Information & Broadcasting Ministry in Media Production a dinga Guiding Principles leh...

Information & Broadcasting Ministry in Media Production a dinga Guiding Principles leh SOP sodoh

106
0
SHARE

Information & Broadcasting Ministry in Media Production a dinga Guiding Principles leh SOP sodoh

New Delhi, Aug 23: Union Information and Broadcasting Minister Prakash Javadekar in Sunday nikhon media production kivenna dinga Guiding Principles leh Standard Operating Procedures (SOPs) asodoh in, hiche hi I-B Ministry in Health and Family Welfare Ministry toh kihouna aneiya asem ahi.

Guiding Principles a COVID-19 containment zone ho a angaicha lou thil khoh ho kiphal louding, natohna mun chule akimang jing thil ho sanitization bol jing ding, entry point ho a thermal screening bol ding, natna thoh lel ding natong hon kivenna sang cheh aneidiu, mai tom leh mask man jing a, khut sop jing ding, hand sanitizer ho Media Production toh kisaiya man jing dinga asei uvin chule ginmo case aumleh ‘temporary isolation leh self-monitoring’ bol dinga jong aseibe uvin ahi.

“Covid-19 pandemic jeh a media production a pang stakeholder jousen pandemic achal louna dinga kivenna anei utoh kilhon a anatoh apat thei diu ahi”, tin Union Information and Broadcasting Ministry thuson aseibe in ahi.

Physical distancing, shooting kibolna mun ho a lut leh che doh na mun gon tup ding, sanitization, staff ho kivenna ding, mi alhom thei chan a lhom sah a chule MHA in asodoh travel guidelines ho jui dinga Ministry in SOP jong asodoh ahi. Gam dang dang a kichepi banga camera maiya acting bol a actor ho tilou adang se in face mask akibol teiyu ngai ahi.

Guiding Principle leh SOP hi Media Production pan a stake holder leh state government jousen aman thei ahi. Javadekar in guidelines ahondoh na a, “SOP hi international norms toh kilhon ahi in, coronavirus jeh a lha 6 lhing kikhah a industry akihon doh kit thei nading ahi”, tin jong aseiyin ahi.

Film leh television sector hi mi tamtah in sum hol na a aman ahijeh a economy khantou nadinga hitobang pan kila ahi, tin Minister Javadekar in aseiyin chule state jousen SOP asan a chule achepi dinga aseibe in ahi. SOP hi Ministry of Health and Family Welfare chule Ministry of Home Affairs toh kihoutohna anei uva asem u ahi.

Xxxxxxxx

NFSA noiya beneficiary a ‘disabled’ ho pansah dinga Centre in state leh UT henga sei

New Delhi, Aug 23: State leh Union territory jousen National Food Security Act 2013 noiya hi achang the idol ‘disabled’ jouse apan sah ding ahi, tin Consumer Affairs, Food & Public Distribution Ministry noiya um Department of Food and Public Distribution (DFPD) in aseiyin ahi.

DFPD in lekhathot apeh na a, NFSA noiya achang thei dinga kisei criteria ho bulhit a atahsa bukim lou (disabled person) jouse National Food Security Act 2013 noiya ahop tha uva chule NFSA leh PMGKAY noiya Act dungjuiya kipe neh leh chah achan diuva lom ho akilah thei nadinga state leh union territory sorkar jouse thuhilna aneiyin ahi.

Akihop tha loulai ho eligibility criteria dungjuiya ration card athah a ahop tha diuva DFPD in aseiyin chule AAY household noiya ‘disability’ hi criteria khat ahi in, chatmo hohi society a alhasam section hiu ahi, ati. NFSA Section 38 dungjuiya Centre sorkar aphat dungjuiya tha kipe ahi in, Act Section 10 dungjuiya AAY (Antyodaya Anna Yojana) noiya guidelines principle dungjuiya hop tha dinga kisei ahi, tin Ministry thuso chun aseibe in ahi.

India sorkar in apohdoh Atma Nirbhar Bharat Package hi NFSA ahilouleh State Scheme PDS Card a kihop tha lou ho a ding ahi in, hiche jeh a ration card nei louva ‘disabled person’ hon Atma Nirbhar Bharat package noiya phatchomna akilah thei ding uva eligible hiu ahi. Atma Nirbhar scheme hi August 31, 2020 teng kichai ding ahitah jeh a state leh UT hon ration card nei louva ‘disabled person’ ho akholdoh (identify) uva chule package noiya phatchomna ho apeh diuva department in temna anei ahi.

Scheme hi achesa May 2020 a kipan ahitan, ration card neilou jouse (disabled ho panna a) hop tha dinga kikoi ahi. Tuchan geiya ration kiladoh jouse hi state in ration card nei lou disabled ho panna a achang dinga lom ho ahop peh e, kiti ahi in, hiche chungchang a state in pan sangtah alah dinga temna kinei ahi, tin lekhathot a aseibe uvin ahi.

Xxxxxxxx

KUSA signboard tahdoh a ana umta

Imphal, Aug 23(ET): Kuki Song Writers Association (KUSA) in tunin Peter Advisor inn mun a meeting anei uvin hichephat sung chun Singboard lhandohna leh tahdohna jong anei uvina hi.

Kikhopna a chun Executive meeting aban hi Aug 30, 2020 nikho leh bol ding in kinoptona anei uvin chule General Meeting hi September 12, 2020 phatsahna jong anei uvin ahi.

Xxxxxxxxx

MLA anahi RK Imo in Congress lamkai ho ngohna thu asei Congress in jou thu ahi, tia nel kalna nei

Imphal, Aug 23(ET): Congress party in Sunday nikhon Congress Bhavan, Imphal khopi a ‘online live press conference’ abol uvin, achesa August nisim 21 nikho a party a kon kinodoh MLA anahi RK Imo thuso asan peh lounau thu asei uvin ahi.

Manipur Pradesh Congress Committee vice chairman leh Disciplinary Action Committee, MPCC Chairman E Dwijamani, ex-MLA leh MPCC spokesperson Ningombam Bupenda Meitei in conference a houlimna anei lhon in, General secretary leh Convener, Disciplinary Action Committee, MPCC S Jiten jong apang in ahi.

Ex-MLA E Dwijamani in, party a kon kinodoh MLA anahi RK Imo douna a disciplinary action lah nadinga PCC President in recommendation apeh jeh a Disciplinary Action Committee ho pohgih (pressure) akipeh na aumpoi, tin aseiyin chule kum 20 lhing organization office bearer hina a party akitup na (integrity) thudoh na ding hi aumthei poi, tin aseiyin ahi. RK Imo in ngohna thu asei hohi jouthu ahi in, party a kon ama akinodoh hi Indian National Congress ‘rules and provision’ dungjuiya kibol ahi, ati.

