India in Chinese apps 59 ban abol jouva PUBG jaona a mobile...

India in Chinese apps 59 ban abol jouva PUBG jaona a mobile apps 118 ban bol be kit

418
0
SHARE

India in Chinese apps 59 ban abol jouva PUBG jaona a mobile apps 118 ban bol be kit

New Delhi, Sept 2: India in Wednesday nikho in mobile apps 100 val PUBG jaona in banned abolbe kit tan ahi. Hiche banned kibol hi tumasang jep a Chinese apps 59 banned ana kibol ban jom a ahin bol’u ahi. Hiche tohgon hung um hi tulaitah a Ladakh mun a China leh India dinmun ahung sousang toh kilhon a security lampang toh kisai a hung kibol ahi.

India ministry of information and technology tohguon na noiya hiche 118 apps hohi athah beh a banned kibol ahidan ministry in ahin phongdoh un ahi. Hiche banned kibol ho hi India gamsung huhdoh na ding leh kiven na dinga kibol ahidan jong aphong doh un ahi.

Athahbeh a banned kibol apps ho lah a tulaitah a miche dom minphah thei ho ahi leh, Baidu, Baidu Express Edition, Tencent Watchlist, FaceU, WeChat Reading leh Tencent Weiyun, chuleh PUBG Mobile leh PUBG Mobile Lite ahi, thulhut kimu dungjui in tule tu hin India sunga mihem PUBG a kichem 33 million apha in ahi chuleh apps lah a download kibol lah a asangloi khat jong ahi tan chuleh niseh in mihem 13 million in aman khat jong ahi.

Ministry in aseibe na ah apps tamtah ahilou lam tah a kimangcha ahidan jong complaint kimujing ahi dan aphondoh naban a data tamtah jong India pam langa thotdoh leh guhdoh jing ahidan aseiyin ahi. Hiche data kithotdoh leh guhdoh a um ho hin India security lampanga boina asodoh sahthei ding dinmun a um ahi jeh a tohgon neilou a khoh ahi dungjui a kibol ahi tin ministry chun aseiyin ahi.

Home ministry’s cybercrime centre injong hitobang gamsung susethei mobile apps kikhah ho adeisah dan jong ana phuongdoh kit un, India chamlhatna suse thei mobile apps ho suhmit a aum jing ding hi angaikhoh pen khat ahi dan jong aphong doh in ahi.

Hiche thulhuh na hi Ladakh mun a China sepoy hon India gamgi a boina ahin sem diu dinmun a um ginmo ahung hitoh kilhon a hung kibol ahidan sorkar akon a thulhut chun asei in ahi.

Ministry of Home Affairs nuoi a um Indian Cyber Crime Coordination Centre injong hiche apps ki banned ho aphatsah dan thu aphongdoh un chuleh kinah kibao naleh boina sosah thei apps hojong suhtang thei jouse suhtang ding adeisahna thu aphongdoh un ahi.

Hiche tohgon hin gamsunga adeh a cham leh lungmon na dei ho dinga thilpha ahin lhut tei ding adeisah dan aseiyun ahi. Hiche tohgon hin gamsung dam nading leh khantou machalna ding joh ahi kibol ahi ati.

India sunga China toh boina ahung khohset toh kilhon in achesa June lha chun Centre in Chinese apps agom in 59 banned anabol nalah a minphah thei TikTok, UC Browser leh WeChat jaona in apps ana khah un, hiche banjom a athahbeh a apps agoma 118 ahin khabe kit’u ahi.

Indina leh China gamgi Galwan valley mun in June lha sung chun India sepoy 20 in thina ana toh un chuleh China sepoy phabep jong ana machang un ahi.

India PUBG MOBILE series for 2020 in total prize pool a ₹ 55 lakh chunglam ahi hiche na India leh International player jong ajao in ahi. PUBG hi akichem nomtah ho dinga ngah ding hahsa tah khat ahina bannah, banned hung kibol hin khangdong tamtah lunggel chombeh a ahin khelsah tei ding in aum in ahi.

