Jan. 16, 2016 – LUPDAN JAT CHOM CHOM HO PHATNA LEH SETNA...

Jan. 16, 2016 – LUPDAN JAT CHOM CHOM HO PHATNA LEH SETNA By: Thanglam Manlun NGV.

175
0
SHARE

Kumthah 2016 ahung lhuntoh kilhon’in Eimi times ngailu jouse chuleh keijong eingailu’a ka Article simjing ho jouse nabon chauvin kumthah chibai kahin peuvin ahi. Tunin mihem ten ipel thei louvu imut/lupdan chom chom ho’a kon mihem khat chun amihina akihetdoh thei chuleh aphatna leh asetna jong ahetdoh thei ahijeh’in inasim cheh diuvin kahin tahlang’in ahi.

LUPDAN THU’A PULE PATE LUNG-GEL:- Pathen’in asem leiset mihemten lim chom cheh inei bang’un chon’na le khan’na jong akibangpon ahi. Chutobang ma chun leiset mihem jousen i-mutdan/lupdan chom cheh ineiyun ahi. Hiche lupdan chom chom ho lah’a akhup lang’a lumho hi pule pate chun aphapoi, akhup lang’a lumho hi anu/apa apul baiye tin anasei jiuvin ahi. Hiche hi atah ahidem? Ahipoi, Pule paten lungthim thuh tah’a chapang chu akichat’a lupdan dih’a alup theina ding’a anaseiyu ahi.

LUPDAN KHAT’NA :- Lupdan khatna chu asih’a lum’a akeng akhut kitum’a lum ho ahi.  Amaho lah’a abang khat deh deh chu akeng tum’a akeng teni kah’a akhut jeplutna lumjong aum’in ahi. Hitobang lupdan’a lumho hi sapten foetus atiuvin, hichu eipaova seidin naobu sung’a nao kijilho umdan lupdan tina ahi. Hijeh chun naocha lup’a lum tiu hite. Hitobang lupdan’a lumho hi apodal atah’a tah asung-gil nem ahtui tobang ahiuvin ahi. Tichu ajalhai pouvin kipana mel apu pouvin ahi, ahin, alungthim’u aching’in thil ahetheiyun aching theiyun ahi. Chuleh naocha lup’a lumho hi amaiyu adong’in ajahcha-seu ve akitin ahi. APHATLOUNA :- Hitobang lupdan’a lumho hin kong-nat, ngong-nat ahenom’un chuleh akhoh dehset chu kitum’a lum ahijeh’in Blood pressure tichu thisan chedan akisuh theipon ahi. Chuleh kitum’a lum ahijeh’in haina hu ahiding bang’in alajoupon mihem hina’a tahsan angaichat bangtah’in ahailhung joupon ahi.

LUPDAN NINA :- Lupdan anina chu asih’a lum’a akhut akeng jangpet’a koiya lum ho ahi. Hitobang lupdan hi sapten Log atiuvin hichu eipaova Thing-long tina ahin Thing-long lup tijeng’u hite. Thing-long lup’a lumho hi alung theng’un thiljouse agel-dau vun chuleh jalhang kiloikhomna’ah athanom’un,  hijeh chun mi-jalah’a umding bou atha’u anommin ahi. Chuleh Thing-long lup’a lumho hin mi atahsan baijeh’un alheplhah baiyun ahi. APHATLOUNA :- Iseitahma bang’un asih’a lumho hin ting-gu ngapdet’na um louva tichu a support ding umlouva lum ahijeh’un kong-nat ahenom’un, chuleh anah-hai (snore) nom’un ahi.

LUPDAN THUMNA :- Lupdan thumna chu ahileh asih’a lum’a akhut kikhap ahilou leh makoiho ahi. Hitobang’a lup hi sapten Yearner/Yearn atiuvin hichu eipaova thil  khat ngaichat’na sangtah nei tina ahin, ngaichatna lup titaote. Hiche ngaichatna lup’a lumho hi ajalhaiyun ahin miginmo ahat’un ahi. Chuleh ngaichatna lup’a lumho hi alung-gel’u angong kaiyin thil ahehah’uvin ahi. Ahin, ahetdoh ngal teng’u leh suhmil kiti aneikit tapouvin ahi.  APHATMONA :- Hitobang’a ngaichatna lup’a lumho hin akhut’u akikhap’uva lum ahijeh’uvin khut ih-mut  anei nom’un, chuleh nah-hai jong anei nom’un ahi.