Ningombam Bupenda Meitei, MPCC Spokesperson in jong RK Imo party a kon akinodoh jouva ngohna thu asei ho nelkalna aneiyin, CLP lamkai O Ibobi Singh chule MPCC President M Okendro atosot na thu aseiyin ahi. Congress President Sonia Gandhi thulhuhna jeh a ama ama panmun a umlhon ahi, tin aseiyin chule CLP lamkai chunga ngohna thu asei hi thutah ahipoi, ati.

Party a kon kinodoh MLA khat in iti dan a tua hi House a Congress MLA 15 bou aume, tia aseilhah thei ham, ati. Supreme Court of India, G Viswanathan in MLA khat party dang a alut ahilouleh election akaidoh na party (parent) douna a thil abol a ahileh party a kon kinodoh thei ahi, tia thutanna anei apodoh in, achesa August 10 ni a Congress in Governor henga ‘trust vote’ kibol hi dan dihlou ahi in, ‘division of vote’ akiphal poi, tia hehna a Governor henga memorandum apeh uva hi party a kon kinodoh khat in ‘trust vote’ a voting aume tia iti asei thei ham, tin jong thudoh aneiyin ahi.

Zou drug case thu CBI khut a pehdoh dinga thumna aum chungchang a RK Imo in adinmun asuhtheng dinga aseiyin, party a kon kinodoh MLA pa leh Chief Minister pa gamsung a um sanga Delhi a aum lhon hin Covid-19 nat douna ichan geiya gelkhohna anei lhon ham, ati. MLA anahi RK Imo in thuso aneina a ‘lamkai a kisei’ (so called leaders) tia aman thucheng jong demna sangtah aneiyin, Sonia Gandhi, Rahul Gandhi leh Priyanka Gandhi lamkaina a democracy leh party athahat na ho thu aseiyin ahi.

Xxxxxxxx

Manipur a Covid-19 positive case 114 kimu be; Recovery rate 68.92% lhing ta

Imphal, Aug 23(ET): Achesa nidan 24 sunga gamsunga Central Armed Police Force (CAPF) personnel 47 leh milham 67 (pasal 53 leh numei 14) Covid-19 positive ahi akihetdoh be in ahi.

VRDL, RIMS a 8, VRDL, JNIMS a 35, Raj Medicity a 5, Babina Diagnostics a 18, Imphal West RAT a 30, Bishnupur RAT a 4, Imphal East RAT a 4, Ukhrul a 8, chule Thoubal a mi 2 test kibol ho positive hiu ahi. Natna nei hohi Imphal West district mi 35, Bishnupur 5, Imphal East 17, Chandel 1, Thoubal 6, Kakching 1, Noney 1, Ukhrul district mi khat hiu ahi.

Imphal East a mi 4, Imphal West a mi 2 chule Chandel a mi 1 panna a agom a mi 7 (general population) hohi state dang a kon hung kile ho ahiuvin, adang se hi gamdang a kholjin lou gamsung mi hiu ahi. Abon uva Covid Care facility a achon tauvin, ‘containment’ leh contact tracing’ kiti kivenna ho apan tauvin ahi. Natna a athi thu aumbe pon, tuchan geiya natna a thi mi 22 lhing ahitai.

Achesa nidan 24 sung ma ma a mi 161 natna a kon adamdoh in ahi. CAPF 88, RIMS 4, CCC Lamboi Khongnangkhong 32, UNACCO 2, Thoubal 18, Phungyar 1, Senapati 1, JNIMS 6 leh RD Wing a kijen mi 9 hi RT PCR test abol kit nauva Covid 19 negative ahi jouva discharged abol u ahitai.

Manipur a tu chan a positive case agom a 5246 (general population 3865 leh CAPF 1381) lhing ahitan, natna a kon dam doh mi 3616 (general population 3011 leh CAPF 605) lhing ahitai. Active case hi tua 1608 (general 833 leh CAPF 775) um ahi in chule recovery rate hi 68.92% a kal ahitai.

Xxxxxxx

Loktak Lake kivahna a nei khosung mihon Covid-19 jeh a genthei athoh nauva sorkar in akithopi ding uva ngehna neiyu

Imphal, Aug 23(ET): Coronavirus pandemic leh natna vetkol na dinga lockdown kikoi hin kivah nadinga Loktak Lake a nga man Champu Kangpok khosung miho sangtah a atongkha in ahi.

Loktak hi Manipur a dinga freshwater lake lenpen ahi in, ‘phumdi’ (floating island) jeh a India pumpi a amin kiseithang ahi. Lake hi mi 30,000 nailam in kivahna a anei ahi in chule phumdi hi wetland ecosystem vekol a pang nga man mi tamtah in chen det na a anei ahi.

Phumdi ho a hi nga man mihon buh neo neo akisah uva chenna a aneiyu ahi. Champu Khangpok kho a cheng nga man insung 240 vel in lake hi kivahna a aneiyu ahi. Ahivanga lockdown jeh a hiche mun a umden uva, athil mat hou ajoh je jong ahet louvu chule akimvel a um dukan jouse akikha jeh a angaicha khoh thil kichoh nading jong anei louvu ahitai.

Anchang leh me ho ahah jeh a khosung mi phabep in anche/me ho bou kihinso na dinga angan se u ahi. Tua hi sorkar in Ningthoukhong leh Yangoi Karang a kal khat a nivei amun ahon uva, hiche teng leh nga akimat hou ajoh uva angaicha ho akichoh thei nading uva ngehna anei uvin ahi. Sorkar in ka genthei nau eihet peh uhen, tin khosung mikhat in aseiyin ahi.

Hiche bou hilouva smartphone lhahsam jeh a chapang hon online class jong abol thei louvu ahi. “Niseh a kihin so nadinga neh leh chah holna a kisah lunggimna sangtah ahi in, smartphone choh ding hi lunggel a jong umlou ahi, tin vengsung mikhat in aseiyin ahi.

Hectare 26,000 vel lhing Loktak lake a pollution asan cheh cheh jong aseibe uvin ahi.

Xxxxxxxxx

Khovei election a BJP CM Face a Ranjan Gogoi pang dinga Tarun Gogoi in asei Assam BJP in jou thu ahi, tia nelkalna nei

Guwahati, Aug 23: Congress lamkai Tarun Gogoi in khovei a umding assembly election a BJP chief ministerial candidate hi Chief Justice of India (CJI) anahi Ranjan Gogoi hi maithei ahi, tia asei Assam unit, Bharatiya Janata Party (BJP) in thu kimoh sei sei ahi, tin nelkalna anei uvin ahi.

“Miho hin ateh teng uleh thu amoh sei sei jiu ahi in, Gogoi thusei hi kasuhchet nom u ahi. CM anahi mi tamtah kamu in, ahivanga Tarun Gogoi tobanga koiman abul abal umlou hitobang thu amoh sei sei lou ahi. Athusei na a hi adih ima umlou ahi”, tin Assam BJP president Ranjeet Kumar Dass in aseiyin ahi.

