India sorkar leh NSCN-IM in hemkham kinoptona asem Manipur gam a kichepi...

India sorkar leh NSCN-IM in hemkham kinoptona asem Manipur gam a kichepi lou ahi, tia CM in House a sei Delhi khopi Maujpur a kinotona a police 1 panna a mi 4 thi; gari le inmun meiya kihal Kuki Black Day song kiphut chunga thu kijih suhmang ding a Tangkhul kiloikhomna hon sei NSCN-IM hon Kamjong District, Phaimol khomi khat chung’a khutlha; Kamjong Kuki CSOs hon demna sangtah nei US President in India ahung viljeh a Bhopal leh Indore a kiphinna um Class XII exam a ‘BJP symbol’ thu akidoh jeh a thunoh baotamna um House in Dk. cr. 28,551,532,881 ‘demands for grants’ sagi phatsahna nei April 1 a kon Census 2021 kila pan ding ahi tia CM sei NSCN-IM ho jao hih jong le Centre in Naga Peace agreement a soi kai dinga kigotna nei Class XI exam a Question paper ‘leak’ ahi thu a thukholna kipan vahding ahitai: Education Minister

429
0
SHARE

India sorkar leh NSCN-IM in hemkham kinoptona asem Manipur gam a kichepi lou ahi, tia CM in House a sei

Imphal, Feb 24(ET): India sorkar leh National Socialist Council of Nagalim (NSCN-IM) in hem kham kinoptona asem hin Manipur gam ahop lou ahi, tin Chief Minister N Biren Singh in assembly session a Congress MLA K Ranjit thusei donbutna aneiyin ahi.

State home department in Assam Rifles hon amat a Manipur police henga apehlut NSCN-IM thingnoi khat gangtah a alha chungchang hilchenna apeh diuva Congress MLA K Ranjit in thudoh anei ahi’in, state police hon ipijeh a lamlen khah a kiphinna bol ho nomang ding go louva thipbeh a avet a, thil umchan video alah uham, tia jong thudoh anei ahi.

CM Biren in adonbut na a, athu hi ‘judiciary’ khut a um ahijeh a state sorkar in pan alah lou ahi, tin aseiyin chule khonung teng hitobang case ho a Assam Rifles hon operation abol nauva Manipur Police ho apansah diuva kisei ding ahi, ati.

Assam Rifles hon amat a State police henga galmanchah beiya apehlut thingnoimi pa hi court order jouva bail a kilhadoh ahi, tin aseiyin chule gamsung gamgi thu pehdohna aumpon, hemkham kinoptona jong gamsunga kichepi lou ahi, tin kitepna aneiyin ahi.

State police hon atohding tong louva Senapati district a bandh bol ho video ala uve, tia ngohna aumthu kholdinga aseiyin ahi. Lamlen a kiphinna bol ho nomang ding agot nauva J Khongsai kiti sepai khat kitongkha ahi, tin aseiyin chule sepai hohin angaina a dinmun umdan dungjuiya action alah ahi, ati. “India sorkar leh NSCN-IM in cease-fire kinoptona asem hi Manipur gam a kichepi lou ahi’in, chule sepai hon Tamenglong, Chandel leh Ukhrul a camp sah ding go a NSCN-IM ho tu masanga jong ana lamtin ahi”, tin Home in charge jong hi a CM in aseibe in ahi.

Achesa February nisim 20 nikho a Senapati a NSCN-IM thingnoi holeh Assam Rifles ho akinoto jouva thilsoh umho chungchang toh kisaiya K Ranjit in thudoh anei ahi. Niseh thuso a kisei dungjuiya Captain khat lamkaina a AR team hon NSCN-IM ho camp a operation abol nauva NSCN-IM thingnoi hon abot lhuh uva, service weapon alahpeh u ahi, tin Ranjit in aseiyin ahi. AR sepai hon February nisim 21 ni a Senapati district heaquartr a kon NSCN-IM Town Commander khat amat uva, police khut a apehdoh u ahi’in, thingnoimi pa hi Lamphel police a achon u ahi. Alangkhat a NSCN-IM toson hon AR ho gari asuhset uva chule meiya jong ahal u ahi. Anikho ma ma a NSCN-IM thingnoimi pa CJM Senapati district chenna, Imphal a apui uva, bail a alhadoh u ahitai. Thuso dungjuiya thingnoimi pa hi state police hon Senapati chan escort abol u ahi, tin Ranjit in ngohna aneiyin, ajeh jong dohna aneiyin ahi.

