Jan. 7-9, 2016 – My Shodhtatra to Henglep Area (Churachanpur District) By:...

Jan. 7-9, 2016 – My Shodhtatra to Henglep Area (Churachanpur District) By: Alun Haokip

146
0
SHARE

Thu makai:

Pu. Amos Chongloi in foreign country i.e France a thil mu ho a kona eimi te kihil nathei tah tah article phabep ahin jih kasim doh in ahile kalunga chouna (challenge) thah khat ahung pengdoh in ahi. Hichu ahile Eimite adeh a simlai tampi hi India sung State chom chom le Foreign mun tampi a I-um taovin Ipu Ipa gam thinglhang kochong a hinkho mandan tampi manga mat a jong nei talou, Ipu ipa gam jule va ham na, hoija uma koi khut noija um kahim ticha jong kihet talou Zalen taha a hinkho mang banga ki ngaito ahija ihet lou kaha a mi khut noija soh le kol banga tanga khosa kamu doh in ahi. Hiche article a katah lang nom pen le kabi doi chu (i) thing lhang kochong a laizon cheng hinkho mandan le kineh jondan (ii) Igam inam kitho kitna dinga thinglhang kochonga laizon hoa kona kihilna, vilthah le suhkhah angai dan (iii) thinglhang kochong ichen na hou det tah a bulphu a khantou machal (Dev) sahna dinga thinglhang lou le ai, khut them, lou lho thingpoh, kivah dan khel angai dan (iii) Govt. scheme jenga kingap le town le city ho kichou lut le themjil, I Zalen gam a kikhel na tah tah polut joulou dan, chu sanga ‘achul tasa Zogam noukit nadia iti pan ilah diu hitam tiho hi itah lang nom u ahi.

Shodh Yatra kiti thugol hi Hindi pao ahin Eipao sanga English joha kicheh joding ham katin a ledoh na hi ‘journey of exploration, journey of search for knowledge, creativity and innovations at grassroot level’ ahi. Shodh Yatra hilchet na chule adoi le atup ipi ham ti hi anoi lam a kathil mudoh ho a konin kivet sah joleh kicheh jo ding ham katin ahi. Chule Zalengam thucheng kagah man hi Chin-Kuki-Mizo te chenna Zogam thing lhang kochong a Zalen taha Ina chen nao gam tia kaman ahin, politics thingnoi movement toh metha louding tiem ahi.

My Shodhtatra to Henglep Area (Churachanpur District)

Tolbol 12 – 17 2013:

Tot bol them a Zalaithang Pu. Ngamsei in ana sei Henglep School bangho kholai lenga ache nagam, Henglep SDO Office Tuibong Khopi (Lamka) a kaiding joh kilem johna gamsung “Henglep gamkai” chu anou thah kitding lamvet nan India sunga kolvom Scientist phabep, Brig Retd chule foreign a kon Japan mi, France mi, USA mi, Germany chule khut them louthem mi tampi jao na in mi 90 vel, a itih a kahet khah lou nao chu  Tolbol 12 – 17 2013 sung in kenglam vih veh, kang(gari) jao louvin National Innovation Foundation under Department of Science & Technology Govt. of India tohgon na noija Prof. Anil K.Gupta IIM Ahmedabad V/P National Innovation Foundation lamkai nan kana kijot uvin ahi.Ipi a kipan a ipi a kijou ding ham kahe pon, kache nao toh kisai ja ngainom um tah tah, kagim nao, tampi um henlang Kuki Inpi Churachanpur, Kuki Students’ Orgn (Henglep block) MDC ho adeha Pu. Paolal Haokip ho in khut le keng tin le ha tho a pan lah jal lolhin na ho jih dinga lom um jongle hiche jihna le simna a phat suhmang sangin kathil mudoh ho hin tahlang mai inge.

  1. Eihon angai ango a igel u tampi umjongle kholgam (gamdang hon) lamdang deuva amu doh khat uchu ‘numei hon jalen taha a avon nom nom aki von theija, numei pasal toukhom, dinkhom lhatkhom pasal toh kibang a anei thei, jalhang kikhop naho a jong lhangphong taha adei angai asei thei hi lamdang asah khat ule machal na kalbi a dinga thilpha lentah khat ahi’.