Achesa Saturday nikho a Assam CM (2001-2016) ana hi Tarun Gogoi (85) in Guwahati khopi a thuso miho akihoulim pi na a, CJI anahi chule March lha a Rajya Sabha nominated member dinga kihahselna neiya Ranjan Gogoi hi assembly election a BJP CM maiya pang maithei ahi. BJP CM candidate thei ding list ho lah a Ranjan Gogoi min apang e ti thu kajah ahi in, aban assembly election a ama hi CM in party face a aman ding ginmona kanei ahi, tia anasei ahi.

“Ram Mandir thutanna chungchang a Ranjan Gogoi chunga BJP lunglhai ahi in, hiche jeh a CJI a kon retired ahi jouva RS MP dinga nominate abol u ahi. Gogoi in RS MP kipe hi alah lou thei ahi in, ahivanga alah hin active politics a lunglutna anei avetsah ahi”, ati.

Muslim leh Hindu ho kum 135 val akinel baotam jing nau Ayodhya a gam a Ram Temple akisah thei nadinga Hindu ho apeh doh nau thutanna anei pet uva hi Ranjan Gogoi Supreme Court a CJI anahi ahi.

Titabar seat a kon election kaidoh a Tarun Gogoi in khovei a umding election katet ding ahi, tia asei ahi in, hijong leh Congress CM candidate hilou ding ahi. Achesa Saturday nikho a Congress leh All India United Democratic Front (AIUDF) in pan alah khom a 2021 election a BJP douna a kiloikhomna (alliance) asem khom u ahi.

“Tarun Gogoi thusei chungchang a sei ding aumpoi. Amahin party a umho sanga party thu ahet joh dan a um ahi”, tin Rupam Goswami, chief spokesperson, BJP Assam Unit in Gogoi demna thu aseiyin ahi.

Xxxxxxxxxxx

Assam in August 25-26 teng school kihon pat na ding chungchang a thulhuhna nei ding

Guwahati, Aug 23: Assam sorkar in ahung lhung ding August 25-26 teng leh school chule institution adang dang ho kihon kit ding chungchang a thulhuhna anei ding ahi, tin state Education Minister Himanta Biswa Sarma in thuphon aneiyin ahi.

Sarma in asei dungjuiya, state sorkar in September nisim 1 nikho a kon school ho akihon pan kit nadinga centre sorkar in phatsahna apeh ding anga ahi. Education sector toh kisaina nei ho Covid-19 test bol na dinga kigotna bulhing set a chelha ahi, tin Education Minister in aseiyin ahi.

State sorkar in tu masanga teacher, professor chule school leh college a natong adang jousen institution ahon masang uva Covid-19 test akibol ding uva thuphon anei ahitai. Education sector toh kisaiya natong jouse achesa August nisim 21 nikho a kon Covid-19 test abol pan u ahitan, August 30 chan chelha ding chelha ding ahi.

August 25-26 teng leh school chule institution adang dang ho akihon kit nading thu task force in aseikhom ding ahi. Alangkhat a, Assam sorkar in ahung lhung ding September nisim 1 nikho a school akihon thei ding khat tou a ahileh kigotna a teacher jouse ama ama natohna mun a akile ding uva asei ahitai. Assam in September nisim 1 nikho a kon school hon pan ding agot ahi in, ahivanga centre sorkar in thulhuhna anei ding ahi.

Xxxxxxxx

MP a insungmi 5 inmun a kikhai lih sa kimudoh

TIKAMGARH, Aug 23 (PTI): Madhya Pradesh gamsung Tikamgarh district a Sunday nikhon kum li (4) chapang khat panna a retired government natong khat, ajinu chule a insung mi thum inmun a akikhai lih sa a akimudoh uvin ahi.

Sunday jingkah a amaho inmun a kon koima ahungdoh aumlou phat a achen khom pi a inheng phabep in police ho ahetsah u ahi, tin District Superintendent of Police Prashant Khare in aseiyin ahi. Police ho amun alhun jou uva, asunga kon kot kikam hunam a ahon u ahi.

Sorkar natong (retired) Dharamdas Soni (62), ajinu Poona (55), achapa Manohar (27), amounu Sonam (25) chule kum 4 bou hinalai atupa thilong ceiling a kon akikhai lih sa aum police hon amudoh ahi. Thilong ho post mortem bol dinga police hon athot tauvin, chule thilsoh hi ipijeh ahilouleh iti ham ti kholna jong akipan tai, tin official pa in aseibe in ahi.

Xxxxxx

Damlou kijen ho kijenman tamlah jeh’a Maharashtra Hospital Licence kahpeh hita

Mumbai, Aug 23: Maharashtra gamsung Kalyan a Covid-19 natna nei ho jenna hospital chun government dan gon juilou a aval a damlou jen man alah nalam in government in hospital licence tunichun akahpih tan ahi.

Sridevi Hospital in avum aval a damlou jen man alah chungchang damlou kijen ho a kon thulhut phabep akimu e tin  Kalyan Dombivli Municipal Corporation (KDMC) thuphong Madhuri Phophale chun asei e.

Chutolhon KDMC Commissioner Dr Vijay Suryavanshi thupeh dungjui a August 31 chan ahiloule government dan ajuikah a din hospital licence chu Additional Municipal Commissioner Sunil Pawar in akah in hinla hemodialysis angai a hon hiding, damlou jending vang pohlut tahlou dia aphondoh ahi tin Madhuri chun aseiye.

Hiche thu toh kimat a government dansem hospital in ajuimong hinam ti vekol ding in KDMC medical officer Sameer Sarvankar chu hospital vaihom dia pansah pai ahitai.

Madhuri in majep a jong hiche hospital hi show-cause ana kipe a tohkhel anei u jong KDMC a pat thukhol A che hon ana mudohsa ahi e, ati.

Madhuri in aseikit na ah July lha a Covid-19 natna nei ho jenna dia lupna 24 a damlou kijendan thulhut jong civic body apepon ahi, ati.

Hospital in donbutna apeh chun achung a themmo na um thudol ho ahilchen joupon chujongle 80:20 a government gon dungjui a lupna umding jong agongpon damlou jong ahetsah deh pon ahi tin

KDMC Chief Accounts and Finance Officer S K Ubale chun asei e.

Alhangpi a government in private hospital a 80 percent lupna ho government lahjat alahding abanle 20 percent lupna chu government phalpeh jat alahthei dia kisei ahi.

Ubale in hiche hospital in thukhol a che civic body ho akithopi nom lou seh hilou in avel vel a hetsahna akipeh vang in vetding in bill khatjong ahin luidoh khapon chujongle hospital natong hon thukhol a che ho kampao kilom in jong ahoupi pouve, ati.

Xxxxxx

Border district 7 sung a gam leiset China in atoupha a kisei Nepal in hephalou

New Delhi, Aug 23: Prime Minister KP Sharma Oli tosotna a Nepal gamsung mun phabep China in atoupha dan a thuso ho in atahlang chungchang chu Nepal in ahetphah lou beh dan in tunichun aseiye.