“State police hon thingnoimi pa escort abol pouvin chule ama kilhadoh le kilhadoh louding hi judiciary kigel lhahna ahi’in, charge sheet dungjui ahipoi”, tin CM Biren in aseiyin chule thilsoh a document ahilouleh galmanchah akiman umlou ahi, tin aseibe in ahi.

 

Delhi khopi Maujpur a kinotona a police 1 panna a mi 4 thi; gari le inmun meiya kihal

New Delhi, Feb 24: Northeast Delhi a Monday nikhon CAA toson holeh CAA doudal ho kahna kinahna thilsoh aumin, kiboina a head constable khat pan nan mi 4 athi e, tin Delhi Police hon asei uvin chule mi tampi jong akisukhan ahi.

Thilsoh a Deputy Commissioner of Police khat jong akisukha in, hospital a pohlut ahitai. North East Delhi noiya um Bhajanpura munvel a petrol pump khat jong meiya ahal uvin, chule gamkaiya dinmun vetup dinga Rapid Action Force (RAF) company 2 panna a CRPF company 8 leh women security personnel company khat in duty abol ahi.

Hiche masanga kiphinna bol hon Jaffrabad leh Maujpur a inmun ni meiya ahal u ahi’in, CAA thu a kinahna thilsoh aum ni-ni channi ahitan, song a jong kisepto u ahi. Chandbagh area, Jaffrabad a jong boina um ahi. North east district noiya um mun 10 a Section 144 akikoi tai, tin Delhi Police hon asei uvin ahi.

US President Donald Trump New Delhi khopi a ahung lhun nidan phabep masang thilsoh ahi. Senior police officer khat in, thilsoh a Assistant Commissioner of Police, Gokulpuri office a um Ratan Lal kiti constable khat athi e, tin aseiyin ahi.

Police hon kiphinna bol ho nomang nadinga tear gas leh mol aman u ahi’in, official thulhut dungjuiya kiphinna bol hon amun dellut a fire tender khat jong asuhset u ahi. Boina aumjeh a Delhi Metro in Jaffrabad leh Maujpur-Babarpur station lutna leh potna ho akhah tauvin ahi. ‘Jaffrabad leh Maujpur-Babarpur lutna leh chedoh na kikhah ahi. Hiche station a train kinga louding ahi”, tin Delhi Metro Rail Corporation (DMRC) in aseiyin, nidan 24 val kha dinga thupeh um ahi.

Delhi Chief Minister Arvind Kejriwal in kinahna thilsoh adei louna thu aseiyin ahi. Delhi police hon North East Delhi a ‘law and order’ vettup nadinga pan alah diuva thuhilna kipe ahi, tin Governor Anil Baijal in aseiyin ahi. Sunday nilhah a jong Jaffrabad kom a CAA deilou holeh atoson ho kikah a kinahna thilsoh um ahi’in chule Jaffrabad leh mun dang dang a CAA lahdoh ding thumna a tamtah in achom chom a toumun kiphinna abol ahi.

Boina asobe louna ding a Delhi mun 10 a Section 144 kikoi

New Delhi, Feb 24: Anti CAA jeh a boina anaso jeh chun North East Delhi hopsung a mun 10 ah Section 144 gamsung vaipo hon akoi tauvin ahi. Delhi Police in asei nauva chun tuni a boina ho chu Maujpur, Kardampuri, Chand Bagh chule Dayalpur ho ah akhoh deh in thuso mihon jong mipi ho sulung hang theiding solouva gamsung a chamna aumvah theina ding a pan lakhom ding in asei in ahi.

Tuni thilsoh achun Constable khat in thina atoh in chule Deputy Commissioner of Police khat jong aki tongkha in ahi. Gari phabep, dukan chule chenna in ho jong akibulu in boina ana sousang lheh in ahi.

 

Kuki Black Day song kiphut chunga thu kijih suhmang ding a Tangkhul kiloikhomna hon sei

Ccpur, Feb 24(ET): Tangkhul Naga Aze Longphang le Tangkhul Naga ZOngsho Longphang ho in Manipur a um Kuki mite ang a Churachandpur Kuki Inpi lentol a Naga gal a thina ana toh ho hetjing na ding song kiphu na chung a thucheng ‘Kuki Genocide by Tangkhul led NSCN-IM’ kiti suhmang ahi na ding in temna ahin nei uvin ahi.