Xxxxxxxx

COCOMI in Integrity hatah a kichepi ding, Atum a namkhat lungholna a chamna kibol kipom lou ding ahi tia sei

IMPHAL,  Sept 2(UNA): Ahunglhung September 2020 tengleh Government of India leh NSCN-IM in framework agreement aneina ding thu a Coordinating Committee on Manipur Integrity (COCOMI) in gamsung kesah ahilou nadinga dimun phatah a kiding jing ding ahi dan aphongdoh in ahi.

Hiche framework agreement hin Manipur gamsung sukeh thei ding tohgon Government of India in achepi theilou ding, Naga touphana gamsung atumbeh a kivaipohna hihen, chuleh Manipur huopsunga Naga ho atum a kivaipoh nading thu hijong leh Naga gamvahmi ho lunghol na a kinopto na abolthei lou ding ahi tin anoplou nau leh COCOMI hi ipi lamdol hijong leh gamsung venbitna a kinei jing ding ahi tin phondohna anei yun ahi.

Naga flag hi Nagaland sung bou a um hen. Koima chan thuneina leh Manipur Legislative Assembly suhboi da hen ti ahi. Government of India leh NSCN-IM hin achesa kum 23 kihouna ana nei tauvin ahi. Chuleh framework agreement jong August 3, 2015, chun ana neipan tauvin thulhuhna dihtah ana ngahjing tauvin ahi. Hinla, kinopto na aum tah vang in boina jatchom cheh leh lunggel chomcheh ana umjeh in tuchan in ana nongkai den jing in ahi.

NSCN-IM langa kuon a North East gamkai phabep atokhah ho Manipur, Assam, Arunachal Pradedh ho ahi in, hinla hiche gamkai leh agam mipi akuon in tin le ha tho in anoplou nau leh deisah louna hi achesa 2015 apat in ahung ging doh jing kit in ahi.

Centre in NSCN-IM toh akikhah hi suh bulhit ding hi athabeh in September sunga suhbulhit ding ahin ngaito kit in ahi. Hiche toh kilhon chun Naga sunga kiloikhom na hon Prime Minister hengah NSCN-IM jaona hihen jaolouna hijong leh akinthei lam a suhbulhit ahi loi nadingin ngehna anei un ahi.

Manipur gamsung mipiten cham leh lungmonna um nadinga kihouchamna NSCN-IM leh Government of India in anei ding hi aki jahdo pon hinla Naga umna Nagaland sung bou hihen, gamdang suhkhah da henlang Manipur integrity suhkeh da hen tin COCOMI thuphon chun aseiyin ahi.

COCOMI thuphon in aseibe na ah achesa November 25, 2019 nikho a New Delhi mun a Union Home Minister Amit Shah toh COCOMI palai ho kimuto na a aphondoh banga Manipur sunga cheng mite lunggel kila masa ding ahi ana tin ahi. Hiche lhamonna thu hi Chief Minister N Biren, Education Minister Th Radheshyam leh Union minister of state for Home Affairs G Kishan Reddy masanga ana phondoh ahi hijeh chun centre government in athusei petchah hen tin COCOMI thuphon chun aseiyin ahi.

Namkhat lung hol na a chamna thu kisei nading a Manipur gamsung suboi thei leh suhkeh nadinga thil kibol jouse COCOMU in kidoudal ding gamsung mipi toh kitho a hatah a ki doudal ding ahi tin jong COCOMI thuphon chun aseibei.

Xxxxxxx

Kituptah a thudih le thutah a MCSCC (Main) exam 2016 bol ding’a CBI in MPSC thuthot nei

Imphal: Manipur Public Service Commission (MPSC) in  MCSCC (Main) Exam 2016, avel a bolding thulhuh anei laitah in Central Bureau of Investigation (CBI) in MPSC thuthot ahin nei in ahi. CBI apat thuthot chu alhangpi a MPSC exam bolding dan ‘suggestion’ ngen ahin, thudih le kitahtah a boldi thu jeng ahi.