Survey Department of Agriculture Ministry of Nepal minpan in Nepal gamgi district 7 hopsung a gam leiset phabep pi dan toh kitoh lou hel in China in atoupha e tia News agency ANI in asodoh ahi.

Hiche thudol a thu kisei Nepalese government in nasatah a apomlou ban a hitobang thusodoh  newspaper chun ngaidam jong athum ahitai. Chule Nepal foreign ministry in jong hitobang thilsoh aum khapoi tia jong ana hilchensa ahi.

Geldoh ding chu achesa October 5, 1961 kum a Nepal le China in Boundary Treaty kinoptona jong ana semdohsa ahikit e.

Kinoptona dungjui a gamgi melchihna No. 37 le 38 amangdan a kisei jong amang hilou in aumlou mong dia kinoptona gamteni kah a ana um jo ahikit e tin foreign ministry chun asei e.

Hiche gamgi chungchang thugin hi alangto a toukhom a seilhapna kinei ding ahi e tia asei ban in gam ho kihetkhel nathei thuso ho hetchen masat a so ding in Government of Nepal chun media ho temna jong anei ahi.

Xxxxxxxx

Numei hon chanvou kibang aneikah a India khangtou theilou ding ahi: VP Naidu

New Delhi, Aug 23: India gamsung a numei hon imalam jouse a chanvou kibang anei angai e tin Vice President M Venkaiah Naidu in tunichun asei e.

India mi akehkhat numei hon imalam jouse a chanvou kibang a aneikah a gamsung khangtou lou ding ahi in, chutolhon a political party jouse’n parliament le state legislature a chanvou kibang numei ho pehding phatsahna anei angai e tia facebook a Naidu in political party ho temna anei ahi.

Lok Sabha le state assembly ho a numei chanvou pehdia bill kigong jong Upper House (Rajya Sabha) in aphatsah vang a 2014 Lok Sabha phat bei tolhon a bill jong kahlhah ana hi lo ahi.

Naidu in numei ho jana peh le thakhat a gel hi gamsung mipi chondan jong ahi in, tahso a numei ho hatsah phat ahitai, ati. Chule Naidu in gamsung numei ho chombol na aumtapoi tihi atah a mit mu a umsah phat ahitai, ati.

Xxxxxxxxx

Chief Minister Nitish Kumar makaina a Bihar assembly kitetding ahi tia BJP luboh JP Nadda in phongdoh

New Delhi, Aug 23: Bihar assembly election hi Chief Minister Nitish Kumar makaina noi a Bharatiya Janata Party, Janata Dal(United) le Lok Janshakti Party in atetkhom ding ahi e tin BJP luboh JP Nadda in tunichun aphongdoh in ahi.

Bihar assembly election hi October-November vel a chelha ding ahi in, kiloikhom party thum ho jona chang tei ding in Nadda chun kitahsan tah in jong aseiye.

Hetding chu JD(U) leh LJP kah a seitheilou khop a kitomona aumban a BJP bou toh kithokhom ding ahidan Kumar in aphondoh laitah a Nadda in JD(U) le LJP toh BJP pankhom ding thu hi aphondoh ahi.

Nadda in Bihar mipi in vaipo dia BJP le NDA akineppina tahso thei nadia party kithokhom pi ho toh pangkhom a Bihar assembly election hi kimaitopi dia kium ahi, ati.

Nadda in kiveng them tah a intin chon a mipi ding a Centre natoh phatna ho seiphong le ding in party worker ho temna anei ahi.

Chule eima keng a din dang Prime Minister Narendra Modi alhangsap noi a Makhana industry, Madhubani painting,  Bhagalpur Silk industry, Litchi ho India keng a din thei nading a machalsah a tosot ding in jong Nadda chun aseibei. Chule Covid-19 thu toh kimat a in crore 10 chondoh a patepna lakh 1 jen boldoh le natna a kon damdoh jong 73.48% hin phahsah thei state government chaloh dan jong Nadda chun akipapi lheh in ahi.

Xxxxxx

Sonia Gandhi in kihoukhom a lamkai luboh holdoh loi dia lekhathot donbutna nei

New Delhi, Aug 23: Congress kivaipoh dan pum khel dia lamkai kiloikhom phabep in lekha apehchu Congress president Sonia Gandhi in toukhom a lamkai luboh panmun lo thei holdoh loiding le apanmun atuhjom nom tahlou thu in donbutna apetan ahi.

Gandhi in party thudol a kikumlut nom talou ahivang a August 10 Congress Working Committee (CWC) toukhom ngehna jal a panmun luboh ding gondoh kahbou a dia panmun kalah ahibouve, ati.

Party lamkai ho chun May 25 nia Rahul Gandhi in apanmun alelhah nung lo ding anoplou phat a panmun ong lodia Sonia chu ngehna anei tho u ahi. Chupet a jong Gandhi insung mi hilou khat in panmun luboh alodia Sonia chun ana sei nahlai ahi.

Rahul Gandhi in haina apehni a jong May 25 CWC toukhom pet a Gandhi insung hilou khat in panmun luboh alodia ana seikit ahi.

Congress lamkai mi 20 vel in congress kivaihom nasung pumkhel dia asei hi Sonia ahiloule Rahul demna hijolou in congress kivaihom na sung pumkhel dia aphut joh u ahikit e.

Geldoh ding chu congress lamkai len adeh a Anand Sharma, Veerappa Moily, Kapil Sibal le Shashi Tharoor ban lamkai khangthah dom Jitin Prasada le Milind Deora hon jong congress kivaihom na sung semphat dia ngehna ana nei jing ahi.

Tuchung a lekha hi Sachin Pilot leh Ashok Gehlot kah a boina Priyanka Gandhi Vadra in aseilhap madeu August 7 nia kisun ahi.

Lekha chu congress lamkai len Kapil Sibal, Shashi Tharoor, Ghulam Nabi Azad, Prithviraj Chavan, Vivek Tankha le Anand Sharma hon asut ahi.

Xxxxxx

Delhi a kimandoh ISIS pa a kon Ayodhya bulu ding tohgon hetdoh a um

New Delhi, Aug 23: Delhi Dhaula Kuan a pat August 21 nia matdoh a um ISIS galguh Mohd Mustaqeem alias Abdul Yusuf Khan a pat Ayodhya bulu ding tohgon anei chu coronavirus toh kimat a gamsung venbitna ahat beh jeh a losam ahi hetdoh ahi.

Ama a kon Delhi khopi mi kititna lah bulu ding tohgon anei jong Balrampur aumna a pat airgun a kichuhna anei jong hetdoh ahi. Chule Independence Day August 15 ni Delhi khopisung abulu got jong venbitna ahatval jeh a ana losam ahijong aseidoh e.

Balrampur achenna in a pat ISIS ponlap, songkhol le lekha phabep jong Delhi Police Special Cell hon tunichun amudoh uve.

