J&K chule Assam, Manipur, Arunachal Pradesh leh Nagaland gam a dinga Delimitation...

J&K chule Assam, Manipur, Arunachal Pradesh leh Nagaland gam a dinga Delimitation Commission kisem doh ta

172
0
SHARE

J&K chule Assam, Manipur, Arunachal Pradesh leh Nagaland gam a dinga Delimitation Commission kisem doh ta

Guwahati, Mar 7: Sorkar in Friday nikhon Supreme Court judge anahi Ranjana Prakash Desai lamkaina Delimitation Commission asemdoh in, Lok Sabha chule Jammu and Kashmir Union Territory chule northeast Assam, Arunachal Pradesh, Manipur leh Nagaland Assembly constituency thah jih dinga commission asem ahi, tin law ministry notification in aseiyin ahi.

Election Commissioner Sushil Chandra leh Jammu and Kashmir UT chule state 4 a State Election Commissioner ho ex-officio member a pang diu ahi, ati. Commission in Jammu and Kashmir Reorganisation Act dungjuiya Jammu and Kashmir constituency chule Delimitation Act, 2002 noiya Assam, Arunachal Pradesh, Manipur leh Nagaland gam a constituency ‘delimit’ abol ding ahi, tin notification chun aseiyin ahi.

‘Delimitation’ hi gamsung (country) ahilouleh province khat a territorial constituency boundary limit kisem na ahi. Justice (retd) Desai hi kum khat ahilouleh order asodoh kit (amasa jo jo) sunga dinga kilheng ahi.

Jammu and Kashmir Reorganisation Act Section 60 dungjuiya, Jammu and Kashmir Union Territory a Legislative Assembly a seat hi 107 a kon 114 a kikalsah ding ahi. Hiche lah a seat 24 hi Pakistan-occupied-Kashmir a um ahi. Seat hi 83 a kon 90 a kal ding ahi, tia Chief Election Commissioner Sunil Arora in tu masanga thuso mihon hiche chungchang adoh nauva asei ahi.

Jammu leh Kashmir Union Territory hi October 31, 2019 kum a kisemdoh ahi’in, Jammu and Kashmir gam union territory ni a akikhen jou ahi’in, khat hi Ladakh ahi. Achesa February nisim 28 nikho a sorkar in Assam, Nagaland, Manipur leh Arunachal Pradesh gam a security thu jeh a ‘delimitation’ kivoh haina notification masa ho asuhmang/avohhai ahitan, dinmun amasa a tobang ahi tahlou jeh a exercise chepi thei ahitai, tia anasei ahi.

Notification masa ho akisuhmang toh kilhon a north-east gam li a ‘delimitation exercise’ chepi nathei ding lampi kihong ahi. “Assam, Manipur, Arunachal Pradesh leh Nagaland gam a ‘delimitation exercise’ ana kivohchon na ajeh hi tuhin aum tapon, Delimitation Act, 2002 noiya hiche hi chepi thei ahitai”, tia Legislative Department, Law Ministry in ‘order’  aso ahi.

Dinmun umdan President in lunglhaina anei ahitai, tia jong aseiyu ahi. Delimitation Commission hi Census 2001 dungjuiya Delimitation Act, 2002 noiya state leh union territory ho kikhenna (division) sem toh dinga kisemdoh ahi’in, Lok Sabha leh State Assembly election a ding ahi. Commission in northeast a akisei state 4 ho tilouva state adang jouse a ‘delimitation exercise’ chule Delimitation Order, 2008 ajo ahitai.

Delimitation natoh hi ‘high power body’ ho kipe ahi’in, hiche body hi Delimitation Commission ahilouleh Boundary Commission tia kihe ahi. “India gam a Delimitation Commission hi livei kisem ahitai. 1952 kum a Delimitation Commission Act, 1952 noi, 1963 kum a Delimitation Commission act, 1962, 1973 kum a Delimitation Act, 1972 chule 2002 kum a Delimitation Act, 2002 noiya Delimitation commission livei kisemdoh ahi, tia EC website in asei ahi.