Hiche song ho chu Black September kum 25 lhinna toh kisai a ana kiphut ahi. Kiloikhomna na teni in hetsah na ahin neina uva hitabang thucheng hi daan noi a jong phalna umlou ahi dan le Naga sung a Tangkhul nam mite le Kuki nammite kikah a muntin a boina aso sah thei ahi dan tahlang na ana nei uvin ahi. Hitabang tah a lhangphong a natoh na kinei hin Naga le Kuki kikah a boina aum sah thei kit ahi dan le, gal chu Naga-Kuki boina ahi a nam lhendoh chom le ngoh ding chom aum loudan jong hetsah na ahin nei uvin ahi.

Manipur Naga Baptist Church lamkai ho in song chung a thil kisun toh kisai a World Baptist Alliance ang a thilsoh chu Naga-Kuki boina ahi dan  hetsah na ana nei utoh lhon a Tangkhul nam achom a kilhendoh na hi dan toh akito lou ding dan le adih lou ding dan jong hetsah na ahin nei uvin ahi.  Khonung a nam teni kikah a boina hungso kit nalou ding a hiche thucheng kisun suhmang ahi na ding a kiloikhomna teni in hetsah na ahin nei uvin ahi.

NSCN-IM hon Kamjong District, Phaimol khomi khat chung’a khutlha; Kamjong Kuki CSOs hon demna sangtah nei

Imphal, Feb 24(ET): Tunin Kamjong District, Phaimol kho mi Seikhohao Haokip(25) S/o Mangjathang Haokip chu NSCN-IM hon ana vouvin, gihna khoutah jong ana neijun ahi. Amahi hin Kenbo bike (Myanmar motorbike) asemna akon tuni nilhah lam nidan 3:00 vella NSCN-IM hon akoudoh uva KNA toh link neiya ngohna anei uva achung’a khut alhao ahi jong akiti.

NSCN-IM hon Seikhohao avoh jou uchun lekha khat ana peuvin ‘Seikhohao chunga mopo le adang dang hon nahet diu chu amahi thu akipeh kit kah’a pampot louding ahi. Hiche hi security matter jeh ahin, ijemtia akisei palkeh’a akisei angailoule achunga action khoutah kilading ahi’ tin lekha a chun akijih in ahi.

Hiche thilsoh to kisaiyin Eastern Kuki Chief Association le KSO Kamjong jaonan Kamjong District sunga Kuki civil bodies hon thilsoh sangtah demna ane uvin ahi.

Hitobang thilsoh chunga Kamjong Kuki CSOs hon tule tua Manipur Government chunga tahsan kinei ahi tolhonin Seikhohao Haokip kivohna chunga thudih a thutan aneidingin ngehna aneijun, thilse asobe na loudinga gangtah a pan alahdiuvin jong ngehna uvin ahi.

Kamjong Kuki CSOs hon jong law enforcing agencies thalchoi gamvah hon alam louva milham chunga hitobanga chonval kibol ho khoutah a avettup diuvin ngehna aneijun ahi.

US President in India ahung viljeh a Bhopal leh Indore a kiphinna um

Bhopal, Feb 24: United State President Donald Trump in India gamsung ahung phah toh lhon in achesa 1984 kum a Bhopal a hui phalou hiplut jeh a thi le manna toh lah a ana damdoh kipunkhom hon kiphinna anei uvin ahi. Rachna Dhingra in aseina achun American multi-national company, Dow Chemical hon Bhopal a athil semna mun uh December 2-3, 1984 jan a hui phaloh a potdoh jeh a mi 3000 in thina anatoh uleh midang lakh 1.2 tobang atoh khah jeh a Bhopal district court in Dow Chemical hiche chungthu a akou vang uvin US Department of Justice in ana donse pouvin hiche chungthu hi kilhunglhai pi louhel ahi ati.

Indore ah local organisation hon Regal chauraha mun ah human chain sem in kiphinna abol uvin hiche achun State advocate General lui Anand Mohan Mathur in jong pan ala in ahi. Mathur in thuso miho ana aseina achun Trump in India ahung ahung phah jeh hi Gujarat gammi American citizenship neihon tukum November lha leh US Presidential election a vote apeh theina ding uva hung ahibou in chule US ho manchah johthei nading a hung ahi ati.

 

Class XII exam a ‘BJP symbol’ thu akidoh jeh a thunoh baotamna um

Imphal, Feb 24: Class XII Manipur state board exam a Political Science paper a thudoh phabep opposition party hon Sunday nikhon demna sangtah anei uvin ahi.

