Interview with Miss Niengneihoi Haokip, Manipur State level Miss Kut, 2018

Interview with Miss Niengneihoi Haokip, Manipur State level Miss Kut, 2018

1109
0
SHARE
Churachanpur district a Kingkin khoa kon tutua Tuibong khopi veng, Churachanpur a um Pu TS Letkhosei chanu Lanu Niengneihoi@ Boinu Haokip in tukum (2018) State level Kut Kangpokpi district HQ a ana kimanna’a Miss Kut kitetna’a Miss Kut lallukhuh ahung channa chung’ah Eimi Times in kihoulimpina ananei chu mipi simthei din ahung kisodoh e. 
 Eimi Times (ET): Amasapen’in inam sung’a nungah melhoi leh thepna kitetna thupi khat – State level Miss Kut contest a lolhinna neikhat nahina  kakipapinau kahin phong uve.
 Niengneihoi (NNH): Henge keijong kakipah in Pathen ka thangvah e.
Mipi ho jouse chungah jong ka kipana kahin phong e.
 ET : Na insung background – nanu le napa, nasopi insung umdan, tuchan’a nalekhasimna mun ho them khat neihinseipeh thei diuham?
 NNH: Ka pa min ahileh TS Letkhosei Haokip ahiye. Ucha mi 5 ka hi uvin pasal 3 le numei 2 ka hiuve. Ka themjil na mun ho chu ahileh :- Prep – Class II, Young Learners’ School, Zenhang Lamka, Ccpur, Class III – Class VI, St. Mary’s School, Tuibong, Ccpur, Class VII – Class X, St.Paul’s Institute, New Lamka, Ccpur, Class XI & XII, Rayburn College ,New Lamka, Ccpur. Tutu  hin Churachanpur College ah B.Sc 3rd semester kasim jing lai ahi.
 ET : Nakondohna kho leh tutua naumna hoilai ham?
 NNH: Ka hung kondohna vangkhuo ahileh Kingkin, Ccpur ahin tule tua ka umna/chenna ahileh Tuibong, Khopi- Veng, Ccpur ahiye.
 ET: Tutua ipi nabollam?
 NNH: Tutua ka bol thupipen hi jilkung pan le simlai hi kakop ahi.
 ET: Manipur State Level Miss Kut kitetna hi Manipur’a dia Miss kitetna a asangpenloi ahitan, Miss Manipur sang’a bon thupi leh lolhing tah khatna kisei ahin, ipi jeh a hitobang kitetna’a jaodia nahung kigot ham?
NNH: Tahchanu khat hina jal a, i golnop thupipen u Kut (chavang kut) a Miss Kut kitetna a hi pan galah lou ding hi katha anomin ahi.
 ET: Kum phabep masang geija chu Miss kitetna hoa hi minu mipa ten achate jao dia anadeibehlou uvin akihen, ahin tulang’a vang hi hitobang umtalouvin akihen, hiche hi ipi jeh ahi tia nagel am?
  NNH: Nule pa tehon chate hoina ding le phatna ding hi adei sohkei uvin Miss Kut kitetna a hi jildohthei tam tah a um e ti ahin muchen phat uva hi achanuten pan agalah diu ahin tosot pan u uvin kagel’e.
  ET: Hiche kitetna’a jaodia nakigella pat chu Miss Kut Title lajeng thei dia nakigellam, oleh?
 NNH: Bai khencha a lah thei ding ahi lou chu ka hechen’in hijongleh Pathen toh kitho’a imalam jouse a gol nung phah theina dinga ki hambol angai jeh chun keiman kabolthei chan bol ing kating ka bolthei lou jouse vang Pathen khut a pedoh inge kati ahi.
 ET: Miss Kut kitetna Result hung kiphon chu nagel bang chet ham, ole nakinlap jeng am?
 NNH: Miss  Kut  title lamong din kana kigel dehpoi. Hinla atahtah’a mipi asang- asing masang’a Miss Kut dia kamin le  SL.No. ahung kiphondoh vang chun umje-umjang  kanahepoi.  Heiha !!
 ET: State Level Miss Kut Contest a jaona dia itobang kigotna nananeijem, tuchung chu hiche contest dia najaomasatpenna ham, Miss kitetna dang itobang bang’a nana jao khah em?
NNH: State Level Miss Kut kitetna a jaoding hi kana geljingsa ahi. Hijongleh direct a state level a panding chu kanakison loujeh in district level le adang phabep beauty pageant ho ah kana jao in ahi. Hiche hochu: HSO DJ Miss contest 2016 ah kana pang masa pen’in chuin Chandel district level Chavang kut 2016 ah jong kana pang in sub-title Best Designer title kana chang’in ahi. Aban’in Pineapple Queen contest 2018 Khousabung mun ah jong rehearsal dan in kana pang’in ahi.
