JNIMS Director office maiya COVID 19 positive kijen hon kiphinna abol jeh...

JNIMS Director office maiya COVID 19 positive kijen hon kiphinna abol jeh uva JNIMS a umho lungjinna soh

65
0
SHARE

JNIMS Director office maiya COVID 19 positive kijen hon kiphinna abol jeh uva JNIMS a umho lungjinna soh

Imphal, Aug 5(ET): JNIMS hospital a um COVID Care Center a kijen asymptomatic COVID 19 positive ho Wednesday nikho a aumnau room a kon hungdoh uva, Director’s office maiya kiphinna anei jeh uva JNIMS a COVID natna hilou natna chom chom a kijen chule aum ho leh anatong ho nasatah a alungjing uvin ahi.

Sun nidan 11 don a COVID asymptomatic hi a mi 20 vel JNIMS Director office maiya kikhom uva, facility kipe/amu u chunga alunglhai loujeh uva kiphinna abol u ahi. Neh leh chah aphatcha amu louvu, chule care facility ho akitup loujeh a kiphinna aneiyu ahi, tin thulhut in aseiyin ahi.

JNIMS COVID Care Centre a hi chapang chule natna dang dang kop adamlou panna a COVID 19 positive 100 nailam kijen ahi. Thulhut dungjuiya, adamlou hohi anchang leh dal chule anche bou apeh uva, nilhah a cha ahilouleh neh ding ima amu louvu ahi. Neh leh chah ahoilou bou hilouva vaigei tah a amu jeh uva lunglhai louvu ahi.

Breakfast hi angaiya jingkah nidan 7.30 leh 9.30 kikah a apeh uva, atamjo aphatcha a amu lou jeh uva lou tamtah tah ne a adamlou hon athoh lel ahi, tin thulhut in aseiyin ahi. Alangkhat a, JNIMS Medical Superintendent Prof T Rajen in thuso miho akihoupi na a lockdown jeh a anche/me chule ngaichat khoh adang hohi lhom a, hiche jeh a adamlou ho anche tailou adang kipe joulou ahi, ati.

Singh in asei dungjuiya, COVID 19 natna neiho neh leh chah sem hi sorkar in phatsahna apeh jouva private agency in avetkol ahi in, achesa kal ni sung hi adamlou ho protein tamna neh leh chah alhahsam jeh a dal, ahtui leh anche phabep bou asempeh u ahi. “Jan nidan 7.30 leh 9.30 kikah a sa/nga panna me leh bu kipe a chule sun nidan 11 leh 1 kikah a hi hawai, bu leh anche kipe ahi in, achesa kal ni sunga kabol joulouvu ahi”, tin Singh in aseiyin ahi.

Thuso mihon JNIMS official ho akihoupi uchun authority hon athu suhlhap ahitai, tin asei uvin ahi. COVID Care Centre, JNIMS a um adamlou (asymptomatic) ho masanga ward chom chom a COVID natna hilou natna dang a kijen ho neh leh chah tobang kipe ahitai, ati. CCC Ward a um ho hiche a hi lunglhai louvu ahi in, neh leh chah atui dom athum u ahi. Authority in amaho hi achombeh a neh leh chah kipe louding ahi, ajeh chu COVID 19 positive ho achom a neh special a sem peh nading dan aneipoi, tia asei ahi.

COVID 19 positive hon Additional Director, JNIMS toh kihouna anei jou uva athu suhlhap ahitan, ahivanga iti kihou lhahna aneiyu ham, ti kihe loulai ahi. Alangkhat a natna kilason to thei ahi, ti jeh a COVID natna hilouva hospital a kijen adang ho chule hospital a che ho sangtah a lungkham u ahi.

Covid natna hilou natna dang nei ho kijenna ding chungchang govt in vet tup na anei ding a simlai kiloikhomna ho in temna nei

IMPHAL, AUG 5(ET): Gamsunga covid natna toh kisai a hospital le muntin jouse care centre a kijah tah toh lhon a natna dang nei ho in boina ato jing utoh lhon in state sung a simlai kiloikhomna AMSU, ATSUM , ANSAM, KSO-GHQ, MSF, DESA KSA, SUK le AIIMS ho in kithokhom in natna dang nei ho kijen na ding mun phate a govt in agon ding in temna anei uvin ahi.