Police hon ama a pat cooker 2 sung a kikoi kg 15 a gih IED 2 le pistol jong amudoh un ahi. Delhi Police hon aseikit na ah mat a um pa hin achesa kum 5 sung a ISIS toh kijamat jing a India gamsung a sosetna boldia kigong jing le achate mi 4 le aji min a passport jong nei ahiuve, ati.

Syria a kaplih ahi masang a mat a um pa hi Yusuf Alhindi in ana lamkai ahi in, chujou a Pakistan a pat ama ana lamhil Abu Huzafa jong Afghanistan drone kikaptona a thikit ahi e tin PS Kushwah, DCP (Special Cell), Delhi Police chun aseiye.

Xxxxxxxxx

Nagaland a Covid case thah 49 kimudoh; agom’a 3,684 lhing ta

KOHIMA, AUG 23 : Nagaland a Covid-19 +ve case thah tuni 49 akimudohbe toh lhon’a agom’a case 3,684 alhing tan ahi. Hiche case thah kimudoh hohi sample 916 test kibol na’a kon kimudoh ahi. Chule case thah kimudoh 49 lah’a 31 hi Kohima akon, 10 hi Dimapur akon, 5 hi Mon akon, 2 hi Tuensang akon chule khat hi Mokokchung akon ahi tin Nagaland Health Minister S Pangnyu Phom chun aseiyin ahi.

Alangkhat’a janni (Aug. 22) chun Covid-19 jeh’a thina toh mi 1 ana um toh lhon’a Nagaland a Covid jeh’a thina toh agom’a mi 8 alhing tan ahi. Chule 82% confirmed case hi pasal akon ahi hiche lah’a percentage atam jo hi military akon ahi.

Xxxxxxx

Inn 750 val sanitizer, facemasks le lou le ai ana kihoppeh

IMPHAL, AUG 23: Imphal West Students’ Club (IWSC) Khumbong in Khumbong gamkai sung’a cheng inn 750 heng’a hand sanitizer, three layered facemask leh lou-le-ai anahopdoh uvin ahi. Hiche kibol nachung thu’a IWSC General Secy. Atom Samarendra in aseina’a hiche thilkeu kihomdoh hohi Dr Yaikhomba Taorem child specialist Shija Hospital and Research Institute, Langol in face masks 7500 piece, hand sanitizer 1500 bottles (100ml) sponsor ahin bol ahi ati.

xxxxxxxxxxx

Metro cities ho’a Petrol man khang

NEW DELHI, AUG 23: State-run oil marketing companies (OMCs) in tunin metro cities jouse a pertrol man revised abol uvin ahin diesel man vang akikhelsah pon ahi. Oil campany in national capital a Petrol man 14 paise a akhansah toh lhon’a Dk. 81.49 per litre (Diesel 73.56 per litre); Mumbai, Kolkata leh Chennai a 12-14 paise in akhang in ahi.

Alangkhat’a oil copany in Delhi a nikho 8 masang chun Petrol man Dk. 1.06 in akhansah in ahi. Mumbai a Petrol man Dk. 88.02 akon in Dk. 88.16 in akhang in ahin Diesel man Dk. 80.11 vang akikhel pon ahi. Petrol man hi metro cities chom chom’a niseh in akikhel jing in tunin petrol man Chennai a 12 paise in akhan in, Bengaluru 15 paise leh Kolkata a 14 paise ahi in ahin diesel man vang akikhel pon ahi. Delhi a Diesel Dk. 73.56, Mumbai a Dk. 80.11, Chennai a Dk. 78.86 chuleh Kolkata a Dk. 77.06 ahi.

Xxxxxx

Dk. Crore 938 fraud case thu’a CBI in Morena gamkai sung mun chom chom kholchilna nei

BHOPAL, AUG 23: Bank fraud case toh kisai in CBI team in janni (Aug. 22) chun Madhya Pradesh’s Morena gamkai sung mun chom chom’a oil firm toh kimat’a kholchilna ananei uvin ahi. Hetthei khat chu oil firm- KS Oils Limited Director chung’a Dk. Crore 983 loan scam jeh’a achung’a First Information Report (FIR) filed anakibol jeh ahi. Hiche kholchil nachung Delhi a jong achelhah pi uvin ahi. Hiche firm hin manufacturing plants hi Madhya Pradesh a Morena, Ratalam leh Guna anei in, Rajasthan a Kota chuleh West Bengal a Haldia anei ahi.

Hiche toh lhon’a CBI, spokesperson RK Gaur in aseina’a firm Director ni (2) tichu Saurabh Garg leh Devesh Agarwal chung’a hehna ahung kinei jeh’a kholchilna kinei ahi. Chule 2015 kum in banks in a sum lah’a nung lah doh kit thei nading in SARFAESI Act noi’a company thikeu ho auction bol anati chu bidding process akon donbut na hoitah anamu lou jeh in ana lolhing joupon ahi ati. Hiche thilsoh chung thu’a Friday nikho chun company factory leh registered office Morena, Ramesh Chandra Garg leh Director Saurabh Garg company office Delhi Barakhamba Road a um chu agency in kholchilna jong anakinei in ahi. Chuleh hiche loan fraud hi State Bank of India a linked kibol ahi tinjong aseibei.

Xxxxx

Assam CM Candidate ding’a KMSS in Akhil Gogoi lhendoh

GUWAHATI, AUG 23: Krishak Mukti Sangram Samiti (KMSS) in janni (Aug. 22) chun Political Party khat phudoh’a Chief Ministerial Candidate ding’a songkul (jail) lamkai Akhil Gogoi election tetsah ding in phondoh na anei uvin ahi. Chuleh KMSS lamkai hon aseina’a Gogoi hin party min ding hi songkul akon ahung pot doh leh phondoh na anei ding ahi ati.

Hiche toh lhon’a KMSS President Bhasco De Saikia aseina’a political party khat semdoh nading’a kigo chai sa’a um kahi tauvin ahi. Hiche party hi regional party hi ding chuleh hiche party ahi tribe, castes, communities, religion leh pao chom chom tho ho jouse kipumkhom ding ahi ati. Chule tu hin Akhil Gogoi hi songkul a um jong Oct. lha sung’a hi hung kilhadoh maithei ahitan ama ahung pot teng Party min kisah jong aphongdoh pai ding ahi.

Hetthei khat chu Gogoi hi 2019 kum’a Citizenship (Amendment) Act doudal’a kiphinna neiho lah’a pan anala khah jeh’a Guwahati Central jail a um ahi naban’a ama chung thu hi National Investigation Agency in kholchilna anei ahi.

Xxxxxxx

India a Covid-19 akon damdoh 75% anailam tai: Union Health Ministry

New Delhi, Aug 23: India sung a COVID-19 natna nei damdoh 22,80,566 lam alhin tah toh lhon in 75 per cent ahung nailam tan chuleh athi jong 1.86 per cent bou a ahung kheh tah toh lhon in ahung nemlheh tai tin Union health ministry akon thuso kimu chun asei in ahi.