Achesa Ellha 28, 2019 nikho a Manipur High Court in Judgement le Order abol na a hatah asei evaluation le tabulation’ thu chu CBI in aseikit in, and hiche evaluation le tabulation hi MPSC sub-rule xviii (26B) a jong umsa ahi dan jong thuthot chun aseiyin ahi.

Chukitle answer script hojong a check dia lom qualified lecturer le professors hon bou avet uva, chugoh hilou a answer script check ding jong ijat a check ham, itih nikho a check ham, itih nikho a an submit ham? tiho record phate a bolding CBI thuthot chun adeisah in ahi.

Chule candidate  koi chu koiham akihet nalou dia  answer script jong coding jong phate a bolding, chukitle adang MPSC jong invigilator lhendan, exam centre lhendan, question semding lhendan chule answer script ho koitup dan phate a avelvet kitding CBI thuthot chun aseiye.

Chuban a main exam teng jongle CCTV camera koiding jong ngaidan ape in, chukitle candidate le anu apa te ho contact number jong submit ahiding adeisah dan aseiyin ahi.

Xxxxxxx

Kum 14 numei chapang hon khat in suse; athi tobang a mudoh hi

Imphal, Sept 2(ET): Mayang Imphal Police Station  hopsung Irong le Heibong Makhong kikah lampi a kisuhset jou a athi tobang a kidalha kum 14 numei chapang nu chu tuni jingkah lampi a che le hon khohelou a um amu uva gangtah a RIMS apohlut u tolhon in damdoh thei ding in aumtan ahi.

Thilsoh lungnatpi Mayang Imphal mipi hon themmo chang ho gangtah a matdoh a dan dungjui a gotna pehding in ngehna anei ngal un ahi.

Langkhat a numei suse ho police hon nidan 24 sung a amatdoh lou le kiphinna sangtah chelhah pi ding in Manipur Muslim Welfare organization hon gihna aneitan ahi. Amahon majep jong chun hitobang ma hin Yairipok a numei khat suhset in ana um e, atiuvin ahi.

Thilsoh tolhon in Covid-19 natna khohsa lou in themmo chang dia ginmo ho hol ding kigo in tuni jingkah a pat chun Mayang Imphal mipi tamtah akikhom uvin ahi.

Hiche thilsoh toh kisaiyin tuni nilhah lam nidan 6:00 vel chun Police hon Md. Arish @Maja Khan (19) S/o MD. Shikander of Heibung Makhong Mathak Leikai ana man tauvin thilsoh kholna achepiuvin ahi.

Xxxxxxxx

Government in Motbung-Saparmeina kah lampi asemphat loidia TYA in ngehna nei

Imphal, Sept 2(ET): Kangpokpi district hopsung a Asian Highway 2 in ahoptha Motbung le Saparmeina kikah lampi hi district khatseh hilou in state pumpi in kingapna anei lamlhah na khat ahivang in asetdan hi che le va le na a din jong ahoi tapon gari lhai le ho le state pumpi le district mipi ding gelna a agangthei pen a semphat ding in Thadou Youth Association, Joint-Headquarter in tunichun government ngehna anei tan ahi.

Hitolhon a lampi semphat nading tohgon a district sung mipi, CSO le kiloikhomna ho kilungkhat tah a pangkhom ding in Thadou Youth Association chun temna jong anei e.

TYA in aseikitna ah hiche AH2 state ding a state dang toh kichot mat to na le state a dia neh le chah pohlutna lampi ahitolhon a agangthei pen a gelkhohna neitah a government in mipi ding gelna a asemloi ngai ahi, ati.

