Indo-China gamgi boina Galwan Valley a sepai ho kinotona a Indian Army...

Indo-China gamgi boina Galwan Valley a sepai ho kinotona a Indian Army 20 in thina toh; Athi umbe ding a kisei

49
0
SHARE

Indo-China gamgi boina Galwan Valley a sepai ho kinotona a Indian Army  20 in thina toh; Athi umbe ding a kisei

New Delhi, June 16: India le China gamgi a boina umna a thina chan asona kum 45 sunga amasa pen ading in jaanlhah in Galwan Valley a India le Chinese sepai ho kikah a kinotona a Indian Army officer khat jaona in sepai 20 lam in thina ana toh uvin ahi. India sepai ho chu akitong kha ho athi be umnalai ding in akisei in ahi.

Indian Army akon thuso kimu dungjui in jaanlhah a gamsung teni military kikah a boina ana sotoh lhon in alang to ni a akitong kha ana um in Indian sepai 3 in amun a thina ana toh in adang mi 17 ho chu kitoh khah na akon damdoh jou louva thi ahiuve akiti.

Defence Minister Rajnath Singh in tuni in Eastern Ladakh a thil soh chung a Chief of Defence Staff le military thum ho a chief hole  External Affairs Minister S Jaishankar jaona in kihou khomna ana nei pi in ahi. Gam teni army kikah a boina hi Ladakh sung a um Pangong Tso le Sikkim a Naku la a kinotona ana um a kon a sepai le manchah alang toni a ana tol lut jing u ahi.

India-China gamgi a sepai thina hi achesa 1975 kum a Indian Army patrol che ho Chinese Sepai ho in Arunachal Pradesh a ana bulu uchu achaina ana hi ahi. Achesa 1967 kum ajong Nathu La mun a gamsung teni sepai ho kikah a boina ana um ahi. Hiche kinotona achun Chinese sepai 4 lam in thina ato ding dan thu jong hetsah na ahung kinei in ahi.

ANI report dungjui in Chinese Army ho mi 43 vel akisukha le thina toh aum e akitin hinlah China in hitobang thu hi official in thuphon aneipoi jong akiti.

Hetthei khat chu Indian Army in Chinese Army akon a gam hung ki keh leh be na pomlou na ananei utoh lhon a gam hung kila be chal sah lou ding a ana tin jing u ahi. China in LAC gaal a gam phabep a camp ahin kisah utoh lhon a boina hung um pan ahi. MEA spokesperson akon thuso kimu dungjui in amun a thi ho chu Colonel Santosh Babu,  Commanding Officer, 16, Bihar Regiment, Havildar K K Pazhani le Sepoy Kundan Kumar Ojha ahiuvin ahi akiti. Thilsoh toh kisai in External Affairs Minister S Jaishankar in Prime Minister Narendra Modi kimupina ana nei in ahi akiti.

UNACCO Covid Care Centre a lupna 253 gontup ahitan, lupna 47 kikoi be ding ahi, tia Minister Jayantakumar in sei

Imphal, June 16(ET): Health and Family Welfare Minister L. Jayantakumar Singh in Tuesday nikhon UNACCO COVID Care Centre a man ding lupna 253 gotsa aumtan, chule lupna 300 alhin nadinga lupna 47 kikoi be ding ahi, tin aseiyin ahi.

Tuni jingkah chan geiya hiche centre a Covid 19 natna nei mi 75 admit abol u ahi. Sorkar in atil a UNACCO Covid Care Centre hi lupna 100 umna care centre a sem dinga tohgon ananei ahi in, ahivanga gamsunga Covid 19 positive atam cheh cheh jeh a sorkar in lupna kikoi hi 300 chan a kalsah dinga thulhuhna anei ahi, tin Minister pa in aseiyin ahi.

Medical Directorate Office, Lamphelpat mun a Minister pa in Ambulance hopdohna kin anei na a, National Health Mission, Manipur in angaicha bulhit thei nadinga ambulance ni alahbe ahi, tin aseiyin ahi. Ambulance khat hi CMO office, Bishnupur a kimangcha ding chule khat hi Medical Directorate, Lamphelpat a kimang ding ahi, ati.

