Jan. 21 & 22, 2016 – Thinglhang le phaicham vote kilhah dan...

Jan. 21 & 22, 2016 – Thinglhang le phaicham vote kilhah dan By: Dr Sheikhohao Kipgen

181
0
SHARE

Election laile thinglhangle le phaichamma vote kilhahdan sun le jan bangin akikhe e. Hou dang dang ho sanga Christian ho hin aphat seh tobanga Hou-in sunga thudih ladih a na toh ding; kitahna neipuma hinkho manding Pathen lunglam bolding/holding ti hi kihilna hijing jeng ahi. Sunday nikho hihen nidang hijongleh kaikhomseh’a kihilna le kithumop na chu ahile thilpha bolding, Bible toh ahilouleh Pathen thu toh kitoh a hinkho manding tahsa lhagao a alhasam ho tilkhou ding ahat ho hatbecheh nading thuho kiseija kikimangcha ahi. Mipi Houin kaikhomma thilpha tamtah kihilna le kithumopnahi Hindu/sanamahi Meilhei hon aneipouvin ahi. Thudih ladih le kitahtah’a hinkho mangding kihilna houin sung aneilouvangun,  vote lhah laile aumchan houhi alhangpia ivetleh kipapi umtah khat ahiove. Mikhella vote lhahpeh jong aumpouvin, chule avel vella hunglut di jong aguo chompouvin ahi. MP/MLA/Municipal election hoa tamtah vei Presiding officer ah akichetan, hitobang lomma kitahtah le thudih tah’a vote alhah uhi pachat umtah ahiove. Mitchoho jong, nangong ho jong chule elbai ho jong ahinpohlut uva ama deitah candidate pa dinga vote ahunglhahpeh u ahi. Mikhella vote kilhahpeh le athisa ho min hinkichoija vote lha jong aumpon, hejong akihekhapon, chule toh jong akitoh khapoi. Hitobang non-Christian ho chondan le umdan hi Christian kahi tihon kitho theile ihoupau Pathen jong kipah intin gamsung jong phattheina changinte tihi ginchat ahi. Hindu Meilhei le adang dang non-Christian ho vote lhahdan hi thinglhanga Christian ho dia vetton theitah ahi. Thinglhanga polling station hoa mikhat in vote anople asom aja a vote alhah thei ahi. Chapang kum lhing lou khat in tehse min khat na vote alhung lhah thei; ajipa in ajinu le achate dia jong lhathei thou; haosa pun akhomite vote jong anop dan dan a ata thei; ahilouleh thingnoi/gamvah hon polling booth khat atoupi nilhumma aman akonalai ja bou tading hijeng tiho hi ahi. Chugoh hilouvin polling station lhunmasanga polling officer ho toh guthimma kihoutoh a lampia kitatchai den ti jong aumin ahi. EVM ahung kiman a patnin hitobang vang aumtheitapon hinla amunna athunei avaihom hon adei dei kibolthei thou thou nalai ahi. Thingnoi/gollhangho kikumna munna vote lhahdan jong seilouva het ahijenge. Deibanga vote kilhah theilouna hi thinglhang polling station ho hi ahi. Security hon jong ima abolthei chompouvin thildihlou kibol amu-u jongleh kimu mosah ahiuvin, asunga tou Presiding officer pan jong boillouva polling achelhah thei photleh atia a power jong exercise boltah tah theilou dinmun atuo ahi. Hitobang umchan/chonna hi kumsotpi ihin chepiu ahitai. Thingnoi/gollhangho akingoh vangin, hoitah’a ivetleh amaho ahung kikum masanguva hitobang hi ina boljing sau ahi. Vote ki ki capture toh peh hi muntamtah’ a ana umsa jong ahi. Thingnoi kikumlouna polling station jong ichom hideh lou ahi. Hiche hin avetsah chu ahile thudih ladih a vote akilhah theilouhi thingnoiho akingoh’a akiminset sah vangin, mipi jong kiphalou ahi. Vote hi athisa ho minnna jong vote lhahlou ding, mi minnna jong vote lhah lou ding chule eima vote manlutah chu eima satah’a gachea kilhah ngai ahi. Hichu daan toh kitoh ahin ihoupao Pathen lunglhaina jong hiding ahi.Tunia isei nompennnu chu ahile hitobang thilphalou hi boltapoute kitijongleh ima phachompontin, hinla thinglhanga Christian ho le phaichamma non-Christian ho umchan akikheh dankisei thu ahibouve. Hitobang thildih lou le thilphalou hi phatsotpi ihin chepiu ahitan, kikhelna jong aumdingle phatsopi lutkit ding ahi. Hitobanga thildihlou aguh a bol (mass scale rigging), khat le khat kikigih to (intimidation), booth capture kibol (booth capturing) chule adang dang thilsoh ho hi vannoi mundanga jong umdaponte. Hinla Christian kahi kitia thudih ladih mong mong umlou jou le nal jeng abolthei theipa thua kikikai, ahat pa thu thua kikikai, ‘rule of law’ umlou kiti chu jachat umtah ahi. Hitobang daanpi toh kitohlouva chon kitihi extra constitutional forces kiti ahi. Hitobang chonna hi Christian