Simlai kiloikhomna ho in thuso ahin neina uva gamsung muntin a mipi natna dang nei ho in kijan na ding mun umtah loutoh lhon a hahsat na tampi ato jing tah dan u hetsahna ahin nei uvin ahi. Munkhat a naonei nupi khat hospital apoh na ding um loutoh lhon  thina ato na chung chang a kiloikhoman ho chun hitabang thilsoh avel a aso kit nalouding in hetsah na ahin nei uvin ahi. Hospital ho a natna dang nei ho jong ahiding doltah a jan na akinei na ding in jong hetsah na ahin nei uvin chuleh frontline a natong ho in jong natna po a apan nalouding uva govt in phate a vetsui na anei ding uvin jong hetsah na ahin nei uvin ahi.

Central Armed Police Force mi 33 panna a Manipur a Covid-19 positive case thah 75 kimube

Imphal, Aug 5(ET): Manipur a achesa nidan 24 sungin Covid-19 positive case athah 75 mudoh be ahi tin Wednesday nilhah nidan 5:00 a covid-19 common control room akon thuso kimun aseiyin tuhin Covid care facilities a chonlut ahi taovin ahi.

 Tuni case thah kimube chu milham 42 (pasal 28 leh numei 14) leh Central Armed Police Force (CAPF) akon mi 33 ahin VRDL, RIMS akon 34; VRDL, JNIMS a 25; RIMS TruNat a 1; Babina Diagnostics Centre a 13; Raj Mcdicity a 1 chule STDC/IRL akon 1 ahi. Amaho chu Imphal West akon13; Thoubal akon 11; Chandel akon 2; Churachandpur akon 1; Imphal East akon 13; Senapati akon 1; Bishnupur akon 1 ahi.

Milham 42 case thah kimube ho lah a Senapati, Chandel leh Churachandpur akon mi khat cheh chu gampam a kon hung kile ahiuvin midang 39 ho hi travel history neilou ahiuve jong akiti.

Alangkhat a tunin natna nei mi 48 RT PCR test kibol jouva natna akon adamtah jeh in discharged akibol uvin amaho chu CCC, Mcitram (11), Thoubal (3), DH Thoubal (10), Ukhrul (6), Kamjong (1) and RD Wing (17) ahi.

Tuchan hin Manipur a Covid-19 positive case 3093 aphatan, hichelah a active case 1224 ahi. Tuni chan a natna akon damna doh mi 1862 ahitoh lhon in recovery rate jong 60.20% aphatan chule thina toh jong mi 7 um ahi tai.

Tuchan a district a case umjat chu, Bishnupur district a 93 umlah a adam doh 84, Active case 9; Chandel district a 56 lah a adam doh 39, active case 15; Churachandpur district a 306 lah a adam doh 160, active case 146; Imphal East district a 218 lah a adam doh 72, active case 146; Imphal West district a 502 lah a adam doh 226, active case 276; Jiribam district a 108 lah a adam doh 81, active case 27; Kakching district a 145 lah a adam doh 98, active case 56; Kamjong district a 140 lah a adam doh 127, active case 13; Kangpokpi district a 309 lah a adam doh 159, active case 148; Senapati district a 253 lah a adam doh 191, active case 62; Tamenglong district a 231 lah a adam doh 198, active case 33; Tengnoupal district a 20 lah a adam doh 16, active case 4; Thoubal district a 333 lah a adam doh 80, active case 250; Ukhrul district a 313 lah a adam doh 231, active case 82 ahin chule Noney leh Pherzawl akon natna nei 25 leh 32 ahin abon in adam doh tan ahi.

 

India a Covid-19 positive case lakh 19 val ta; mi 39,795 in thina toh

New Delhi, Aug 5: India a Covid-19 positive case lakh 18 aphana nikho ni jou Wednesday ni case thah 52,509 akimudoh be jeh in Covid-19 Positive case lakh 19 aval tan ahi.

Union Health Ministry data dungjui a India sung’a Wednesday ni case thah 52,509 mudohbe ahin chule thina toh 857 alhing in ahi. Tuhin positive case 19,08,254 umtah a 12,82,215 akijendam tai ati.