Prof. Anil K. Gupta V/P NIF in nagam uhi ‘resource rich economically most disadvantage region’ ahi ati. Pathen in eipeh kham kham kalhoh neisun in kuptah in achunga thugol hi kangai ton ahile hitei jinte tin katah sanne. Shodyatris khat Chetan Patel in keiho Gujarat gam chu nilhum a lam ijot jongle hampa/thingphung jat som kal aki mupoi ati ahi. Chule muchi chivo khat phudoh nadinga jong hahsa tah le gimtah a hal le twichap angai dan le ama cham a ima apou loudan asei jin ahi. Ahin Innovative Idea nei gam ahi jallin agam nasa tah in akhang touvin ahi. Vetsah nan ‘lou bolna ding tuilam ala uvin gam satna gam ahi jeh in achung chu solar plate a akhu kit uvin ahile agam sunga dinga tui jong neng chule meivah (solar light) jong neng tah in amang thei uvin ahi. Chukit le Chetan Patel in asei kit na Gujarat CM Pu. Narendra Modi in kal khat sung in pungkal sung khat akah jin hiche hunsunga chu milham adeha loubol, chanvou changjou louhon phone chom cha abolla aboina asei thei ahi dan jong asei jin ahi. Eiho a la atam jo MLA/Minister ahung hiteng akot kile tam ji ta……… I pu Ipa gam vang itou mun jeng a jong hampa/thingphung jat 10 val aki mun thei ineh jouteng amu(seed) ipai mang jongle amuna akeh jengin ahi. Hinlah ‘ibolla economically backward (khangtou machal joulou) ihi uham? Kivai poh kitup loujeh ham? Agam mipi Innovative Idea kivat jeh ham? Ahilou le ipi jeh ahi tadem? Gelphat akul lheh jeng tan ahi.

Keima mimol lunggel a kamu doh khat chu ahile ami la gender liberal (numei pasal dinmun kilhang lheh jeng), natural resource (theiga songga, hampa louhing) la akhop inei kit uvin ahile ipi chu lhasam a khantou machal na in ilonvuh jou lou-u ahidem ngaito kham set in kagel in ahi. Kivai pohdan (governance), accountability (muthei ja natohdoh), ownership (aneitu hina) ho lhah sam jeh hiding ham tin kagelle? Nangla …………………..!Mundang gamdanga thil lamdang deu hin semdoh thei (innovative ideas) semdoh/ lung suhto nei imu teng le lamdang san aki pahcha ji lheh in ahi.Ahin eiho gam jenga jong chutobang chu tampi aum tan ahi. Vetsah nan eiho Manipur gamsung jenga jong innovative chom chom double shuttle handloom (kon akop a kikhong thei), indan chunga Sintex um tui adim teng acham a kikhah thei jeng thil semdoh, gas khella kimang thei changvai akon anhon na, adg. tampi aum tan National Award changei mujong aum tan ahi.

Eiho gama jong kipha sam ahi dehpon ahi. Vetsah nan tuchung Shodhyatra chun H. Paokholiem Lhungdim Molnom Village in drum tin a kona kisem doh anhona chu ahung hochu apah cha lheh uvin ahi. Hiche drum tin a kona an honna hi khoppi ho a anhon na a manthei ahin khat vei hona Kg 50 vel hon thei ahin ahona pat amin sung hi pung 1 sung ahin aban a hona vang hi minute 45 vellin aki hon minthei jin ahi. Amin kasu miltan sopiu Pu. L.Tombing (kahet dan) Bungmoul kaki mupi na uva Khoiva ju peina asemdoh, tuibuh semna apohdoh thah, Khuga dam a khutna kisem motor boat, Japan gal vanleng asem, thing hehna machine asem dohho lekha bu a aso chule YPA, SSP in Award apeh ho jong chu atah lang in ahi.

National Innovation Foundation (NIF) in atup khat chu ahile hitobanga innovative idea neithei le semdoh ho hi iti lampanga panpi a ama ho ding le japi dinga kivah nale phat chom pia pang thei ding ham tihi ahi. Hiche thu toh kisai ja kasei nom chu ahile eimi ho laha hin thil thah podoh khat aumle kidop to le kipapohna hi alhasam in kamun, chule thil thah podoh hon jong e atile semhoi bea mipi hetsah a hiche kihinso nale japi dinga phatchom sah thei ham ti gutna lhasam jep kit in kamun ahi.

Tua pat innovative invention/idea neiho japi in tilkhou le tosot na inei uva chule hitobang semdoh thei hon jong iki jahmat uva ito lampang mimal le japi phatchom pi thei ham tihi pan ithah lah diu hi lamvet ahi.

  • Kamu doh dang kit khat chu ahile bandh aum jing jeha a gam mipi ten genthei na tampi toh jongle le amaho le amaho kihinso thei (self-relient) na aso doh kit uvin ahi. Mi atam jon inkhon(hon) le lou anei cheh uvin ahi. Alhangpi a muchi atu hou ahile, dahdel, melcha, chng(bu), ahlu, thieng, malcha, khamen, be jat chom chom, mai, haithei, jonglha, ahi. Chule agam sunga gam laha keh thingna louna tampi lou le aija kisem thei aum kit in ahi. Chubanna gancha chom chom kelcha, vohcha, uicha, bong, loi, vatot, ahcha, jong avul kit uvin ahi.

