Interview with Thangminlal Haokip. Manipur HSLC 2015 – 11th Rank

Interview with Thangminlal Haokip. Manipur HSLC 2015 – 11th Rank

541
0
SHARE

“Tuchan in Mobile phone kaneinaipon, Facebook, Watsapp hon ka lekhasim jong asuboipoi” – Gl Thangminlal Haokip

Chandel District Kotsophai kho a kon, tu le tua Langol a um Gl. M. Thangminlal Haokip in tuchung Manipur HSLC exam 2015 a Manipur pumpia Topper (Rank 11) ahinlah hi kithang atpi leh kineppi umtah Student khat ahijeh in simlai chapang lekhasim chapang danghon kitilkhouna leh ama hinkho mandan le lekhasimdan hoa kon kihilna aneitheina diuvin ET in kihoulimpina anei hi ahung kiso e.

ET: Amasan tuchung Manipur HSLC Exam a lolhinna sangtah (11th Rank) nahin muna chung’ah ET in kipapina kahinphong uve. Ichan’a nakipa em, nanu leh nap ate ichan’a kipah uvem?

TH: Keijong kakipah lheh jeng’e. Chule hiche kipana hi kam’a seiding hileh kisei jouponte. Kanu leh kapate jong seijoulou hellin eikipapi lheh jeng uve.

  ET: Nakonna kho hoilai ham, na insung dinmun, namu leh napa’n ipi abol (ipi naa atoh) themkhat hinsei tem’o?

TH: Ka kho chu ahileh Chandel district a Kotsophai ahin, keiho insung hi ahileh thagum a natong a sum kilo kahiuvin chuleh kanu hi insung minu (housewife) maimai ahin kapa’n vang mistry naa atong’e.

  ET: School nahung kaiya pat tuchan’a nakaina school hoilai lai ham, na class topper nahung hiji em?

TH: Keihi nursery a kipat cl-X chan Children’s Training School, Langol a kahung kaijin ahi. Class topper vang cl-VI a pat kahung kipan in ahi.

  ET: Tuchung Manipur Class X ‘Topper’ khat hidia nana kigin chat em, ole nagel sang’a hoijo a nahung passed joh ham?

TH: Ahichu Topper hi kadel ahin, ging jong kana kiging cha’e. Hinlah abang komle boina neocha cha ho jeh in lunglhah daina kana neijin hinlah hiho jouse chu hainil’a kalungtup chu kamolso ahi. Hiche lolhinna hi Pathen jal leh mijouse kithopina le taona jeh ahin, hijeh chun kakipana kahin phonge.

  ET: Niseh a na phaat leh hinkho mandan, na lekhasim dan themkhat hinseijo.

TH: Alhangpi in kiseileh keihi vah jong kavah doh behseh pon, chule inn a atamjo’n kaum jin ahi. Hijeh hin lekha jong kalung deitah a simtheina ding’in phat kanei theijin, kalungtup kamolso jouvin ahi. Chule notes sang’in text book hi kaha simjoh ji e.

  ET: Na phaat ong sung’a ipi nabol ji em, extra curricular lang’a nakimanchah dan iti em?

TH: Kenvang kaphat ong sung’a hin lekha dang dang tichu school text book hilou newspaper hihen adang hileh kasim jin chule abang komleh kaloiho kom’a kachejin TV kagaveji e. Extra curricular lam hi katha anop vang’in kabol behseh poi.

  ET: Tulai nungah golhang chapang school kaiho jong mobile phone a internet, FB, Watsapp ho ah angol gamtaovin, hiche hin ichan’a lekhasim atohkhah thei’a nagel em, nangma tah in hiche hohi ichan’a naman/nabol em?

TH: Tuchan geiyin vang keiman phone jong kanei naipon hijeh chun internet, FB, Watsapp ho ah hin phat kasumang theipoi. Hiti hin kalekhasimna lang jong asuboi poi, Ahitheile vang cl-xii chai masang sen phone hi kichoi daleh phalheh in tin themjilna lam ah jong kikhangtou lheh jonte.

  ET: Lekhasim lang hi school pha, teacher pha ichan’a ngai em, ahiloule itobang school hileh oja hileh student ho joh a kiha ngap em?

TH: Hiche’a hi kasei nomchu ahile school, ojaho chule student hicheng hohin lekhasimna lam ah hin pan inei sohkei uvin ahi. Ajeh chu student khat chu lekha them lheh jongle akithopi ding leh ahilding aum louleh hitheilou ahin chule school hihen oja hihen phalheh jongleh student ho akidoi louleh hithei kitlou ahi. Hijeh chun amaho jouse hin panna anei cheh uve.

  ET: Aban ipi simdi nati em? Science, Arts, Commerce, Computer- ipi lampang simdi nati em, gampam’a chedi nati em?

TH: Maban’a hin science simding katin hinlah gampam’a vang cl-xii chai tokah’a chelou ding kati ahi.

  ET: Ipi hung hidi natup em (aim in life)? Ipi jeh’a natup nam, natup chu iti mudi nati em?

TH: Kenvang kahin kho a katup chu ahileh Civil Service ahin, katup lonajeh chu ahile inamsung, i society sung uva dinga kapeh doh a chuleh thilkhat boldoh ding ti ahi. Chujongleh miho hetthei tah namkhat hisah nadinga pan lahding tijong hi kagel jingkhat ahi.

  ET: Kipa aume’e, nalungtup molso dinvang kahin thumpeh uve.

TH: Keijong kakipah behseh jenge. Nei kipapiu va nei khoto jeh uvin. Pathen in ET phatthei bohjing henlang khangtou jing tahen.