India gam a Delimitation Commission hi thanei tah (high power body) ahi’in, amaho ‘order’ so hi hoilai court hijong le achungthu dohna kinei theilou ahi. Order hi President in apeh nikho a kichepi pan ahi’in, ‘order copy’ hi Lok Sabha le mopohna nei state legislative assembly kipe ahi. Ahivanga amahon ‘modification’ abol diu kiphal lou ahi, tin EC website chun aseibe in ahi.

Coronavirus natna a kon gamsung miho akiven them dinga CM in temna thuso nei

Imphal, Mar 7(ET): COVID-19 natna Saturday nikhon gam 88 val alhungtan, Manipur gam a coronavirus case photchenna kinei aum loulai vanga India gam a tu chan a photchenna kinei case 31 alhin toh kilhon a Myanmar toh gamgi kikop a igam sung uvin kigotna sangtah anei phat ahitai, tin Chief Minister in aseiyin ahi.

Myanmar hi natna akisei masat na pen China toh gamgi kikop ahi’in, mihem khat leh khat natna kilason to ahijeh a mipi kikhopna a ahithei chan a pan lahlou ding ahi. Ministry of Health and Family Welfare, India government in March nisim 5 nikho a natna akivet tup jou kah a mipi kikhopna ho pel ding ahilouleh vohchon dinga Office Memorandum asodoh ahi.

Manipur gam a festival lenpen khat hi a Yaoshang kon ahitan, rong a kichepna, thabal chongba, kichep golseh chule ni 5 sung kin gon chom chom umjing a, mipi tamtah in pan alah a, khat le khat angaiya akhut kituh a kitongkha to ahi’in, ahivanga damtheina hi gelkhoh pen ahijeh a gamsung mihon ahithei chan a mipi kikhopna apel ding chule golnop lentah a kibol ho asuhlhom ding hi kivenna aneiya, nat douna dinga mipin pan alahkhom dinga CM in temna aneibe in ahi.

MLA ho lhalo kikalsah DBSP in demna sangtah nei

Imphal, Mar 7(UNA): Democratic Bharatiya Samaj Party, Manipur State Committee in Manipur Legislative Assembly MLA 60 ho lo (salary) leh Allowance akikal sah sangtah in adoudal uvin ahi.

DBSP/MSC president Chabungbam Premchandra in thuso anei na’a, MLA 60 lah a 32 hi crorepati ahi, tin aseiyin ahi. Gamsung a thil man akal a, tohmun umlou chule kum masa a twi hah jeh a gamsung in hahsatna ato pet a MLA ho salary leh Allowance kikal sah hi adihpoi, tin aseiyin chule hiche hi mipi ho dinga lungnat umtah ahi, ati.

Legislator hohi mipi thalheng chule House member hiu ahi. Amaho lo, allowance chule adang dang hi public exchequer a kon kila ahi’in, amaho hi Bureaucrat ho tobang a lo neiya natong ahi pouve. MLA hohi gamsung chule mipi natong dinga politics a lut u ahi’in, moral, ethics thudohna ahi. Hiche hi lo kipehna natoh hilou ahi. Angaichat a ahileh mipin member ho avetsui ding ahi’in, hiche hi ahiding mong ahi, tin thuso chun aseibe uvin ahi.

CM N. Biren in RIMS a lupna 20 umna Isolation Ward sah ding aphatsah ahitai: RIMS Director

Imphal March 7(ET): Manipur Chief Minister N Biren Singh in aganna thei pen a Regional Institute of Medical Sciences, Imphal a lupna 20 umna Isolation Ward sah nadinga phatsahna anei ahi, tin Prof. A Santa Singh, Director, RIMS in lupna 15 umna Surgical Intensive Care Unit (SICU) thah ahondoh na a aseiyin ahi.

Lupna 20 umna Isolation ward sah nadinga proposal state sorkar henga kipe lut ding ahi’in, lupna alhahsam jeh a boina suhlhapna hiding ahi, ati. Athah a hondohna kinei lupna 15 umna Surgical Intensive Care Unit (SICU) jong hi ICU a lupna lhahsam jeh a boina suhlhapna ding ahi’in, lupna hi India a dinga aphapen, chule remote a kibol ahi, ati.

