Ithoile khoh cheh cheh (Kithatona umbe cheh)

Ithoile khoh cheh cheh (Kithatona umbe cheh)

207
0
SHARE

Ithoile khoh cheh cheh

(Kithatona umbe cheh)

                          Nam sung’a kithatona thilsoh ho hi asoteng ahamdoh jousen sanggtah in demna akineijin hitobang deilou um thilsoh tuban asolou di akideije ti ahijeng’e. Ahin kon ipi seileh changvai lah a jun kitha kiti leh ipiham khat ithoileh akhoh cheh cheh kiti bang’in aban so  tahlou malah akhoh cheh sobebe jengji hi nam (society) sung’a natna hipi kijendam loujeh ham, aseiji honjong aseikalval bolthei aneilou jeh u ham, ami ami mong-mong’in italou uham ti hi ahi. Society chedan dihlou hi abul ipi hia ipijeh a nam sung’a kitha tona umjing ham ti hejongle kihetmosah a ima bol louva kikoi laise’a angai ngai hijing di ahi. Society sung’a hitobang kithatona natna (boina) suhlhap theilou ahi hi “Murphy Law” tia kisei – “thil khat chu achedihlou di (aboidi) teng ipi kilo henlang chedih sahteidi, boida sahteidi kiti jongleh boi thou thoudi ahi” kiti chet hi ilah uva soh ahi. Lhakhat sung, hapta kijom thetna kithana umho lah a hi mithat honjong kei kahin/keiho kahiuvin hiche jeh a kibol ahi ti jong umlou, ahia koi kiphongle kiphong hihleh kon abol ham ahelou jong umkitloudi ahi. Bongbal Kholen lang’a mi 2 kikaplih joujouvin Moreh a thingnoi lamkai lang khat kithana ana um’in, chujouvin Jiribam lang’a LTT thingnoi Cadre 2 ana kikaplih kit nin, chuin Kangchup lang’ah thingnoi KNF PRO khat kaplih ahung hikitne. Ajeh beija koima kithat loudi ahi. Ahin kithana gei hi aum teitei ngai ham ti hi ahi. Sum le pai kichuna jeh a kithatona ahileh gunda holeh sapte khanglui lang’a Cowboy ho kiboltona to kikhelou ahi. Gam (lhang) toupha di kichuna a kitha tona ahijongleh humpi, keipi hon anchah di sa kiholna dia gam/lhang akichu uto kibang kit ahi. MLA, MDC ho kichuna jeh a kitha tona ahijongleh chomkhat let le lalna di bep ahijeh in amu sang’a asuhmang tamjo kiti aphachom louhel kibol toh kibang kit ahi. Hinkho lemna leh thisan sona a thil khat akimu chu akisumang hinkholeh thisan to tedia manna hijo ahi. Politics jong kitha kinah kivetda tona ho umlouva ‘Friendly Match’ tobang’a (chamdel’a) bolthei himama ahi. Power leh sum kichuna hi thilse tamjo konna bul ahin hiche bou gelna aumlaise’a thilse khat asoteng kiloikhomna kahi ti jouse adon cheh uvah aw bembem’in peng jongleu phachom dehlou di ahi.

                         Ei le ei kah a kitha tona a hinkho chanlo hohi nam pumpi hinjouna di, hatna dileh gam huhna dia hinkho pehdohna hileh ichan’in akihat nin akimachal tadem ti di chu tua kitha tona a hinkho lem hohi nampi dia aphachom dijong umlou ahi. Jat dang nam dang hon hiche hopi khu amahole amaho bon hitia kibolto u, kichat tijat aum uve atidiu hijongle thukhat, chuche malah mi nuisat bep channa hinalai di ahi. Kuki Inpi Manipur hon tua pat kithatona bolbol kidou di ahi tia thulhuhna ahinnei uhi seididol le boldididol tah ahi. Mipi kiloikhomna hon thalchoi ho thu ahiteng kikum nomjilou ahin ajeh beijong hikitlou ahi. Civil leh Student kiloikhomna hohi langnei sihnei kichat beija apan u ngai di ahi. Hiche aum louleh Society dammona (kitha tona) hi beithei loudi ahi. Thilse bol bol civil leh Student kiloikhomna hon kinungsun di ahi ti thei dinmun ihinphah got bep u ahi. Thudih hi akiseiteng angai dia hah ahi. Ahin society sung’a mipi kiloikhomna thudih sei ngam leh natong ngam aumlou jeh a hiti ahi. Hiche hi vangset umtah ahi.

SHARE
Previous articleThusoh chom chom
Next articleThusoh chom chom
Editor at Eimi Times.