Jan. 29, 2016 – Arunachal in phulahna manchah PR hin neta

Jan. 29, 2016 – Arunachal in phulahna manchah PR hin neta

196
0
SHARE

Arunachal Pradesh a PR (President’s Rule) kikoi hi ginchat ana umpehsa ahi. Chomkhat setpi hi Ruling Congress sung’a kiboina ana um ahijeh in itih tahleh Arunachal a Congress vaipohna chung’ah moltum ahung kilamdem ti ahijeh in alamkhatna iseileh achaina kheh-a PR kikoi chu vaigei jepbon nalai tithei bon ahi. Congress Chief Minister Nabam Tuki jong hin ahum hal’a anapeiya Chief Minister toumun ahinchudoh anahi jeh in lhou (sot) dehlou, mi anabolna bangbang’a ama chung’a jong hung chu tididan ahi. Centre in anopleh State khat chu adon achan beiya PR akoikhum theijeng ahidehpon hinlah alampi themkhat akihon pouleh Centre (Union) govt dia chu paome pidi (excuse) khat umjeng, hiti khati jeh-a PR kikoikhum ahi atileh kichaijeng ahi. Arunachal politics boina hi Congress ho sung mama akon ahijeh in BJP ahilouleh Centre amoh ngoh-a dan dihlou tah in eikibol’e atinadiu umlou ahi. Congress MLA mi phabep chun BJP jaona’a Opposition party dang akon MLA phabep toh hung kihoutoh uva Chief Minister Nabam Tuki atosaotnau (support) chu alahdoh phat uva Assembly a atamjo kivetdohna ananei uleh Nabam Tuki govt ‘support’ bol chu hung lhomjo ahiphat uva asuh asah umthei talou, achaina’a High Court leh Supreme Court geiya athu hung kiheh u, Court ninjong achaina asei masang’a PR kinehsah u ahi. Hiche jeh-a hi Nabam Tuki leh anungjuihon Court ija selouvin akibol’in, Democracy thadohna ahi, thudih umlouna natoh ahi tihoa kitomna aneikit u ahi. Alangkhatna, Nabam Tuki govt kisuhbei dihsa hon asei kit uleh Arunachal politics boina jeh-a kum kehkhat valjen Assembly toukhomna jong umthei talou chu PR koi tilou lampi dang bei ahi ti ahikitne. India danpi (constitution) a Article 356 dungjuiya State govt khat nin Constitution dungjuiya kivaipohna achelhah theitahlouleh Centre in PR akoithei ahi. Hiche Article hi koikho kel ham ichom ham kiti bang’a Centre govt poa pang-pang’in party dangkhat vaipohna State govt chung’a ichan ham’a phulahna manchah phatah a amanjing ahi.
Congress in Centre anapohjing laiya jong BJP leh akijoppi party dangkhat pohna State govt khat chung’a hiche PR moltum hi anadop jing ahi. Congress ten Article 356 (PR) hi dandihloutah in amanjing uve tia BJP ten Congress ho demna leh ngohna ananeijing uchu tua BJP jong power ahintuh phat uva ichuomcha ahidehlounau jong umdi ahi. Alamkhatna seidin, koi party hileh PR nekha (kikoikhum) khat chun lunglhaisel leh thipbeh-a “kanehdi mong, kachandimong ahi” tidi hi umbehlou ahi. Manipur ajong hi ahamdohsun, State govt chung’a alunghangsun’in PR koidia aseijing vang hin hitobang manchah hi amaho (PR kikoihen tia seiji ho) govt pohpetna kikoikhum din kigel leu dihthei asahdehlou maithei u ahi. Opposition party holeh kiloikhomna khat le ni’n PR koidia ngehna (demand) abolman’a Centre in amoh koidi jong hidehjilou ahi. Governor in PR koidia lekha athot leh Union Cabinet nin President kom’a ‘recommend’ abolkit, hichu President nin anopna soi akai ngaikit ahi. Tua President pu hi Congress mi anahi (ahi) jeh-a tuchung Congress pohna Arunachal bang’a PR koidi anopna soi akaidi ti hohi hahsa thoudi ahi. Hijongleh President chu Union Cabinet seisei boldia gulpi lup tho bep hikit ahi.

SHARE
Previous articleJan. 28, 2016
Next articleJan. 29, 2016