Alangkhat a Friday nikho a Isolation Ward a kipolut a damlou mikhat hi COVID-19 natna nei ahi ti photchenna umlou ahi’in, mipin social media a jouthu aseithang lou dinga temna jong aneiyin ahi. Kin gon a Prof. Ch Arunkumar Singh, Medical Superintendent, RIMS Hospital, Imphal, Head of Department ho, Faculty member ho, Staff nurse chule Non-Teaching staff hojong apang uvin ahi.

Coronavirus testing centre lah a JNIMS jong lhendoh na kinei

Imphal, Mar 7(ET): Jawaharlal Nehru Institute of Medical Sciences (JNIMS) chu coronavirus testing centre  ding in lhendoh na ana kinei in ahi. Hiche lhendoh na chu tuni a Chief Minister N Biren Singh in  Union Home Minister Amit Shah ang a gamsung a coronavirus hunglhun tah toh lhon a state sung a mi kichat le tijat na ho thu hetsah na ana nei toh lhon a ana kinei ahi.

Chief Minister pa in Union Home Minister toh akimu to achu  state sung a coronavirus natna akon kiven na ding toh kisai a natoh kibol ho chung a hou limna ana neipi ahi. Kihou na achun Moreh akon hung lut ho vetchil na ding a natoh kinei ho jong seikhomna ana kinei in ahi. Kiven na ding a Bir Tikendrajit International Airport, Mao le Jiribam ho a natoh na kinei ho jong ana seikhom lhon in ahi. Chief Minister pa in international border Moreh ah kha ding alhang mipi ho in adei dan thu jong Home Minister pa ang a tahlang na ananei in ahi.

Kihoukhomna achun  chief minister N Biren Singh makai na noi a kum thum lam vaipoh na ahung umtah toh lhon a natoh doh ho nung vetding thu jong seikhomna ana nei lhon in ahi. State sung a BJP in vai ahin pohkal kum 3 lhinna kingon a Union Home Minister pa in panlah na ahung nein a ding in jong chief minister pa in temna ananei in ahi.

Chapang School kaijoulou ho Free Education peh thei nading Ministry of the Saints kihongdoh

B.Lalboi Gangte

CCpur. March 7 (ET) : Panpi ngaicha dehset chapang ho panpi thei nading’a kibol doh Ministry of the Saints in tunin Young Learners School, Auditorium mun’a official launching ana um in ahi. Kingon achun Rev. HB. Hluothang in Ministry of the Saints hondoh na ananei in chuleh Rev. H. Chungthang Thiek in Ministry of the Saints hung kipat dan tahlang na ananei in ahi. Chuleh Ministry of the Saints official launching bol ahitoh lhon in natoh doh  leh member um jat Haulienlhu Tusing, Chairman Managing Board in tahlang na ananei in ahi.

Hiche toh lhon’a Ministry of the Saints hi School kai joulou chapang genthei tah tah ho sponsored bol’a ahinkho’u khel ding tupna’a kibol doh ahi. Hiche hung kiboldoh hi Rev. H. Chungthang Thiek vision dungjui ahi naban’a March 2015 kum a Manipur thinglhang gam’a kholjin a avale na’a chapang 2 kum 8 vel anu leh apa kikhen jeh leh anu in athi khum jeh’a School kai joulou’a aum dan agamudoh’a kipat genthei chapang ho kithopi ding ti lunggel ananei pan tan ahi. Chapang neo cha ahilai’a insung hahsat jeh’a School kai joulou ho manbei’a School kaisah ahit hei nading angaito ahi toh lhon’a Foreign funding ima umlouva apoh nat val jeh’a Ministry of the Saints chung chon’a mitakip in panpi na apeh thei na ding’a ahin boldoh ahi. Hiche hi Denomination based ahi lou jeh hin lunglut nanei koi hi jong leh School kai joulou chapang ho sponsored abol thei ding ahi dan Ministry team in atahlang in ahi. Tukum akipat School kai joulou chapang 8 ho mi 7 in lha seh’a Dk. 600 in sponsored abol in ahi. Chuleh next target hi chapang 39 vel ding sponsored kibol go ahi ati.

