Interview with Nagaland DGP: Pu Lengkhothang L. Doungel, IPS

Interview with Nagaland DGP: Pu Lengkhothang L. Doungel, IPS

1144
0
SHARE

Police department a dia panmun (post) sangpen hi Director General of Police (DGP) ahitai. Medziphema (Ghaspani) town a kon (L) Pu Langkam Doungel @ Langkam Kuki (first Kuki MLA from Nagaland) chapa lenpen Pu Lengkhothang L. Doungel IPS in hitobang panmun hi achesa November 26, 2014 nikho chun Nagaland state ah analopantai. Nagaland State a hitobang dinmun/panmun sang hinlo thei Kukite lah a ahung umdoh thei hi nam pumpi a dia kipapi umtah leh lolhinna khat ahijeh in ET in kihoulimpina le thudoh themkhat ana kineipi’n, hiche hi mipi hetdi leh kitilkhoutheina din ahung kitahlang’e.

Eimi Times (ET) : Amasapen’in hitobang panmun sang DGP post nahintuhna chung’ah kahin kipapi lheh uve. Natha nopdi jong kagingchauve, ole iti nagel em?

Lengkhothang L. Doungel (LL Doungel) : Police officer khat kahina’a hitobang Nagaland DGP panmun kahinlo thei hi keidia janmang hung guilhung tobang ahin kakipah lheh in Pathen kathang vah e.

  ET : Na insung (family) background, nanu le napa thu leh na lekhasim lai thu themkhat kahetnom uve.

LL Doungel : (L) Langkam Doungel leh Pi Lhingjakim Doungel chapa lah a alenpen kahin, sopi pasal 3 leh numei 4 kahiuve. Nagaland nin December 1 1963 nikhoa Statehood anamujouvin 1964 kum chun Nagaland MLA election masapen anakibol in hiche a chun kapa chu Ghaspani constituency, Dimapur district a kon ah MLA anakaidoh e. Kohima Baptist school ah lekha kanasim’in, 1978 kum in St Edmund’s College, Shillong ah Graduation (BA History Hons) kana simchaije. IPS kamu masang’in service dang jong kanamui, hiche ho chu : Nagaland Police Service, Indian Information Service, Indian Railways Traffic Service chuleh achaina’n 1987 kum in Indian Police Service (40 RR) West Bengal Cadre kana joptai.

  ET : West Bengal cadre IPS nahin Nagaland state DGP a nahungpan thei hi ichan’a boina (obstacle, objection) ana um’am, ahilouleh boina beija thil ho anachelha thei nam?

LL Doungel : Pathen’in kei leh ka insung mite, loi le gol, jat le nam chanpi chuleh ama tahsan te taona asan jal’a ahitheiloudi jong hung hithei ahi. Imajouse aning akah seidi hileh saoval’in te.

  ET : Nagaland gam mi nahijeh a deilhenna jatchom nachan jeh ham, ahilouleh thil umdan (circumstances) kito khah jeh a West Bengal’a kon’a nahung thei ham, thil umdan themkhat neiseipeh thei diuvem?

LL Doungel : Nasei jouse chu lampi khat chieh in apangnai, ahin imajouse hi Pathen in ama kouva aheng’a taote taona asanjeh ahi ti hi katahsan’e.

  ET : Police natoh (policing job) lang’a hi West Bengal leh Nagaland ichan’a kibahlouna um’am, hiche state tenia ahahsatna leh abaina ipipi ham chomchakhat a neiseipeh thei diuham?

LL Doungel : Nagaland le West Bengal kibahlouna chu imalamjousea lenpitah aum’e. Mihem, agam umdan, miho chondan le hindan ho kibahloujeh in police natoh lang’a isei leh Nagaland leh West Bengal chu akibahlouna sangtah aum’e. Ahivang’in hiche state teni a thanop aumna leh ahahna jong jatchomchom aumgel kitne.

  ET : Nagaland a Kuki holah a police department a koitobang bang het thei tah a post sang, rank ichan phakha ijat ana umkhatam, nang ban’a ichan hung kaisang thei koi um’em?

LL Doungel : Tuni geija seidin Nagaland a Kuki holah a dia (L) Pa Mangkholen Sitlhou chu IGP rank chan anakaisang masapen ahi. U Siempi Gangte chu Senior SP rank chan anaphan chuleh tu le tun Sopi Lamkhothang Singsit hi IGP rank ah aum’e. Aban’a di leh anungthop di aumtheilou hi thaset umtah ahi.

  ET: Politics bol insung khat (Ex MLA cha) hina a Nagaland gam’a Kukite dinmun tu le khonung’a di themkhat neiseipeh thei diu vem, nangmatah in ‘retirement’ joulang leh politics lang, MLA election tetdi ho nagel em?

LL Doungel : Kei mudol lin Kukite hin huoilai hileh alhangpia politics lam ah lung gel pilhinna ineipouvin politics lang’a khahdohna dihtah jong ineipouve. Hiche nakah hin phung le chang thu ah iboikit un ahileh nampi phatchomna ding sang’a eima changtum phatchomna ideikit jiuvin ahileh politics lam’a lhahsamna inei jing uve. Tu kalunggel dan ahileh khonung’a politics a hunglutdi ti lunggel ima kaneipoi.

  ET: Kum phabep masang (napa khang) a Medziphema (Ghaspani) Molvom area a MLA inakaidoh thei u chu tua itidan’a Kuki MLA kaidohtheilou hitam?

LL Doungel : Chung’a kaseisa ho jeh ahi. Politics lam’a pilhinna leh khahdohna umlou, nam ngailutna lhahsam jeh ho ahijeng’e. Hiche ho ban’a inchen louchen sum le pai lhahsamna leh lekhasim lang’a lhahsamna ho jehjong ahi. Hiche ho ban’a jat le nam di gelsang’a phung le chang gelkhohna ho jeh ahi.

  ET : Tu tua nanatohna, DGP hina a ipilam pen nakhohsah em (priority)?

LL Doungel : Kanam mite akihabol uva lolhinna ho aneina diuva tilkhouna leh tosotna kaboldi ahi. Nagaland Police a-di ahileh, mipi ngaichat dungjuija kithopina ahidi bang’a natong, police natoh tam leh kituptheina dia tulai manchah thah thah ho manding, mipi lunglhaina a police hon naa atohdi ti hi kakhohsahpen ahi.

  ET : Kum phabep masang, thingnoi hatlai, ceasefire um masang’a toh tua gamsung law & order dinmun iti em?

LL Doungel : Mundang gamdang bang’in Nagaland State sung’a dan le thupeh (thu umdan) aphaleh tai tithei ahi. Ajeh chu mijousen ama ama tohnom ho adeitah in akitohtheitai. Hiche dinmun hi kum phabep masang’a anaumlou ahi.

  ET : Kipa aum’e, na phaat mantam tah neipeh jeh un. Natohna ah pathen’in phatthei naboh tahen.

LL Doungel : Neihin kipapinau leh vaang neithumpehnau hojeh in keijong kakipah lheh jeng’e. Chuleh kineppi umtah Eimi Times thuso a-kon’a ijat inam mite kijahmat theina munpha ahijeh in kakipapi lheh in Eimi Times “Chibai” kahin bol’e.

Fact File
Full Name : Lengkhothang L. Doungel
Parents : (L) Langkam Doungel and Pi Lhingjakim Doungel
Native Place: Medziphema (Ghaspani) town, Dimapur district, Nagaland
Earlier achievements: Nagaland Police Service, India Information Service, India Railway Traffic Service.
Indian Police Service (1987 batch West Bengal Cadre)