Council of Higher Secondary Education of Manipur (COHSEM) in abol class XII political science exam a kinel baotamna thei thudoh phabep um ahi. Twitter mang hon asodoh lim khat a hi India Prime Minister masapen Jawaharlal Nehru phatlouna (negative trait) phabep asei diuva thudoh um ahi.

Chule question adang khat a simlai hon state leh Centre a sorkar sem a BJP election symbol ajih diuva kidong ahi’in, thudoh teni hi social media a tua kiseithang ahitai. Angellica Aribam, Secretary, National Students’ Union of India (Congress party student wing) panna a social media mang hon athu hi atahdoh u ahi.

Question number 32 a hi Bharatiya Janata Party election symbol lim jih dinga kiseiya, hiche question hin ‘marks’ 4 apoh ahi. Question number 39 a ‘Gamsung semna dinga Nehru panlahna ahoilou li seiyin kiti a, hiche hin jong marks 4 apoh ahi.

Congress legislature leh MPCC spokesperson Kh Joykishan in hitobang thudoh hohi simlai ho lungthim a politics khumna ding ahi, tin aseiyin chule hitobang thudoh aneijeh vet angaiyin, ipi syllabus a kon kila ham het ngai ahi”, ati. President, Manipur University Teachers’ Association (MUTA), Maibam Ranjit Singh in hitobang thudoh hohi doh louding ahi, ati. Hitobang thudoh hi question sem hon koi jong leh moderator in apan sah louding ahi, tin aseiyin ahi.

CPI national executive member leh MLA anahi Moirangthem Nara in question kisem dan hin politics toh kisaina anei avetsah ahi, ati. Chule BJP Manipur unit general secretary Nimbus Singh in Nehru chungchanga thudoh hi themjilna toh kisai ahi, ajeh chu amahi gamsunga dinga prime minister masapen ahi, tin aseiyin ahi.

Nehru in India semna dinga pan alah ahijeh a ama lamkaina noiya kivaipohna hi aphatna leh aphat louna umding ahi’in, aphatlou na akidoh hi akhohpoi, tin aseibe in ahi. Ahivanga hiche hi doh louding ahi, question sem hon ahoilou abol ahi, tin aseikit in ahi. Alangkhat a veteran politician Okram Joy in question kisem dan hi themjilna politics bolna a kiman na ahi’in, hiche hi themjilna chule democracy dinga thilpha ahipoi, tin aseiyin chule themjilna a politics akibol hi aphatna sohlou ding ahi, tin aseibe in ahi.

 

House in Dk. cr. 28,551,532,881  ‘demands for grants’ sagi phatsahna nei

Imphal, Feb 24 (ET): 11th State Assembly 10th Session ni sagi channi a House in kilungtoh tah in dangka crore 28,551,532,881 lhing Demands for Grants sagi phatsahna anei tauvin ahi.

Phatsahna kinei thumna hohi Police a Rs. 2341,95,94,881, Agriculture- Rs 387,75,17,000, Vigilance & Anti- Corruption Department – Rs. 6,23,83,000, Fire Protection and Control – Rs. 22,13,70,000, Jails – Rs. 31,76,72,000, Home Guards – Rs. 21,35,10,000, Fisheries – Rs. 40,34,86,000 ahi.

Khudengthabi a IPS officer numei khat chunga AR sepai khat achonval e, tia ngohna thilsoh um chungchang MLA K Ranjit in apohdoh CM Biren in adonbutna’a, akisei sepai pa hi tua ‘departmental enquiry’ noiya um ahi, tin aseiyin ahi. Opposition MLA Md. Abdul Nasir thudoh House lamkai in adonbut na’a, gamsunga drug factory aum’e, tin aseiyin ahi. Police department in hitobang factory ho mat doh nadinga pan alah jing ahi’in, themmona nei ho hi court in athilboh toh kitoh a gotna apeh ding ahi, ati.

Gamsunga kani lei bol atam cheh cheh thu a CM in thinglhang gam a kani lei kibol kihol jing ahi, tin aseiyin chule NAB, Manipur Police, Assam Rifles leh Excise department hon kitho a kani lei suhmang nadinga campaign abol ahi, ati.

Chule Tharoijam, Imphal West a mipin mi avohlih thu a ginmo mi 6 akiman tai, tin MLA Abdul Nasir thudoh donbutna aneiyin ahi. Themmona neiho toh kinai insung miho tilou court complex a midang alut ding kiphal louding ahi, tin aseibe in ahi.