Kasei nom chu honlei, lou, gancha avah uchu ahipon, akide thei lou (aki chimat theilou) gancha le muchi chivo aki vulkhom sang hin gancha hohi masang ipu ipa ten gamkhet(reserved forest) ana nei bangin ‘reserve land (gambeh khat) kisem henlang gancha hi kho mipin munchom a kikul khup henlang chule loulho thingpoh jong asuboi beihel in kibol thei le or honlei munchom gancha phah jou lou na a bolla gancha ina vul tho ding. Ajeh chu mun tampi a gancha le inkhon kisem khom a khatjoh sang jong kiphat chom pi joulou kamun ahi.

Pu. Hempao Touthang N. Pangsang haosapu in go (bamboo) a kona ama khut taha asem doh ‘go-hal’ aphat dan chu shodhyatris ho koma avet sah in lamdang sa le vetchim tih nei louvin Yatris hon ave uvin ahi. Hiche hal hi test boldin NIF in tuhin Sabhav SRISTI Sanshodan Laboratory  test abol laitah ahi. A result hung potvah ding ahi tai. Ijem tia hiche test hi valid (atah) ahi leh mipi manthei dinga hung kisem doh ding patent kiti (apodoh pa min tahlang le pompehna) chule mipi adeha asempa (apodohpa) in aga aneh ding ahi. Chugoh hilouvin mun chom chom a thinglhang louthem chom chom hon loule ai (louchop) thingna louna a kona kisem doh ho apodoh hou vetsahna jong anei uvin athil hetjao nao hetpeh na le papoh nan Certificates jong aki pen ahi. Koi tobang thing lhang lou le aija thepna nei aum le kihet toa anatoh athil bolna a lampi komu peh thei ahi. Mipi het dinga athil semdan ho atah lang nomlou jongle aguha (confidential) neipia athil manchah loule ai aman chah ho apha chom mong ahile Test kibolla adih monge ti photchetna aum teng le panpi na le kipa man NIF in apeh ji ahi.

  1. Kho khenkhat i.e Lhanjang (Japan gal a ana um panta) kho mipi hotoh kimu to na a World War II jouva pat gamchom mi koima akho ahung lut loudan thu asei juvin ahi. Lhanjang kho a tehse Upa kum 90 chunglam mikhat Pu. Sokhojang Kuki (Haokip) Japan gal ana sat thu asei jin chule Uniform le Medal ho jong chu Shodhyatris ho henga avetsah in aki von in ahi. Hinlah datmo le dipdam umkhat chu pension amupon ahi (jou jouva INA pensioner bon uma iti ……) Tehse khat in asei nakit a Japan gal (World War II) jouva pat nat le sat vetsah nan Japan nat (tonat) hung umdoh in asei jin ahi. Chugoh hilouvin kidang tah kit khat chu Japan gal khanga kho ana um tasa In 60 val umna kho a chu Govt School Class V chan jeng cha jong aum naipon ahi.

Kalung in kangaito ving veng in hitobang kholui le in 60 val umna kho hi iti dana Govt. a kon chan dinga lom chanvou i.e School, adang dev prog ho chang lou ahi dem. Koi ngoh ding hitan tem? MLA…… akho nei ten asei lou le iti ahet ding, MDC/Social Activist………. Akho mite agel khoh loujeh in aki lep thei kit dem, Haosapu,………… koi angoh tadem ..MLA/MDC etc. Khat le khat kisemo to a kanding aum pon agui abah holdoh a semphat vah ding hi akul tan ahi.

BIODIVERSITY COMPETITION

Aki jin na akho akho a chapang (simlai ho le asim jou talou) ho toh Idea competition le Bio-diversity competition aki neijin noija ho hi Idea competition a chapang hon Idea ajih le asei hou chu ahi. Koi tobang semdoh thei jeng hihih jongle Idea asei le Idea chu NIF a thot a IGNITE competition a thot Idea hoi hochu National Award amu theiju ahi. Idea hohi tonso na dinga Scientist hon aboipi kit jiuva asem doh jiu ahi.

Chunga ho goh hilouvin chapang tampi kidang tah in ngaidan chom chom anei uvin ahi. Seigoulen kiti chapang khat chun lamdang deu tah in hitin ati ‘bottle alangtoa kihong thei, bahche (scissor) alang toa chena umding, scooter anung kang ni’ ahile eiho laha hiche tobang hi simlai chapang khat in hin podoh le ipahcha diuvem? Anui sat diuvem? Atosot diu vem? Aeroplane semdoh te ucha Wright Brother chapang teni chu ana nuisat ujongle atah aso lhon tan ahi. Hitobanga simlai chapang Innovative Idea neiho hi tosot thei jilkung, minu/mipa, japi lamkai ijat ium tah uvem…………..