Ministry akon thuso kimu chun asei na a India a covid akon thina toh hi natna nei hotoh vetkah ding a leiset chung a anem loi ahi akiti. Achesa nidan 24 sung a India sung a covid natna nei hi mi 57,989 a ana kibe in chule damdoh na nei hi mi 22,80,566 lam ahi jong ati. Chule damdoh na nei jat hi achesa July nisim 1 akon in ahung khang jing in ahi akiti. Akijendam/adamdoh tam cheh cheh le thina toh lhom cheh cheh hi centre in daan phate a asem a tohgon phate a anei jeh ahi tin ministry in thuso chun aseiyin ahi.

India in tohgon kinei ho leh doudal na ding a natoh na anei ho hi lolhing ahi ti adamdoh jat ho hin avetsah ahi ati. India sung a covid akon thina toh hi 56,706 lam lhing ahitan chuleh tu natna nei jat hi 30,44,940 lhing ahitan ahi.

Xxxxxx

SpiceJet in Europe le India kikah a cargo flight panta

New Delhi, Aug 23:  Budget carrier SpiceJet in Amstaerdam akon Mumbai kikah a cargo flight alensah pan utoh lhon in Europe a India akon non stop a cargo flight lensah masa pen ahung hitan ahi.

Hiche aircraft mama ahi Mumbai akon Khartoum, Sudan chan cargo flight kilen sah kit ding ahi akiti. Hetthei chu Spicejet in Amstardam akon Mumbai chan a tonne 13 a gih thil ahin poh lhung ahi. Flight chu Ducth capital akon 10.50 pm (local time) a hung kipan doh ahin, Mumbai khopi chu 10.54 AM (local time) in ahung lhung in ahi akiti.

Thuso kimu dungjui in Mumbai akon Khartoum chan lengding cargo flight hin tonne 40 lam a gih thil apoh ding ahi akiti. Ajay Singh, chairman and managing director, SpiceJet in asei na a Europe akon kingalouhel a thilpoh chu lolhing tah in akichai in,  hitabang natoh hin airline minphat na ahin pohlut ding toh lhon a Europe, Africa le CIS gam ho a lenna ding a jong mipi kinep na le deichat na ahin lhut dung ahi ati. Airline hin cargo flight 5764 lam ana lhadoh a tonne 31,800 lam a gih thil apohdoh ahitan ahi akiti. Hiche flight hin achesa March lha akon a India le leiset chung muntin a lou le ai chuleh thil jat chom chom ahin pohjing ahitan ahi akiti.

Xxxxxxxxxxxxxxx

Covishield chung a thu kisei hi adih ahipon, vaccine hi trial ho lolhin thei le bou kijoh ding ahi: SII

Pune, Aug 23:  Tu le tua Coronavirus vaccine, Covishield chung chang thu kisei ho hi jou le nal ngen ahin, hiche vaccine hi lou lhin na akimu a ahiding dol a phal na ahung kinei le bou john a kinei bep ding ahi tin Serum Institute of India (SII) in tuni in hetsah na ahin nei uvin ahi.

Hiche hilchet na chu SII in muntin a thuso ho a vaccine kisem lha ni sung a jah thei hiding ahitai tia ana kisei jing toh lhon a ahinnei u ahi. Tu le tua thuso kinei ho hi adihpon, govt in hiche vaccine semna ding a phal na eipeh uhi sem jou teng khonung a jah ding a koi ding bou a phal na eipeh u ahi tin company chun hetsah na ahin nei uvin ahi.

Tu le tu in phase 3 trial achelha jing in, phate a lolhin na ahung kinei le bou vet tup na kinei a maban hung kichal bep nalai ding ahi tin SII akon thuso kimu chun asei in ahi. Hiche phase 3 trial mihem chung a bolding hi tu lha kipat na lam a Drugs Controller General of India (DCGI) in phalna ana peh toh lhon a ana kibol pan ahi.

xxxxxxxxxxxxxxx

Karnataka a doctor hon CM toh akihou jou uva kiphinna ngahding a thuso neiyu

Bengaluru, Aug 23: Karnataka a government doctor ho in state sung a doctor khat thina chungchang a kiphinna ana nei uchu Chief Minister pa toh kihou na ana nei utoh lhon in kiphinna chu suh hai tah ding in hetsah na ahin nei uvin ahi.

Hetthei khat chu covid toh kisai a natoh na gim val jeh a govt doctor khat ama le ama ana kitha toh lhon a doctor ho chun kiphinna ananei u ahin hinlah Chief Minister BS Yediyurappa in doctor ho kiphinna le thuman ho chu vetlhah pehding a kitepna ana nei toh lhon a kiphinna chu an aki suhai ahi. Chief Minister BS Yediyurappa in doctor ho gimna ho vetlhah ding a thupeh ahin neitah toh lhon in state government medical Officer’s Association in kiphinna asuhai taovin, amaho chung a kipa thu akisei in ahi tin Medical Education Minister K Sudhakar chun ana sei in ahi.

Medical officer ho in kiphinna angah ding uva hetsah na ana nei toh lhon in Health Minister B Sriramulu in athuma ho u Chief Minister pa toh kihou toh lhon a suhlhap pehding a tohgon anei dan u jong hetsah na ahin nei in ahi. Minister pa chun medical department ho koukhom a hahsat nah o chung a kholchil na nei a vaal a natoh na le kigim bol na aum le vaipo mo na nei hoc hung a gotna pehdinga hidan jong tahlang na ana nei in ahi. Doctor ho in kiphinna chu tulai covid toh kisai a doctor ngaichat na asan toh lhon a mipi ding gel na ana ngah u ahi akiti.

S R Nagendra, Nanjagud taluk health officer pa chun kal masa a chu ana toh na gimval jeh a ama le ama ana kithat ahi. Nagendra insung mite le doctor phabep in ama le ama akitha najeh chu Zilla Panchyat CEO Prashanth Kumar Mishra in ana gim bol jeh ahi tia ana mo so u ahi. Doctor ho in CEO pa suspend bol ding a thumna govt ang a anei u ahi. Hiche thumna toh kisai a government in Mysuru regional commissioner ang a kholchil na nei a ni 7 sung a report hin pe ding a thupeh ana nei u ahitan ahi.

Xxxxxxxxxxxxxxxxx

Chapang chung a khanset na covid-19 lockdown sung in akhan be pon ahi: NCPCR Chief

New Delhi, Aug 23: India sung a covid-19 lockdown sung ahin chapang sung a khanset na complaint akhan be poi tin National Commission for Protection of Child Rights chairperson Priyank Kanoongo in hetsah na ahin nei in ahi. Hiche thu chu thulamleng ana umtoh lhon a NCPCR in vaipo ho ang a hilchet na anei ahi. Thuso miho toh kihoulimna a Kanoongo in NCPCR  in hitabang khanset naho umlou na ding a panlah na tanglou a anei jing dan hetsah na ana nei in ahi.