kahi tiho thinglhangmite lah’a aha umdehset in ahi. Kitahna le thudih umlouna munna chu Pathen lhagao cheng louhel ding ahi. Thudih ituhchah lou-uva thilpha ibollou-uva ahile Pathen henga tao tao jongleu hen itaonao chu Pathen dinga kidah umtah hidi ahi. Thildih ichepilou-uva thilpha ibollou-uva ahile inam u i-society u damlou ding, Pathen phattheiboh na jong ichan lou diu ahi. Thildih thudih umlouna, toltha lungchang kenna, kinah kisao ki-engset ki sumsel nale adang dang thilphallou umna munna chu chamna le monna aumlou ding hetsa ahi. Pathen hephalou non-Christian Meilhei le Pangal ho lah’a kitha kimat le kigih (threaten) jong aumdapoi, hinla vote lhah nikhoa aumchan hou ivetleh daan dungjuitah le thudih tah’a ama ama tahsatah’a avote manlutah chu ahung kilhah cheh u ahi. Mitcho pa jong, elbai pa jong nangong pa jong adammo pa jong koiman akhellin vote atapeh deh pon ahi. Amaho lah’a hitobang aumtheile eiho lah’a ipi dia umthei lou ham? Eiho Christa nungjui thudih le ladih a natong ding joh ihiu hilouham? Thingnoiho ngoh pouhite. Milham eiho ikitah loujeh uva amahon chance lahnopna-a eineipai u ahitai. Hitobang thildihlou hi thingnoi hon jong amaho phatchomna dinga manchah phatah’a aman paingallu ahi kiti le seival hilou maithei ahi. Mipi milham ho lah jenga jong kitahna aumlou jeh’a thingnoihon pansatna-a ahin nei-u hiding ahi. Eimite lah’a chu mikhat in achangseh a vote jakhat val ahin ta-a ahile loupitah in idomsangun ipahchaovin, aman jong kiboltheisah nale kithupi sahna in anei-in, ahabolbe chehnadin itilkhou kit uvin ahi. Ahin daan dungjuitah’a ivetleh ithilbolluhin mi tamtah voting right chu kichepna a anei ahi, (criminal) daan sukeh lenloi khat ahi tia jong lahthei ahi. A langkhatna Candidate ho chun lungthim tha le jung sumle pai tamtah ahin suhmang u ahin thi le thi hin le hin tia adih adihlou thu umlou (by hook or by crook), daan toh kitoh kitohlou thu jong umlouva (fair means or foul means) aboltah ujongleh, mipi milham hon i-vote manlutah chu itahsatah’a kilhah ngai ahi. Phaitolla boillouhella milham voter hon ama ama satah a avote ahung kilhah u hi vetton theitah le thinglhanga chengho dia kihilna thei tah ahi. Mikhat kumnga sung aletna dia eima i Christian hina paimang hella ihina kikijohdoh jeng, akhoh le thina gei tuo ding hinalai, mi moltumma pan ding kiti chu ngolhoitah ahin hinla iboldatheipouve. Ijat thupha thudih kiseijongleh aphat ahung lhung teng angai ngai kihikit thouding ahi.  Milham jong milham lou jong adeh’ a election laile miphalhem ngen tobang kihiji ahi. Hitobang mite chun Hinnna thu iti adomsang tadiu vem? Hoiche ham Christian ethics? Christian kahi tia non-Christian ho masanga ipi kiletsahna di inei uvem? Imphal city a cheng eimiho jong thinglhanga vote kineicheh jongleh hitiho jeh in thasetna lentah aumtan atamjon election laile vote lha dingin akiche nomtapoi. Imphal ichenna munna vote kihinneicheh taleh information technology akhantou to dungjui in munni a vote la kihin neitapontin, phaitolla ichenna veng munna vote joh kihin neinom tantin,  demographic imbalances hung umthei intin, eimite politics lang jong ahin toh khah thei hinalai ahi. Kahatnai kajounai tia mi vote hi inop nopma bollou ding ahi, khonungle agu idoulel diu ahi.

 

 

Haosahon ihetdiu khat chu ahile mijouse jong nangho banga haosa nom ahiuve ti het ngai ahi. Jou le nal in kichem chemjongleu hen Adhar Card dungjuitah’a government in thil adih tah’a ahinbol nahleh Haosa tamtah khoa ami umlou semthu minho jong a panna hung umlou maithei ahitai. Haosa le Kho lhaseh/kumseh a pungtul tul jeng mipi la punbe chomlou, hitobang nammite chu ihiuvin, hiche hin avetsah chu imadang ahipon Kukite akivaipoh ahoipoi/akituppoi tina ahijenge. Hitia iumjompeh ule thinglhang HAOSA KHO hoa mi vang pung lou ding inn jong tamlou ding ginchat ahin, ahin MIPI KHO patta umna tichu – (Kangpokpi, Saparmeina, Keithelmanbi, Ccpur, Moreh etc.) a vang mi punbe jing ding ahi. Haosa hihen milham hihen Houbung lamkai hijongleh thudih ladih a chon louhon vang Houin sung pulpit a Pathen thu vang seidataleu hen dei aume. Election hi Christian dihtah  ihi ihilou-u kilhen chilna khat ahi.

 

————-