Minister Jayantakumar in Mahindro Bolero SUV car 5 jong hopdohna aneiyin ahi. gari hi Pherzawl, Jiribam, Noney, Tengnoupal le Kakching district khat cheh a chang ding ahi. SUV car hi mopohna nei Chief Medical Officer ho khut a pehdohna aneiyu ahi. Pandemic sunga gamsunga hung kile ho poh le nading gari ngaichatna asan jing hi state sorkar in ahetthem ahi in, district adang hojong akhoh dungjuiya aban ban a kipe ding ahi, tin aseiyin ahi.

Covid 19 pandemic sunga mipi amoh lungjin lou dinga Minister pa in temna aneiyin, sorkar in mipi ngaichat peh nading chule pandemic vetkol nadinga abolthei chan abol ahi, ati. Kin gon a Director, Health Services, Dr. K Rajo Singh, Additional Director ho chule Health Department le NHM, Manipur a official hojong apang uvin ahi.

Manipur a Covid-19 case 10 akimube toh kilhon a natna nei agom a 500 lhingta

Imphal, June 16(ET): Tuesday nikhon Manipur gam a numei 7 panna a mi 10 Covid 19 positive ahi akihetdoh be kit in, hiche toh kilhon a gamsunga natna neiya photchenna um hi case agom a 500 lhing ahitai.

Natna a kon mi 159 kijen dam a chule active case hi agom a 341 lhing ahi. Gamsunga recovery rate hi 31.8 percent ahi, tin Additional Health Director Dr K Sasheekumar Mangang in aseiyin ahi. Athah a positive ahi kihetdoh be hohi abon uva gamdang a kon hung kile ho ahiuvin, hiche lah a mi 6 hi Senapati a kon hiya chule mi 4 hi Imphal West district mi ahi.

Abon uva COVID-19 Care Facility, Imphal a achon tauvin, tu dinmun a atahsa lel aum pouvin ahi. Kivenna dinga angaicha ho chule ‘containment process’ hojong chelha ahi, tin thulhut in aseiyin ahi. COVID-19 natna hi ‘novel disease’ in, kal seh tobanga thutah athah thah hetdoh be aumjeh a state in doctor, staff nurse le paramedic ho panna a frontline worker ho kichuhna phatah peh nadinga ‘skills up-gradation’ apat ahitai.

Tuchan geiya gamsunga Covid 19 training team hohin medical officer 522, staff nurse 917, allied healthcare provider 349, auxiliary nurse midwives 902 chule social health activist 1,573 hi kichuhna apeh ahitai, tin Dr. Mangang in aseibe in ahi.

Sumkovei na mun, private business unit le dukan bol jousen mask bol lou ho thil apehlou diuva sorkar in thuso nei

Imphal, June 15(ET): Health and Family Welfare Ministry in Covid 19 natna akilahson to louna dinga face mask bol dinga thuhilna aneiyin, scientific study chom chom in face kibol hin natna ahouiye ti avetsah ahi.

Natna nei atamjo hi anatna sohlou (symptoms umlou) ahijeh a hetlouva natna nei khat toh kito/kimu khahna jong umthei ahijeh a mask bol jing ding hi thupi ahi. Japan le Korea kiti natna achal louna dinga lolhing tah a pan la a gam hon mijouse mask akibol sah u ahi. Hiche jeh a State Cabinet injong office panna a mipi lah a mask kibol tei nadinga thulhuhna aneiya, hiche dungjuiya dukan le sumkolveina (business establishment) jouse chule Private Business Unit hon hiche dan ajui cheh diuva thuhilna asodoh ahi.