Achesa March nisim 25 akon a chapang chung a khanset na ana kibe em tia thudoh kinei na a lamkai nu chun akibepoi tin ana sei in ahi. Hitabang thulamleng chung a ahou limna a kanoongo in chapang school kai nga a ahung kisol doh hi atam e tin akisei in hinlah school kihong loulai ahin hitabang hi seithei ahipon ahi ati. Hiche lockdown sung a angaicha chapang ho ration kipeh jing dan le bongnoi ho hopdoh na akinei jing dan tahlang na ana nei toh lhon in online education kibolpeh jing toh lhon a school fee hi phate a pehding ahin, hiche chung chang ahin govt toh jong kihou na akinei tan ahi tin hetsah na ahin nei in ahi.

Lockdown sung a chapang trafficking chung chang thu ana kidoh na a NCPCR in hiche chung chang in phate in natoh na akinei in state commission hotoh jong kihou na kinei ding ahi ati. Chapang kipui mang thei na jeh hi vaichat jeh ahin, tahlal insung akon chapang hohi apuimang anop toh lhon a hitabang akon kiven na ding a insung mi ho ang a tilkhou na neiding tohgon kinei ahi ati. Hitabang tahlal insung akon chapang hohi phate a vetsui ngai ahi in, ahithei le insung pumpi vetsui ding ahi tin jong ana sei in ahi.

Xxxxxxxxxxxxxxxxxxxxxxxxxxxxxxxxxxx

Gamsung hung lut ding kigo Chinese khat kiman doh

Lucknow, Aug 23: Indo-Nepal gamgi akon gamsung hung lut kigo Chinese khat tuni in matdoh in ana um in ahi. AKimandoh pa chu  Maharajganj’s Sonouli, Uttar Pradesh a ana kimandoh ahi. Police akon thuso kimu dungjui ahung lut pa chun visa valid anei in hinlah covid jeh a Nepal akon hung lut ding hi koima kiphal peh lou jeh a ana kiman ahi akiti.

Ama pa chu gamgi ana paltan kon a SSB ho in ana mat u ahi. A passport dungjui in akimandoh pa chu Shen Lei (37) ahi akiti. Thudoh kinei na a Shen lei chu lou le ai a kivei ahidan le New Delhi akon a Kathmandu ana jot a Nepal a tourist visa kichai tah toh lhon a India hung lut ahidan tahlang na ana nei in ahi.

Xxxxxxxxxxxxxxxxxxxxxxxxxxxxxxxxx

Thuso miho local train tousah na ding chung changa thulhuh kinei vahding ahitai tia Maharashtra Govt in sei

Mumbai, Aug 23: Thuso mi jouse Mumbai sung suburban train a tousah na ding chung change  phal na pehding thu chung a kihou lhah na kinei vahding ahitai tin Maharashtra Relief and Rehabilitation Minister Vijay Wadettiwar in tuni in phondoh na ahin nei in ahi.

Wadettiwar hin Disaster Management portfolio jong atuh toh lhon in thuso miho toh akihou limna a thuso mi thu po le a che ho hi local train jouse a touthei ding u ahitan ahi ati. Hiche thu chung chang ahi chief minister Uddhav Thackeray phalna kingai cha ahin, state cabinet in ahung lhungding ni 2 sung a seilhah na ahin nei ding u ahitan ahi ati.

Hetthei khatchu tua hi train lhom cha bou kilhai sah ahi. Tu naicha a chu gov tin thuso miho hi QR code pe a train tousah ding a hetsah na ana nei u ahi.  Hetthei kahtc hu Mumbai sung suvurban train ho hi achesa March akon a lockdown toh kisai a ana kikhah ahi. Hetthei khat chu covid natna nei hi Mumbai sung a 1,35,362 lhing a chuleh athi jong 7,388 lam lhing ahitan ahi.

xxxxxxxxxxxxxxxxxxxxxxxxxxxxxxx

DMCTE a qualified lou khat principal a kilhen DESAM in demna nei

Imphal, Aug 23: Democratic Students’ Alliance of Manipur (DESAM) in DM College of Teachers’ Education (DMCTE) a qualified lou khat principal panmun kipeh na chung a demna sangtah ahin nei utoh lhon in National Council for Teacher Education (NCTE) ang a complaint bolding in govt gihna ahin nei uvin ahi.

DESAM akon thuso kimu chun asei na a DMCTE principal cu a qualified lou khat ahi toh lhon a khel ding a hetsah na ana kinei ahin hinlah govt in athah beh a lhendoh na ahin neipa ujong NCTE daan noi a qualified lou ahidan tahlang na ahin nei uvin ahi. Tu le tua qualified aumlou le govt in phatchom khat adinga director, Higher and Technical Education chu principal atuh sah ding u ahi ati tin DESAM chun hetsah na ahin nei uvin ahi.

Xxxxxx

Naga te thakhel dinga NSCN-IM kilhengdoh suhkhel ahiding ahi kiti

Kohima, Aug 23: Indian govt in Naga te thakhel ding a NSCN-IM achang seh a lhendoh na ana nei hi British te in Indian Muslim ho thalheng ding a Muslim League ana lhendoh tobang hung hiding ahi akiti. Central government in Kum 23 lam ahin kihoupi vanga chamna thu kiseilhah theilou hi India sung khangthusim chedan toh kitohlou ahidan jong tahlang na akinei in ahi.

NSCN-IM in tunaicha a thu chaina sem ding ahin deilou uhi ceasefire noi a chanvou achan hou adalhah nom lou joh’u ahidan tahlang na akinei in hiche thu toh kisai a New Delhi in Naga kiloikhomna chomkhat kihoupi dinga ana kou toh lhon a NSCN-IM in thumna anei ho pehding dinmun ahung hilou hi Nagaland mite joh suhlunglhai ding a govt in kigeldohna athah nei uham ti doh thei ahung hi in ahi.

Nagaland sung a Naga Tribe 14 ho in  ‘Nagaland Gaon Burha Federation’ kiti kiloikhomna na noi a Prime Minister Narendra Modi le govt vaipo dang ho ang a NSCN-IM ho limsah lou a Manipur akon Tangkhul nam hotoh pampei ding adei dan u jong hetsah na ana nei u ahitan ahi.  NSCN-IM lamkai len lah a atam jo Manipur akon Tangkhul ngen ahi utoh lhon a Nagaland miten ahin thet pan u ahi.

Hetthei khat chu Nagaland state kisem til lai a Naga lamkai ho in Chiten Jamir makai na noi a Tangkhul ho ang a Nagaland gam jopding a temna ana nei lai uva Tangkhul hon ana pam pei uva, 1970 kum  lam a Naga National movement ahin thah jop uva Naga lamkai le sepai asang a sim ahin tha u ahi.