LUPDAN LINA :- Lupdan lina chu ahileh athal lang’a lum’a akhut akeng jangpet’a koiya lumho ahi. Hitobang lupdan hi sapten soldier atiuvin eipaova sepai/sepoy tina ahin, hijeh chun sepai lup titaote. Sepai lup’a lumho hi athip’uvin thu amoh sei sei pouvin ahi. Chuleh alung-gim nom pouvin, thil aval’a kiboljong adeipouvin ahi. Sepai lup’a lumho hin chapang angailue-vin ahi.

LUPDAN NGA’NA :- Lupdan nga’na chu ahileh akhup’a lum’a akhut teni lukhap chung’a koiho ahi. Hitobang lupdan hi sapten Freefall atiuvin, eipaova seidin asuboi umlouva chamlhat tah’a lum tina ahin hijeh chun chamlhatna lup timaiyu hite. Chamlhatna lup’a lumho hi ajummo uvin, alungmo uvin chuleh ahunam’un ahi.  Ahin, chamlhatna lup’a lumho hin ngailut’na aneiyun kidem kiseiset tiho hi athe’uvin ahi. APHATMONA :- Akhup lang’a lup hin heart beat tichu lung-phut/sou-phut ahiding bang’in achesah theipon ahi. Ajeh chu tahsa pumpi gihna’in Lung-chang adelpha ahijeh’in Lung-phut (heart beat) akitup theipon ahi. Heart beat ahina ding bang’a achetheilou jeh’in thisan chedan jong akisuh theipon ahi. Ajeh chu heart beat dungjuiya mihem thisan kihomjal/kithejal ahin heart beat akisuh louleh thisan chedan kisuhlou ding mong ahi. Ahideh’in chapang akhup lang’a lumho hi kichat umtah (danger tah) ahi. Hijeh’a chu pule paten Scientist ho hung umdoh masang peh’a pat’a chamlhatna lup tichu akhup lang’a luphi aphapoi tia ana seiyu ahitan ahi.

LUPDAN GUPNA:- Lupdan gupna chu ahileh athal lang’a lum ahivang’a akhut teni lukhap chung’a koi ahilou leh akhut kikhap ho ahi. Hitobang lupdan hi sapte paovin Starfish akitin eipaova seidin alha tampi’um Nga tina ahi. Hijeh chun Ngalup’a lum tiuhite. Hiche Nga-lup’a lumho hin gol-le pai houidan athem’un ahi. Ajeh chu gol-le pai thu angaiyun chuleh kithopi angaina’a jong kithopi ding’a kigosa umjing ahiuvin ahi. APHATMONA :- Nga lup’a lup tichu athal’a lum’a akhut kikhap hon akhut’u akikhap’uva lum ahijeh’uvin akhut’u a ih-mu nom’in ahi, ajeh chu thisan che kisuhlou jeh ahin hijeh chun Lieng/Dah natjong anei nom’un ahi.

LUPDAN PHALOUPEN : Lupdan phalou pen chu ahileh Sofa chung ahilou leh touna chung’a lup’a touna ahilou leh sofa ning/agei kikhap’a ikeng langkhat touna chunga lhonjang’a langkhat’a tol chot’a lup hi lup lah’a lupdan phaloupen chu ahi. Hiche lupdan hi mi atamjon sun i-mutna’a ibol nom pen’u chu ahi. Eiho thinglhang mite deh deh lukhap (pillow) umlouva touna ning kikhap’a lumte ihiuvin ahi. Hitobang’a lup hin lhohbu atongkha theiyin ahi, ajeh chu ilhohbu’uva kon thigui neocha cha simsenglou tahsa toh kijopmat ahijeh’in anemthei/pillow umlouva tongkham kikhap ahilou leh touna ning kikhap tihohi iboltah lou diuvin aphan ahi. Lupdan leh thisan che hin kiguijop’na anei ahijeh’in lupdan ichihthei diu angaiyin ahi. Ahideh deh’in BP neiho ikichih theidiu angaiyin ahi.

LUPDAN PHAPEN : University of Medicine of Ehima Japan in kholgil’na anei dungjui’uvin mihemte’a ding’a lupdan phapen’a akholdoh’u chu ithal lang’a lupding hi ahi.

Achaina in chung’a kisei lupdan hohi ipel thei louvu mihem hina’a choldona lampi’a Pathen’in eigot peh’u chu ahin hicheho lah’a hi khat pen pen nang’in jong naha manpen ahilouleh nom nasahna pen lupdan khat umding ahin hiche’a konna chu namihina nakihetdoh thei chuleh lupdan phapen chu nakilhen thei ahi. Asim jouse Pathen’in kum lhung’a din phat thei bohtahen.