Jan. 4, 2016 – MANIPUR’A KUMTHAH HUNG LHUN HIN By: H. Goutinlien...

Jan. 4, 2016 – MANIPUR’A KUMTHAH HUNG LHUN HIN By: H. Goutinlien Gangte (goutinliengangte@gmail.com)

198
0
SHARE

Kumlui 2015 vang nahchang sal in akichaitan, achesa kumluiya banga 2016 kumthah hi gamsung mipi dinga kipana kumthah hihen tihi Manipur mipi kinepna hitei ding ginchat ahi. Manipur dingin kumlui 2015 chu boina chom chom le hahsatna chom chom in ana lhun khum adeh a ILP thu jeh in kipah na kum tia lahthei le gelthei ahi pon, ahin kumthah jong hi itobang ahung hi ding Pathen tailou leiset mihem koima ahemasa le aseithei aumlou jeh in dinmun ding seithei louvin iding uvin, ipi chu hitah leh kumlui che manga 2016 kumtha ilut utoh lhon uvin ijakai semthei le umsah thei Pathen in gamsung le mipi chunga cham le lungmon naleh Lou in gah tamtah asoh kum bana khantou le machalna ahin lhun kum ahi ding kinep na nei pum in Eimi Times sim jouseh kumtha chibai/salam kahin bol’e. Kumlui vangchu Manipur dingin cham le lungmuon kum ahi pon, kumbul akuon thilsoh jatchom chom tamtah ana soh in dan le thupeh dinmun in jong phat nalang sangin setna lang amanoh keo hilouvin, Thongju le Thameiband by-election akuon politics dinmun a jong hatah in kikhelna asohdoh dan muhdoh thei in aum in, gamsung thilsoh atamjo chu kana le hagelna, hamsetna leh tijatna, lungkham nale hahsatna kum a ana um in, adeh in Inner Line Permit thu’a mipi kiphin na jeh in phaicham a simlai khat le thinglhang a pasal hangsan 9 in thina ana tuoh uvin, hinla thina tuoh pasal 9 ho kivui louva kum agalkai ahi jehin boina hi kum galkai tina ahi jeh in tukum dinmun hi seithei louvin aum in boina hi machal cheh cheh ding tahsan aum in ahi. Manipur government in August nisim 31 nia assembly a state sunga ILP chesah theina dinga bill 3 passed ana bol chu anti tribal bill in ahung kisep doh in hiche bill 3 chun thinglhang gam nasatah in ana hotling in adeh in Churachandpur district sunga mipi kiphinna nasatah ana um in Manipur khangthu a melchih thei din mohna neilou simlai chapang jaonan pasal 9 in thihna ana tuoh uvin MLAs le Minister ho inn ho ana kihal lhan, kumluiya boina hijong le thina tuoh mi 9 ho akivui lou lai jeh in boina chu suhlhap lou le kinop tuohna umlou ahi jehin boina kum galkai ahi jeh in maban a dinmun ding seithei lou in ium jing uvin ahi. Langkhat a galguh bolho khansetna in jong phatna lang amanoh pon June nisim 4 nichun Chandel a galguh bolhon army jawan 18 nikhat thu’a ana kaplih jeh uva Naga galguh boi NSCN K terrorist a kiphongdoh a ban kibol, asungthu, thudih tah phondoh louva Myanmar toh gamgia Indian army surgical operation abol bana state sung munchom chom a galguh bolho khanset na asoh jing hin danle thupeh dinmun ahoi loudan mudoh thei in aum in, chule kumlui sungchun thinglhang le phaicham a galguh bol organisation thah jong ana kiphutdoh in home ministry report dungjui in state sunga political lungtup chom chom neia galmanchah choi’a kiphin galguh bol organisation 40 aval tam, thinglhang galguh bol atamjo hi government toh SoO/ceasefire nei ahi jeh uvin galguh bolho jeh a khansetna hi phaicham a atamjon ahi.   Adeh a ILP bill passed ding deina le ILP bill 3 state assembly passed abol doudalna kiphin na hin kumlui chu niseha kimanchah dan hatah in atongkhan adeh in economic le education hatah in atongkhan social worker Serto Tondan Kom in kumlui a bandh le blocked in Manipura dangka Crore 2895 val ana mandan akhuolchil na achun muhdoh ahin,  police intelligence wing thulhut dungjui in kumlui October lha chan chun state sunga bandh ni 89 aum bana economic blocked ni 24 val aum tan, nikhat bandh hin dangka crore 36 val amang jouvin, chule nikhat economic blocked hin dangka crore 3.09 val amanjou dan Kom khuolchilna achun muhdoh thei ahi, langkhat a kumlui a ILP thu’a kiphin najeh in phaicham le thinglhang a education lang jong hatah in atongkha’n dan tuoh kituoh louva simlai ho kiphinsah jeh in July nisim 8 nichun JILPS ho kiphinna a mohna neilou Ananda Singh Higher Secondary School simlai S Robinhood in security force ho khuta thina ana tuoh in, chule ni 60 val themjilna aumthei pon ahi, langkhat a thinglhang adeh a Churachandpur district sunga bill 3 doudalna in mipi kiphinna nasatah in aum in milham 9 in thina atuoh keo hilouvin nisim 60 val themjilna aumthei pon, hiche hin simlai ho lhahsam na lentah asohsah ding ahi tijong hi gel louthei ahi poi. Chule gamsung thu boi ho bailam taha suhlhap thei ahilou le alang langa vettuoha seikhoma suhlhap thei ho sulhap louva aum jing adeh a tutua jong vui louva um le mipi kiphinna suhlhap louva akoi a kum agalkai hin vaipo O Ibobi Singh lamkaina Congress government hin gamsung avettup jou talou ahi dem? ahilou le mipi’n atahsan tahlou dan tuchung Thameiband le Thongju by election chu aphotchet ahung hi ding tahsan aum in hichu ahile Congress government chu boina chunga chamna semthei lou mipi’n tahsanna anei talou tihna ahin, tua milham 9 thiluong hin ichan ahin pha’a government in ipi thulhutna ahin nei dingham tihi mipi galdot ahi jing’e.