ET: Screening Stage a pat Candidate tamtah lah a achungnungpen nahung hi hi koijeh leh ipi jeh ahi tia nagel am?
 NNH: Screening nikho a pat ijakaiya achungnungpen hiding tupna jeh in kihambolna leh gentheina tampi kahin kimaitopi jing in ahi. Hitiho jouse boljouna leh thohjouna eipe Chung Pathen loupina jouse leh choi-atna jouse kapeh toh kilhon in ijakaiya asuh-atouva support eibol leh eikithopi jing jeng kappa (Dad) le hatchungnung  Pathen ‘credit’ jouse kapen ahi.
 ET: Miss Kut kitetna chu hahsa nasah am, bai nasah am, abaipen’a nagel leh hahsa nasahpen chu ipi ham?
 NNH: Abaipen a kagelchu Pathen phattheina ‘physical fitness’ ahin, chuleh ahahsa pen a kana gel chu Stage a ‘Catwalk’ bollaiya kiselhuh khah ding hi ahi.
 ET: Miss kitetna lang’a aban lalungtup naneijam?
NNH: Tule tua kalunggel chu Miss Kut 2018 hiden ding hi ahiphot in, maban vang Pathen lemsah dan dan hiding dan ahitai.
 ET: State Level Miss Kut Contest hi nahetbangin nilhah khatna kibolla kichai hilou chomkhat setpi adandan (stage by state) a hung kibolla, ‘internal assessment’ hoa Mark ho hung kigomkhom sohkei hi iti nagel lam, hiche Contest hi iti kibolleh hoibe theidia nagel am?
 NNH: ‘Stage by stage’ a ‘assessment’ kibol hi a ‘fair’ pen ahitoh kilhon’a ‘all round a deserving candidate’ ho ‘quality’ mudoh theina ahin, ahoilheh jeng’in ahi. Ahoibe cheh nadin maban leh ‘Jurists’ lah a ‘mainland’ a kon in ‘Professional’ hojong ‘Judge Panel’ in kijaosah theileh ‘title winner’ ho maban akomuthei diu katahsan in ahi.
ET: Kut program jouse ah Miss kitetna hi aumtan, ademloi jong aumdapon, hiche thua nageldan ipi um’am?
 NNH: Imalam jouse hi aphatna le aphatlouna umjing ahijeh in ken vang Miss Kut ‘beauty pageant’ hi numei hon ka talent hou ‘showcase’ kaboltheinau platform umsun-sun ahijeh in boljom jing jeng ding pha kasai.
 ET: Mi het khat nahung hitan, gollhang nahin hel (deicha) jong hung umsao-sao tamai theijin tin, hicha lampang’a nadinmun nasei theidem (itihleh jineidi nati am?)
 NNH: Achesa kum phabep a pat eihin hel phabep jong ahung umjiji nai, hijongleh kalhunna ding kalhunjou phatleh ngaito patdia lunggel kaneijeh in Dongma lampang hi aphat ahung lhun phat leh ngaito din kagel e. Tutadin vang dongma kaneipoi. Jinei chanei hi phat vatjep kasanalaiyin ahi.
ET: Miss kitetna ho’a jaonom ho dia ipi thumop nanei nom’am?
 NNH: Miss kitetna a jaonom jousen ahetdiuva poimo chu ahileh Potthona, Gunchuna, Kitahna, Thumanna, Kihambolna, Umchan pha, Umdan-Khandan pha,  Kitim jouna, Khotona leh Kineosahna le adang dang. Hitiho jouse neitheina dia Nule pa thu man chuleh Pathen het angaiyin ahi.
 ET:  Hinkhoa natuppen (aim in life) ipiham?
NNH: Christian innsung nomtah nei ding/semdoh khomding hi kahinkho’a kaduthusam leh kadeipen ahi.
 ET: Kipa aum’e, naphatman tam neipeh jeh un, mabanna nalungtup ho ah lolhinna hinneibe tan.
 NNH: Keijong kakipah e, hitobang mite hetdia platform eiboldohpeh ho. Pathen’in nangho jong phatthei nabohjing jeng tauhen. Ijakai Pathen loupina hita hen!

 Fact file:
Full Name: Niengneihoi Haokip
Nick name: Boinu Haokip @ Hoiboinu Haokip
Age as on date: 19 Years
Father’s name and Profession: TS Letkhosei Haokip, Activist Writer
Height: 5’4″
Permanent Address: Kingkin village, Churachandpur, 
Present Address: Tuibong, Churachandpur.
Hobby: Flower Gardening, Watching Television & Cooking.
Earlier Achievements (if any): (i) TKSU Rayburn College Unit, Miss Fresher. 2015. (ii) Best Designer – Chandel district level Chavang Kut 2016.