Jan. 6, 2016 – THU CHOM CHOM (MIX- MASALA) By: Thanglam...

Jan. 6, 2016 – THU CHOM CHOM (MIX- MASALA) By: Thanglam Manlun NGV.

185
0
SHARE

HISTORY : History kiti chu phat chesa’a thilsoh, mihem khat, namkhat ahilou le gamkhat natoh thilbol ho  hetdoh thei’na le simdoh thei’na chu history kiti ahi. Van-noiya cheng chitin namtin’a miten ama ama nam ahilou le pule pate chondan khandan ho akhang akhang’a miten ahet theina ding’in jihtho thusim aneicheh’in ahi. Ahin eiho kuki chate hin ithusim hou jihtho’a nei louva lungchin’a  ineitho jeh’un ihatnao hihen ijon’nau thusim hijong le mi hetdoh thei ding’in isemdoh jou pouvin ahi. Thusim (history) kiti hi namkhat titahlou insung khatjong khangui thusim kicheh’a neilou chu mi-noise achang’in ahi. Tuni’a kuki te mi-noise’a ium nahou lah’a khat chu ithusim hou mi het theiding’a isemdoh joulou jeh’u ahi. Hijeh’a chu isopiu Naga hon nomadic einati lou ahi. Inam sung’uva Kuki Historian  (L) Dr.TS Gante hi kuki nampin pachat ding’a kilomtah mikhat ahi. Aman 1991 vel’in  “ The Kukis in Manipur” ahinjih’in ahile ichan ham’in mihet ihung hidoh’un ahi. Tua jong ama tohban ijop’uva National ahilou leh International level’a Kukite khang thusim idopsang diu angaiyin ahi.  Kalung don’na khat chu Manipur’a kicheng’a India mi kihiya Manipur history ahilou le India history’a kukite koima hetphah’in akiumpoi tia lung mong  tah’a iumjeng theiju hi kalung don’na khat ahi. Manipur history ahilou le India history’a kuki te apanlou le koi mitmo’na   hintem? Ole meilheiho ingoh diuham? Koima ngohding aumpon athusim neite mitmojeh ahi. Tuni chan geiya ithusim’u ajaopoi tia ilung moh den’uva ithusim hou ikisem tup lou’ule Nomadic ban’a foreigner tia min suhno touno  eilhah’na diu nailam cha ahitan ahi. Ipi ding’a Manipur history ahilou le India history’a ipanda diuham Manipur leng thusim hi kuki chothe chanu khat taiguiya hung kipan ahi ihet diu angaiyin chule India chamlhat’na ding gaal bol Subhash Chandra Bose noi’ah pule pate anapangu’ve tijong ihetdiu angaiyin ahi. PULE PATE GAALBOL : India’in chamlhat amu masang’a vaihom British te vaihop’na kuki ten anadou dal’le tihi British ten aphakhop set ding’a thusim eina koipeh’u ahitan, aban sujomding athusim neiten isutjom loujeh’uva midang’in eihetpeh louvu ahi. Hijeh chun tu khonung hijong le pule pate gaal bol thusim amahthah lou’na din pan lapan taute kiti ahi. Pule pate gaal hat thusim anatoh umlouva kum 95 lang ihin selguh jeh’uva min ahet’na lhasam ahi. Hijeh’a chu  kuki unity day tin nikho khat kimang henlang hiche niteng chule tulai khantou’na toh kilhon’in news paper, television le internet mangchan pule pate gaal bol thusim kisamphong le ipiding’a min ahetda dingham. Tunung’a jong anatoh umlouva thusim lungchin’na ipohtho peh’ule kuki independence war memorial hall isah’u jong pan’na bei hiding ahi. Anatoh umlouva pule pate lim ahilou le agaal manchah hou khai’na ding mai mai ahile vang ithusim’u koiman eihet peh lou dingu ahi. SIX SCHEDULE : India constutition article 371(A-Nagaland),(B-Assam) chule (C) hi Manipur’a ahin, hiche India constutition article 371(C) hi tribal miho venbit’na ding’a kisem dan ahi ti ihesoh kei’uvin ahi. Hiche danhi Manipur’a pilhing’a ache’na ding ahahsan ahi, ajeh chu amangcha ding tribal ho ikilung toh theipou vin ahi. Manipur kivaipoh’na dan noiyah Hill Arias Committee akisem’in ahin ikithuto loujeh’un constutition’in apeh thanei’na neokhat jong ajedoh thei pou vin ahi. Alangkhat’a 1972 lang’a lamkai masa hon kilhep lhah’na ahi ti’a ana paimang sau  district council kivai hop’na jong gelkhen’na umlouvin achop le amat ithouvin, tun power imacha eikipepoi tin ilung phatmopi kit’un, ahile hoilaija chu gang chel’a six schedule ideldoh diuham lungdon umtah khat