Wednesday nikho thina toh 857 toh kigom in tuhin covid-19 jeh a thina thoh mi 39,795 alhing tan active case 5,86,244 aum in adamdoh 12,82,215 ahin, recovery rate 67.19 percent in akal in chule thina toh hi 2.09 per cent in akhenem e akiti.

Tuni case thah 52, 509 kimudoh hi ni sagi (7) kijom a case thah 50000 val kimudohna ahitai.

Wednesday nikho a thina toh 857 lah a 300 chu Maharashtra akon ahin, 110 chu Karnataka, 108 Tamil Nadu, 67 Andrhra Pradesh, 54 West Bengal, 39 Utter Pradesh, 25 Gujarat, 20 Punjab, 17Rajasthan, 17 Bihar, 13 Telangana, 12 Madhay Pradesh, Delhi, 10 Jammu and Kashmir, 9 Odisha, 8 Chhattisgarh, 8 Haryana, 6 Assam, 5 Uttarakhand, 4  Goa, 3 Kerala, 3Jharkhand, 2 Andaman and Nicobar Islands, 2 Puducherry, 2 Tripura, 1 Chandigarh ahi.

 

COVID case atam cheh cheh toh kilhon a SOP guidelines ho phatah a jui ngai ahi: CM

Imphal, Aug 5(ET): COVID 19 positive case atam cheh cheh toh kilhon a social distancing, face mask bol ding, savon a khut sop ding kiti natna a kon kivenna ding dan hohi athah a phatah a jui ngaiya, mipi kikhopna lah a ahithei chan a panlou ding ahi.

Achesa kal sunga mipin social distancing dan ajui jeh uva Chief Secretary in kipathu aseiyin ahi. Covid 19 positive case (active) 1197 lah a mi 502 hi Army/CAPF personnel ahi in chule adang mi 695 hi mipi (general population) lah a kimudoh ahi, ati.

Tuesday nikho a Chief Secretary in Army chule Central Armed Police Forces (CAPF) senior officer hotoh kihouna aneiya, COVID natna a kon kivenna dinga pan alah tei nading uva aseiyu ahi. Kihouna a SoP kinoptona asem uva, force jousen Nodal officer alhen a chule quarantine leh Covid Care facility hi amaho sepai ho umna dinga agon dinga aseiyu ahi. Personnel koima hi COVID negative ahi ti suhchen ahi kahse a duty a sol doh lou dinga jong asei uvin ahi.

Police Department sunga jong positive case kisei ahi in, ‘contact tracing leh test’ nasatah a chelha ahi. Police personnel leh akimupi hou 840 val test kibol ahitai. Test atam thei pen a akibol theina dinga Sample/testing team hi police department doctor ho leh health care worker ho toh kitho a kisemdoh ahi.

Positive case akimudoh na mun jouse a ‘contact tracing leh test’ abol u ahi. Wednesday nikho a senior doctor ho umna state level team ho Chandel district a che uva, district team ho kithopi leh toson dinga cheu ahitai. Imphal West leh Imphal East district a sample lahna leh testing team kalsah dinga jong thulhuhna um ahi, ajeh chu hiche mun a natna hatah a chal ahi.

State sorkar in ICMR in aphatsah Rapid Antigen Test Kits 20,000 alah ahi. Test kibol atam thei pen ahithei nadinga apet pet a 50,000 kits choh be dinga jong thulhuhna um ahi. State Cabinet in boi pet a angaicha suhfel ahi theina dinga apet pet a doctor 100 lah dinga jong thulhuhna anei ahi.

COVID Care Centre sem be jing nadinga state sorkar in pan alah jing ahi. Tuni chan a hi lupna 1639 um ahi in, hiche lah a hi CCC Lamboi Khongnangkhong a lupna 469 chule CCC Kangpokpi a lupna 70 um ahi. Hiche toh kilhon a JNIMS leh RIMS a Covid lupna 100 leh 47 um hi Covid positive natna nei khoh a, symptoms nei ho kijenna a kimang ding ahi. RIMS leh JNIMS in non-Covid service kiti OPD, maternity service leh adang dang jong athah a apat kit ding ginchat ahi.

Moh tijat hi aphatchomna umlou ahi in, lolhing tah a natna a kon kivenna dinga social distancing phatah a mijousen ajui ngai ahi.

