Jan. 27, 2016 – ‘Republic’ kiti leh haosa dinmun

Jan. 27, 2016 – ‘Republic’ kiti leh haosa dinmun

159
0
SHARE

67 channa Indian Republic Day chu Manipur jaonan India pumpi ah lolhingtah in ana kimang tai. Kumseh-a kiboljing bang’in District level, Sub-division level leh State level ah hitobang nikho lopna leh nitna kinguon thupitah anaum’e. Govt dia bollouthei hilou hitobang kin thupi hi thingnoi kiloikhomna Group chuom-chuom hoa kon itobang suhboiteidi ti tohguon umjongleh bollhah teiteidi ti ahijing kitne. Hiche hi Govt khat hina’a athunei leh athahat vetsahna khat jong ahi. Koima hiche kin’a jaoloudi tia gihna umjongleh govt vaipo MLA leh govt natong hodia jaotei ngai kin thupi khat ahi. Thingnoi titahlouvin tulai govt chung’a lungdamlouna nei kiloikhomna khat chun alungnopmo vetsahna’a hitobang kin hi ‘boycott’ boldi (jaoloudi) ti ahiji-e. Kumseh leh thingnoi kiloikhom chuom-chuom hon Indian Republic Day boycott aboljiu hi athahbeh ahipoi. Tukum injong North East gam’a thngnoi group jatjat hon India Republic day ‘boycott’ di’n thuphon ananei uve. Manipur’a Civil kiloikhomna phabep min tuchung Republic Day boycott abol uve. Thingnoi um masanga Republic day kimanji chu lasa them hon lasahna aneijiuvin, thepna jatjat nei hon athepnau avetsah jiuvin, pu le pa lam (cultural dance) ho vetsahna leh Footbal kichep (exhibition match) hojong ana umji’n, hitobang ho vedi’n mipijong lentol vel dimset in ana umji-e. Hiche nikho hi mipi kisuhhal le golnop nikho tithei anahi-e. Tulai invang Bomb le meichang in vai ahopna phaat ahitolhon’in boycott kibolhenlang kibolhih jongleh kum phabep masang’a mipi golnop nikho dan’a ana kimang tobang chu ahitapoi. Imphal khopi avang bandh aumjing vang’in ‘March past’ leh lam thoho vedin lampi jet le vei mipi adimset setji thouve. Hiche hi thingnoi hon bandh abolvang uva bazaar ho kikhah bepma, Bus le thilpo gari hobou lhaijilou ahi.
India dia kumkhatna nikho thupi chieh 2 (ni) umhi Independence Day (15 August) leh Republic Day (26 January) hi ahi. Independence day ahileh British govt vaipohna akon chamlhat mu nikho ahin, Republic day ahileh India danpi (constitution) kithensona leh achepat nikho tidi dan ahi. “Republic “ hi Democracy kivaipohna tolhon’a lamkai vaipo ho mipi’n aphaat (term) umdia alhentho tina jong ahi. ‘Republic day’ kiti hi ipi kiseina, ipi jeh a kimang ham ti hechen uhitin geltoh chet leuhen Eimi-te lah a Haosa ho dieh-dieh dia a thuchang tahbah hi phahpoh ngamjong hiloudi ahi. Ajehchu haosa kivaipohna leh Mi- U-pa thunei vaihopna ihiu hi ‘Republic’ toh kikadel jeng ahi. India in chamlhat ahinmu jouva agam pumpi luboh (President) chu kum 5 dia mipi’n alhendoh hita, gamsung luboh vaipo khat chu athiteng leh achapa hamkhat in apagou lamdohsa tabang’a ajom theilouding ti kivaipohna ahi. Eimite lah a haosa vaipo khat chu athiteng achapa lenpen chu mithei hen mimoleh apa dinmun haosa vaipohna chu ajop ahi. Tulai Village Council Act dung juiya khomiten Village Council Member ho alhenjong hi ‘Republic’ hina khat tithei ahinan hinlah alubohpen haosa vang mipi’n alhentho ahiloujeh in ‘Republic’ hina umlou ahi. Chuleh Republic hina dungjuiya gam vaipo thalheng MLA/MP khat chu athitengleh achapa khat chu MLA/MP kihisah jeng theilou, ahidijongleh mipi maman alhendi, atundi ti ahi. Mipi thaneina le vaihomna ‘Democracy’ kivaipohna adia ‘Republic’ kiti hi khombul (pillar) thupi khat ahi.

SHARE
Previous articleJan. 26, 2016
Next articleJan. 27, 2016