Xxxxxx

Manipur a Covid-19 case thah 125 kimudoh holah a travel history neilou mi 123 hi; Nikhat sung’a mi 157 discharge kibol

Imphal, Sept. 2(ET): Manipur a nidan 24 (Wednesday nidan 4:00 pm) sung’a Covid-19 +ve case thah 125 kimudoh lah’a 123 hi travel history neilou milham ahin chuleh adang 2 hi Central Armed Police Force (CAPF) ahi tin Covid-19 Common Control Room akon thulhut kimu chun aseiyin ahi.

Hiche toh lhon’a case thah kimudoh travel history neilou mi 123 lah’a 40 hi Imphal West akon, 28 hi Churachandpur akon, 18 hi Imphal East akon , 17 hi Bishnupur akon, 14 hi Thoubal akon, 5 hi Kakching akon chuleh 1 hi Chandel akon ahi. Tun amaho jouse hi Covid Care facilities a akikoi tan ahi.

Chule thina toh mi 29 alhing tan ahi tin jong thulhut chun aseiyin ahi.

Alangkhat’a Covid case thah kimudoh jing jong leh adamdoh jong aum jing in ahi. Covid natna akon damdoh jeh in mi 157 vel State sung mun chom chom a um CCCs akon in discharge akibol tan ahi. Chule discharged kibol 157 lah’a 63 hi CAPF, 45 hi CCC lamboikhongnangkhong, 29 hi UNACCO, 11 hi RD Wing, 5 hi RIMS, 2 hi JNV Chandel chuleh JNIMS leh PR Kakching akon khat cheh ahi. Tuni chan’a Manipur a case 6507 um nalah’a milham 4,905 chuleh 1,602 Central Security ho ahi. Chuleh adamdoh jat 4,607 lha’a milham 3,660 chuleh 947 Central Security personnel  hiche naban’a active case 1,871 aum nalai in ahi.

XXXXXXXXXX

CM lui O Ibobi Singh vengbit sepai phabep in Covid-19 natna nei

Imphal, Sept 2(ET): CM lui Okram Ibobi Singh security a pang sepai 11 janni a test kibol ho chu Covid-19 positive ana hiuvin ahi.

Hitolhon chun opposition congress lamkai pa le insung mi ho abon a Babina Diagnostics Center a test kibol ho negative ahiuvin chule tuni jingkah chun Congress Bhavan suhtheng na jong anei uvin ahi.

Hetding chu Arun Enterprises neipa Arunkumar Thangjam kipapina kingon party office a Monday nia kiman pet a chu  Congress Legislature Party (CLP) lamkai O Ibobi Singh jong pang ahitolhon a kingon a pang jouse jong kiveng a patepna kibolcheh dia jong hetsah ahi tauve.

Chule congress MLA phabep ho jong tunichun patepna akibol un thuchen ngah ahiuve.

Majep a jong Wabgai constituency a pat congress MLA Md Fajur Rahim jong Covid-19 natna a damdoh bep ahi. Amahi Manipur a dia MLA Covid-19 natna nei masapen jong ahi.

Xxxxxxxxx

LTT cadre kiman teni gang a pan jeh’a gotna kipe ding

Ccpur, Sept 2: Achesa August nisim 20 a ana kiman Liberation Tribal Tigers (LTT) cadre teni chu sumdon le miphalou gang a pan jeh’in IPC section noi a gotna pehding in phondoh ahi tan ahi. Akiman teni chu Sonneithang S/o Onsei, G. Monglen le Paukhosei @ Seipu, S/o Letkhai, Haijang, Churachandpur district akon ahi lhon in ahi.