  1. Agamkai aki chena mun ho theng sihseh le damthei hoi taha aum chu melchih theitah le kihil nathei tah ahi. Agamkai khantou machal na lampanga lhahsam na mun hijongle inson a junbuh le ehbuh anei uvin ahi. Shodhyatri ho ana gel dan uva chu agam hi thenna lampanga lhahsam jeha nat le dammo tampi umdinga ana tahsan u ahi. Songpi kho mun a chun kolbuthei na (pomegranate leaves) a kisem/ ki-om cha kadon uvin ahi. Khotuh kho jong hin school neilou ahin school kaina ding alhom pen in Km 5 vel lamjot ngai ahi. Hiche kho neocha kho mite milem nale jindot them dan hi kithang atpi le kipa umtah ahi. Vailhah kon in kho miten Shodhyatri laha ateh dom cheh hochu tenggol (walking sticks) khatcheh ape uvin ahi.

Lhanjang apat P.Sejol kijot matna ‘bah-kol’ a Shodyatra ho agam man chun Ng. Lhing Nei Chan Mate deichom a Chachan ti kikou nungah feltah nuchun P.Sejol kho mite SMS a agam man thu ahet sah chun P.Sejol kho mite hon (group) 3 a kihom in gammang lah a chun sal le meivah choi jin eihung holdoh peh uvin ahi. Chachan hi Hengkot khomi Pol XII simlai ahin Shodhyatra ho laha hungpang ahi. Seithei lou khop in Ng. Chachan le kho mite chunga kipa thu aki phonge.

Nilhah in vaigei le gimle chol jeh in deibangin kho mite toh kimuto theina um tahih jongle ajing nikho matah in thanom tah in kho mite toh kikhopna aki nei jin ahi. Idea competition a jao chapang neo cha ho chu kipa mana globe agah kipeh tah chun gangtah in amaho gamkai don chu ahol ngal jeng uvin ahi.

 

hodyatra achaina Tuilumjang kho aki phah chun khut them bol mikhat in akhut taha asem khut them jat chom chom ho chu avet sah in ahi. Lasa them tah Gl. David Mate in mipi ho anga ngainom umtah lasahna aneijin ahi. Gl. David Mate hi tu tua Delhi a simlai ahi. Khomi dang khat in namut abol kit in shodhyatri ho dinga a itih a amukhah ngeilou vetnom umtah khat chu ana hikit in ahi.

Thu geiheh:

Agam sunga phat masa lam in kitha kimat nagam ana hijong le Shodhyatri agam mipi lunglut na dungjuija japi dinga ‘community Innovation centre’ khat semdoh a hilai muna chu agam mipi hon kijil na aneija chujou teng akho akho a apoh doh thei diu tihi tohgon ahi.

Ibi doi-u (i) thing lhang kochong a laizon cheng hinkho mandan le kineh jondan ihe taovin (ii) Igam inam kitho kitna dinga thinglhang kochonga laizon hoa kona kihilna, vilthah le suhkhah angai dan itahlang taovin (iii) thinglhang kochong ichen na hou det tah a bulphu a khantou machal (Dev) sahna dinga thinglhang lou le ai, khut them, lou lho thingpoh, kivah dan khel apoimo dan ihe taovin  (iii) Govt. scheme jenga kingap le town le city ho kichou lut le themjil, I Zalen gam a kikhel na tah tah polut joulou dan ihe chen taovin ahi.

Achuti le nangma hoilai muna um/cheng nahim, Manipur phaikolgam, thinglhang gam, India sung state chom chom Delhi, Shillong, Pune, Bangalore etc. ahilou le foreign/gamchom a um hijong lechun Igam (Ipen na le Iki vuina ding gam) Zalengam a nouthah kitna dinga nangin ichan geija na khohsah a pan la dinga naki got em………?

 

Nakho naveng, nagam kai sunga thinglhang damdoi hethem le thil lamdang deuva semdoh (innovation) aum le noija kipe banga hi kijah mat thei ahi. NIF Ahmedabad honeybee@sristi.org. Laishram Y. Imphal – 8974777860, Helum Ccpur – 9612533066, Lun Haokip Sadar Hills/Spt – k.lunhaokip@yahoo.com or kanamjem@gmail.com

* an MSW and Scouting Fellow NIF/SPTWD Manipur.

[1] Koi tobang SMI a chapang ho panpi nom aumle : director koma smi_bijang@yahoo.com or lhingnu@yahoo.com