Jan. 28, 2016 – Smart City hitalou Township joh hita

Jan. 28, 2016 – Smart City hitalou Township joh hita

203
0
SHARE

2014 kum langa pat Smart City sahna dia Moreh kom’a Haolenphai gam’a Acre 3000 (sangthum) govt nin alahdi (achohdi) ahi ti thua nam sung’a kinielna ana umpeh tolhon’a mijousen hela he, mula mu seila seilou kiti khat ana um chu tun lhangphong’a tahlang ahung hitai. Hichu – hiche thua hin thingnoi khut alutne/ajaove ti anahi-e. Hill Tribal Council (HTC), Moreh President Milun Jangmang Haokip, Kuki Chiefs Association – Moreh Block (KCA-MB) President Milun Jamkholen Mate chuleh “Representative” Milun S.Haopao Haokip leh Dr. Gary T. Haokip in hiche gam “pehdohna” dia soi (signature) anakainau thua gihna anamu uto lhon’a hilchetna le tiemna ahinnei naova asei uchu ahileh amaho macham’a abol’u ahilou jeh in hiche thua ajahda hon thingnoi kiloikhomna khat akidoh joh diu ti ahi. Mipi/Civil kiloikhomna thalheng chu ahileh akichieh khat aum’in tua “Representative” (thalheng) hi ipi koi thalheng hamvang akihepon, ipichu hitaleh Haolenphai gam pehdoh/johdohna din soikaina aum’e kiti thulamleng dan’a anakisei, aphotchetna tahtah umlou chu tunvang ahung kichieh tah jeh in akoikoidin navahna khat ahi. Chuleh hitihchan aguh guh-a thil kiboldan’a ana um thua hitobang hilchetna le temna hung kiboljong hi thilphatah ahi. Ahin akhohtah khat chu hilchetna hinpehon amaho macham’a thil abol’u ahipoi tia thingnoi kiloikhomna khat phatsah leh seidung juiya gam lahna’pehdohna dia soi akaiyu ahidan asei uhin apha ahinpohlutdiham, ipi ahinpohlutdiham lungdon umtah ahi. Ajeh chu hiche hin aphatsah le aphatsahlou thingnoi ho kikah-a kihet themlouna hinpolut khaleh moh-a kitomona kah-a kitomona cheh hung sohkha diham ti ahi.
Govt kom’a Haolenphai gam pehdoh di ti hi nam sung’a mitamjon aphatsahlou ahin thingnoi holah ajong aphatsah le aphatsahlouloi um ahi tu naicha’a hiche thua thuphon ana um hoa kon muthei ahi. Tua chu hilchetna hin kibol dungjuiya hiche thua ajahda holeh ahetbenom hon ‘thingnoi group khat’ kidoh johdia hung kisei hi thingnoi ho kikah a kihoutohna ahung umdoh-a gam chu pehdoh/johdoh ahijongleh khonung’a nampi dia thilpha thilse ahung hidi chu thuchom hitantin tu tadia dia vang thilpha hidi ahi. Thingnoi ho phatsah a kibolkhat chu mipi’n ima aseitahloudi tina ahijongle thukhat hidi, hiche thu hi nampi thu ahipon Haolenphai gamnei haosapua leh agamkai Moreh lhanga thingnoi thingchung kilokhomna ho thu thu ahijeng’e itia kinel baotam beiya athu hi ithipsan jongleh damna hijo maitheidi ahi. Hilchetna dungjuiya hi ivetleh aphatsah-a abolhon jong nampi dia phachom hung hidiham, midang’in athumtho achutho jengkhat eigam’a koidi kiti hi vangphat um ahi, ti ahi. Thil kichai nunga kithato hojong phachomdi thu ahiloujeh in kihoutoh a seitohmo aumpoi. Chuleh khat thilbol chu khatnin jahda teidi, khatnin ajahda jeh a kitomlah a bolteidi ti lungput tobang umji hin nampi damna asongailou ahi geldoh a phadi ahi. Govt invang Haolenphai gam chu Smart City dia ajolou ahitah jeh a ‘Township’ (kholen, khopi) sahna dia aduchat thouthou ahi kilang ahi. Amin keu kikhel hitalou, gam letdan jong Acre 3000 apat Acre “2000 bouva” kumsuh ahitai.

SHARE
Previous articleJan. 29, 2016
Next articleJan. 28, 2016