Akiman teni chu achesa August nisim 20 a Pangen kho kom a ana kiman lhon ahi akiti. Amani chu Assam Rifles ho in ana mat uva Thanlon Police ang a pehlut na ana nei u ahi. Assam Rifles akon thuso kimu dungjui in akiman doh teni akon in camo uniform 20 lam matdoh in ana um in ahi akiti. Hche uniform ho chu Irang vadung gaal aum LTT cadre ho ading ahi akiti. Hiche uniform chu Sempat Gangte kho akon mi 2 in ahung lah ding a hetsah na ana kinei ahi. Hiche uniform ho poh le na a kimang Gypsy khat jong ana kiman doh in ahi. Police in court ang a bail sanpeh nalouding a report ana peh u ahitan ahi.

Police akon thuso kimu dungjui in akiman doh teni hi sumdon paidon ahi lou le tup le doi neilou gang a jao jeh a kiman ahin, hiche toh kisai a achung thu lhon kitan ding, apan nao kiloikhomna LTT hi sumdon jing le guchat le daan toh kitoh lou thil jat chom chom natoh na anei jing u ahitoh lhon a bail pehlouding a hetsah na kinei ahi akiti. Akiman doh teni hi akilha doh le daantoh kitoh lou thil abol ho abol jom ding ahi toh lhon a bail reject ding a hetsah na kinei ahi akiti.

Xxxxxx

Manipur state economy semphat nading a kihoukhom na um

Imphal, Sept 2(ET): Covid-19 toh kisai a state economy alhahsam chom toh lhon in  asemphat ding toh kisai in tunin Chief Minister makai na noi in kihouna ana um in ahi. State sung economy athah a semphat na ding a agriculture le sector dang dang phate a boipi lou akhoh dan chung a jong kihou na ana chelhan ahi. Chief Minister pa akon thuso kimu chun asei na a Agriculture, Horticulture sector le adang dang ho chung a natoh ding toh kisai in kihoukhomna akinei in ahi. Hiche kihou na achun Chief Secretary, Principal Secretary ho,  VC CAU, Dir CSIR, MU akon Professor le HODs ho in panlah na ana nei uvin ahi.

Xxxxxxxx

India a Covid-19 positive case thah 78000 kimube tolhon a natna nei lakh 37 pha, amollem jong 66,333 hita

New Delhi, Sept 2: Tunia natna nei 78357 um be tolhon a India a Covid-19 natna nei mihem lakh 37 aphatan hiche lah a adamdoh jong mihem lakh 29 hi damdoh nalang a 76.98 percent in aum in chuleh nikhat sung a natna a thi mi 1045 pum a Covid-19 natna a mollem jong mi 66333 ahitai tin tuni jingkah nidan 8 chan a Union health ministry thuphon chun asei e.

Indian Council of Medical Research (ICMR) thulhut dungjui a janni chan a patepna bol mi 1012367 ahi in, September 1 chan a sample kiladoh hi 4,43,37,201 ahi in, chule athi 1045 lah a Maharashtra a pat mi 320, Karnataka 135, Tamil Nadu 96, Andhra Pradesh 84, Punjab 59, Uttar Pradesh 56, West Bengal 55, Bihar 39, Madhya Pradesh 32, Delhi 18, Haryana 17, Gujarat leh Jammu and Kashmir a 14 gel, Rajasthan 13, Puducherry 12, Jharkhand, Odisha le Uttarakhand a 11 gel, Chhattisgarh le Telangana a 10 gel, Assam 9, Tripura 5, Kerala 4, Himachal Pradesh, Goa le Meghalaya a 2 gel chule Chandigarh, Manipur, Ladakh le Sikkim a mi 1 gel in thina ato ahitai, ati.

Amollem mi 66,333 lah a Maharashtra a mollem mi 24,903 hi atampen ahi in aban a Tamil Nadu 7,418, Karnataka 5,837, Delhi 4,462, Andhra Pradesh 4,053, Uttar Pradesh 3,542, West Bengal 3,283, Gujarat 3,034, le Punjab a mi 1,512 ahi.

