Jong thohdi Ngao thohda mai hen (CBI in MCS exam thu chaidoh...

Jong thohdi Ngao thohda mai hen (CBI in MCS exam thu chaidoh masa hen)

210
0
SHARE

Aug 26 Editorial

Jong thohdi Ngao thohda mai hen
(CBI in MCS exam thu chaidoh masa hen)

MCS exam 2016 boina thua CBI hon thukholna ahinneipat nao hi ningkum December lha ahitan tuchan geija ichan machalna aum’e ti jong ima kiheloulai ahi. Hiche thukholna (investigation) chelhah laitah in MPSC in hiche kiboina exam hi avel’a bolkit dia thuso ahinnei kit hi thudihlou chunga thudihlou khat kibolbe tina ahi. Hiche jeh a Student kiloikhomna phabep hon CBI thukholna kichai kah in hiche exam avellin kibol thei ponte tia ahung aolah lah jeng’u hi adihna um ahi. Ahin exam velbol kit dia nomlou hon CBI thukholna hi ichan gei hitam, gangtah in kibol chaidoh loihen ti ima aseikit lou u ahi. Kum khat sung ham, tua pat lha ijat sung ham’ah thukholna kichai hen ti jong sei dia (ngehna neidia) phatah  ahi. CBI thukholna kiti hi phat alahji mong hijongleh gangtah a kholchai thei ho khohsahna tahtah akineileh gangtah a chaidoh thei jong um ahi. Tu tua Manipu a dia CBI in case alah a thukholna anei thupidom cheh chu hiche 2016 MCS exam leh Babysana thi case ahi. Babysana case hi tukum February lha lang’a CBI in case analahpan ahi. Thina thu ahileh thudih holdoh a mona nei ho achan didol gotna peh di ti ahin athisa chu hung hing kitdi jong ahitahlou jeh a phat le nikho tamlah jep jongleh akhohlouna khat um ahi. Ahin MCS exam thu kikholna hi asotlai chan’a themmona neilou khangthah officer tamtah service career asuhset dehdi, akhohleh amaho hinkho keu hilouva ainsung mite hinkho gei atohkhah thei ahi. Govt officer khat kum 2 langjen service ahinbola lhalo jong ahinsan jouva phulou helou banga anatoh (service) kikahlha kiti hi mi hinkho le service tongkha thei tah ahi. Hiche Exam a adihlou bol mi ijat hamkhat jeh a mona neilou phabep gotna kipe hi jong thoh ding ngaovin athohloi kiti thudihloupen ahi.

MPSC in ahung lhung ding October/November lha a hiche MCS exam tahbol kitdi ati hi abul Prelim exam a pat kit di ati ahipon kiboinapen Main exam ana bol candidate ho avelbolnom hon bolkit uhen ti ahi. Hiche hi anabol hoilou jep ho dia chance phatah hijongleh lhendoh a ana umsa service jong hinbolsa ho dia thaset umtah hidi ahi. Kum 4 jouva hiche exam a dia athah beh a lekha hinsim kit di chu thilbai hitaloudi, service anabolsa ho ahung pass lou uleh adihlou bol holah a jao hidia namdetna khat hithei kit ahi. CBI in kholna anei ahileh exam kibolsa Answer paper hoa mark dihlouva kipe hojoh kholtohna umhenlang hiche dungjuija kahlhah theiaumle kikahlha henlang answer jih dungjuija mark kipe athem ho bou lhendoh in umle thudihpen hidi ahi. Hitobang chet hi Assam Civil Service a jong ana kibol ahi. Covid jeh a hitobang thukholna achal theipoi tina jong umdehlou ahijeh in MPSC honjong Court Case umsa khat leh CBI thukholna chelhah laitah a hitobang thuphon ahinnei hi MPSC hi ima helou leh nehguh chahguh dimna ahidan tahlangna cheh hung hithei ahi. Hiche akichaisa exam velbol kit di ti sangin 2016 MCS exam thu kichai chaileh exam aban/athah bolpai di joh kigot tupna umleh thildih hidi ahi, MPSC a Chairman leh Member hohi Term um ahiuvin a-term u kichai kah a MCS exam khat boldoh di ti hi atup ujong hidi ahi. Student kiloikhomna hon adang dang sei sang un hiche kah in kikhol chai hen ti jong seitha leu phadi ahi.