Chief Secretary Dr J Suresh Babu in soi akaina thuso a chun, dukan bol, sumkolveina hong chule private business unit jousen mask akibol cheh dinga thupeh anei ahi. Thil cho a che mask kibol louhon apet pet a akichoh thei nadinga, dukan bol jousen mask jong akoi diuva kisei ahi. ‘No Face Mask No Sale’ ti kisun signboard hi building chule dukan ho jouse pam a atahdoh diuvin thuhilna aneibe uvin ahi.

Deputy Labour Commissioner, Manipur le subordinate officer kiti Labour Officer le Labour Inspector jousen hiche rule hi ama ama district/jurisdiction a khoutah a akichepi nadinga avetlhah diu ahi. Food Safety Administration le Food Safety Officer hohin Licensing and Registering Authority (Food Business Operator) hina a hiche dan hi Food Business Centre jouse a akichepi nadinga avetsui diu ahi.

Deputy Commissioner le District Level Officer, Consumer Affairs, Food & Public Distribution Department jousen jong hiche dan hi business establishment le Oil pump ho a achepi diu, mask bol lou customer ho thao apehlou diu chule pump a Mask bol lou ho petrol, diesel kipe louding ahi tia akisut na signboard atahdoh diuvin thuhilna chun aseibe in ahi.

Lawyer kiloikhom hon advocate ni kigih jeh a sorkar henga memorandum pelut; Police hon FIR jihlut ta

Imphal, June 16(ET): Advocate ni in Lamphel police station le Sekmai police station a hehna asem toh kilhon a police hon Custom Division, Imphal a official kahi tia kisei mikhat chunga FIR ajihlut tauvin ahi.

District Superintendent, Imphal West, K Meghachandra in phone a thuso miho akihoupi na a asei ahi. Advocate chongtham victor le atohkhompi Amom Malemsana hin Custom Division Office, Chingmeirong a official kahi tia kisei mikhat a kon gihna amu jouva Sekmai police station le Lamphel police station a hehna asem lhon ahi.

Achesa june nisim 10 nikho a advocate teni hin mobile phone a kigihna ato lhon ahi in, Custom Division Chingmeirong office a nehguh akibol video alahdoh lhon a asosal lhon jeh a tha ding chan a mipa hin agih ahi. Hiche thu hi All Manipur Bar Association in sangtah a alah a chule Chief Secretary, Special Secretary chule Superintendent of Police, Imphal West in action dihtah a alah a chule duty bol a lawyer hon kicha louva duty abol thei nading uva venna apeh diuva jong aseiyu ahi.

Okram Nutankumar Singh, Joint Secretary, AMBA in soi akaina government authority henga application apeh nauva, Advocate Victor le atohkhompi advocate Amom Malemsana in Custom Division Office, Chingmeirong a nehguh kibol asosal thu chule hiche jouva thilsoh umchan ho asei uvin ahi.

Victor le Malemsana kigihna hi gamsunga um lawyer jouse kigihna ahi, tin aseibe uvin ahi.

 

Tamenglong QC a boina ana soh

Tamenglong, June 16(ET): Tuni nilhah lam nidan 3:30 PM vel in Tamenglong Don Bosco School QC a ni 14 lam quarantine jou a discharge certificate pehdoh na ana kinei lou jeh in quarantine a um ho in kiphinna ana nei uvin ahi.

Hiche kiphinna nei ho chu CMO, SDO Tousem, SDPO TML le OC TML PS ho in ana phal thip uvin ahi. Hiche certificate peh gei na chu gojuh jeh ahi tia hetsah na ana nei utoh lhon nilhah lam in pehdoh na ana nei uvin jing nikho le inn lam kile ding u ahitai akiti. Alangkhat  nilhah lam nidan 7.30 PM vel in United Builder School QC a um ho in gate a kisukhom in jani sun akon light vah lou jeh in kiphinna ana nei uvin gate ana tum hong go uvin ahi akiti.

Asunga um ho akon thuso kimu dungjui in mi thum lam dammo aum utoh lhon a Doctor ngaichat ahi dan jong hetsah na ahin nei uvin ahi. Adammo ho chung chang a doctor ho phone ana kibol na a phon a kon in ajan ding dan le alou ngaichat ho hetsah na ahung kinei in ahi akiti. Jannlam nidan 9 vel in meivah ahung tan ahi akiti.

