Jan. 14 &15, 2016 – Kailam noi lhang’a Kuki International Army natoh...

Jan. 14 &15, 2016 – Kailam noi lhang’a Kuki International Army natoh thusim By : Thangjakap Haokip, Delhi University

199
0
SHARE

KIA kiti hi tulang a ijah khah lou maithei u ahitan hinla hiche group jeh a hi mi ijat hamkhat NSCN-IM khut a kon’a ina sochat u ahie. KIA hi afull form chu Kuki International Army ahie.KIA hi akiphu doh dan jong hi tulai a thingnoi kiloikhom na ho hung kiphu dan a vang kiphut anahipon hinla situational demand leh aphat in angaichat jeh a ana kiphut doh ahie. A detail chat vang abon in kahepon hinla kapalen ST-Haokip ama jong a lamkai khat a ana pan jeh chun athu themkhat kahe in ahi. Isopiu Nagate toh ihung kiboi phat uva kho tampi hal a um jouva , mi ijat hamkhat hinkho abei jouva , mi ijat hamkhat amachang jouva adang aumna lai ho venbit nadia kiloikhom na ana phudoh dan u ahie.

Tulai a i nam thingnoimiho tup leh doi toh vang akibang pon ahi. Tulai a organisation inei hon alhangpi a atup uchu Kukiland/Zalengam/Homeland/Kuki Development Council/ Khulmigam etc tiho hi ahi e kitile kisei val ponte. Ahin KIA tup leh doi vang chu phat chomcha a ding bou ahin ahi- “Only for short term , attainable and clear objective ” ana ahie. Amaho tup leh doi pi pen chu iti kho le veng , inn leh lou , sopi u leh nao , nu leh pa , tehse leh chapang hohi NSCN-IM ho khut a kon in akihuhdoh thei dem ti hi ahi pen e. Unprepared conflicts ti di ham ahijeh in eiho ina ha thi uvin ahi. NSCN-IM ho hem le thal hon ana advance gam tauvin hijeh chun ana kiha doulel dehset e. Situations demand jeh a hung kiphut doh anahi vang in gaal mi te a kon a mi tampi leh kho ijat ham khat ana huh doh un ahi.

-Eimite leh Milong relation :

Henglep area adeh a Kailamnoi area -Khoupum ( Milong ho kulpi )toh boundary lang a cheng ho chun KIA te panlah na chu akihaimil thei poe. Kailamnoi area a eimi kho themkhat ana umho chu ahileh : Mamuong , Songkuong, Chingmei,Molcham , Khanpi , Najaang , Kongjanglok,etc ho ahi e. Che lai gallai tah a chun mi ahaosa aneijou jong itam naipouvin alhang pia mi atam jo hi thinglhang a kicheng a thinglei , zoulei etc tiho a ana kikihin so lai phat chu anahin ahi. Thinglhang hinkho hibang a nomtah a ana kimang a hengle kom a milong kho hotoh jong relation adeh a Malcha kijoh to leh kichoh to lampang a ana hoichu boina jeh in choboi in ana umtai. Atheng theng a seidin milong hotoh eimi akho kinaipi a ana umho chu akingai a kingailu thei u anahi e. Kajol kajol tia jong ana kikou ji uva kin le dong anei phat u jongle khat leh khat ana kikou khom to jiu ahie. Thinglhang lam neh leh chah hah phat jongle puhsui dia khat le khat kom a ana che jiu va hitia chu kingailuto tah a hinkho ana man jiu ahi.

-Khoupum a Simlai ho :

Hinla gaal ahung kigot umtah jeh chun hitibang kingailutna chu kithet tonan ahung umgo tan ahi. Thulamleng jatchom chomle muchi phalou milong ho lungthim a tu in ahung umtan ahi. Hitia ahung umdoh phat chun masang a hibang a ana kinai ho jong chu gaal mi mit in akimu to gam tauvin ahi. Eimi Khoupum a lekha sim tulai ccpur town area mi lekha sim a thinglhang a kon a hung aum bang in che lai phat jong chun Khoupum a kuki chate themjil mi phachom thim pi ana um un ahi. Ajeh chu ccpur town lang sang a Khoupum chu kailamnoi area ho ding a che le vahle na naijo anahin ahi. Ajeh chu vetsahna din Mamuong apat ccpur town chan chu ni 3 vel keng lampi ahin hinla Khoupum vang chu ni 1 a kile le nathei anahin ahi. Chukeo hilouvin donbosco khoupum chu themjil na mundia mi ana kiha chuna loitah khat anahi e. Thu ahung haboi got thim phat chun eimi simlai chapang Khoupum a lekha sim a kikoi ho jong chu inkote cheh in ana ki puidoh tauvin ahi. Ajeh chu school lah dung a jong chu eimi holeh milong ho kah a kinahna jatchom chom ana umsa ahitan hitia thuboi aumkit leh alhomjo eimi simlai ho chung a ipi lhungding ham vang chu seilou a hetsa ahin ahi.

