Jan. 10, 2016 – KICHA IN, AHIVANGIN KICHA HIH IN By: By:...

Jan. 10, 2016 – KICHA IN, AHIVANGIN KICHA HIH IN By: By: Hegin Misao, Asst. Pastor Thangkanphai Baptist Church, Saikul, Sadar Hills, Manipur

160
0
SHARE

Mi abang khat chun imajouse a kichatna anei jiuvin, abang khat loi chun imacha kichatna him him anei pouve. Hiche teni hi ani ni in apha deh poi. Kichatna nei louva um ding ahinai, ahivangin thil phabep khat a kichat nei angai kit in ahi. Kivai hopna a dan palkeh/sukeh ho khu imacha kichatna neilouva hing ho ahi jiuve. Kumthah ahung hi toh lhonin minu mipa, nungah gollhang hon, toh le tham ding, inchen khosahna dingin lungkham lungdonna le kichatna jatchom chom inei diu ahi. Ahinla, Pathenin ama ngailu achate chu kichat louna lungthim apejie. Ajeh chu Pathen ging khen a/ Pathen lungdei lama hinkho mang ten leiset hi tuikhanglen lai lunga kileh lut ding hijong le kichatna nei pouvinte (Psalm 46). Goliath chun Israel nam mite chu noise tah in ana chou/phin ji in ahi. Hiche achouna awgin chun Saul lengpa chu ana tijat kichat sah jin, ipi ahung soh tadem tin lunggim lungdonna sangtah ana neiji in ahi (1 Samuel 17:11). Pathen ginna neilou, Pathen toh phatah a kigui jopna nei talou Saul lengpa chun Goliath akichat jeh in tija pumin kihot hot in aume. Ahinla, alangkhat a David chu ivet leh galsatna lama kijilna imacha  aneilou vang chun hangsantah in kichatna neilouvin Goliath chu ana joutan ahi. Pathen toh hingkhom, kiloikhom leh Pathen ging khen cha a hinkho mang tehon imajouse aki maitopi ngam uve. Khonung ding kichatna hi ahao le avaicha in jong aneije. Lekha them holeh athemlou hon jong khonung ding kichatna lungthim hi aneiyuve. Ahinla, Pakaiya kingai jing miten lunglhah na anei loudiu ahi. Lungdon le kichat sang chun alungthim uvin hitin seiyunte; “Pakai keilama apan leh kicha ponge. Mihem in kachunga ipi abol jou ding ham? Pathenin achate taona angaipeh in, kichat tijatna a konin ahoidoh ji e (Psalm 118:6; 34:4). Lhagao lama hat tah khat jong chun phat khat le kichatna neiyinte. Hiche hi angaina ahi. Pathen toh kinaicha a hinkho mang Abraham jong chun kichat tijatna ana neiye. Hiche ho jouse hi Pathenin ahai deh poi. Abraham koma Pathen akilah in, “Kicha hih in, keima nakiselna kahi,” anati (Genesis 15:1).  Thil jatchom chom jeh in ihinkho uva kichatna hung lhung inte, ahin Pathenin achate chu donlouvin koiponte. Ama lung lama ihin tengu leh kichat tijatna jouse ilungthim uva konin ladoh intin, kichatna a kona eihuhdoh diu ahi.