ahi. KUKI BLACK DAY : Kuki nam miten mujin nikho tukum’a jong ihin manteidiuva um ahi. Black day thu’a hin lung-gel jat chom chom kumseh’in iseijun hiche ho jouse hi kinel’na ahipon nampi ngailut’na jal’a phading ham tia lung-gel isekhom nau ahin aphamo pon ahi. Tuni chan’a nampi ngailu aching athem hon Black day thu isei nauva hin mudoh ni kaneiyin ahi. 1. Cham’na mitvet 2. Lethuhding mitvet  hicheteni mitvet’a hi kumseh’a akinel dan’a ium’u ahi. Tuni’a ken kaseinom chu ahile Nagate gaal’a lethuh ding lungel neiya iman’u ahipon ahi. Nagate chu ingaidam sau ahin hiche ingaidam nau chu akisan thei’na diuva alampi isempeh’u  ahin hinla tuni chan’in ingaidam nau akisan nom pou vin ahi. Mi kangaidam tai kitihen lang ingaidam pan hehihle apan’na umlou ahi. Hijeh’a chu kihou’na aum’a kangaidam tai iti’na diu lampi igonpeh nau ahi. Hiche ban’a ken kadei mitvet khat chu ahile political view’a ivet diuvin kadeiyin ahi. Naga ten amaho politics noiya dale nop thu umlouva iumnadiu tohgon ahin nei’uva donle kai (Nagaland tax) eipohsah nau idoudal phat’uva gaal’a eihin bol’u ahin hiche gaal hi politics gaal ahi. Hijeh’a chu kuki inpi’in Naga te thu nasei lhah masang’uva Kukite thu nasei chai masat dingu ahi tia memorandum 60 vei apeh’u ahitan ahi. Hiche hi kuki Inpi’n political movement inei nauva eikithopi nau lampi khat ahi. Ahimong’in thil khat patdoh’a alhum alhah umlouva ngah kiti hi thildih jong ahipon chule mi noise ichan natheiyu lampi khat jong ahi. Aphat sot’hen pal jong le thil khat chu akipat doh le akichai’na jong umtei ahi, hijeh chun ngahlel poute nikhat le akichai’na hung um thou thou ding ahi.         NAGA TE TOH PANKHOM DING : Tulai hin Naga te toh pankhom ding thu iseipoh jap jap jiuvin lamkhat’a igel’le dihtah ahi. Naga tetoh pankhom ding hi koima ada umpon tin chule koima anom jong umponte, ajeh chu alampi akito leh adading koima aumpon ahin tuni chan’a hi alampi kitoh theilou ahi. Naga tetoh ipan khomu le ihat diu jong lung-gel thei jousen ahetding tahsan ahi. Ahin akhoh khat chu min eipan khompi nom lou le iti kipankhom dingham lungdon umkhat ahi. Naga ten eipankhom pi nom pouve ti photchet’na chu gaal eibol khum’uva gaal kichai jouva jong cham’na deilouva UNC leh Kuki Inpi kihou’na NSCN (IM) in akha chu aphotchet’na ahi. Eipankhompi nom’u hile kihou tohna jal’a thil jouse chamna’a chaithei ahi. Ikah’uva cham’na umlouva pankhom chu thil hahsa ahikeu hilouva tijat um le kipal’na thei ahi. Cham’na kadeinai kiti henlang thile mantoh thon anoi’uva kikithol henlang kiki thol khel leh toltoh eichotpha bep ding’u ahi. Hijeh’a chu eihojong nam khat ihi nauva ikeng’a dinding ingaito dingu ngaiyin  ikengu’va idinthei nau chun mi kivop-pi nom’na keu hilouva jana jong ichan dingu ahi. Mito pankhom kiti hi athu akito lou le thina ahi. Hijeh chun kilung toh’u hitin kengkhat’in ding leuhen eiho ding jong Pathen’in alampi hingong tei nante ti ikinep lel loudiu ahi. NAM POLITICS BOLHO : Tuhin ipi seijong leuhen kinep’na ineisun’u chu India Govt. toh nam sepai hon kihou’na aneidiu hi ahipen’in ahi. Kihou’na umlouva hoilaija chu six schedule ithum diuham? Tu’a ingaichat pentah’u chu India Govt toh kihou’na neiding hi ahipen’in ahi.  Ahin hiche’a akhoh khat chu nam sepaiho kengkhat’a adinkhom theilouvu hi ahi. Govt. toh SoO ineinau phat akichai seh’a suhsaobe’na ding’a iboi jingu hi Govt. gelkhoh thei dinmun’a iumlou jeh’u ahi. Tunung’a bolkhel bolkhah ahilou le thumkhel thumkhah thu iseijuva iki oimo touva phachom ding aumtapoi, hijeh chun nam lamkaiho kilung toh’un lang kengkhat’a din ding ngaitou vin achuti lou le SoO hi  Ui-SuU hungsoh thei ahi. Achai na’n “ united we stand, devided we fall” kitihi athah’in geldoh kit’ute, ilhuh masang’a ilhuh lou’na ding’a kituhto ding aphan ahi.