Judaism hou (tahsan) thua Pu Bnei Menashe to kihoulimna

Judaism hou (tahsan) thua Pu Bnei Menashe to kihoulimna

180
0
SHARE

Manipur, Myanmar leh North-east India gamkai a cheng Eimi phabep in Judaism sakho bol’a, tuthah tichu, ningkum (2014) kum top/kumlhun apat tuphat gei’a Shavei Israel kiloikhomna leh Israel government kithopi nanoi a, Israel gam a choulutna Aliyah (Israel gam’a pemlutna-immigration) chelhah jing toh kisai’a ET le Judaism hou lamkai Pu Ben Manashe kihoulimna hi mipi simdin ahung kiso-e.

 

Eimi Times (ET): Pu Ben Menashe, tunikho’a hiche ki-houlimna (interview) neithei dia nahung umjeh in kipana thu kahin seiye. Ahile, tunikho gei’a Eimite sunga Judaism sakho bol’a mi phabeppitah ahung phah tolhon’a tu-tu dinmun ichan ipi iti ham, neihin seipeh thei ding ham?

 

Bnei Manashe (BM): Kipa aum’e. Amasan, I-hetma banguva, eiho Eimite hin, India gam ‘sapkangte’ British ten kum sottah ana toupha phatsung lai’a Christian missionary hoa kon’a, tonlai – ipu-ipa te khanglai apat puchon-pachon (customs and culture, rituals) khosah hinkho hin mangten, hindan thahbeh ‘Hinna Lekhabu’ Bible jui’a ihin bol uvin, chuti chun, abul patna lam’a mi lhomcha a ana kipan hijongle, ol-ol in ajui ihung tamcheh-cheh uvin, phat chomkhat vangchu thinglhangmi Eimite pumpi tobang Christianity sakho jui Christian ina himan uvin ahi. Hinla, tunikho a i-nam sunguva hop phabep in Judaism sakho ihinbol nalo ajeh apipen loikhatchu Christianity in ilah uva Bible ahin pohlut jal jeh jong ahin ahi.

 

ET: Ahile, tutua Judaism bol’a ilah uva phabeppi ahung umtah toh lhon in, iti ipiti hung kipat ham?

BM: Tua kasei mabang chun Christianity NE India ahung kipat dan ho hasei ngailou in atamjon ihetsoh keidiu ahin, hiche hou (Christianity) jal’a Judaism hung umdoh lo ahi, katima bangchun, Bible sung hi hop-ni in (tichu ‘Old Testament & New Testament tia i-het’u) alhangpin akihom’in, Old Testament (Jews ten Tanach ti ahet’u) lekhabu’a Manasseh phung/nam kaimang’a ahung um’a chutia ‘Ten Lost Tribes’ kiti Israel phung mang holah ahung pan tolhon’a, eihgo Eimite jong ihung konnau akikhol’a akisut teng akibangchet leh akitoh chet umji hihjongle, ‘Khul’ itiu khel lang ikholdoh jilou utolhon’a, Bible a Manasseh kaimang (exile) a ahung um na chungthu to alangkhat’a Eimite hungkonna hin suto, chule Israel te sakho chon-chan ho leh i-pu ipa te’u kithoi-umdol holeh chonchan ijakai ho hin kaimat’a, ajona’a Manmassi te hi Bible’a Manasseh phungmang te ihiuve, tia lunggel ahung potdoh tolhon in, achesa 1970s laichun Churachandpur district akon Eimi pasal loicha lhomcha in hatah’a lunhlut thanopna neiyin Judaism sakho ahin bolpan’uvin ahi.

 

ET: Tua Judaism sakho boldan leh tillai, tichu 1970 kichailam leh 1980 kipatlai) a boldan ichan gei a kikhe tam?