Moreh a SDPO quarter panna a police department a infrastructure chom chom hohi aganna thei pen a angai khoh ho a kipan a aban ban a kibol ding ahi, tin MLA Chaltonlien Amo thudoh donbutna aneiyin ahi. Moreh hi Act East Policy kichepi na mun ahijeh a thil kisem leh kisa hohi abon a hoitah a (quality neitah a) kisem ding ahi, tin CM in aseiyin chule Imphal Moreh lamlen a police/security out-post kihon be ding ahi, ati.

MLA RK Imo Singh in Bengal Eastern Frontier Act chungchang a thudoh anei Biren in adonbutna’a, ILP gamsunga kichepi ahitai, tin aseiyin chule tua hi state sorkar in Base Year seilhah nadinga pan alah pet ahi, ati. Hiche chungchang a ngaidan kipe ho akilamto e, tin aseiyin chule Mao, Jiribam, Moreh leh adang dang a gamsunga dan dihlouva hung lut ho kholna ding check point kihong ahi, ati. Gamsung mi dihtah ho hetdoh theina dinga state sorkar in gamsunga NRC achepi ngai ahi, tin jong aseiyin ahi.

Chomkhat jouva House a The Manipur Professions, Trades, Callings and Rmployments Taxation (Ninth Amendment) Bill, 2020 apodoh uvin ahi.

 

April 1 a kon Census 2021 kila pan ding ahi tia CM in sei

Imphal, February 24(ET): 11th Manipur Legislative Assembly ni sagi channi a Chief Minister N Biren Singh in 2021 Census kilahna hi tukum April nisim 1 a kon kipan ding chule hou (religion) jong record kibol ding ahi, tin MLA AK Mirabai Devi leh Kh Joykishan Singh in Census 2011 a Sanamahi hou pansah angaidan thu asei adonbutna a aseiyin ahi.

House in hiche thu a achesa 2003 kum a kilolna anei ahitan, census a Sanamahi hou apan sah nading a Registrar General of India henga lekhathot apeh ahi, tin CM in aseiyin chule gamsunga um mihem lakh ni tobang in Sanamahi hou ajui ahi, ati.

Art and culture minister anahi Dr M Nara Singh Chairman hina a House Committee in July 25, 2003 kum a report apeh’a chule Census Report a Sanamahi hou pansah ding chule Census Operation a hou hi achombeh a code number apeh dinga India sorkar henga ngehna neidinga House in kilolna anei ahi, tin Joykishan in achesa thil umdan aseiyin chule House in kilolna atuhchah dinga temna aneiyin ahi.

MLA Joykishan in ngaidan apeh akisang in, hiche chungchang a angaicha ho kibol ding ahi, tin House lamkai Biren in aseiyin ahi. Zero House sunga Education Minister Th Radheshyam in Renant Christian School a simlai numei tua RIMS Psychiatrict ward a kijen nu a dinga thilchom kigon peh ding ahi, tin aseiyin ahi. Numeinu hi HSLC exam ni ni channi a flying squad team hon amat ahi.

MLA Kh Joykishan Singh leh MLA S Rajen Singh in Zero Hour a hiche thu apohdoh in, sorkar in simlai nu in aban exam ho abol theina dinga pan alah a chule Praja High School, Lamsang a lhung thilsoh a panla ho chunga action alah diuva ngehna anei lhon ahi. Director (S) in simlai nu dinmun akhol ahi’in, numeinu hi natna hi ol cheh cheh ahitai, tin aseiyin chule Flying squad team hon hahsatah a atohdiu atoh u ahi’in, mi khel a tou case tamtah um’a chule tuchan geiya mi khel a tou case 20 hi report kibol ahitai, tin aseibe in ahi.

Simlai numei nu hin admit card a alim kibehna a mitbeh akibeh lou chule exam a akibeh thu flying squad hon thudoh anei ahi. Hiche chungchon a simlai nu hi pilhing loulai chule admit card a kipe asoi toh tua asoi kitoh lou ahi’in, team hon apen nikho adoh nau jong anikho dihlou apeh ahi. Hiche jouva exam hall pam a apuidoh u ahi, tin simlai nu kimat dan chungchang thu aseiyin ahi.

Nu le pa chule insung mihon chate hon marks hoitah tah amu nadinga alungthim asuhgim lou dinga Education Minister Radheshyam in temna aneiyin, themjilna pha joh pehding ahi, ati.

