IPI JEH-A ABOILOU DING BOI HAM?

IPI JEH-A ABOILOU DING BOI HAM?

764
0
SHARE

Leiset chung’a hi Pathen in imajouse hi aboilou helding’a asem  ahin, boina hi hoija hung kipan ham itileh Satan (Lucipher) akon ahi. Nam  sung hihen, society sung hihen, khosung hihen, insung hijongleh boina a-um  teijin, hiche boina hi mikhat akon ahilou leh honkhatna kon ahi jui jin  ahi. Eimite lah a hin kavetna ahileh boinalou hel ding, kikum nalou helding  ho a ikikum khah jeh uvin inam sung’u, i-society sung’u aboijing in ahi.
Phung le chaang jeh in iboi uvin, thina manna thu-a  iboi uvin, jineina  thu-a iboi uvin, gam thu-a  iboi kit uvin; boina ding eimahon ikisem doh  jing uvin ahi. Boina semdoh hon mipi a-oimo in, mipi in boina semdoh ho  a-oimo kit in ahi.
Lungthim pha keng hiutin, thilpha jeng bou sei hiutin, tong  leohen boina toh ikigamlat diu ahi. Boina kiti hin eihin delllut’u ahipon,  eiho joh in aphalou isei, ibol teng’u leh boi jui ihiuvin ahi. Hiche boina  iseisah u, ibolsah u chu isung’uva cheng thilha lungput chun isei sah u  ahi. Avetsahna sei ding in lamkai deihon mipi athu-a control (thunun) ding  tia thu ahin seija, ama deija na ahin toh teng leh boina chu hung peng doh  ahi. Boinalou hel ding’a eimite eima hole eima ho kikah a iboi ji uhi  diabol in ilah uva sagu ase jeh ahin, Christian dihtah eihiuleh hitobang  kiletsahna thusei, vaihom, kiti hohi ineilou diu ahi. Mipi lungdei ipi ham
tijoh Pathen idoh diu, ikineo sah diu ahi. Tulaija hi mijouse hi aching,  athem, abol thei ngenna kigel ahitah jeh a nam lamkai kahi tihon chingthei  tah a thu aseidiu, mipi alamkai diu, thutah le thudih asei diu angai tan  ahi.Kijou lhep, kilhimlhah bol lou hel ding ahi.
1960-80 laijin mihem ho tukhang’a bang’a hetgilna le thepna  sang nei mi anatampon, lamkai ho thu thun ana nung in ahileh boina ana lhom  in ahi. Hinlah tulai hin lamkai ja amale ama kitung ho sang in mipi  achingjo gam tan, hijeh chun lamkai hon seikhel, tohkhel anei uleh atatoh a  donbut dingle tong ding mi atamtai. Hiti ahijeh chun nam lamkaiho ding’in  mipi lamkai ahahtai. Mipin jong nam lamkaiho jana penom talou, sei  ngaitalou, lamkai ho sang’a lamkai mi atam tah jeh in society le namsung  akitup joutapon, akhoh lheh e. Aboilou beh ding’a iboi thei uhi koima in ei  bollu ahi jui pon, eima ho kibol joh ihi jui uvin, lungset umtah ihiuve.  Boina kitihi khantouna ding’a boinaho apha in, manthah na ding’a boi  hi  akhoh lheh jeng’in ahi. Boina hi crisis  hida henlang busy lang joh hileh  imalam jouse a imachal diu, ikhantou diu ahin, crisis lampang ahijui jeh in  inam sung’u le i-society sung’u hi stagnant ahilouleh retardation lampang joh in i-umdoh jui uvin, minung phah lel nan inei uve.
Mihem in eima, eima  hina theidol lammah natong hiutin, thu sei hiutin hinkho theng mang thei leohen boina toh ikigamlat tei diu ahi. Tulaija eimite/Kukite boina hohi hoitah a kavetna kakhuol leh boina loubeh ding’a boi jui  ihidannu kamudoh e. Kiseingailou, kithungailou, kijatolou, kingailut lou na hohin boina eisem pih u ahibouvin ahi. Tunia Kukite dinmun hi kavetna ahileh adihlou athenglou, ahoilou, aphalou, akiselguh tamtah kamudoh in, hiche hohi ichepi jing lai seuvin, imacha hipoute. Alen, alal ding, athunei ding, ahaoding athemding, aching ding ikichu jeh uva boi joh ihiuvin, Pathen thutoh kitoh in aneo ding, kithungai ding, lamkai jading go hiute, chungnun chu ding gotda pou pou leo hen i-society sung’u, inam sung’u vah AIDS natna, TB natna bei tante. Hitobang society le nam sung’a
natna hohi eima ho kipeto jui ihijeh uva namdang ten natna hitpi (germs) ahin lha doh jui ahi.
Adeh a Lamka (Ccpur) khopi sung’a eimite hi kavetna ahileh kalung donna lentah a-um tan ahi. Manipur a lekhathem tamnapen, Manipur sung’a ding’a City/town nina jong hikit nalai, khantouna lamma jong district dang sang’a khangtou jokit, asung’a cheng mihem ho jong eimite/Kukite ngen hikit, ahivang’a kitona ding lamma kikhitbeh thei juiloute ihiuhi datmo umtah ihiuve. Hoilai tah a ching ihiuva, hoilai tah a hi them ihiuvem? Aching, athem te akitoh bouvin ahi. Phung le chaang thu seipoute akitileh ikhoh cheh cheh uvin, MDC, MLA election laileh ikhoh dehset uvin ahi. Hiche ho jeh a hi Pathen in eigaosap u ahitadem tin jong
kagel jui jin ahi. Hinlah, Pathen in  vang eilungset lheh uvin, eiho joh in Pathen idalhah uva, inop nop uva ichon jeh uva hi Lamka sung mite hi boina in ei tomjing’u hiding’in katahsan’in ahi. Hichu dihjong dih maithei ahi, sopiteho.
Kitona ding’a keiman kadeipen chu ahileh (1) dialect/language a boilou ding, (2) Tribe (Phung) a boilouding, (3) Nangho, keiho, amaho kiti thuchengp’a boilou ding (4) Majority thule minority thu a boilou ding ahi. Amavang thisan (blood) a sopi ule nao ihinao hi sumil louhella kingailut ding, chekhomding, seikhomding, nehkhomding, pankhomding, kipa khomding, thohkhom ding ahi.
Tua Lamka town sung’a mite hin Pathen le mihem ngaiding’a ngainom umlou hel, jahda umtah sei louhel ding thu isei jui’u, ikidemto jui-u, Thadoute, Paite te, Haokipte, Zomite, Kukite tia kamcheng ilha lai seu vin boina toh kikhen poute ti kamun ahi. Seiding’a lomlou kidemna,  kigotna-a Zogam, Kukigam, Zalengam kiti ho isei jui uhi gangtah in ngadoh hiute. Thu hi thaneitah ahin, thua ihindiu, thu-a ithi diu ahijeh a chingtheitah a mijouse thuseidan ithep diu kadeijin ahi.

Dr. Sir H.H.Mate