Interview with Langkhanpau Guite, ADC Chairman, Churachanpur

Interview with Langkhanpau Guite, ADC Chairman, Churachanpur

589
0
SHARE

Churachanpur district sung’a Songtal kho’a hung kondoh Pu Langkhanpau Guite hi Private School teacher anapang’a 2010 kum’a Churachanpur ADC Chairman hung kaidoh anahi-e. Social-politics lampang bou hilouva Pathen thulang’a kiloikhomna hoajong panlajing khat anahi-e. Kitah tah-a natong khat leh hinkho kituptah-a mang ‘politician’ khat’a kihe Pu Langkhanpau Guite ET in kihoulimpina anei hi mipi simthei din ahung kitahlang’e.

Eimi Times (ET): Na innsung (family) Background neisei peh thei diu ham?

Langkhanpau Guite (LG): Kei hi Thanjadal Guite of Songtal Village chapa 7 leh numei 4 lah’a athum channa kahi. Hinlah vangset umtah-in pasal 2 in eina dalha taovin, tuhin New Lamka Dorcas Veng munna kacheng’e.

  ET: Na educational background leh MDC nakaidoh masanga ipi naa natoh am?

LG: Churachandpur Govt.College ah B.A. kana chaiyin, MA hi IGNOU noi ah kachaiyin, M.Ed. hi Manipur University munna kana sim’in ahi. MDC kakai masang’a kanatoh gah minphah thei cheng chu: Asst.Teacher J.N. Model School (1997), Asst.Teacher St.Paul Institute,New Lamka (1997-2000), Teacher of the Year Award 2000 hi St.Paul Insitute akon kana mun ahi. Chujouvin Rayburn School Head Master(2001-2006) kana hin, 2007 kum chun Churachandpur Constituency ah MLA kana tet’in, kana lolhingpon ahin MLA ana kaidoh Pu Phungjathang Tonsing chu Vote 1600 bouvin kana phalel in ahi.

  ET: ‘Social’ leh ‘Religious Organisation’ lang’a itobang pan nanalah khah em?

LG: Achesa 2008-2010 chan hi Paite Tribe Council (PTC) Gen.HQ President kana hi pumin Vice Chairman. Zomi Council panmun jong kana tuh in ahi. Chujouvin ADCC election 2010 kahin tet in, 10 Tuivai Constituency ah ‘uncontest’ in MDC kana kai doh-in ahi.Achesa 2001 kumin Presbyterian Church In India PCI(R) ah houbung upa (elders) din namdet kana hin, hiche toh kilhonin General Assembly Moderator jong kana tuh-in ahi.

  ET: Ichennau Manipur District munchom chom ho ivet leh MDC Chairman post kichu na-in hatah-in ana boi jiuvin, hinlah Churchandpur ADC Chairman hi boina umlou hel’in kum 5 sung lolhingtah a nahin tuh in akimu’n, hiche hi ipi jeh ahi tia nagel em?

LG: Chairman post kichu jeh-a district dangho boina um kiti chu amaho ‘internal problem’ hitan tin, hinlah Churachandpur District sunga Chairman post kachan hi ‘uncontest’ a kanamu ahi. Hiche hi Pathen phatthei bohna jal leh, elected member ho, nam lamkai ho, tribe lamkai ho chuleh mipi deisah najal ahi tin kasei nom’e.

  ET: ADCC Chairman nahi sunga hahsatna nato ho mipi hetdinga neisei peh thei diu ham?

LG: ADCC Chairman kapoh sunga hahsatna tampi ana kitoh jongleh, gah minphah thei chu development fund hung ho deibanga ahina dingdol’a kimangcha thei lou, chuleh local area semphatna dinga fund lhingset’a hung kipeh lou jeh-a mipi ho dinga thilpha tampi akibol doh manlou hi khoh kasah tah khat ahi.

  ET: District dang ADC ho sanga Churachandpur ADC in tohdoh anei pen in akilang’in, tohdoh lah a gasei theipen’a nagel ipi ham?

