Jan. 17, 2016 – KIKHELNA AUM ANGAITAI By: Hegin Misao,...

Jan. 17, 2016 – KIKHELNA AUM ANGAITAI By: Hegin Misao, Asst. Pastor Thangkanphai Baptist Church, Saikul, Sadar Hills, Manipur

174
0
SHARE

Christian masa ho chun vetjui/vetton thei tah in ana hing uve. Christa nungjui ahinau chu hetthei tah leh kilang tah in hinkho anamang uve. Tulai Christiante le houbung atamjo, chuleh hou lamkai tamtah in ihina ding dol’u ihitah loujeh un vetjui theiyin ium tapouve. Hiche jeh hin mi tamtah in Christian akiti leh ahe khel ji tauve. Ihindan ule ichondan’u hi tulaiya hou (religion) dang ho toh aki khetna umbeh talou leuvin ichon tauve. Midang ho Pathen koma hinpui lut nading “thenna hinkho” jong imang tapouve. Hiti ahitah jeh chun iChristian kiminvo nauhi abana ahung umding khangthah ho dingin vetjui thei le dei theina dingin aum tapoi. Houbung (Church) hi lhagao lama kiloikhomna ahin, lhagao thu a kiloikhomna a lhagao mi alhom beh seh tan ahung khanglen ding chapang holeh khang thah ho dingin thanop umbeh sehlou hou khat ihi sah dinguvin aumtai. Christian minu mipate leh Hou lamkai hon iChristian hinau hi vetton theiya ium tah loujeh un, chapang holeh khangthah ho dingin iChristian hina uva kona ajilthei diu leh lunglutna/thanopna anei theina diu aum beh tapoi. Khangthah tamtah Hou-in ahung kaiji nauvin, Pathen houkhomna ache lhah jing sungin jong a Mobile phone uva akichem un, SMS or chatting abol’un ahi. Hou-in sunga jong Pathen ginna aum tapon, amit u atol lele jiuvin ahi. Ipi jeh a hiti a hitan tem? Ajeh chu lhagaova hing Christian amupouve, Pathen ging aum tahlou jeh in khangthah ten jong gin ding Pathen chu aging tapouvin, jabol ding Pathen chu ajabol tapouve. Khangthah hon Hou-in sunga kimanchahna jousea pontho tah in pan alajing nauve, kaikhomna a la asauvin, tum ging thei ho (musical instruments) jong amangcha uvin, chule houbung sunga khanglai te kiloikhomna a jong pontho tah in pan ala jing nauve. Ahinla, alangkhat a neh le don thenglou leh numei pasal adih lou lama kiloikhomna chule Pathen deilou chonchan le hinkho jong amang kit uve. Ipi jeh hintem? Ajeh chu khangthah ten tahsa le lhagaova adih le apha chule thutah akijil nadiu nule pate ho, houlamkai ho a konin imacha amudoh tapouve. Bible a kimu Christian hina dihtah, khat le khat kijabol tona, thenna hinkho, Pathen ginna tiho hi tulai Christian minu mipa, hou lamkai, khangdong ho a kona mudoh ding aum beh tapoi. Tukhanga Christiante hon hiti bep seuva hi ihin uva ahileh, abana hung lhung ding khang (next generation) a khangthah hon Christian sakho hi hou jatchom chom hotoh kibanga ahin lah maitheiyu ahi. Ahinla, Christian dihtah aum tapoi itinau ahi deh sam poi. Pathen gingtah/Christian dihtah, Pakai lhacha natong dihtah jong tamtah aumding tahsan aume. Muthim salvah ding Christiante ivah doh tapouvin, Christa kom hinjon mihem tamtah kipal lhuh sah joh in ipang tauve. Hijeh chun ichon dan’u le ihinkho mandan’u Pathen thu toh kitoh in khel tau hitin, vetjui thei tah le miten Christa akimudoh nathei diu joh in hingu hite. Ihoubung’u leh igam sunguva kikhelna angaicha tai. Abana ahung umding khang (next generation) beh a khangthah ten atah a Pathen ahin houthei nadiuvin tahsan cha kahi tijousen kikhelna neitau hitin, pan la tau hite. “Keima min a kikousa kamite chu ahung kineosah theiyuva taona aneiyuva hitia hi keima angsung ahinhol theiyuva, athilse bolnauva kona akihei manguva ahileh, keiman jong van a kona kahin ngaiya achonset nau ka-ngaidam ding chule agamsungu kadamsah a kaphatsah ding ahi.”
(2 Chronicles 7:14).