-Gaal hung kipat tilleh thilsoh ho :

Chomkjat jou in athu ahung boi cheh chehtan ahileh gaal nei tei di chula ihung ihitauvin hinla eiho chula unprepared ihinalai uvin ahi. Hinla NSCN-IM hon ihin kap jeng phat uva chu eima nople da umlou a eiho jong ile thuh thei thei nah uva pan inalah u ahi e. Zoupi lang a thilsoh chu ahung kithang tan hiche phat chun hilang area a um eimi ho din vang lungjinna mei akai tan ahi. Ajeh chu akinaipi kho ho chu naga kho jong umsau sau ahin , chuna banle manchah jong ima kisuh ana kinei pon ahi. Thingnoi hon ana nei u themkhat chu ahi jeng in hinla hichun tah tah in mi ana kiha thopi jou poe. Hitia ahung umphat chun kailamnoi area a khosung a um housa ho chu ahung kihoukhom tauvin manchah self made weapon tidi ham hochu hasep in ahin sem pan tauvin ahi. Manchah thal choilou honjong tingcha , Chemcha , Chempong , moltum tiho kichoi pum in gaal mite chu dou thei thei in ana dou un ahi.

-Kuki International Army (KIA) hung umdoh dan neokhat leh athil bol hou

Akho akho a gollhang ho chu volunteer ding in ahin hol tauvin ajeh chu hichelai phat a ithingnoimi nei hou chu gaalsat khat anahipou vin ahi. Chuleh eimi thingnoi ho umlouna mun a chun volunteer hon pan nasatah ana lauvin ahi.Chomkhat jouvin lamkai phabep in Naga gaal kap mong mong din phullou hellouvin mi ahin holpan tauvin , gollhang ijat hamkhat chu gamle nam ngailutnan ahung kipehdoh jeng un ahi.Hiche lai phat a gollhang ana kipedoh ho vang chu gamle nam leh amite angailu mong mong uve kitile kisei val ponte. Hitia kipun khomna min ding chun KIA tichu Kuki International Army tin sah in aum tan ahi. KIA a pang din mi koima ana force pouvin hinla volunteer joh mi ahung kiha bol un ahi. KIA ho chun naicha a kihutdoh anahi vang un thinglhang lam adeh a kailamnoi area Henglep lang ho din pan nasatah ana nei un ahi. Thal vang seikham jong anei pouve , Kapalen ST Haokip ama jong matric x chai khat ahijeh chun agah pan le alamkai deu lang in apan sah un ahi. ST Haokip thepna lampang chu ahile gaal laiya itobang a strategy lah di ham tiho chu anahi pen e , ajeh chu thinglhang ahin akhang chedan mong mong a jong matric pol x chai mi ana kikhat laitah chu ahi e. Keiho jong Mamuong a housate ti di ham kana hijeh uchun keiho inn jong chu volunteer ho kisit jingna munkhat ahin ahi. Kei vang kaneo na lai in tu a kanung gel leh ima asuh asa h jong kahedoh thei tapon ahi.

-Manchaha ana kinei ho :

Hitichun KIA adia volunteer a ana chehon jong gaal chu adou thei thei nauvin ahin saat tauvin ahi. Thinglhang a um manchah ho jouse chu akho akho a kon in achom khom uvin golhang hon gaal kap nan ana nei jiuvin ahi. Hinla manchah tichu single barrier , rifle , handmade pistol tiho leh semthu Pumpi tiho chu ana kiha man deh set in ahi. Meithal neilou hon jong tingcha , chempong , chemcha , semthu thalpi ,Mol jum leh mol tum chuleh adang dang ahitheina cheh ana kichoi un gaal chu ana sat un ahi. Ana kiha manchah loikhat chu Pumpi ahin ahi , Pumpi hin eimi ho naga gaal idounau va i backbone in ana pang in ahi. Pumpi semdan khat ana kihelou hile ichan a ithi diu tam , ajeh chu NSCN-IM ho manchah hoitah tah toh eiho a home-made single barrier hotoh tekah hoi hilou ahi. Hinla pumpi semdan khat ihet jeh un ichan ham in gaal isaat nauva eikithopi uvin ahi.