 

NSCN-IM ho jao hih jong le Centre in Naga Peace agreement a soi kai dinga kigotna nei

New Delhi, Feb 23: NNPG in thuso miho heng a asei nauva chun tuni chun Naga peace talk toh kisai in Naga National Political Groups (NNPGs) a working committee phatbep in Naga Peace talk toh kisai a Interlocutor chule Nagaland Governor jong hi RN Ravi chu New Delhi a aki mupi uvin ahi. Chule Government of India (GoI) hi NSCN-IM ho hiche peace talk a jao hih jongleu suoi kaiding a kigo chaisa ahitau ve ati. GoI in hiche peace talk chungthu a NSCN-IM hon seilhahna adeilou jeh uvin athu akaisau be ujong ahethou uvin IM ho jao hih jongleu suoi kai jeng theisa ahidan asei in chule Naga mipi hon chamna anei uh ahi in hiche thu phatsottah akon kiboipi hi Centre in jong asuh navah nom ahi thu asei in ahi.

Thuso in aseibena achun Nagalang gamsung bouva ‘Bicameral Legislature’ umding in asei in chule mundang a naga umna ho a ‘Autonomous regional council’ umding in asei in chule naga mi ahi kihettheina passport jong sem ding thu jong asei uvin ahi. NNPG a working committee hon aphatsah bang uvin GoI in jong aphatsah khat chu 2017 Nov 17 nikho a Framework agreement (FA) a suoi kikai chu Preamble hi FA sung a umlou ahi thu asei in chule FA hi Preamble sung a umdehlou ahi. Thulhut in aseibena achun kihouna ho akichai leh GoI hi suoi kaiding a kisachai sa ahitan hinlah Naga mipi ho kholna jeh in stakeholders ho ngaidan jong ki ngailha ding ahi thu asei in ahi.

Tuni aki muto nauva chun NNPGs hon Manipur, Arunachal Pradesh le Assam gamsung a Naga umho a ding in jong aseitha uvin kinopto louna umlou hel in akichai uvin chule March lha leh khatvei kimuto kit ding in akivailhah uvin ahi.

 

Class XI exam a Question paper ‘leak’ ahi thu a thukholna kipan vahding ahitai: Education Minister

Imphal, Feb 24(ET): Education Minister Dr. Thokchom Radheshyam Council of Higher Secondary Education Manipur (COHSEM) in abol Class XI exam a question paper ‘leak’ ahi thu a sorkar panlahna ho Babupara office mun a thuso miho akimupi na a hilchenna aneiyin ahi.

Director Education (S) Th Kirankumar chairman hina a achesa February nisim 19 nikho a mithum panna Enquiry Committee kisemdoh ahitai, tin Minister pa in aseiyin chule Question paper leak ahi chungchang a Cyber Crime, Crime Branch a criminal case a FIR jihlut ahitai. Thukholna umding, thilsoh a themmona neiho kiman vahding ahitai, tin aseibe in ahi.

“Society pha sem nadinga eiho ikitah uva chule lungthenna leh lungdih na ineiyu masat ngai ahi. Hinkho hi exam sanga thupi jo ahi’in, mikhat in exam 10 vei abol thei chule lekha helou mikhat jong khonung a mi lolhing tah hithei ahi”, tin Minister pa in aseiyin ahi. Exam bol dan ahoicheh nadinga ngaidan akilem in, mun a ong jing’e,  ahivanga tuhi nu le pa tehon themjilna apeh dan seikhom phat joh ahi hi vangset umtah ahi, ati.

Nu le pa leh jilkung hon chate ho marks hoi nadinga alungthim asuhboi loudiuvin temna aneiyin, exam a mi a vet leh guh kiti ho nga phat ahi, achuti louleh khonung mang thei ahi, ati. Class XI Exam a subject 5 a question paper hi social media a ‘leak’ ahi, tin aseiyin, hiche jeh a gangtah a exam bol nading phat khel dinga thulhuhna um ahi, ati.

COHSEM in ama ama police station leh school a athot pack kibol question paper hohi COHSEM henga apehlut diuva thuhilna um ahi’in, vangset umtah a exam kibol loulai subject a akipelut question paper hohi akihongsa um ahi. Dan dungjuiya question paper hi exam kipat ‘minute 45’ masanga bou kihong thei ahi, ati.

Press meet a Commissioner Education (S) Shri T. Ranjit Singh, Chairman COHSEM, L. Mahendra Singh, Secretary COHSEM Ch. Biren Singh chule COHSEM official leh staff hojong apang uvin ahi.