Ju-hai (bottle) athah sung’a ju-lui kikoilut (Aug 25, 2016)

Ju-hai (bottle) athah sung’a ju-lui kikoilut (Aug 25, 2016)

190
0
SHARE

Manipur High Court in Kh. Ratan ‘wanted’ kiphon khum chu adihpoi atikeu hilouvin mona neilou ahi tia thutanna ahinnei hi Kh. Ratan amatah sang’a JCILPS ho dia galjona lientah hidi ahi. Ahin hiche’a hi Kh. Ratan thua kiphinna beijenglou maithei ahi. Akhohna lotlot nin Kh. Ratan hi Police FIR Case dang thu to kimatna police ‘custody’ umnalai ahi. Hiche lam hi hepha louva Kh. Ratan nungjui holeh JCILPS hon ahinseidiu hi ahileh Court in bon mona aneipoi tia ipi dia kilhadoh loulai ham ti hijengdi ahi. Ratan hin mona aneipoi ti keu hilouva tukal thu kholchilna um masalouva mi ngohna leh ‘wanted’ tia moh bolbol loudin Court in state govt gihna anei nalaiye. Hiche hi Kh. Ratan leh anungjui ho dia hansanna leh kitilkhouna lientah hibe di tina ahi. Abul’a chu Court nin Ratan ki-ngohna hi adih ahi anati ahin ipi atileh chomkah louva aki ngohkhel’e ahinti kit hitam asunglang thu umdia jong ginchat umtah ahi. Ipi hileh hcihe kahlah hin JCILPS ho lamkaina’a mipi kikhopna’a kilolna jat khat ahung umdoh kit mantan, hiche kilolna chu ahileh tua Govt in PMP Bill khel’a Manipur Regulation of Non-local People (MRNLP) Bill ahinsemkitna’a 1972 kum masang’a Manipur’a ana umho bou Local mi (agam mi dihtah) a kisimdi ahinti hi pomloudi, PMP Bill a kisei 1951 kum hi pansatna’a nei thou thoudi ti ahi. Alangkhat ah,Tribal kiloikhomna jatchuom-chuom hon MRNLP Bill kiguong hi Tribal hodia kijumsona cheh, PMP Bill to akikhietna (akibahlouna) umdehlou ahi atikit uve. Bill thah hi thinglhang mi leh phaicham mi ho khat jojoh beh in pomjong leh boina hithoudi, ani nilhon’a apomlou jongleh boina hithou thou ti dinmun ahidoh-e. Manipur Tribals Forum Delhi (MTFD) in MRNLP Bill hi “ju hai (bottle) thah sung’a ju lui kisunglut” kiti to thakhat chet ahi ti’n adem’e. JAC-AATB leh MTFD hin Bill thah (MRBLP Bill -2016) hi thinglhangmi leh thinglhang gam ho phaigam mi hoa kon bitna ahidehpoi tia angaiya tin le ha tho’a tindi/doudi ti ahikit’e. Bill 3 deilouna’a mi 9 thi (martyr) vuilouva kikoikal jong kum khat lhinna di hapta/kal khat jong vat talou, athu u seilhahnala umdehlou ahijeh in kimoh vui ponte ti hi JAC-AATB ho panna ahikit nalaiye.

JCILPS honla PMP Bill ‘withheld’ akibol’a akhel ding Bill khat akichesah tokah-a kiphinna ki-nga loudi ahi ti kit, hichena dia ahunglhung ding State Assembly toukhomna sung’a kiphinna khucheng’a boldi ti kiguotna umdan’a kilang kit ahi. Achutileh State govt hin alonaje ahetlou mong mong ahidem, henasa’a abol mong ahidem, khohsahna tahtah aneilou ahidem hidi ahi. Gampam’a kon kol le vai ho hunglut jing khatannadi daan (Bill/law) khat semdi iti tahtahleh hahsalouhel ahi. Bill kisem hoa gamtin gamtang kijena aumthaji jeh a bou kinoptona umtheilou ahi. Hiche henasasa’a pum notho di akiti laisea boina leh akiphinndi beitheiloudi ahi hetdoh phaat ahitai.