Interview with Pu Songrolal Songate, noted song composer

Interview with Pu Songrolal Songate, noted song composer

461
0
SHARE

Pathen lasem lang’a minthang Pu Songrola Songate-a hi kum tampi Manpur gamsung munchom choma Music instructor’a anapang jing ahin, tuchan hin Laa 627 ana siemdoh tan ahi. Ama hin Staff notation jong Louisville, Kentucky State, USA mun’a ana jillin, tuhin Sielmat, Churachandpur mun’a Home Music training ahon jingtoh kilhonin, Sielmat Christian Higher Sec. School a Teacher a jong pang ahi. ET in kihoulimpina anei hi mipi simthei din ahung kiso e.

  Eimi Times (ET) : Na innsung (family) background themkhat neisei pehthei diu ham? Chuleh tua hoilai mun’a natoh nanei am?

Songrolal Songate (SS) : Achesa 1954 kuma Pherzawl Village a kana piengin, Senvon Village a hung khanglen kahi. Rev. T.Khuma Songate laigilga pasal 7 leh numei 3 lah’a atahpen kahi. 1975 kumchun Lienmawi toh houdan thiengin kana kigom lhonin, Pathen in chapa 2 leh numei 1 eipen, Sielmat, Churachandpur mun’a kachengin ahi. Tuhin Sielmat Christian Higher Sec.School mun’ah Teacher in kapangin, high school student ho leh Higher Sec. student ho jilkung’in kapangin ahi.

  ET : Music leh staff notation hi hoilai mun’a ichan najil ham?

SS : Tonic Solfa hi sangtah-in kana jilpon, hinlah kum 6 kahi apatnin solfa kiti hi kana lunglut in, keima kiham bolna jalleh kapu L.Rhanglien Songate akonin kahung thiem toupeh in ahi. Achesa 1990-1991 kumin Louisville, Kentucky State, USA mun’a Staff notation kana jillin, kum 1 leh lha 4 kana jil jouvin Bachelor of Music certificate kahin kilah in ahi. Dr.Kenneth Ronald Wells koma theoretical kajil’in chuleh Dr.Albin C.Whitword koma string instrument kana jilben ahi. Secular lam’a seidin 1982 kum chun B.A kana jouvin ahi.

  ET : Nangma hi Hmar community lah’a hung khanglien hijongle chun, Thadou-Kuki speaking lah’a nasa tah-in naki mangchai tithu akijan, hijeh chun hoilai munho’a nana kiman chah ji am?

SS :1977-1983 chan hi Music instructor in Kuki Christian Association (KCA) Henglep Area ah kana kimang chan , chuleh houbung chom chom tichu KBC, KCC, KRBC, Independent Church, EBC, ZPC ho’a jong kana kimang chan ahi. Agamkai’a seidin Henglep Area, Sadar Hills, Saikul, Imphal, Churachandpur, Uchum chuleh Nambol area lah-ah Music instructor in kana vahlen ahi. Chuban’ah 1990 kumin Indian Children Choir(ICC) mi 27 ho America gam’a States 27 vilna progam chu keima lamkainan kana cheovin, music instructor din Lunglei, Aizawl, Haflong, Guwahati chuleh Delhi munho’ah kana chejin ahi.

  ET : Manipur thinglhang gamsunga Choir laa siem (song composer) minthang tah nahi dungjuiyin laa hi ijat vel nasiem doh tadem?

SS : Laa siem minthang tah kahi vang kati nompon, hinlah tuchan hin Pathen in eipeh dungjuiyin laa hi 627 vel kasem dohtan ahi.Ka lasiem hohi atamjo choir laa ngen ahin, Hmar pao’a kisa hi atampen hintin, aban’a Thadou-Kuki pao hintin, English pao’a 27 chuleh mizo pao’a 10 aphatan ahi. Tuchan hin Ka laa siem ho hi Mizo, Thadou-Kuki, Paite, Zou, Liangmei Naga chuleh Meitei paovin akileh doh in ahi.

  ET : Laa siem phontho tah nahi dungjuiyin, Laa siem kiti hi pienpi (inborn quality) thepna ahidem? Ahilou leh kiham bol vanga laa siem jeng thei ahidem?

SS : Laa siem kiti hi thanop manleh kihambol man seh-a siemjeng thei ahipon chuleh Laa lam’a lunglut manleh lasathiem himan’a laa-kai siem kiti hi mohbol jengthei ahipoi. Hijeh chun Keima hetdan invang Pathen in eipeh pienpi thepna khat hidin kagingchai. Pathen jal’in keima noi’a solfa anajil milah-a gah minphah thei cheng chu : (L) Sonneh Haokip, Manglun Haokip, Jangkhokai Haokip @Jeff-Akai, , (L)Buonglienkung, James Rochullo, Bobby Songate, Paotingen Vaiphei ahiuvin, chuleh kei noi’a matriculate in music ana chai ho cheng chu: Sehlun Singson, Jangginpao Khongsai @Paocha, Genlallian Vaiphei chueh Thangboi Kipgen ahiuvin ahi.

  ET : Na innmun’a Music training hi itih kum’a nabolpat hitam? Tuchan gei’a nabol jing nahlai ham?

