‘Justice Committee’ hon Kuki gal hang ho helou

‘Justice Committee’ hon Kuki gal hang ho helou

324
0
SHARE

‘Justice Committee’ hon Kuki gal hang ho helou
Tuchung Manipur a gal hang ho geldohna leh jana kipehna nikho (Patriots Day) kinit tolhon’in ana kija khalou Committee khat jong ahung chomdoh kit tai. Hiche – ‘Justice Committee on Anglo-Manipuri War Martyrs and Freedom Fighters’ kiti phaicham mi loikhat ho ahiuve. Amahon asei thupipen uchu  Manipur gal hang ho akitileh Bir Tikendrajit leh Tahngal General bou Manipur govt nin geldohna leh jana apehdan’a aum’in  thudih ahipoi tia thudih hol kahiuve atiudan ahi. Bir Tekendrajit leh General Thangal hi British sorkar in phasi a anakhailih lhon ahin Khongjom galmun tah a meilhei leng sepai gal hang tamtah injong ahinkho anapehdoh u ahi. Ahin India akitileh tua Hindu bou India mi dihtah a gel loi aumbang’a Manipuri akitileh meilhei ho bou dan’a gel aumkit jeh in Manipur thinglhang gam’a British te ana kisatpi Kuki gal hang haosa ho hi Manipur  gal hang ho kiti lah a jaosah di kiti himhim umdehlou tina ahi. Hiche Justice Committee kit hohin Anglo-Manipuri War hi Khongjom mun bouva ana kisat ahipon mundang leh phat dang dang’a jong ana kisat ahi la atikit ngal u ahijeh un Manipur akitileh phaicham kalval amuphah lou u kilang ahi. Alang khatna, thinglhang gam’a cheng Naga leh Kuki hon gamtum kivaipohna tum atiji teng uleh Manipur gam kiti kisukeh theilou di ahi tia choh jeju kit u ahi. India gam sunga British te to kidouna kiti photna ana lamkai gal hang ho hi adon adon agam agam’a India Independence kiman teng amin u kiphapoh teija jana sangtah jong kipeji ahi. Manipur govt nin kumsehleh August 13 ni hi gam le nam ngailutna nei “Patriots day” tia anitji hi 1891 kum’a Anglo-Manipuri war a Manipur gal hang ho geldohna leh jana pehna’a kimang ahi.
India pumpi chu kiseida tajongleh Manipur thusim’a British te ana kidoupi hi meilhei leng te leh thinglhang’a Kuki te bou ahi. Nagaland a Angami Naga hon jong British te anakisatpi naove. Ahin tua Manipur a Naga hohin Jadonang leh Gaidinliu vin British te anadou tilou Naga dang British te ana kidoupi ngapcha khatcha ana umlou u ahi. Jadonang leh Gaidinliu chun British sepai kisatpi, kikaptopi di sepai aneilhon jong hilou, ahia tunia anilhon’a Manipur sorkar geijin jana neitah a akoi lhon ahi. Kuki ten Kuki ten British te ana satpiu chu Manipur keu hilouva Naga Hills leh Burma gei ana kihot ling ahi. British ten amatna anakhailih ho jana sangtah kipea khailih dia jong ana ngapchatlou Kuki haosa gal lamkai ho tuni’a Manipur sorkar beh in hetphah donphah louva akoi hi thusim ahetlou jeh u ham, henasa a abollou u ham, Kuki te lang’a kon ima haseina umlou jeh ham ti hi ahi. Gal mun’a ahinkho anatohdoh holeh akiman’a khailih a ana um ho bou ahipon, Andaman Nicobar Island (twikol) lang songkul’a meilhei gal lamkai ana kihen hojong geldoh a jana pehdi ahi ti hi Anglo-Manipuri War thua Justice Committee hon asei nahlai u ahi. Andaman Island a Kuki haosa songkul’a ana kikoi ho hiche Justice Committee hon ahetphah kitlou u tina ahi. British te ana “kikaptopi” Kuki gal hang ho hetphah ahilou hi apona tah loi aum vang’a Manipur gam kitia hin thinglhang gam anajaopoi tina khat ahijeh in akhoh dehpoi tia gel loi jong aum kitne. Ahin nomle dale Manipur govt kivaipohna noija umho chu athusim ujong ajaotha ngai ahi.