Ipi kibolna hitam (Houin le school ho kikhah jing, Exam le election...

Ipi kibolna hitam (Houin le school ho kikhah jing, Exam le election ho boldi kiti)

385
0
SHARE

Ipi kibolna hitam
(Houin le school ho kikhah jing, Exam le election ho boldi kiti)

Thil khat chunga boina asot teng thunei vaipo honjong alonaje helouva moh ngolthoji tobang ahi. Covid natna jeh a mi tamtah umkhomna thei school le houin kikhopkhomna ho kikhah jing nalai, bazaar len hojong kihong loulai ahi hensasa a Manipur a October/November lha leh MLA by-election boldi kiti toh MPSC 2016 Main exam thahboldi kiti toh hibang asojeng hi ipi kigel hitam lungdom umtah ahi. Alang khat kitna All India Medical Entrance test (NEET exam) jong vel ijavei ham postpone kibol jouva September lha leh akigong banga boltei di kiti jong umkit ahi. Mask kibua milah a chomkhat gavadoh thei, bazaar jong gakai thei ahivanga mi tamtah kititkhomna a phat sotjep umdi kiti hi covid a kon kivenna thei hidehlou ahi. Exam kiti hi Room khat ah alhomthei pen kiti jongleh mi som beh pungkal 2 le 3 kikah beh toukhomna ahi.  Hitih chen Mask kibua exam a lekha jihdi kiti hi lunggel kilham theilou tamdi ahijeh a asimdoh le ahet ho tahbah phatea jihtheilou mi tamdi ahi. Tu dehdeh hi ‘community transmission’ kiti mipi lah a natna kithejalna lhung ahitan koi chu natna vei hia koi chu hilou ham ti jong mijouse test kibollou jeh a kihethei talou dinmun ahitai. Ima bol louva mi thusei lasah moh vet vet dileh ngai dia mask kibua kikah thimtah a (social distancing) touva hoin kaikhom le school/college class nei di joh hi kivenna thei hijo maithei ahi. Alam khatna, mipi kikhop khomna ho akiphal lou vanga mipi kikhopna kin dang dang jong kibol thou kit, thina kin hoa jong govt nin mi kitam khoplou di ativanga alouthei louva mi tamtah tah kikhom thou thou ahi. Govt ninjong aseididol asei maimai hitam tithei ahi. Nilhah lang nidan 2 chan bazaar ho kihonga mi kipel metmutna jong dim, nidan 2 alhin teng curfew akipantai tia dukan ho kikhah a police hon achele avahle jahda a amat le aleusah kiti jong hi pabeng thusim lheh lheh ahi. Natna (virus) hi hi sun kahlah a umthim khin khen’a nilhah lang nidan 2 a pat mi adel lele hile kilom’a kibol hi benglam umchan to thakhat chet ahi.

MLA by-election hi Bihar MLA election to thakhatna boldi akiti tahbahleh October lha a boldi tina, NEET exam hi postpone akibolbe louleh September 13 a boldi, MPSC in MCS exam thahbol kitdi atijong atiteitei uleh October a boldi ahi. Ahin election leh exam akigong phat le nikho hoa boldi ti hithei ponte tiloi jong adon cheh a umkit ahijeh in tuni chan’a akichehnapen umdehlou ahi. Ima jouse hi politics to kivetchep ahitah jeh a election le exam boldi jahda hojong political party holeh atoson’a pang student kiloikhomna ho ahikit uve. NEET exam tu dinmun’a bolloudi ti hi India a tutua opposition Congress party ho vaipohna State holeh Congress bahkai Student kiloikhomna ho ahiuve. Manipur a MCS Main exam thahbol kitdi kiti nomlou hohi ana pass sa, service jong bolsa ho ahiuvin covid thuto jong kiha seitha behsehlou, CBI in thukholna anei kichai kah in exam kibol kit thei ponte ti ahi. CBI thukholna kichai hita nama jongleh tule tua MCS exam velbol di kiti hi covid jeh a jong dihlou, lekha simna di lha 3 jong phat kipe louva hitobang exam thupi boldi kiti jong ngol thubuh ahibouve. Court thupeh kipangputpi ahileh ana masei jep thei jong ahi.