Interview with Pu J. Lhungdim IDAS

Interview with Pu J. Lhungdim IDAS

1153
0
SHARE

All India Civil Services Exam 1984 kum’a lolhinna ananeiya Indian Defence Accounts Service (IDAS) anamu Pu Jamkhongam Lhungdim @ J. Lhungdim hi Kuki society a dia Senior Gazzeted Officer ahi naban’a lhagao lam’a lunglutna nei mi khatjong ahi. Amahi Churachanpur M. Songel haosapu ahiban’a ECA Houbung upa (Elder) khat leh news ngailutah khatjong ahi. Tu le tu hin India khopi New Delhi mun’a Defence department a Principal Integrated Financial Adviser naa atoh ahin tu naicha chun inlang (Manipur) ahung phan Eimi Times (ET) in ana kimupin, eimi lah-a gah het thei India government a senior officer khat ahijeh in ET in kihoulimpina ananei hi mipi simdin ahung kiso e.

Eimi Times (ET): Na family background leh na education background themkhat neisei peh thei diu ham?

J.Lhungdim (JL): Achesa 1956 kumin Churachandpur Molnom kho-a kana piengin, (L) Zilkhojang Lhungdim laigilga khatseh kahi. Lekha kahin simthei’a kipat hin kapaneo Seikhojang Lhungdim, Chief of M.Songngel in eina vetkol ahi. 1980 kumin St.Anthony’s College, Shillong mun’a graduate kana chaiyin, Master degree hi NEHU noi’a 1982 kum’a kana chai ahi.

  ET: Govt.Service hi itih kum’a natoh pan ham? Ipi post a nana lut’a huoilai laiya ipi post nana toh khah em?

JL: Pathen lungset jal’in 1984 kum chun Bank P.O.(Delhi/Chennai) kana mun, hinla lha 9(Jan-Sept) bou kana tongin, December 1984 chun IDAS Assistant Controller of Defence Accounts( Guwahati/Shillong) kana mun, hijeh chun 1985-1988 chan kana tongin ahi. Govt. service kabol sung hin Pathen jallin posting leh promotion kanamu toupeh-in hiche hochu: Deputy Controller, 1988 (Shillong), Joint Controller of Defence Accounts, 1993 (Shillong/Guwhati), Director Ministry of Defence, 1998(Delhi), Finance Officer, NEHU, 2001-2006 (Shillong), Controller of Defence Account, 2006-2009(Guwahati), Planning Adviser, NEC, 2009-2014(Shilllong), Chuleh October 28,2014 apat chun Principal Integrated Financial Adviser in promotion kana mun ahi.

  ET: Tulai milham atam jon na Govt.service (IDAS) hi aha hetthem pon, hijeh chun alhang pia hetthei dia neisei peh thei diu ham?

JL: Alhangpin IAS, IPS leh IFS tiho hi hetbai lheh ding ahin, kei natoh hi milham din het hahsa thou nante. Hinla alhangpi-a hetthei ding chun, Vice Chief of Army Staff toh katong khomin, Financial administration lampang kaboi pi jiuvin ahi, Army Ordinance- Army ho meichang meilou, UN peace keeping force chuleh Indian army ho lhalo (Salary) lampang sutoh-a kapan jiu ahi.

  ET: Gazzeted Officer khat nahi naban’a khosung haosa mopohna napohtha dungjuijin, Kuki society sunga haosa khat’in khosung vengsung avettup ding dan hi nangma ngaidan ipiham?

JL: Ichen nao India hi Democracy ahi dungjuiyin, Haosan jong Democracy system hi phate cha ajuidih ding hi kadei sahpen khat ahi. Election Politics ho ahin Haosa himan’a koiman force in vote holda henlang, mipin adei pen chu tungdoh leh Christian houdan tojong kitoh ahi. Tuchan hi kakho sung M.Songgel ah “Election phat teng kho mipi hon na deidan dungjuiyun vote kilhah uvin kati jin”,ahi. Igam sung uva kho tampi boina Job Card jong hi kho chagan amu dingdol muhen lang, kho chagan jong phaten atoh dingdol tongleh ida khosung khangtou lou ding ham?. Development lampang jong kho mipi abol thei chan’in bol henglang gamsung sempha leh tua sanga imachal joh diu ahi kati-e.

  ET: Mi loikhat ngaidan’in Haosa leh Hobung Upa poh kop hi thildih ahipoi, Politics lampang bolhon phaten bol uhen lang, houthu boipi hon houthu boipi hen tihi ahi.Hiche chungthu ahin ipi ngaidan nanei am?

