Interview with Gl. Paul Haokip. 1st Runner up. Manipur Manhunt 2015

Interview with Gl. Paul Haokip. 1st Runner up. Manipur Manhunt 2015

785
0
SHARE

Tulai phaat le nikho to kitoh a numei hihen pasal hileh duonghoi kitetna (kilhenna) hi ahung kihabol khat ahitan, tehse hon hoi twi akidontheipoi atichu tulang hin “donthei” (phatchomna um) ahung hitai. Kum phabep masang’a pat Manipur a hitobang pasal duonghoi le lhohnei kigom holna (kilhenna) hi ‘Fashion industry’ hon ahinbolpan uve. Tuchung injong RESEACAAF ho gonna noijah hitobang kilhenna ana umin, hiche a chun Imphal Old Lambulane akon eimi khangthah – Gollhang Paul Haokip in anichanna (first runner-up) ahinla e. Hitobang kitetna’a hi tahsa hoi leh damtheina dia tahsa tongkhathei neh le don phalouva kon kikangse ngai/poimo  ahina hi tulai khangthah tamtah inkihilna leh kitilkhouna’a aneitheina  din ET in Gl. Paul Haokip kihoulimpina anei ahung kitahlang’e.

Eimi Times (ET) :  Amasan tuchung Manipur Manhunt 2015 a Title nahinlahna chung ah kakipapinau kahinphong uve.

Paul Haokip (Paul) : Keijong kaki pah e chule Pathen kathang vah e.

  ET : Nakonna kho, naseiletna leh tua na umna hoilai ham, nanu le napan ipi abol am, insung thu (family background) themkhat hinsei tem’o.

Paul : Ka kho tah tah u chu ahile Khangbarol ahi, ahin kaneo lai a pat Old Lambulane,        Imphal a kahung seilet ahi. Ka pa hi 2007 kumchun damlou na jeh in ana um tapon, tutua hi kanu,ka upa, ka unu chule ajipa le achate thum to kaum uve. Ka nu hi ahile Central Jail, Imphal a Jail Warder ahi.

  ET : Lekha ichan nasim am, tu tua ipi nabol em?

Paul : Padmashree Institute of Management & Sciences affiliated to Bangalore University  a MSc Biotechnology kahin chai in tutua hi competitive exams ho a dingin kaki go e.

  ET :  Ipi nagel leh hiche Manhunt kitetna’a jaodi nana kigot ham, ole Modeling hi nanabolpeh ham?

Paul : Tuchung RESEACAAF Manhunt 2015 a theme chu “Hunting personality inside you and to upgrade our traditional dress/attire” ana kitin, chibang chun kenjong Pathen in eipeh talent le skills ho hi milah a tah doh le phon doh di kana deisah ahin chule eiho Thadou-Kuki te ipu ipa teu chon dan le nam jem ho choisang le milah a tah lang a aumdi kana deisah jeh a Manhunt 2015 hi kana pan ahi. Modeling hi profession in vang kana bol pon hobby dan  in vang kana bol e.

  ET : Modeling hi i ‘career’ kha (kivahna dia bolgun) a naneigot em, ahilouleh ‘hobby’ (thanopna maimai) khat dan’a nabolgot em?

Paul : Modeling hi career in vang kanei go poi, hobby khat dan a kabol got ahi ajeh chu eiho Manipur ti tah lou north-east sunga modeling hi career khat a kinei thei lou ahi ajeh chu fashion industry hi a scope aneo val nalai in akhan touna ding nasatah in avat nalai in, metropolitan cities ho lah bang hinai lou ahi.

  ET : Manhunt a jaona dia itobang kigotna nana neijem, tahsa sem (body building) ho nabol lem, nabol leh hoilai (ipi Gym) a nabol em?