 

Covid-19 douna a state le centre panlahna hi ‘kithuto’ vetsahna hoitah ahi, tia PM Modi in sei

New Delhi, June 16: Novel coronavirus douna a pan kilahkhomna, Centre le state in kithuto na anei hi ‘cooperative federalism’ vetsahna dihtah ahi, tin Prime Minister Narendra Modi in Chief Minister ho, Lt. Governor ho chule State le Union Territory a bureaucrat luboh hotoh nikho ni umding kihouna kipat ni a aseiyin ahi.

Chief Minister hon ngaidan asei dungjuiya, Modi in June nisim 30 jou, ‘Unlock 1’ kichai teng itobang tohgon umding ham ti phondohna aneiding ahi. Meeting hi Ladakh hopsung Galwan Valley mun a India le China sepai ho sangtah a akiboi pet a um ahi. “Khonung teng leh India in novel coronavirus adou dan velvetna aumteng tu phat hi pan ilahkhom dan u tekahna a kigeldoh jing ding ahi. Hiche hi ‘cooperative federalism’ vetsahna dihtah ahi”, tin PM in aseiyin ahi.

Tuchan geiya India pumpi a Covid 19 case agom a 3,43,091 lhing ahitan, achesa nidan 24 sunga athah a case 10,667 kihetdoh be ahi. Natna jeh a thi hi 9,900 lhing ahitan, achesa nidan 24 sunga mi 380 thi ahi. “Vannoi mun chom chom a um hetthei umtah expert hon India in Lockdown achepi a chule gamsung mihon phatah a ajui dan hi asei jingu ahi. India a recovery rate hi 50% val ahitai.

India hi coronavirus natna kiseina a lolhing tah a mi akijen dam na gam holah a pang ahi”, tin Modi in aseiyin ahi. Maban lampi seikhomna dinga State 20 a Chief Minister hon pan alahdiu tahsan ahi in, hiche state hoa hi Punjab, Assam chule northeast state adang jouse pang ahi.

June 17 teng Modi in Maharashtra, Tamil Nadu, Delhi le Gujarat panna a natna akhohsetna gam 15 a Chief Minister hotoh kihouna aneiding ahi. Covid 19 pandemic sunga PM in state lamkai luboh hotoh kihouna asem 7 channa ding ahi. “Gamsung economy ol ol a ahung pha tou touvin, power consumption jong akal in, fertilizer kichohna akal tan ahi. Tua hi economic point chule value chain ho boipi ding ahi”, tin Modi in aseiyin chule factory neo ho puihoui angaidan thu jong Modi in aseiyin ahi. “Inmun a kon mask bol louva che doh hi gel jong gel hih uvin”, tin Modi in guidelines ho phatah a jui dinga aseibe in ahi.

 

Police team hon ju chule ju kisemna a kimang thil phabep man

Imphal, June 16(ET): Sagolmang Police team hon Inspector Kh. Devkumar Singh, OC Sagolmang police station lamkaina chule SI L Kenedy le ASI H Birchandra Singh tohgon a a Jugeshchandra Haobijam, IPS, SP, Imphal East district chule Ksh Ravikumar Singh, IPS, SDPO, Lamlai vetkolna noiya Pukhao Dolaithabi kho a thukholna anei uvin, ju chule ju kihon/kisem na thil tamtah aman uvin ahi.

Tuesday jingkah nidan 6.30 don a kholna aneiyu ahi in, plastic bucket 16 (litre 20 cheh), plastic jar 2 (litre 15 cheh) chule ju sem nadinga anthom kikoina bel 2 (alluminium) jong aman uvin ahi. Khunaijam Shanti Leima, w/o Kh Jiten chule Wahengbam Bebe Leimai, w/o W Premjit aman uvin, ani lhon a Pukhao Dolaithabi kho a cheng hilhon ahi.