JL: Tuchan hin ka paneo adam nalai’in aman haosa apoh jing nahlai ahin, hinla tahsa hatlou ahitah jeh-a atamjo-a mopohna kapoh ji ahi bouvin ahi. Haosa leh Houbung upa poh kop chung chang hin asei lam lam them ding dan’in kamun, keijong hahsatna tampi katoh’in, thilbai vang ahipoi ti kasei nom’e. Hinla alhangpia seidin Haosa himan’a Pathen thu toh kigamlat hel jeng ding tina ahideh poi. Tulai haosa tampi hi ju-le-sa nelou’a Pathen ging pum’a khosung apoh leo khosung chu khangtou teiding tina ahi.

  ET: Eimite kho lah’a M.Songgel hi lekha lang hihen, sports lang hihen, houthu lang hijongleh vetjui theitah ahitan, hiche hi ipi jeh ahi tia nagel am?

JL: Pathen jal’in M.Songgel khusunga hin Govt.service neocha cha ho simlouvin Gazzeted Officer 8 tobang kanei uvin, Footbal lam’a jong Manipur CC Meet chan kana peh uvin, tuchan hin houin(Church building) khatbou katung doh uvin ahi. Hichu khosung mipi, katoh khompi khosung vaipo haosa- Upa chuleh Youth Club ho kitup jal hidin kaging chan ahi. Youth Club hon jaan khojin nunga simlai chapang vadoh phal lou NIGHT CURFEW akoi jeh uvin simlai chapang tampi amidoh tan ahi.

  ET: Gazzeted Officer leh Haosa mopohna natuhna ban’a houbung upa nahi dungjuijin tulai nungah- gollhang hon “houdan theng’a kichen hi sum alut val’in, hijeh chun hou dan hihihjong leh  kichen jeng hi aphai”  ti agel uhi ngang’in ipi ngaidan nanei am?

JL: Kalung lamtah khat neidong khai. Ken jong mun tampia hiche chung chang hi kana seijing peh khat ahi. Houdan theng iti tengleh golvah bol tei tei ding, sumle pai tampi sen tei tei ding tina ahideh poi, Pastor/Hubung upa khat’in Pathen min’a agop chu thupi pen ahi. Chatui tamcha hijongleh jingkah/nilhah kah sunga bol thei ahi. Hiche hi tulai mipiho leh houbung lamkai tampin ahet themlou khat ahi. M.Songgel kivaipoh danchu koiham khat houdan theng’a jinei/kiengnei ding aumleh houbung’in Rs.8000, Haosa pun Rs.2000/- chuleh kho mipi chengin Rs 10,000/-kithopi nadin kape jiuvin ahi. Hitobang hin bolcheh leohen nungah-gollhang hodin kitil khouna khat ahi. Chuleh keima ngaidan’in custom neite kihi jongleh manle moul hi ijo thei ding bep uvin semtoh theileo hen kanom’e.

  ET: Nang tobanga Pathen thutoh kitoh’a khosung vaipo thei hi society sung’ah akingai chalheh-in, hinla nang hi atamjon gampam’a naum jingin, gampam’a itobanga society level a pan nalah am?

JL: Nasei dih lheh-e.Ajeh chu keihi 1976 kum’a kipat ichen nao Manipur gamsunga umlou kahitai. Kum 38 jen hi atamjon kol leh vai gam’a hinkho kamangin ahi. 1981 kum’a Kuki Worship Service kiphudoh na achun founding member khat kahi. Minu-Mipa atamjon KWS hi apha chompoi tijongleh, kei geldan invang KWS hin simlai chapang tampi hinkho asemphai tin hangsang tah-in kasei nom’e. KWS hin Seminar, Career Guidance chuleh Gospel Camp ho ana kigong jingin hiche dungjuiyin khangthah mi ijat ham khat hi Pastor leh Officer ahidoh lon ahi.

  ET: Manipur gamsunga Meitei ho ban tah-a atampen kihi jongleh niseh thuso lang’a ilhahsam uhi ipi ngaidan nanei am?

JL: Tulai khantou machal dungjuiyin daily newspaper neilou society chu akhangtoulou ahitai. ET hi ahoijoh nacheh din pan lakhom cheh uhitin ET board hon colour newspaper ahinboldoh diujong kinep aum’e. Eimi Times Hard copy kamu lou vangin internet a kana sim jingin, gam pam’a um keiho dingin thu leh laa hetna hoitah ahi, hijeh chun kenjong ET kajo chan’in kithopi thei chan’in hin kithopi jing nang’e. Eimi Times managing board ho pachatna sangtah kahin pei.

  ET: Na phat manlu tah neipeh jeh-un kaki pah uve. Pathen in navangboh jing tahen.

JL: Keijong kakipah e, Eimi Times hingsot hen.