 

ATRPFM in ADC 6 a post 750 lah dinga notice kiso vohhai ding thumna a memorandum pe

Imphal, Mar 7(ET): ADC 6 (gup) post 750 kilahna dinga niseh thuso a notification kisodoh ATRPFM in khongai dinga thumna memorandum apelut uvin ahi.

ADC khat a tohmun 125 cheh lah nadinga niseh thuso a notification kiso ahitan, ATRPFM in natoh kilah khongai ding le April leh May lha a ADC election bol dinga jong thumna anei uvin ahi. Nisim 7 nikho a ADC 6 a CEO hon post 750 (ADC khat a 125 cheh) lahna dinga ‘recruitment notification’ aso hi mipin asan louding ahi. ADC ho term hi Act dungjuiya May lha le kichai ding ahi’in, term akichai masanga election bol ding hi dan dungjui ahi.

Ahivanga election bol sanga state sorkar le ADC hon ‘recruitment process’ joh aboipi hi dihlou ahi. Advertisement kiso dungjuiya 2 years Diploma in Elementary Education (D.El.ED) (NCTE Recognition Norms and Procedures Regulations, 2002 toh kitoh) ahilouleh Diploma in Elementary Education leh Teacher Eligibility Test (TET) leh adang dang hi educational qualification chungchon a anei angaiye, tia primary teacher minimum requirement rule umlou ahi. Aboina hi thinglhang district, ADC jurisdiction a D.El.ED facility umlou chule TET certificate masa hojong aphat kichai (expired) ahitai. Hiche jeh a tribal atamjo in hiche post ho apply abol thei ding hi hahsa ahi.

Thinglhang gam a school tamtah in Manipuri pao leh pao dang ahet them lou ahi’in, ama ama pao a lekha hil thei ding jilkung lah ngai ahi. Hiche jeh a anu pao he ho deilhenna chom pehding ahi, ati. ATRPFM in ajeh chom chom jeh a recruitment process khongai dinga thumna anei ahi’in, achuti loule kiphinna chom chom kibol ding ahi, ati.

Hill Areas Committee (HAC), Manipur Legislative Assembly, Secretariat in January nisim 16 nikho a meeting anei nauva State sorkar le Chief Election Officer in akisei election hi November lha a bol dinga kilolna aneiya recommend abol ahi’in, hiche hi lou natong thinglhang miho dinga boi ahi. Christmas kon chule changvoh lai ahijeh a voter hon election a pan alah nading uva hahsa ahi. Sorkar masa hon election hi ‘law and order’ aboi tilouva term kichai masanga abol ji ahi, tin asei uvin ahi.

Athum channa a ATRPFM in Partyless election adei lounau thu asei uvin ahi. Party Less Election hi Panchayati Raj Election a kichepi ahi’in, Municipal Council Election leh ADC Election ho a kichepi lou ahi. Partyless election kibol hin status asuhnem ding ahi, ajeh chu Panchayat hi Village Authority election toh kibang ahi. Election masa a jong kichepi lou ahi. ADC leh Pradhan hohi local self government ahi’in political party a dinga ‘grassroot politics’ hi ahi, tin aseibe uvin ahi.

Hiche chungchang a Principal Secretary, Chief Election Officer, Manipur in pan alah a chule election hi April ahilouleh May lha a akibol tei nadinga action alah dinga ARTPFM in temna aneibe uvin ahi.

 

ADC election akivohchon a ahile ADC election leh ‘recruitment’ boycott bol dinga KNF-N in gihna nei

Imphal, Mar 7(ET): SoO a pang lou Kuki thingnoi kiloikhomna KNF-N in achesa March nisim 3 nikho a Manipur State Legislative meeting a ADC election umna ding lha gup phat akikah chon demna sangtah anei uvin chule TA&Hills, Manipur government noiya ADC jouse a recruitment notification ho boycott bol dinga gihna anei uvin ahi.

Information and Publicity Secretary, Gou Kuki in thuso aneina a Cabinet kilolna hin state sorkar in thinglhang gamkai ‘politics’ leh adang dang a akhantou ding agel khoh lou avetsah ahi’in, hiche hi kiloikhomna dinga pohnat umtah ahi, tin thulhuhna demna sangtah aneiyin ahi.