Muivah in Nagaland sunga vaipoh na ding le letna dinga Nagaland sung akon lamkai lui jouse ana suhmang a hunam a meipum long mangcha a Nagaland mite chung a vaipoh na ahin nei u ahikhah toh lhon a Naga miten Tangkhul ho hi ami uva apom theng thei lou u ahi. Nagaland mite in Tangkhul hochung a lunglhai lou na anei utoh lhon a Centre in Naga mite thalheng ding a NSCN-IM kihou pi na anei uhi thildih ahung hilouding dan jong hetsah na ahung kinei in ahi. NSCN-IM in meipum mangcha a Indian govt ang a kihoi tho sah na anei jeh a centre in thu tan lhah na anei ding ahileh Nagaland sung a kihou na kichai nung le boina lentah hung umding hi Centre in ahet ngai ahi tin thuso ahung kinei in ahi.

xxxxxxxxxxx

Border district 7 sung a gam leiset China in atoupha a kisei Nepal in hephalou
New Delhi, Aug 23: Prime Minister KP Sharma Oli tosotna a Nepal gamsung mun phabep China in atoupha dan a thuso ho in atahlang chungchang chu Nepal in ahetphah lou beh dan in tunichun aseiye.
Survey Department of Agriculture Ministry of Nepal minpan in Nepal gamgi district 7 hopsung a gam leiset phabep pi dan toh kitoh lou hel in China in atoupha e tia News agency ANI in asodoh ahi.
Hiche thudol a thu kisei Nepalese government in nasatah a apomlou ban a hitobang thusodoh newspaper chun ngaidam jong athum ahitai. Chule Nepal foreign ministry in jong hitobang thilsoh aum khapoi tia jong ana hilchensa ahi.
Geldoh ding chu achesa October 5, 1961 kum a Nepal le China in Boundary Treaty kinoptona jong ana semdohsa ahikit e.
Kinoptona dungjui a gamgi melchihna No. 37 le 38 amangdan a kisei jong amang hilou in aumlou mong dia kinoptona gamteni kah a ana um jo ahikit e tin foreign ministry chun asei e.
Hiche gamgi chungchang thugin hi alangto a toukhom a seilhapna kinei ding ahi e tia asei ban in gam ho kihetkhel nathei thuso ho hetchen masat a so ding in Government of Nepal chun media ho temna jong anei ahi.
Xxxxxxxx
Numei hon chanvou kibang aneikah a India khangtou theilou ding ahi: VP Naidu
New Delhi, Aug 23: India gamsung a numei hon imalam jouse a chanvou kibang anei angai e tin Vice President M Venkaiah Naidu in tunichun asei e.
India mi akehkhat numei hon imalam jouse a chanvou kibang a aneikah a gamsung khangtou lou ding ahi in, chutolhon a political party jouse’n parliament le state legislature a chanvou kibang numei ho pehding phatsahna anei angai e tia facebook a Naidu in political party ho temna anei ahi.
Lok Sabha le state assembly ho a numei chanvou pehdia bill kigong jong Upper House (Rajya Sabha) in aphatsah vang a 2014 Lok Sabha phat bei tolhon a bill jong kahlhah ana hi lo ahi.
Naidu in numei ho jana peh le thakhat a gel hi gamsung mipi chondan jong ahi in, tahso a numei ho hatsah phat ahitai, ati. Chule Naidu in gamsung numei ho chombol na aumtapoi tihi atah a mit mu a umsah phat ahitai, ati.
Xxxxxxxxx
Rahul Gandhi le Priyanka Gandhi in Congress lamkai lenpen panmun dei lhon lou
New Delhi, Aug 23: Rahul Gandhi in Congress chief hina panmun ningkum a ana dalhah chu atuh kitlouding dan hilchet na ana nei in ahi. Priyanka Gandhi Vadra in jong general secretary kal val a panmun dang adeilou dan thu tahlang na ana nei kit in ahi.
Hetthei khatchu party sung a lamkai 20 lam in party lamkai le kivaipoh dan abon a khel ding a adeisah dan u tahlang na ana nei u ahi. Sonia Gandhi in apnamun akon haiding tahlang na ana nei vang in Punjab Chief Minister Amarinder Singh le Chhattisgarh Chief Minister Bhupesh Baghel teni in atosot lhon dan phondoh na ana nei lhon in ahi.
Amarinder Singh in lamkai khel ding thu hin podoh hochung a gotna ana nein a a tu phat hi hitabang thil hinpoh doh phat ahipon, BJP in gamsung asuh chat vai laitah ahi phate a limgeh a um jing ngai ahi ati. Rajasthan Chief Minister Ashok Gehlot in asei na a Sonia in ngahding tohgon anei le Rahul Gandhi in apanmun alo ngai ahi tin asei in ahi.
Sonia in asot nathei chan a atuh ding chuleh Rahul Gandhi in maban a atuh ding ahi tin Amarinder Singh chun ana sei kit in ahi. BJP makai na govt makai na kidin te pi ding a Gandhi te ngai ahin, lamkai dang kilhen na um thei louding ahi tin Congress CHief Minister thum ho chun asei uvin ahi.
Xxxxxxxxxxx
Centre in simlai ho hahsatna avelvet a JEE le NEET themvet nahi agellhah ngai ahi: Anil Deshmukh
MUMBAI, AUG 23 : Maharashtra Home Minister Anil Deshmukh in Covid-19 jeh’a simlai hon hahsatna ato nao chung’a tunin Central Govt. heng’a Joint Entrace Examination (JEE) leh National Eligibility cum Entrance Test (NEET) hi simlai ho dinmun avetlhah jou teng leh conduct abol ding in ngehna ananei in ahi. Chuleh Covid-19 jeh’a JEE leh NEET exam bol ding simlai hon kigotna’a hahsatna ato naban’a simlai nu le pa jeng jong hiche exam ding chung’a lunggim na sangtah anei uvin. Hetthei khat chu hiche themvet nahi simlai tamtah ding’a ahinkho kisemdoh nading ahi jeh in Central Govt. in simlai ho hahsat na velvet na anei jou teng hiche exam hi conduct abol ding in jong ngehna anei in ahi. Chule National Testing Agency (NTA) hin Joint Entrance Examination (JEE) (Main) hi ahung lhung ding Sept. nisim 1 apat 6 chuleh National Eligibility cum Entrace Test (NEET) (UG) hi ahung lhung ding Sept. nisim 13 nikho ading’a phondohna anei ahi.
Hiche toh lhon’a Deshmukh in aseina’a Congress lamkai Rahul Gandhi jeng in jong Central Govt. heng’a JEE leh NEET simlai hon entrance exam ding phat vohchon ahi nading’a ngehna anei naochung’a vetlhah na aneipeh ding in jong ngehna anei in ahi ati. Simlai tamtah in hiche themvet nahi Covid-19 jeh’a kigotna phat phatah’a anei theilou nao jeh’a themvet nading nikho vohchon ding’a ngehna Supreme Court na anakinei chun achesa August nisim 17 nikhon Supreme Court in NEET leh JEE themvet nading nikho kivochon theilou ding Sept. lha sung’a um ding ahi tin ngehna kineiho anasang pon ahi.
xxxxxxxxx