Akiman thil chule akiman teni Excise department khut a Manipur Liquor Prohibition Act 1991 noiya maban action lahna ding a pehdohna anei diu ahi. Achesa June nisim 14, nilhah nidan 4.30 don a Mass drive abol nauva SDPO Lamkai police station chule Sagolmang police station team hon Sanjenlok ko, Sinam kho kom a jong ju kijoh kholna aneiyu ahi.

Hiche a jong hi plastic jar 27 (litre 15 cheh), le plastic drum 8 (litre 20 cheh), ju kisemna anthuh kikoina bel jong amat u ahi. Chule ju (DIC) litre 30 jong amat u ahi. Hiche toh kisaiya mi 5- Chaphamayum  Ambra (53), W/o (L) Ch. Kumar, Takhellambam Sunita (55), W/o (L) T.  Inao, Chaphamayum Khomdonbi Leima (60), (L) Sanajaoba, Chaphamayum Memtombi (42), W/o Ch. Brojendro ,  Phanjoubam Memma Leima (59), W/o (L) Tomba jong amat u ahi in, akiman ho chule thil ho Tuesday ni a Excise department khut a pehdohna anei tauvin ahi.

 

Term kichai nung’a State Cabinet in Extension abol ahin election um kah’a Council hoina ding’a kavetsui ding ahi: Chairman ADCC

B.Lalboi Gangte

CCpur. June 16 (ET) :  Autonomous District Council (ADC) Churachandpur sung’a issue tamtah seiding aum toh lhon in tuni nilhah lam nidan 2:30 in T. Paukhanlian, Chairman, ADCC in office mun’a thuso miho ana kimupi in thil umdan ho tahlang na ananei in ahi. Hiche phatsung’a Chairman, T. Paukhanlian in aseina’a 2015 kum akipat mipi lhendoh kahi nung uvin term jong May 2020 in kichai jong leh tulai gamsung’a natna Covid-19 jeh in March 3, 2020 nikho in State Cabinet in extension anabol in ahi. Hiche dungjui’a Gazette Order kiso June 1, 2020 apat lha 6 sung Manipur a ADC 6 ho manchah hiding chuleh October-November kikah chan hi ding ti ahi ati. Chuleh lhendoh kahi nung uvin 3 Bills ah boina, ADC sung thu boina chuleh tun COVID-19 toh kisai’a boina aum tou jing in ahi. BJP Ministry hi jong leh power ham/political lam’a  thunei kichuna aum jing naban’a COVID -19 toh kisei’a lungling laona lentah aum lai tah’a ADC sung’a issue chom chom aum hi mipi lang akipat themmo channa um thei ahi jeh in ADC thaleng leh Chairman khat hinan phamo kasa lheh jeng in ahi tinjong aseibei.

Hiche toh lhon’a achesa May nisim 24 nikho apat Imphal mun’a Camp ding’a lhep leh puidoh’a um Congress MDC 8 leh BJP ah District in-charge Khaipao lamkai nan member phabep in Political camping anei’u ahidan aphongdoh in ahi. Hiche thu’a Deputy Commissioner,  Churachandpur heng’a achesa May nisim 31 nikho in “No Confidence Motion” lekha akipelut in chuleh DC in jong  Secretariat ah forward a process achelhah jing lai ahitoh lhon’a Legal Cell, Parent Body, Home Department leh a dang dang in panla ding agot laitah in June nisim 10 nikhon Withdraw anabol kit uvin ahi. Hiche withdraw kibol na ajeh chu achesa June nisim 11 nikho’a Party Leadership in Congress MDC phabep lah lutna ananei toh lhon’a “No Confidence Motion” pehlut’a um chu nung lahdoh ding ti ahi jeh chun ana kiladoh in ahi. Hiche hi Party ahoi joh cheh na ding leh party interest ah phat um lai sung’a tongkhom ding’a thuhil na ahi dungjui’a BJP party ah lah lutna anei’u ahi ati. Chuleh hitobang thil ho jeh’a term um phatsung’a boina tamtah lah’a boilou na ding tamtah’a kiboi den kha ahi tinjong aseibei.