Manipur District Council Act, 1971 Chapter III (13) ‘Terms of Office of Members’ dungjuiya tua ADC member election hi kum 5 term dinga June nisim 1, 2015 kum a um ahi’in, June 2020 teng term kichai ding ahi. Chule June masang a election bol ding ahi’in, sorkar in phat atepchon hi kisang louding ahi, tin jong aseiyin ahi.

ADC election kon a TA&Hills noiya um ADC 6 a gangtah a recruitment notification akisodoh hin tua ADC member hon election a sum thahat aman chah theina dinga aguh a sum ahol nau kicheh tah a avetsah ahi’in, hiche jeh a sorkar in mipi sum guh kipehna umlouva election dihtah a abol dinga temna kineiya chule recruitment jong election kon a bol loudinga temna aneibe uvin ahi.

State sorkar in District Council Act, 1971 Chapter III No 29 (Functions of the District Councils- Articles i-xvii) tuni chan a achepi lou jeh a KNF-N in alunglhai louna thu aseiyin, sorkar in tu term a kon hiche hi bulhing set a achepi ding chule thinglhang gamkaiya imalam jouse a khantou machalna aumding akhohsah dinga temna anei uvin ahi.

Election hi ahung lhung ding lha 6 akivohchon be a ahile changvoh lai chule promotion exam hotoh kitoh ding ahi’in, voter le simlai ho sangtah a asuhboi ding ahijeh a sorkar in Cabinet kilolna alahdoh a June 2020 masanga ADC election abol ding hi thilpha hiding ahi, tin jong asei uvin ahi.

Sorkar in Cabinet kilolna alahdoh louva, election avohchon a chule election masanga recruitment (post ong alah) abol a ahileh KNF-N in ADC election chule recruitment boycott abol ding ahi’in, hiche jeh a thilse alhun a ahile sorkar mopohna/themmona hiding ahi, tin gihna anei uvin ahi.

 

Coronavirus akon kivenna dinga Indo-Myanmar gamgi kha ding a MCC in ngehna bol

Moreh, Mar 7(ET): Coronavirus natna akon gamsung le mipi venbitna ding tohgon toh kimat a Tengnoupal district Moreh a Indo-Myanmar gamgi kot ho agangthei pen’a khah dingin Moreh Consumers Club (MCC) President T Seiboi Haokip in Manipur Government leh Authority ho heng ah ngehna abol tan ahi.

Tunia Moreh a MCC office mun’a Seiboi in thusoh miho akimupi na achun tutua vannoi hotling Coronavirus natna veiho hi Myanmar gamgi Moreh akon bailam tah’a hunglut thei dinmun a aumtoh lhon’a gamsung mipi ding gelkhoh na in akisaipi authority hon agangthei pen’a Moreh gamkai bouseh hilouva Tengnoupal district huopsunga Myanmar toh gamgi jouseh district mipi ho gelkhoh najal a khah dingin ngehna anei in ahi.

Aseibehna achun Manipur Health department in Indo-Myanmar gamgi kot 1 leh 2 a Coronavirus natna venbitna dinga natoh anei toh kimat a kipahthu jong ana phongdoh in hinla Myanmar hi Coronavirus natna hung kuondoh na China toh mile 1,400 saova kigamgi ahin, China miho chu Myanmar a Zalen tah’a che le vahle ahi toh lhon in Natna hi bailam tah a Myanmar ahin pohlut thei uh ahi toh lhon in Myanmar chu India toh kigamgi ahi kit jehin natna hi Moreh akon bailam tah’a hunglhung thei ahi jeh in gamsung mipi ding gelkhohna jeh’a authority concerns in agangthei pen’a gamgi hi akhah ding ahi ati.

Natna hung kuondoh na China akon mihem keo hilouva van manchah chom chom niseh a Myanmar hunglut a hiche hochu India Moreh hunglhung pai jing ahi jeh in natna hi bailam tah’a Manipur adeh a Moreh hunglhung thei ahi jeh in boina alhun masanga kivenbit chu damna leh sochatna ding ahi jeh in MCC ngehna hi Manipur Government leh akisaipi Authority in agelkhoh a gamgi hi akhah ding ahi ati.

