Jan. 23, 2016 – Thangting thu hi mi Chouna’a kineidan

Jan. 23, 2016 – Thangting thu hi mi Chouna’a kineidan

203
0
SHARE

Thangting thua Moirang lang meilhei hon bandh abolnauva Conference a cheding ho touna Bus ajepset u chu henasa’a abol’u ahijeh in abolnomnom aboljou teng uleh hetkhiel jeh dan’a hinsei goloi hung um maithei kit ahi. Bandh um jeh-a YMA Conference a chedi ho chun Bandh bol lamkai ho kom’a phalna akilah uve kiti jouva bandh bol volunteer hon phalna lah le lahlou thu umtalouva Bus ajepset jeng u chu bandh bol lamkai hotoh a volunteer ho kikah-a kijahmatna umlou ahidem, phalna chu aminmaimaijin kipe intin kisuboi thou thou hen ti ahidem, ahilouleh bandh lamkai hotoh volunteer ho kikah-a kithu nunna umlou ahidem, khatpenpen ahidem, ahilouleh abon’a kigom ahidem hidi ahi. KKL Ambulance kijepset leh kikham jingna jonghi khatvei bou hitalou, tukal bandh umlai jongleh ana adamlou pohna gari (ambulance) ho ima loloudi ti kinoptona umjou nung’a jong bandh hung umkit teng angai-ngai kibol jithou ahi. Hitobang umchan hi Civil kiloikhomna ho kihou jing laisea koima’n kichatna aneiloudin akilang’e. Hijeh-a chu hitobang thilbol lamkai ho hi khuoldoh-a govt nin achandidol gotna apeh tokah in tukal bolkit tahloudi ti ijavei kisei jongleh sohkit thouthou din akimui. Hitoabng bandh laiya tohkhahloudi Amulance hobang jepse’a pangji hohin chi le nam’a kithetna /kivetdana kamcheng hoilou jong alhajiuvin akiseiye. Hichu ngolman, jukham man, lunghan thangtom manna gari kijepse sang’a hoimojo leh khonungpeh geiya dia Manipur pumpi kipumkhatna hinsuh-a pangthei ahi phaigam mi holah-a aching alunggel theidom hon mipi ho ahatsah u ngaidi ahi. Kiboina kiti hi mi ngol khat le ni thusei natoh jeh ajong kipanthei ji ahijeh in mi til ngol’a pang ho hi ama ama sung’a kiphona aumdomdom’a phadi ahi.
Bandh bol hi aphatmo lheh vang’a Manipur a dia abolloute umlou, govt chung’a kiphinna nei khat chun boldi dang umlou bang’a bandh abol jeng ahijeh in paitheilou ahitah jongleh mi ti ei ti bandh ibolteng koi tobang chu lhakang’a, koi tobang chu vet jep ngai ham ti mijousen hetheileh kilomtah ahi. Bandh bol kiti photnin bandh bol sung’a gari hijat jat ajepse’n ahallhai akiti lebou bandh chu thusoa kitahlang’a govt injong khohsahna ahinpeh bep dan’a gel tam kit ahi. Bandh bol volunteer ho hi munkhat bouva um hijilou u, adondon’a kithethang jiu ahi. Munchuom-chuom’a umho chu iti akijatmat to theipoi kiti diham, chuleh iti chu alamkai hon a vulounteer ho ka ‘control’ joupouve kiti thei diham? Bandh lamkai hon a volunteer ho a control joulouleh ipi dia bandh akou uva mi atildoh thei u ahidem tijong doh thei ahi. Munkhat’a bandh bolhon ahinlhadoh nung uva aban’a ana um volunteer ho hithei ponte tia gari nungsol lopi, ana jepseloi, tulai Mobile phone khang’a phalna peho leh volunteer ho kikah-a kijatmat tona aumpoi kiti jong chu jou thu bou hidi ahi. Tuchung Thangting thua Moirang lang’a bandh kibol chu chi le nam’a kinotona leh kamcheng’a kidelna jong ana ummantan achebeleh mundang, district dang jong ahintohkhah thei anahijeh in aphaatcha’a kihouna ana um’a ana thip chu thilpha tah ahi. Ahin bandh bolho suhthipna dia amaho deideiya kinoptona ana um hikit taleh boina muchi kitu bep hung hikitding ahi.

SHARE
Previous articleJan. 24, 2016
Next articleJan. 23, 2016