Alangkhat’a ADC ah junior member hi jong leng 2017 kum’a BJP Ministry semdoh ahi phatsung’a Executive Member ding’a lahlut’a um kahin chuleh member khat mai mai’a um nom kahi dan lamkai ho kom’a kasei in ahin Executive Member ding joh in eina lalut uvin ahi. Hiche phatsung in boina chom chom jeh in Camp chom chom leh High Court chan’a dellut ngai ahi naho nom kasah lou jeh in  Member khat pou pou injong Chairman dinmun atuh thei ding’a Government in daan asemdoh jeh in Langkhanpau leh Khaipao phansah ding in Ministerial Committee chan gei in kana sei in ahi. Ahin loi ho focus jeh’a Chairman dinmun katuh khah hi keima lhin jou leh thep na jeh ahipoi ati.

Chairman mopoh na kum khat leh akeh sung kapoh sung in mipi ngaichat na jouse tong doh thei lou vin um jong leng kei masang’a Chairman mopoh na neiho sang in na akitong doh jo in chuleh tukum bul akipat Covid-19 leh Council sung thu’a boina aum jeh’a natoh ho jong lungdei bang tah’a kitong theilou ahi ati. National Disaster Management Act 2015 dungjui’a Council thunei najong kangah ahitoh lhon’a bolthei um sun District Administration, Medical Department leh Civil Society Organization ho nungthop’a pan kila ahi. Hiche nading’a khopi sung mun poimo leh lamlen dung’a sanitization chepi’a Fire Department aki kithopi in chuleh Sodium Hypochloride jong litre 7,500 tobang aki kapdoh in ahi. Chief Medical Officer, Medical Superintendent, District Hospital chuleh  Community Quarantine Centre mun ho’a face shield, face mask, hand gloves leh hand sanitizer tamtah Council in akipedoh in chuleh Isolation Ward ding’a Dk. Lakh 1 peh ahi naban’a CCpur District Hospital ah waiting shed jong Council in asah ahi tin aphongdoh in a hi.  Council vetkol nanoi’a um Quarantine Centre jouse’a sprayer, disinfectant, hand sanitizer leh apoimo dang dang jong akipe in ahi.

ADC Chairman kum khat leh akeh kapoh sung in khopi sung suhtheng natoh kisai’a nen ho pohdoh nading Sanitary Truck 4 akicho thah in chuleh nulla dung’a nen akiboh nalou na ding’a wire netting akibol in hiche naban’a simlai tamtah in phatchom na anei thei nading ngaito na in District Library jong Council in akisem pha in lekhabu tamtah jong akikoibe in ahi. Hiche nachung chon’a New Bazaar ah Community Police Centre jong semdoh ahi naban’a nupi ho ding gelkhoh najal in Bus Parking vel’a bazar buh ding akisah peh in ahi. District Council panlah na’a State in aphal dungjui in kho kimkhat’a School aum thei na ding’a phalna peh ahi dungjui in District sung’a school 7  sahthah na natoh achelhah jing lai ahi. Chuleh thu poimo seikhom dia Executive Member semdoh ahi dungjui’a sitting a poimo leh seikhom’a thulhuh na akilah bang bang’a toh molso’a um ahi in mikhat bou in lamkai hina atuhden ding kiti ahithei pon ahi tinjong aseibei.

Forest Minister Awangbow Newmai in gam huhna dinga pan lahkhom a sorkar tosot dinga kouna nei

Imphal, June 16(ET): Forest, Environment and Climate Change Minister Awangbow Newmai in Tuesday nikhon Loktak Lake, Keibul Lamjao National park, Sendra avil in, project chelha ho chule akimvel a khonunga umthei ding project ho vetlhahna aneiyin ahi.