BM: 1980s kipat tilai chun, Israel a um Rabbi E. Avichail kiti khat in, Manipur’a Judaism ana bol masa loiho’n Jews mi kahiuve tia lekha sut Israel a ana thot utolhon in, Manipur (chule Mizoram) ahung vilpan in, ama pan halah jal chun, khangdong phabep bep, akum kum’in Israel gam’a sol’in ana um’uvin, atamjo’n Torah leh Halacha (Jewish laws) ajil un, abangkhat loi chu Manipur langa community ho hil le mapui ding in ahin sol jiuvin ahi. Chomlam a seiding in, masang kum 30, 20 dinmun toh tedin tuhin hatah in akikheltan ahi.

 

ET: Iti ichan a kikhelna um’a hitam?

BM: Vetsahnan, Rabbi E. Avichail makaina le lamkaina a phat phabep ana kichal in, chule ama luboh hina injong Eimi te lah a Juda sakho bol ho vesui dingin ‘Amishav’ kiti ana umin, taona lekhabu panna in Jewish sakho bolna a manchah poimo-mo ho manthei leh neiyin ahung umpan in ahi. Hinla, achesa 2005 vellah akon chun ‘Shavei Israel’ kiti kiloikhomna (tutua Jerusalem, Israel a pansa) khat in ahin vesui pan’in, amaho panlah na akon in Jewish Eimi ho (ahilouleh Bnei Menashe) sakho bol lam to kisai a kithopina panlahna keu hilou in, masang’a ana kihephalou le kijaphalou mi hon tamtah-tah nion Israel gam a Aliyah (pemlutna) ahung umpan in ahi. Chuleh, kumseh tobang in khangdong langjep ho adin Seminar agong jiuvin ahi.

 

ET: Aphai, ahile, tunikho gei’a Eimite lah’a Judaism sakho bol ho Israel gam ajotna’u chungthu a ipi lunggel nanei am?

BM: Hiche chungthu hi phat sotthim apat kana seinom chungthu khat ahi. Heng’e, ipu-ipateu tichu Abraham, Isaac, chule Jacob henga Pathen in ateppih gam, inlam nungjot ding ti chu keiman jong keima hina tah in kapom nai. Hetdia poimotah khatchu, Israel gam hin, 1948 a zalenna ana mujou-jou’a aboipi masatlah’a khatchu, ‘Law of Return’ kiti leiset kolning 4 apat Jews mi kiti phot-phot chun a-gam a khosah pemlutna dia thaneina (right) anei nadia danpi thulhuhna ana sem’un ahi. Hinla tunikho ‘Bnei Menashe’ te kinung tolna khu ivet’a ahile, houhil le lamkai Rabbi teho makaina Beit Din (Jewish court of law) a, agam alhun jouteng uleh Giur kiti conversion process, aboltei jiu ahi. Hiche chun chomlam’a avetsah chu, Jewish halacha dan dungjui in Jews kiti term noilhah ihi joupouve, ti avetsahna chungchon’a, nam dang jatdang vetsahnan Hindu, Muslims, etc, ho khat tou in Jewish sakho abolnom a ahile, conversion process ajotdingu toh kibangchet’a ahin ahi. Anina’a, hiche agam pemluna, kahlah a hougut leh pontho le gunchutah a sakho bol umjong leh, alhangpi in atamjo hin , ‘kei agam’a kachou lutthei photleh…’ ti mentality neiyin, a-hou/sakho leh Pathen chu chungnun (priority) petalou in agam’a chen ding gotna jal hin thil tamtah asuse jin ahi. Ajeh chu hiche (agam’a choulut teding) tupna chun thildang tamtah ahin compromise sahjiuvin, community le houbung sungdung’a asukha jin, thilpha vang ahipon ahi.Hiche tobang dinmun inei tengule, mi in ichung’uva adei dei’a (exploit) na atong jiuvin ahi. Lainat umtah khatchu, hiche’a ichung’uva, agam pemlutna lungtup jal’a na hin tongji’a chu eiholah akon mama ahung hijin ahi. P-then houna to kisaiya hou ibol’uleh Hatchungnung Ama kinbol leh hou ding chu masatsah pen’u hitin, thil dang-dang ho nukhahsah’u hite. Kakipah’e.