 

Private hospital hon Covid-19 positive hilou adamlou ho kijenna man asuhlhom dinga Joint Committee in sei

Imphal, Aug 5(IFP): Gamsunga um private hospital hon COVID natna hilou adamlou adang ho ajenna a pan alahcheh uva, kijenna man asuhlhom diu ahi, tin Joint Committee for Public Awareness on COVID-19 in aseiyin ahi.

JCPAC hi state leh civil bodies ho kiloikhomna ahi in, Chief Minister tohgon ahi. Mipin gamsunga hospital len pen ni- RIMS leh JNIMS hospital jotna a hahsatna ato tah jeh a boina suhlhap nadinga pan alah diuva Tuesday nikho a committee in thuso anei nauva aseiyu ahi. Private hospital authority ho hiche thu a kimupi dinga jong asei uvin ahi.

Yaiskul MLA leh Committee convener Th Satyabrata in thuso aneina a, gamsung a ‘community transmission’ kipan til ahijeh a local club leh organization honjong tosotna lentah apeh diuvin aseiyin ahi. Niseh a sum kilo thu a neh kihol tamtah in toh ding aneilou ahitah jeh a khantou machalna natoh ho amaho dinga gon dinga jong temna aneiyin ahi.

Gamdang mi lah angai teiya ahileh COVID status panna a amaho detail lah soh nadinga sorkar chule department in pan alah dinga aseiyin ahi. Vengsung phabep in ama ama veng jotna lampi akha tan ademna thu aseiyin, containment zone tia veng khat akiphon teng hitobang pan lah ding ahi bouve, ati. Lampi kikha hin emergency a boina bou aso ahi in, hiche sanga SOP kisodoh ho khoutah a akijui nadinga volunteer leh club hon pan alah ding ahi, ati.

Covid natna nei ho leh a insung mi chule vengsung thet bol louva tosot joh dinga aseiyin ahi. Thinglhang kho phabep in khosung miho phailei a ache ding jong akhah uve ti thu akija in, hitobang hi bol louding ahi, tin temna aneiyin ahi.

Achesa May 26 a kon Joint Committee for Public Awareness on COVID 19 in lamchom chom a natna doudal nadinga pan alah pan ahi. Committee a hi All Manipur United Club Organisations, Committee of Civil Societies of Kangleipak, The Ethno Heritage Council, League of Indigenous Peoples Upliftment, Kuki Inpi Manipur, Manipur Muslim Welfare Organisation, United Committee Manipur, United Naga Council leh Zelianrong Baudi pang ahi.

 

Ram temple kum 3 sunga kisa jou dinga VHP in sei; Kin goun a PM Modi apan hi Hindutva goljona ahi, tia Owaisi in demna nei

New Delhi, Aug 5: AIMIM chief Asaduddin Owaisi in Wednesday nikhon Ayodhya mun a Ram Temple ‘Bhoomi Pujan’ kin goun a Prime Minister Narendra Modi apan hi ‘secularism chunga Hindutva in goljona anei vetsahna ahi, tin aseiyin ahi.

“India Prime Minister ache in Bhoomi Poojan a apang in ahi… tuni hi Hindutva in secularism agoljo na nikho ahi”, tin Owaisi in aseiyin ahi. ‘Liberty leh equality’ chunga atamjo hina (majoritarianism) in gol ajo nikho ahi. Prime Minister in Mandir foundation bou hondohna anei hilouva Hindu Rashtra foundation jong ahon doh ahi”, ati. Nikho kipat til a Prime Minister Narendra Modi in ahoulimna a ‘Jai Siya Ram’ slogan a houlimna apat a chule kin goun hi thusim a seithei thupi tah ahi, ati. “Thusim isemdoh u kakipah e. India gam mi crore a sim in tuni nikho ahung lhun hi atahsan theilou ahi. Gamsung pumpi hi Lord Ram thu (spell) noiya um ahi”, tia Modi in aseiya, hiche jouva Ayodhya mun a Ram Temple foundation hondohna anei ahi.

Kin goun a pang mi 175 lah a Modi jong pang ahi. RSS chief Mohan Bhagwat, Trust chief Nritya Gopaldas Maharj, Uttar Pradesh Governor Anandiben Patel leh CM Yogi Adityanath toh Modi milah a atou uvin ahi. Pandemic jeh a touna mun ho social distancing dan jui pum a agon u ahi. Prime Minister Modi leh Adityanath in Hanuman Garhi mun a taona anei lhon a chule Modi in Ram Janmabhoomi jong vilna anei ahi.