Paul : Manhunt a jaona dia ‘mentally and physically’ kigot na kana neiyin ahi. Ajeh chu kitetna khat a mi japi lah a hung kiki tet ding ahi jeh chun kigotna angai cha ma ma’n ahi. Lha ni (2 months) Apunba Fitness Centre, Nagamapal akhun personal trainer noi a tahsa sep na kana nei in tu’n jong ka jom jinge. Chule tah sa damthei na le hoi nadin jong neh le chah kitup tah in kana nei jin ahi.

  ET : Tuchung Manipur Manhunt  a chu abon’a mi ijat pang em, ipipi kivetna um em?

Paul : Tuchung Manhunt a chu mi 48 screening ahung jaovin, chilah a chun 29 akilheng doh in main event nichan geiyin mi 29 chu kana kitet uve. Sub-title phabep ana umin chiho chu ahile Best Model, Best Photogenic, Best Physique, Best Designer chule Best Discipline ho hi anahi.

  ET : Ningkum langjong chun eimi pasal hojong hiche Manhunt kitetna ah anajaosaosao jiuvin Title la vang ana umpon, ipi jeh-a nang nahinlah jouva nagel em?

Paul : Ken kahin lah jouna hi ahile Pathen chule in sung mite chule kaloi kapaite hon nasatah a support eibol jeh uva kalah thei in kaki gel e. God helps those who help themselves kiti khu adih mama in, ajeh chu kei jong kaha kibol in adang se chu Pathen khut a kangap ahi.

  ET : Thudoh le donbutna (Intelligent/personality test) a ipi thudoh nadoh uvam, iti nadonbut em?

Paul : Common question minute 3 sunga donbut dinga eina doh uchu, “Numei le pasal kikah a kinah na le kiboina aumteng pasal chu themmo chan jing ding ahi. Nanop em?Ajeh seiyin”, Ken kana donbut dan chu ahile “ Kanom poi, ajeh chu kinah kiboina aumteng pasal bou chu themmo chansah ding ahipoi ajeh chu pasal chu phattinna thil phalou bol ding ahipoi. Athemmo chu khol doh a, thudih chu chesah ding ahi. Tulai phat a ichennau society ahin numei le pasal akibang tai itiuvin tha (rights) jong akibang tai itiuve. Pasal bou chu ngoh ding ahipoi.

  ET : Tulaijin Eimi lah ah Motion Album picture leh Video Film bol ahung kihabol lhehtan, hicheho lang’a thanopna naneijem, ole nabol, napanna umkha tam?

Paul : Eimi Motion Album le film ho ahung kiha bol tan ahivangin ken vang thanop na kanei beh seh poi chule pan jong kana pang khapoi.

  ET :  Manipuri Film a dia kouna (offer) namu em, mu le chun napangdem?

Paul : Offer vang tuchan in kamu poi, mujongleng pang dingin kaki tahsan poi.

  ET : Hinkhoa natup (aim in life) ipi ham?

Paul : Administrative Officer khat hiding hi katup ahi.

  ET : Hitobang kitetna a pangnom eimi khangthah ho dia ipi naseipehnom um am?

Paul :  Hitobang kitetna a apang nom eimi khangthah ho koma kasei nom pen chu ahile, Pathen in eipeh u talent hohi ama loupi na dinga man chah a, neh le don phalou jousea kona kikang se a, damthei na le hoina dinga tahsa sep jong ngaicha ahi. Chiho jouse chunga hi ‘self-respect, integrity le confidence’ nei ngai ahi. Ken 1st Runners Up le Mr. Photogenic kana kisan ahin nanghon keisanga sangjo nahin mudiu kinep le tahsan aumin ahi.

  ET :  Kipa aum’e, neiki houlimpi jeh un, Pathen in namaban jong napuijing tahen.

Paul :  Keijong kaki pah e chule Eimi Times Pathen in phatthei boh jing tahen.

           [Interviewed by Letminlun Lhungdim]

SHARE
Previous articleSangpuii Zou
Next articleSept 11, 2016 Local news