Jong in athina ging; Mihem in ginglou

Jong in athina ging; Mihem in ginglou

421
0
SHARE
Jong in athina ging; Mihem in ginglou

                            Churachanpur Khuga Dam twi kiting a athilo hi umtalou di ham itileh tu atileh khat akhelutnin akiholmon athisan akimui kiti thu aumjing atwilah a kijap thina thei ahi hetna leh tatna a nei umdehlou tina ahi. Achesa June 29 (2019) nikho’a hitobang vangsetna toh a ahinkho anachanlo kit chu Churachanpur district Tuinom kom’a J Gamnom khoa kon kum 23 a tah/upa Demkholen Haokip ahi. Twilah akhehlutna pat ajaphachan Kuki Khanglai Lompi (KKL) ho lamkaina a aluong hol dia amun anadel uchu State Disaster Response Force a twithem hotoh jan khovah a ahol uva ajing jingkah lang’a nahnah a amubep u ahi. Dam twilah a nga mat jeh a twilah a khelutna thilo vang chu nehdi holna jeh a thilo ahijeh in thi tahpi ahijongleh thukhat ti thei ahi. Ahin theinom’a picnic che a kihuilha jeh ham leh nisa satval jeh in twilah ah kikijap hen tinalam’a twilah a khelutna thilo aumjing vang hi sotna pat Dam twija kijap khadi ahi tia ana kiseijing khat donse’a kineilou jeh hidi ahi. Jong (monkey) in athina aging’e, akicha e kiti thuchih bon aum ahin mihem in itidan’a midang tamtah anathina mun kichatna kineilouhel ahidem tijong datmo umtah ahi. Tua jong govt nin Dam twija kijap di khana, jahdana di ipiham khat abollouleh hitobang twilah a khelutna thina toh thilsoh aban jong umjingnalai di ahi. Toset vangset kiti jongleh twijap themlou hon hibang twi thuhna a twijap kithem chuhgot chu thithei ahi henasa a kibol ahijeh in koima themmo chansahje umlou ahi.  Khuga Dam hi Dam dang dang bang’a Multi purpose Dam ahin akisahlona jehpen chu thum (3) bou ahi. Hichu – donding nehding twi kholna ding, Electric meivah munathei di chuleh akimvel’a phailei/twilou hon twi amunathei ti ahi. Dam kisem a kon mipi phatchomna apehdoh hoto hinkho beilona ahidoh ho kitekahleh aphalou, akanlouhel lang himaithei ahi.

                            Hibang Churachanpur khopi sung’a twi hahlaija Khuga Dam hin mi ijat dia donding nehding twi apehjouvam, khopi sung’a inn ijat nin kolphe tahomei (electric meivah) muna a aneijem ti ho kiveleh Dam kisahna a sum kisumang hotoh Dam twija khelutna thiho to tepi thei hiloudi ahi. Govt nin mipi phatchomna dileh khantou machalna dia Dam ho asah, asem ahin mipi hon hon amanje ahetlou uleh govt kingoh theiloudi ahi. Dam twilah a thi ahijeh in govt nin luongman (compensation) pe hen tithei jong hilou ahi. Koiman Dam twilah a kijap dia mi asolgun umloubeh di, chuche malah aga kijapgo aumjongleh ahethei hon ajahda di tahsan umtah ahi. Khuga Dam twilah a khelutna thi ahung kijom thim phatna pat chu district Administration nin order khat anaso a koima Dam twilah a phalna neilou hon ngamat abollou di, theinom’a twilah a kijap umthei loudi ti ho order anasao a avedi chowkidar jong akoijing didol ahi. Dam twi kitinna hi munlen tah ahijeh in koiman akimvel jouse phatseh a avetjingdi jong hahsa maithei ahi. Hijeh a chu akho akho aveng aveng, ama ama insung mi cheh ho kihilna umdi hi aphapen hidi ahi. Nisa satlai dehdeh leh Swiming Pool a sum leuleuva kijap sanga Dam twija kijap di ti thanom umdi ahijeh Dam a kigahna khat aumlouleh boijing nalai di ahi.