SS : Mun gamla ho’a ana kiva jou tahlou jeh-in 1997 kuma patnin ka chenna innmun Sielmat, Churachandpur mun’a kana bol panin, jingkah leh nilhah lamin kana boljin ahi. Hinlah student hi mi 5 kalval kana laji pon ahi. Tuhin music training bol mi 3 bou kaneiyin, maban’a Music training bolna ding mun akinei teng anom chan jilna thei tohgon kagel jinglai tah ahi.

  ET : Na laa siem ho lah-a ipi laa hi nadei pen em? Chuleh ipi laa hi minthang pen inte natim?

SS : Jeremiah bung 1 sunga Pathen in Jeremia ama natong dia akouna toh kisai’a Pathen peh Laa ka siem “ Thi chennin ama rongchao bol katih” (Thi channa ama na katoh jingding ahi) hi ka laa siem ho lah-a kadei pen khat ahi. Hiche laa hi Ng.Lalparzou, The Reepers band, HN Zate (Germany), chuleh Biete sisters hon studio ah record ana bol taovin ahi. Ka laa siem ho lah-a aminthang pen(mi atamjon asah/ahet) pen chu “Oh! How I love you my dear Teachers” kiti laa hi hidin kagingchan ahi.

  ET : “Thuleh laa hi akikhen theipoi” kiti hi nangin ichan’a nahilchen thei dem?

SS : Thu leh laa kiti hi “Bu leh me” tobang ahin, Bu tuitah kihon jongleh me atui louleh anneh tui theilou ahibanga, thu leh laa hi kikhen theilou ahi. Ichennao Manipur gamsunga houbung atamjon laa lamhi igel khoh pouvin hijeh chun khangthah tamtah houin kainom louvin amoh vamang taovin ahi. Keima geldanin Hobung hing(lively) kiti hi houin sunga ala sahdan uvin akihei kiti leh kisei khel behlou maithei ahi. Hijehchun igam sung uva houbung jousen church music system hi upgrade bol utin, music promoter chuleh music pastor jong neithei taleo hen hobung jong nasa tah-a machal ding, mi hetjong hiding ahi. Vetsahna: Mizoram Presbyterian Church ho Synod chor akonin akihen, ICI, EBC,ECA, KCC ho jeng jong Central choir/Synod Choir ho’a konin nasa tah-in mi het ahin ahi. Music lam kagel khoh jeh-in keima houbung EFCI, Sielmat Church ajong tukum sungin Music system Dk.3 Lakhs man val kacho uvin, Manipur a speaker kimu beh lou Line Array Speaker 2 jong kachoh beuvin ahi.

  ET : Gospel laa tilouva lunglen laa hi nasiem khah tah em? Nam laa kiti leh Gospel laa kiti hi nangin ipi ti nagel em? Tulai laa-kai siem them abang khat hin laa-kai siem man ala jiuvin, nangin ipi nagel em? Chuleh tulai lasa hihen laa-kai siem ho koma ipi seipeh nom nanei khadem?

SS : Tuchan hin Pathen laa bou kasiemmin, lunglen laa kiti hi kasiem khapoi. Nam khat kiti hi Pathen siem ahi dungjuiyin, Gam leh nam ngaina laa (Patriotic song) kiti hi kei gellin asepoi kati nom’e. Houthu leh Politics thu hi phate cha ache khom teng leh tahsa leh lhagaova kikhang tou ahi. Kenvang Laa-kai siem man hijat hinding tia fixed kibolho hi kadeipon, Pathen in Laa-kai siem theina moh-a eipeh hi kenjong moh-a kahop ding kati ahin, ama lung kato louleh nikhat leh eilah pieh kitthei ahi. Hinlah laa-kai kisem peh hon kipa man leh thachol man’a eipeh uleh hichu thilchom hintin, laa-kai siem man fixed a kibol hi kadei poi. Chuleh tulai lasa honjong kiletsahna beihel’a Pathen in lasah theimna eipeh uhi mangchao hitin, Laa siem honjong Pathen thil mohpeh hi athon in hom ute tihi kaseibe nom’e.

  ET : Laa thiem khat nahi toh kilhonin laa phatchom dan themkhat neisei peh thei diu ham? Chuleh Mizoram leh Manipur hi ichan’a laa lam’a akikhetna nahet doh am?

SS : Laa kiti hin lunghel leh lunghan jong anem sah theiyin ahi. Saul lengpa jeng jong Musician David semjang saina akoninn alunggel anem sah theiyin ahi. Hitoh kilhonin Satan injong Laa mangchan khangthah tampi damun lampia ana puilut in, hijeh chun laa kiti hi apha jong aumin, ase jong aumin ahi.Manipur gam’a lasa ho leh musician ho hi Mizoram musician hotoh akikhetna aumbeh pon, kimu niem na(inferiority complex) inei hou hi pailhao hitin lung lentah-in malang nojing leohen miphah chan iphah thei thou diu ahi.

  ET : Jatdang/gamdang’a cheng hilechun Award tampi sangthei nahitan, hinlah kidop dan ithep loujeh u himai tantin, hijongleh ET in nangho tobanga ‘hidden talent’ neiho aki houpi nomjing ahin, naphat manlu tah neipeh jeh-un kaki pah uve.

SS : Koima hetkham kahi lou hitam kati nunga ET in gelkhoh tah-a neihung kihoulimpi jeh-un kahin ngaisang lheh uvin,Pathen in naphung vuh jing taohen.

KAKI PAH-E!