jat chom chom Railway line semna kha ding pum a pat ding a phondoh na ana nei u ahi.

Convenor, STDCM  L. Romesh in ahou limna a committee in Meitei nam mite ST a hetlut dinga ngehna anei jing toh lhon a Ministry of Tribal Affairs, Government of India in state government ang a hetsah na lekha ang jing lai uva state government in kihetmosah a um nalai toh lhon a kiphinna kipan kigo kit ahi ati.

JCPI Nagaland in Dimapur sunga ILP umnadia ngehna nei

Dimapur, Sep 5: Nagaland sunga NRC leh ILP boina suhlhap ma aum nadia  mopoh na lamkai ding Chief Minister, Neiphiu Rio in Inner Line Permit (ILP) hi Dimapur a cheng ho ding gelkhoh na jal’a  boina umlouva suhlhap ding kingai to ahi tin asiye. Joint Committee on Prevention of Illegal Immigration (JCPI) hon Bangladeshi galjam ho lutsah lou na dia ILP jui ngai ahitai tin asei uve. Amaho hin, Assam boina ho avet uva konna Nagaland boilou na dia kivendoh ding adeisah u ahi. Phat kilem pet na vendoh apha joi tin jong asei uvin ahi.

Abhishek Committee in ILP chungchang sorkar henga report February 2019 chun apetan, amahon akholdoh le amudoh dungjui uvin, Standard Operation Procedure (SOP) on ILP/BEFR hin sorkar tha peh be hen, ajehchu lakh a sim galjam chuleh gamnei mi hina chanvou neilou ho, natong dia ahung un, aching den ji taove tin asei uvin ahi. ILP zone, thilhang mite tamna lah ho’a vang hi ILP lekha neilou hon na atoh thei louding ahi tin dan aumin, amavang tourist, leh PSU Employee hovang kiphat ding ahi tin JCPI in aseiye.

 Register of Indigenous Inhabitants of Nagaland (RIIN) min khum na dan jong jui dia kisem doh vah ding ahitan, JCPI in Dimapur jong ILP zone na umdin ngehna aneiyin ahi. Governor masa PB Acharya in Dimapur sunga ILP aum ding aphatsah na ho jong tosot na anei uvin.

KPI district munchom chom  a Teachers’ Day loupitah a kimang

Kangpokpi, Sept 5(ET): Kangpokpi district sung mun chom chom a tuni in Teachers Day loupi tah in ana kimang in ahi. H.M. Higher Secondary School, Keithelmanbi in school adinga a 29th  vei channa Teacher’s Day cum Fresher’s Meet, 2019 chu Janglallen Hall, school campus sunga ana mang uvin, Dehlam Lhouvum, Chairman, Keithelmanbi Village Authority chu jin gun in ana pang in ahi.  Kingona chun Teachers’ Day toh kisai a hou limna Paokai Chongloi, Lecturer, HM. Hr. Sec. School in ana nei in chuleh kipaman hopdoh na chu School Secretary, S. Singsit makei na noi in ana kibol in ahi. Jilkung ho kipe ji HM award chu achesa 1990 kum akon a school founder S.Singsit le a innei pi in apenna nu le pa aumtalou  Helthang Singsit le Hatjakim Singsit geldoh jing na a school a jilkung, simlai thepna nei podoh ho ana kipe ji ahi. Tukum adinga hiche awrd chu Lalboi Singsit, Thadou-Kuki Lecturer le Haojangul Lhouvum, English Lecturer ana kipe lhon in ahi. Kingon achun simlai thah 73 lemna jong ana kinei in ahi.  Kaangpokpi khopi sunga um Diamond English High School, Lighthouse, JN Public School le adang dang ho injong Teachers Day loupe tah in ana mang uvin ahi. Alangkhat a T. Vaichong High School, Tujang Vaichong sub division Kangpokpi District mu a jong tuni in Teachers Day loupe tah in ana kimang in ahi. Kingon achun SDO T. Waichong  ChunglenmangKipgen MCS; Medical Officer PHC T. Waichong Dr.Mangpi Shoute le Kapil Thapa ho in jin gun, jin ja um le kinnei in ana pang uvin ahi. Kingon a jin gun a pang Chunglenmang in ahou limna a jilkung ho ading a natoh lenpen chu gamsung a simlai ho hinkho semtoh hi ahi ati.