Loktak Development Authority Chairman L Susindro, Manipur Pollution Control Board Chairman L Radhakishore, Naoriya Pakhanglakpa MLA S Subhaschandra Singh le Thanga MLA T Robindro Singh toh Minister pa kilhon ahi. Northeast pumpi a dinga ‘freshwater lake’ lenpen hitobang Loktak Lake gamsung in inei uhi vangphat umtah ahi, tin Minister pa in aseiyin chule hiche hi gamsung mihon sangtah a aphatchompi ahi, ati.

Amasapen a Lake huhna dinga pan lahkhom angaiye tihi ihetthem masat diu ahi. Sorkar in koima adouna a na atoh ahipon, Loktak lake huhna dinga pan lahkhom ngai ahi, tin aseiyin ahi. Phumdi a kisa inn (hut) hohin twi asuhboh ahijeh a lahdoh ngai ahi, ati. Tourism khantouna ding, nga man miho kivahna ding hihen lang lamchom chom hijong le Manipur khonung hi Loktak Lake a kingam ahi, tin aseiyin chule  Loktak lake huhna dinga mipin sorkar atosot dinga temna jong aneiyin ahi.

State animal Sangai chenna Keibul Lamjao National Park (KLNP) a Sangai kitha hi apet pet a ngah ding ahi, tin aseiyin, sa venna dinga mipin joh pan alah ngai ahi, ati. Sorkar in mipi tosotna beiya gam le go ahuh theilou ahi, tin aseiyin chule ei kithopi dinga Centre chunga bou kingap ding ahipon, gamsunga um resource tamtah hohi sumang louva revenue muna a neiding ahi, ati.

Mipin sorkar atosot a chule khonung pha semna dinga pan alah phat joh ahi, tin aseiyin chule Loktak Development Authority (LDA) in Lake suhthengna a pan alah jing chule Manipur Pollution Control Board (MPCB) panlahna ho apachatna thu jong aseiyin ahi.

Minister Awangbow Newmai lamkaina ministerial team hon Loktak Lake avil uvin, Yanggoi Maril, Thanga chule Chaoba Ching viewpoint a lake dinmun inspection abol uve, tin LDA Chairman L Susindro in aseiyin ahi. Ahung lhung ding phat a hi ngaman mihon nga mat nadinga electric current aman louna ding uva dan (act) thah kipodoh ding, hiche dungjuiya, nga matna a dan dihlou mang ho gotna khoutah kipe ding ahi, ati.

Phumdi suhtheng ding chungchang a, natoh hi July lha teng machine thah kila a kipan ding ahi, tin aseiyin chule tu le tua lake hop 20 suhthengna natoh chelha ahi, ati. Phumdi ho ‘cutting process’ hi Maibam Phumlok a kipan ahitan, hiche mun a phumdi hi asa dan feet 14-15 lhing ahi. KNLP kom a phumdi suhthengna dinga sorkar henga proposal kithot ding ahi, tin aseibe in ahi.

Loktak lake amun a vetlhahna akinei hi Lake athupi dan vetsahna ahi, tin MPCB Chairman L Radhakishore in aseiyin chule Covid 19 protocol jui pum a tukum project umding ho chepi thei nadinga kihouna ding jong ahi, ati. Minister hon gamkai huhna dinga pan alah diuvin temna aneibe in ahi.

Minister pa hi achena a Forest Department PCCF K Angami, Additional Chief Secretary MH Khan, LDA Project Director L Bhagaton Singh le LDA official hon ajui ahi.

HSLC exam a pachanna neiho CM in kipapi

Imphal, June 16(ET): Board of Secondary Education, Manipur noiya High School Leaving Certificate Examination, 2020 a position holder holeh hiche exam na a lolhing jouse Chief Minister N Biren Singh in akipapi thu aphong in ahi.

Aman aseina achun chapang ho lolhin theina hi amauho kihambolna chung a minu mipa chule gurdian ho pan hatna jal ahi in atohgim man uh tua hi gaso phatah alothei uh ahi ati. Alangkhat ah a lolhing louho jong ki thaset louhel a panthah alah uva kitilkhou a chule lunglhalou hel a pan lakit ding in jong asei in ahi.