Jan. 24, 2016 – BOINA HI PHAT CHOMCHA A DING BOU AHI...

Jan. 24, 2016 – BOINA HI PHAT CHOMCHA A DING BOU AHI By: Hegin Misao, Asst. Pastor Thangkanphai Baptist Church, Saikul, Sadar Hills, Manipur

128
0
SHARE

Vacha lenpen Ostrich khun boina ato diteng nel lah (sand) ahilouleh leiset anem lah a alu avui lut jin ahi. Mihem tamtah geldan nin jong boina aumteng ivet da a iki hetmo sah leh mang ji ahitai tihi ahi. Mihemte hi jat ni a hopkhen thei ahi. Jat khat naho hin boina kiti neilou hel danin aumuve. Aboina neiyu midang hon amudoh peh ujong le nomlou u, boina kanei poi tinalai ahiuve. Tekah nan khamna thei ju, chep le mom a addict hiho khun hitin aseijiuve; keivang itih hijong leh kangah nom phat phatna kangah jengthei ahi.” Hiti hin amaho le amaho aki joulhep jiuve. Ahinla, Bible in boina ho jona dingin suhkhel ho im mang/selmang louva phondoh joh ding aseiyin ahi. “Amavang asuhkhel jouse phongdoh a donlouva koipan hepina akimu ding ahi” (Prov. 28:13). Mihem alhom jo in aboina ho u aphongdoh uve. Boina ho phondoh ding jachat pi, mihon eimu neo kha get unte ti gelna jeh a koima koma boina seidoh ngamlou, ahithei channa joh selmang ding gel jing mihem tamtah aume. Ahinla, solchah Paul’in boina ato ho midang (seitheina dol miho) koma aseiphonge, “hoima lam jousea hesoh genthei toh jinga um jing jeng kahin ahi; polama eidouva, lungsunga kichat kanei jing jeng jiu ahi”ati. Pakai Jesun aseiye, leiset chunga hi hesoh gentheina nathoh dingu ahi. Hijeh chun boina/hesoh gentheina ahung lhun teng chonset ahipoi. Mihem loikhat chun amaho chunga hesoh genthei/boina ato hou hi midanga sanga chungnung jon agel kit uve. Midang hotoh tedingin mivangse kahi, aw ada kahi tai, ati jiuve. Ahinla, atah chu ipiham itileh leiset chunga cheng mihem jousen boina jat chom cheh ineijuve. Phat atamjon boina ito tengu leh satan ahilouleh Pathen, midang ho, gam vaipoho ahilouleh ichen na kimvela umho ingoh jiuvin, mi ngoh a eima jamdoh ding ti lungput inei jiuve. Ahinla, alhangpi in, boina ho hi eima a kondoh ahijeh chun ikisan maidiu ahitai. “Mi ama ama lung ngaichat thil’in ajol lhah a aloi lut ji a lhepna a chujia ahivouve” (James 1:14). Eiho a kona kikhelna aumpat angaiye. Kikhelna eima a kona aumpat nadinga kigosa a um ihiuleh leiset chunga imajouse ikikhelsah theiyu ahi. John Maxwell lekhabu jih khat a chun thusim khat hitin aume; Tehsepu khat, achanu te ina atute ho vildingin achen ahi. Nikhat insunga akichol kah/imut kah in atuten anemul’a kengkoh lou ana nupeh un ahi. Tehsepu ahung khah doh chun namse asah tai. Aumna ka (room) chu anamse a agel ahi. Ka choma akichon kit vangin namse asah kit tai. Achainan, pahcha lei laiya kikichol leh anam tui tante ti agelin akichon tan ahileh pahcha lei lai jong namse kit. Hichun, tehsepun hitihin aseitai, “tuni chu leiset pumpi anamse tai.” Leiset pumpi namse hilouvin, anamse chu ama a kona joh ahi. Hiche tobang hin, eihon jong boina inei tengu leh eiho a kona ipi umham tia kikhol masat angaiye. Boina ahung umpatna chu ihol doh tengu leh boina chu akeh khat isuh lhap u ahitai. Hinkho a boina teho galjona inei thei nadiuvin, boina chu kimaitopi a galjona neiding ahi. Losapna abung bu a iletun teng hiche chu galjona ahi. Boina hi phat chomkhat kah a ding bou ahi. Phalbi jong hung kichai jintin khal hung lhung ding ahi. Jan muthim hung kichaijin tin khovah hung hiding ahi. Tuni chan a boina tamtah ito jing vangu vin leiset chunga konin imang deh pouve, ium jing nalaiyuve. Pakai Pathenin tuni chana eipuiyu ahin, mabana jong eipui galkai kit diu ahi. Hijeh chun lunglha hih in! Satan galmanchah hoipen/hatpen chu lunglhahna hi ahi. Mihem atamjo boina a kona lunglhah nahin hinkho asuse jo e. Suhlhap lel sei lhap lel boina imacha aumpoi. Losapna theiho jouse jong jolel hel ding aumpoi. Boina jouse hi phat khat ahilouleh phat khat teng suh lhap thei, bol toh thei, seitoh thei ahisoh keiye. “Ilhahdah louvu leh aphatcha a aga ilo diu ahi” (Gal. 6:9).