-Pumpi manchah :

Hinla vangset umtah khat chu pumpi a operate dan ithep loujeh un mi ijat hamkhat eima leh eima ikisukha khauvin ahie. Kapa jong chu Nagaten kakho u ahung hal kigot ni a chun pumpi mehpil dia aloipa toh duty post mun a ana nganseu ahin , hinla pumpi chu athamdan ahet lou jeh chun pumpi chun ahin seh in ahile akisukhah lon ahi. Kapa kisuh khah apodia mi gollhang ijat hamkhat angaitoh nunao chapang chule tehse pohdi ijat hamkhat aumtoh hitichun Mamuong kho dalhan Phailien kahin del tauvin ahi. Mun tin mun tin a kon in eimi gollhang KIA volunteer ho mikitho pi din ahung uvin hitachun nahchang sal in phailien kaga lhung un ahi.

KIA critical role :

KIA ho chu reinforcement aphat dungjui in akingaichat na mun jouse a sun leh jan umlou , ann neh leh don ding jong ha gel thupi lou in kanam mite khat le ni beh kahuhdoh khahle tin akikouna ticheng a ana lhai le le jeng uvin ahi. KIA hon jong manchah kibanglou NSCN-IM ho chu hitachun ana kidoupi jeng uvin ahi. A cadre ho ujong ijat hamkhat in ahinkho ana chan lo tauvin , ijat hamkhat ana machang kit un ahi. Thinglhang lam a nule pa anahe hon vang KIA akiti teng le a mitlhi uvin adonbut ji uve . Ajeh chu KIA te natoh phat dan leh gaal ana kaap jeh uva NSCN-IM leh naga mite khut a kon a kuki te ijat hamkhat pin hinna a anei u ahie. Kho ijat hamkhat a chun a mipi ho adalhah sah ji uvin amahon duty apoji uvin ahi. Hinla vangset umtah in kho ijat hamkhay vang chu nagaten eina hal chai peh tauvin ahi. Hinla KIA holeh thingnoi kiloikhomna jatchom chom chule mipi ho panlah na jal in eimaho le eimaho vang mi phachom pi NSCN-IM chule Nagate khut a kon in isohcha thei un ahi.Organisation thingnoi kiloikhom na adang hon jong pan nasah tah in alanau ve hinla hiche article a isei nom pipen u chu KUKI INTERNATIONAL ARMY (KIA) ten thinglhang lam a kuki chate holeh kho leh veng ho huhdoh nadia apanlah nau leh gam le nam adia hinkho phal ngam a pan analah dan pau joh chu ahin ahi.

-Gaal kichai jou a KIA te dinmun leh khumkhana

Hinla chomkhat hou in gaal ahung kichai in , hiche phat chun KIA jong mi aki volunteer hon jong ana dalha sau sau tauvin ahi. Ajeh chu KIA te bidoi tuppi pen chu ahung kimol so tan ahie. Chomkhat jou in KIA kiti chu ahung thip tan ahi hinla mitin aheho  lungsung a vang KIA ten gaal laiya apan lahdan uvang lungmit in alang jing nalai e . KIA chu abidoi kicheh nei a – situational demand jeh a hung kiphut doh ahin , sumle pai duchat man ahiloule min than di deiman ahiloule aphung phung a thingnoimi nei angai e ti a hung kiphut vang anahipon ahie. Hinla gaal ahung kichai jou in KIA vang akihepha tapon, seikham in jong isa tapouve.KIA naga gaal ana dou holah a anasa loi tah khat chu ibol a imoh haimil jing diu hitam tia athu u themkhat limited tah a kihe ho hung kijih ahin ahi. Kuki International Army (KIA) chung chang a adang hetna nei hon lungsettah in kihetsah to uhite. Achung a hung kijih ho chu adih lou jong umkhat nante , adih lou aum a le kihetsah to uhite , correction is always welcome. Kuki International Army (KIA)  vang aum ta pon hinla hung umkit mo lou ahie – if the situations demand ti hi ka last message ahi.

Note :
Seikhel seival aum le vang kingaidam to uhitin ki sudih jo go uhite but onem heuvin. Hiche article a kon a lunghang ahiloule lungnop mo na nei ium uva le ka contact no 07827403428 ahi nin contact thei u ahie.ya feedback is always welcome.