Interview with Satmunchon Kipgen, Manipur HSLC exam 2020 – 11th Rank

Interview with Satmunchon Kipgen, Manipur HSLC exam 2020 – 11th Rank

188
0
SHARE

Interview with Satmunchon Kipgen, Manipur HSLC exam 2020 – 11th Rank

“Social media hi amangthem hodin hetbena ahidi vangin simlai hodin lekhasim vang hatah in atongkhai tin kagelle. Taona leh kihabolna jallin ima ahimo aumpoi tin kagelle”

– Gl. Satmunchon Kipgen

Sadar Hills Kangpokpi district sung Tujang lhang’a Jalenmol kho a kon Gl. Satmunchon Kipgen nin tuchung HSLC exam 2020 a Manipur pumpia Rank 11  a pachanna ahinnei hi kithang atpi leh kineppi umtah Student khat ahijeh in lekhasim chapang dang hon kitilkhouna a  aneitheina diu kinepna jallin Eimi Tims (ET) in kihoulimpina anei hi anoijah ahung kiso e.

Eimi Times (ET):  Amasan tuchung Manipur HSLC Exam a lolhinna sangtah (11th Rank) nahin muna  chung’ah ET in kipapina kahinphong uve. Ichan’a nakipa em, nanu leh napa ichan’a kipah am?

Satmunchon Kipgen (SK): Hiche HSLC Exam a Rank 11 kahinmu kajah chun kakipah lheh in amasa chun atah jong kakisahpon gingjong kana kiginchatlou ahi. Kanule kapa jong akipah lhon lheh in athu ajahjah lhon’in anatohna lhon muna kon’in kei kipapi din inlam ahinjonpai lhon’e.

ET:  Insung gentheitah a kon nahi thu ana kijan, na insung dinmun, nanu leh napa’n  ipi abol (ipi naa atoh) themkhat hinsei tem’o?

SK: Insung hahsatah a kon hung seilen kahin, kihinsona dileh kei le kanaote lekhasim sotna din kapan vadung song akhen’in kanu’n jong nel alohjin ahi.

ET:   School nahung kaiya pat tuchan’a nakaina school hoilai lai ham, class topper nahung hiji em?

SK: Primary school lang kahetapon, Classs I chu Kangpokpi govt school, Class II le III Good Shepherd School, Class IV le V Gamnomphai UJB School chuleh Class Vi-X hi Eklavya Model Residential School (Gamnom Sapormaina) ah kahunkaijin atamjon class topper kahung hitoupehjin ahi.

ET:  Tuchung Manipur Class X ‘Topper’ khat hidia nana kigin chat em, ole nagel sang’a hoijo a nahung passed joh ham?

SK: Topper khat hidin vang kana kigingchapoi. Ajeh chu government school ngen’a kanakai ahin ka educational background ahoipoi. Hiche result hi keima gel sang’in ahoijoi.

ET:  Niseh a na phaat leh hinkho mandan, na lekhasim dan themkhat hinseijo.

SK: Holiday ho tailouvin niseh in  pung li le pung nga (4 to 5 hrs) sung tobang lekha kasim jing’e.

ET: Na phaat ong sung’a ipi nabol ji am, ‘extracurricular’ lang itobang bang langa nakimanchah am?

SK: Ka phaat ong sungin Comic ho kasimji’n “extracurricular activity” ah Essay Writing, Quiz, ho district level, state level hoa ah kanajaojie. Sports (Outdoor) lang vang katha anom behsehpoi.

ET:  Tulai lekhasim chapang school kaiho jong mobile phone a internet, FB Watsapp ho ah angol gamtaovin, hiche hin ichan’a lekhasim atohkhah thei’a nagel’em, nangma tah in hiche hohi ichan’a naman/nabol’em?

SK: Tulai Social Media tiding FB, Whatsapp ho hin chapang school kai ho lekhasim hi hatah invang atongkhai tin kagelle. Aphatna le asetna aumcheh in, amangthem ho ding’in vang thil hetbena in pangjo inte tin kagelle. Keima chungchang thua seidin Hostel’a um kahijeh in Mobile Phone hi holiday tengle bou kamangji jeh in ka lekhasim vang atongkha behsehpoi.

ET: Lekhasim lang hi school pha, teacher pha ichan’a ngaijam, ahiloule itobang school leh oja hileh student ho joh a kiha ngap am?

SK: Lekhasim lang’ah school pha le Teacher pha angai mong mong’in hiche chungchon’a student honjong mopohna lentah anei uve. Lekhasimna a school teacher leh student hon amopohna akihetna atoh dingdol akitoh chehleh lolhinna umtei ding ahi.

ET: Aban ipi simdi nati em? Science, Arts, Commerce, Computer- ipi lampang simdi nati em,

SK: Class XII chan Science simdingin kakigon ahi ajeh chu Science a hin Scope jong alen’in kalunglutna lang jong ahi.

ET:   Ipi hung hidi natup am (aim in life)? Ipi jeh’a natup ham?
SK: Kaneova pat vang chu Commercial Pilot kana hinom’in ahin kadamthei behlou jeh a Pilot dia ahahsatdi jeh leh society a dinga na pha tohna thei ding service mudi jong kadei jeh in UPSC  Civil Services exam bol’a mudi katupme.

ET: High School simlai chapang ho dia ipipen naseipeh nom’em?

SK: High School hi eiho educational career a dia Foundation hoitah in kisem utin taona chule kihabolna jallin ima ahitheilou/ahimo aumpoi kati nom’e.

ET: Kipa aume’e, nalungtup molso din vang kahin thumpeh uve.

SK: Keijong kakipah e, ET ho jong Pathen’in phatthei naboh uhen lang machal jing taovin.

 [Interviewed by T. Lhungdim]