Left party hon kin gon kibolna a Centre leh state sorkar in pan alah hi Supreme Court thutanna toh kitoh lou ahi in, trust semdoh dinga court in thuhilna anei ahi, tin kin kibol doudalna anei uvin ahi. Congress lamkai Priyanka Gandhi in alangkhat a, kin goun hi gamsung kipumkhatna ahi ding akinepna thu aseiyin ahi.

Wednesday nikho a PM Modi in Hanuman Garhi temple mun a taona aneiya, ‘minute 7’ kalval hilou phat aman a, hiche jouva Ram Lalla temple kiti thing leh hai (glass) a kisa mun avil ahi. Bhoomi Poojan a hi mantra sim, leiset khot, leiset chule shila hou ding jong pang ahi. Ayodhya a official hon asei dungjuiya Bhoomi poojan ceremony a silver thengset a kisem brick 22.60 kh kimang ahi.

Wednesday nikho a kin gon akichai teng leh temple sahna natoh gangtah a chelha ding ahi. Trust member hon asei dungjuiya, temple hi lha gup leh kum khat sunga sah jou dinga aseiyu ahi.

 

CCpur District Hospital a Hospital service chom chom kithah hon kit ta

B.Lalboi Gangte

CCpur, August 5 (ET): District Hospital sung’a Covid-19 positive case anakimudoh toh lhon’a Containment Zone a phondoh ahi nung’a Service chom chom kha’a aum vang in District Administration deina bang in tuni (Aug 5) akon chun OPD leh service dang ho angai bang in ana kihong kit tan ahi. Hetthei khat chu achesa July nisim 26 nikho’a District Hospital akon positive case nakimudoh jeh’a District Hospital campus sung leh akimvel Containment zone a ana kiphongdoh ahi. Ahin District Hospital phatchom khat anakikha jou nung July nisim 31 nikhon Containment zone akon in anakilahdoh kit toh lhon’a District Administration deina bang tha’a hospital a service jouse angai bang’a chelha ding’a thupeh ana um in ahi.

Hospital kihon toh lhon’a Hospital  campus sung lut ding jouse in gate bul’a sanitizer a khut kisop cheh ding’u chu jou teng ticket akilahthei bep ding’u ahi. Chuleh OPD hi jingkah leh nilhah in akikhen in jingkah lam leh Ground Floor OPD ah General OPD, Dental, ENT, Surgical OPD leh Minor OT jouse kihong ding, Medicine OPD leh Child OPD hi first floor kihong ding ahi. Chuleh nilhah lam hi ground floor ah Ortho, Ayush, Urology leh Physical Medicine & Rehabilitation (PMR) ho, first floor ah Non Communicable Disease (NCD), Eye leh Psychiatry ho hi ding ahi.

 

CM in video conferencing a fast track court ni hondoh na nei

Imphal, August 5(ET):  Chief Minister N. Biren Singh in tuni in Fast Track Court (FTCs) ni Uripok le Lamphelpat, Imphal a um chu video conferencing in Chief Minister Secretariat akon in hondoh na ana nei in ahi.

Kingon toh kisai a Chief Minister pa in ahou limna a FTC ho hin numei chung a khanset na case ho suh lhap na state sung a ana nei jing toh lhon a hitabang court nei be ding apoimo dan hetdoh ana hitoh lhon a sembe na hung kinei ahi ati.

Achesa kum thum le akeh sung in numei chung a khanset na case 951 lam register an akiboldoh in, hitabang court ho akon ahi numei ho in achung uva khanset na kinei naho chung a thutanna agan nathei pen a aneilhah thei ding u ahi tin Chief Minister pa chun ana sei in ahi. FTC ho hin POSCO le rape case state sung a tan lhah lou a um ho atan lhah soh ding ahi dan jong chief minister pa in tahlang na ana nei in ahi.