LG: Elected member ho tosot leh kithopina jallin Churchandpur MDC ho hi limited fund hung jongleh thei kham khama natoh hi practical tah-a ana kibol ahi. ADCC ho natoh doh gah minphah thei cheng chu:

  1. ADC Office Campus, Tuibuong mun’a 13th Finance Commission noi’a Dk. 1 Crore val lut in ADC Assembly Sitting Hall 85% tobang jotheng ahitai.
  2. NLCPR noi’a District sungah school building 10 akisa doh-in, School building 5 hi jotheng ahitai.
  3. Special Project Assistance (SPA) noi’a Barrack type Teacher Quarter 50 centre in proposed abol lah ah Quarter 5 jo ahitan, Quarter 5 hi jotheng ahi hih laiyin ahi .
  4. Donar chom chom akonin building tampi chuleh suspension bridge jong ana kibol doh-in ahi.
  5. DRDA noi’a development works-IAY, BRGF, BADP etc ho MLA, DC, SDO ho share akihop jouva MDC share hohi phate chan constituency sungah akihom doh-in ahi.
  6. D.Phalien leh Bungmual kikah-a SPA & 13th Finance Commission tohgon nanoi’a ADC Counselor Hostel kisa hi 95% tobang jotheng ahitan, inaugurate bolna ding naicha ahitai. Hiche Hostel kisah na’a hin Chairman quarter, Vice-Chairman quarter, CO quarter chuleh conference hall jotheng ahitan, hinlah staff quarter,executive head quarter, EM’s quarter ho 60% vel jotheng ahitai.
  7. Thinglhang miten 6th Schedule chanvou ichan theina diuva centre koma 3 vei memorandum jong ana kipe doh-in, Village Authority Ammendment Act (VAAA) jong hi ADCC in nasa tah-in ana kidoudal (objection) in ahi.

  ET: Tuchung ADC election hi tet kitding nati teidi tahsan aum’in, maban’a ADCC togon ipi um’am?

LG: Tuchung ADCC election jong hi 10 Tuivai Constituency a katet kitding ahin, Pathen jal’a mipi deilhen jal’a kaidoh kitna bang nei leng District sunga development works toh bangkhai tampi ho hi toh molso ding katin, ADC Assembly sitting Hall jolou hi jotheng ding kalunggel ahi. 6th Schedule hi Manipur thinglhang gam’a umsah teiding, thinglhang gamsunga midang ho paova kho min kisa ho eipaova kheldoh ding chuleh Churachandpur District akon’a District thah khat jong ahithei leh sembe nadia panlah ding kati ahi.

  ET: Achesa March 24,2014 nikhoa ADCC Resolution dungjuiya district min khelding leh khel louding thuhi themkhat neisei peh thei diu ham?

LG: Hiche thuhi keima changval thulhuhna ahipon, ahung kikhom MDC member ho thulhuhna ahin, keiman aphai/aphapoi kati thei poi. Hinlah hiche hi achesa Dec.19,1987 kum lang’a MDC ho kilolna jong anahi-e. March 24,2015 nikho chun ADCC meeting kilolna-ah Churachandpur district hi Lamka a khelding thulhuhna ana kineikit in ahi. Hiche chung chang’a hin aseijouse them nante, hinlah district chu koima’a tumding ahipon ibonchaova ding ahina ban ah, Meitei Lengpa minkhat sanga ei thinglhangmi paova idei’u min khat’a kheldohdi hi thilpha ahi. District minchu ipi min’in kikhel jongleh, a district head quarter min vang kikhel dehlou ding ahi. City lentah tah-Bombay, Calcutta, Bangalore tiho bon Mumbai, Kolkata, Bangaluru tia akikhel theileh lung kitoh tah-a pan ilah khomleo eiho district minjong khelmo ahipoi. Athu hi higher authority ho koma kipe lut ahitan, mipi langa kon’a objection aumlouva Cabinet in pha asah leh district min hi khel thei ahi.

  ET: Naphat mantam tah pedoh’a Eimi times neiki houpi jeh-un nachung’ah kaki pah-uve.

LG: Keijong Eimi Times in gelkhoh tah-a interview neihung bol jeh uvin kaki pah-e..Eimi Times managing board ho hungha pan uvin lang Eimi Times hi hung machal jing tahen.