Chuleh Indo-Myanmar gamgi kot (gate) 1 leh 2 a Coronavirus natna khuolchilna um jongle hiche kot tenih bouseh hilouva official hetpi na jao louva Myanmar leh India kikom matna thei lampi hi Tengnoupal district sunga mun tamtah aum kit in Kwatha akon T Minou kikah ajong alang lang a hetpi na jao louva sun leh jan a kijotmat thei jing ahi tin jong MCC President chun aphongdoh in ahi. Gamsung leh mipi Coronavirus natna akon venbitna dinga MCC in ngehna anei hi gelkhoh a district sunga CSOs hotoh kitho a MCC in mipi dam nading leh bitna dinga thulhuhna kinei ding ahi tin jong Seiboi chun aseibe in ahi.

CKKP lamkai nanoi’a KKP Khanglai hon Lamka khopi sung’a Cleanliness Drive ananei

B.Lalboi Gangte

CCpur. March 7 (ET) : Mizoram Presbyterian Church Synod, Manipur area noi’a Tuailai Central Khristian Khanglai Pawl (CKKP) lamkai nanoi tunin CCpur Lamka khopi, Tedim Road dung’a Cleanliness Drive ananei uvin ahi. Hiche phatsung in nungah gollhang 1000 val in pan anala uvin ahi. Chuleh CKKP gonnan achesa March nisim 5 akipat in Mata kho’a 11th KKP General Conference anachelhah jing toh lhon’a tuni “Clean Lamka, Healthy Lamka” thupi pansa’a Cleanliness Drive ananei’u ahi. Hiche Conference hi jing (March 8) nikho chan chelha ding ahi.

Hiche toh lhon’a Cleanliness Drive kipat masang in Police Station mun’a flag-off programme ananei uvin hiche phatsung chun Rev. Lalngaihawma, Leader Central Khristian Khanglai Pawl (CKKP) in ana lamkai in chuleh Rev. R. Lalhmingsanga, Administrative Secretary, Manipur Area in houlim na anei in chu jouvin Rev. S. Lama Vaiphei, Coordinator, Manipur Area in taona anei toh lhon in Cleanliness Drive ana kipan in ahi. Administrative Secretary in aseina’a gamsung then na ding’a hi mitakip in mopoh na anei cheh in chuleh khopi sung then hin mitvet in vethoi na leh tahsa damthei ding ajong phachom ahi jeh’a KKP in khopi sung suhtheng ding ti lungtup akinei nachung chon’a tuni’a tohmolso’a um ahi. Chu naban’a gamsung thenthou leh hoina ding’a vaihom hon pan alah nao mipin anungthop cheh ding ujong poimo ahi ati. Aman aseibena’a ichennao gam eima in iki suhtheng lou leh koima in eihung suhtheng  pehlou ding’u ahi jeh’a Pathen tahsan leh ging chate ihi nao chung chon’a thenthou nahi chepi ding in mipi temna jong anei in ahi.

Kimanchah na phatsung in nungah gollhang hon Lamka khopi thenthou na ding’a mitakip in mopoh na kinei cheh ahi tin kholhang anasam (slogan 3) utoh lhon in Cleanliness drive anapan uvin ahi. Cleanliness Drive achun KKP member khanlai mi 1000 val group 2 in akikhen uvin Police Station akipat Tuibong leh Lanva lang amano uvin, Tedim Road dung solam leh lhumlang pang’a Plastic jaona nen umho jouse anachom theng uvin ahi. Nen achom khom’a um ho jouse ADC/CCpur sanitary truck mang cha in anapodoh uvin ahi.

Alangkhat’a KKP in Cleanliness drive anei phatsung in Traffic Police hon jong kithopi na anape uvin ahi. Cleanliness drive kibol lona ajeh hi mipi lah’a thenthou na poimo dan vetsah naleh mitakip in then nalam pang agelkhoh ding deisah naleh Khopi sung’a cheng mipi ho tahsa damthei na nalam ding gelkhoh na jal’a KKP natoh achelhah pi ahi.