State government in tuni a kihongdoh FTC teni aidng in retired District le Sessions Judge Salam Imocha Singh le Chandam Brajachand Singh judge dingin lhendoh na ana nei uvin ahi. Chief Justice, Manipur High Court  Ramalingam Sudhakar in asei na a FTC kisem lo napen hi numei le chapang chung a khanset an ho seilhah na le thutan lhah na ding ahi ati. Deputy Chief Minister  Y. Joykumar, Minister for Law and Legislative Affairs  L. Jayantakumar Singh, Minister, CAF&PD Karam Shyam, Manipur High Court judges, Chief Secretary Dr. Rajesh Kumar, Secretary (Law) Athokpam Nungsitombi le adang dang ho in kingon achun panlah na ana nei uvin ahi.

 

Gamsung economy machal nadinga gamgi a um lamlen ho semphat ngai ahi: Dr. R K Ranjan, MP

Imphal, Aug 5(ET): Inner Manipur Parliamentary constituency MP Dr RK Ranjan in, gamgi mun ho a go ju henlang dai kai jong leh apha neiding hi thupi ahi in, economy hatdoh sah nading ahi, tin Nongkam Satang kho, Tengnoupal district a achesa Tuesday nikho a ‘One-day Awareness Programme on Cane and Bamboo and its Application’ kin kibolna a aseiyin ahi.

Central Agricultural University (CAU), Imphal, Apunba Imagi Machasing (AIMS), Manipur chule Nongkam Satang, Choktong leh Machi Village Authority, Tengnoupal district tohgon na noiya chelha ahi. Program hi Cane and Bamboo Technology Centre (CBTC), Guwahati, Assam in North Eastern Council, DoNER Ministry in atosot ahi.

State government a kon Road Transport and Highways Ministry henga ‘all-weather road’ akisem nadinga proposal kithot ding ahi, tin Dr. Ranjan in aseiyin ahi. “Lamlen pha leh gamgi a health infrastructure kitup umlouva gamkai khangtou louding ahi”, tin aseiyin, Maring nam miho hi ting leh go thil semna a thepna neitah ahiuvin, awareness sangtah a ngaicha ahi, ati.

CAU a kon team hon soil testing abol uva, go tilouva litchi chule agar thingphung tu nadinga leiset pha ahi amudoh u ahi. Hiche hohi akitu a ahileh khosung miho sum muna hoiding ahi, tin aseiyin chule gamgi a cheng hohi gamgi ngah ahiuve, ati. Chule gamsung miho economy ahat doh nadinga jo chan a kithopina peh dinga jong aseibe in ahi.

Program president Dr. Lorho S. Pfoze in, gamkai jotna lamlen Lamlong Khunou leh Nongkam Satang kikah aset dan chule semphat angai dan thu aseiyin, Nongkam Satang hi India leh Myanmar kah a sumkol veina mun ahithei nadinga ‘international market’ mun a sem ding ahi, ati. Hiche a dinga Burma leh India sorkar toh kihouna nei ngai ahi, ati.

Prof. M Premjit, Vice-Chancellor, CAU, Imphal in ahoulimna a Nongkam Satang kho hi Lychee, Coconut, Cane leh Bamboo lei bol nadinga mun phatah ahi, tin aseiyin, hiche jeh a tuni a pang MP ho toh kihouna neiya NOngkam Satang mun a Scientific Plantation and Skill Development centre sem doh dinga nopna kanei ahi, ati. Chule nursery plant a Tissue culture lentah sem angaiye, tin jong aseiyin ahi.

Rajkumar Mayanglambam, DC, Tengnoupal District jong kin gon a guest of honour a apang in, Lamlong Khunou a kon Nongkam Satang kikah lamlen sem nading tohgon hi Assam Rifles program noiya um a, no-obejection certificate sodoh ding ahi, ati. Telephone network umlou, health facility leh primary school lhahsamna ho thu jong Prime Minister scheme thah noiya suhlhap ahina dinga athu pohdoh dinga aseiyin ahi.

Th Krishnatombi Singh, Additional Superintendent of Police, Tengnoupal district in ahoulimna a, Myanmar gam a lamlen jouse gari lhaina thei ahi in, ahivanga pillar no. 71 a kon 87 chan lamlen umlou ahi. Hitobang dinmun hin national security asuhboi thei ding dinmun a um ahi, ati.

Program sunga hand sanitizer, mask, hydroxide leh hand glove ho khosung miho ahom uvin ahi. Directorate of Health Services, Manipur government leh Manipur University in ahop aho. Kin goun a Morung Makunga, ex-Minister jong apang in ahi.