Chule tuchan a Madhya Pradesh a Covid-19 natna a thi hi mi 1,426, Rajasthan 1,069, Telangana 846, Jammu and Kashmir 717, Haryana 706, Bihar 621, Odisha 503, Jharkhand 428, Assam 315, Kerala 298, Chhattisgarh 287, Uttarakhand 280 ahikit e. Chule athi thei dinmun a umjat hi Puducherry 240, Goa 194, Tripura 118, Chandigarh 57, Andaman and Nicobar Islands 46, Himachal Pradesh 40, Ladakh 35, Manipur 29, Meghalaya 12, Nagaland 9, Arunachal Pradesh 9, Sikkim 4 le Dadra and Nagar Haveli le Daman and Diu a 2 gel ahi.

Xxxxxx

Myanmar a Covid-19 daan palkeh ho songkul tang ding ahi: SUU KYI

Yangon, Sept 2: Myanmar State Counselor Daw Aung San Suu Kyi in tuni in gamsung a covid-19 daan palkeh ho songkul tang ding ahi tin phondoh na anei in ahi.

Tuni a video conference a Major General Soe Tint Naing, Yangon’s southern district administrator, U Nay Win Aung le Dr. Thet Su Mon, assistant director, Yangon Public Health Department toh akihou na uva  Daw Aung San Suu Kyi in vaipo hon Natural Disaster Management Law mang a daan palkeh ho gotna pehna ding a dan khoujep aman na ding uvin hetsah na anei in ahi.

Hetthei khatchu Myanmar sung a covid natna nei hi achesa August nisim 21 akon ana khang jing a 938 aphah ahitan ahi. Gamsung a covid akon thina toh jong mi 6 lam lhing ahitai. Daw Aung San Suu Kyi in hiche gihna chu health lam vaipo hon vetusi na neina a hahsatna anato jing utoh lhon a ana nei ahi. Rakhine akon hung pot doh mi 4000 lam ana umtoh lhon a mi 500 lam positive ana hiu ahin, hiche toh lhon a ahung pot ho holna chelha jing ahi. Ministry of Health and Sport in achesa August nisim 10 akon Rakhine hin dalha ho in kiphon na ahung nei cheh ding uva hetsah na jong ana nei ahitai. Myanmar sung a hiche natna hung len na hi Rakhine state akon kum 26 a upa bank natong khat akon hung kipan ahi. Janni a health ministry in Yanon sung a khopi 7 lam a lockdown ahin koi  ahin, Khopi sung a mipi ho chu ajeh beihel a koima in inn adalhah louding uva jong hetsah na ana kinei ahi.

Xxxxxxx

Gantah a mona neiho mandoh dia MMWO, HQ Women’s Wings in state ngehna nei

Imphal,  Sept. 02(ET): Imphal West district sung a Tuesday jan a kum 14 numei chapang suhset a um thu nasatah a themmo achan ban a asuse hon nidan 24 sung a matdoh a dan dungjui a gotna pehding in Manipur Muslim Welfare Organization (MMWO), Headquarter Women’s Wing in tunia Hatta mun a thuso miho to kimutona anei pet a government le police department kom a ngehna anein ahi.

MMWO, HQ Women’s’ Wings thuphong in numei chapang nu hi tha ding tupna a asuhset u ahiban a hitobang chonchan tuhtang mo kei a aso jing hi numei ho ding in bit na aumlou photchen na ahi in, hiche hi government in themmo chang matdoh a um ho gotna apehlou jeh a sohjing ahi e, ati.

Hetding chu majep a jong suhset a um Yairipok numei khat jong Ikop Pat a athisa a mudoh ana hi in, tuchung thilsoh jong chutobang ahikit e. Khohelou a aumpet mudoh hon kum 14 numei chapang nu chu RIMS a jendia ana pohlut ahi.

Government in numei suse ho amatdoh a gotna apehlou le MMWO Women’s Wing ho thipbeh a moh umlou ding u ahidan jong aphondoh ban a thilsoh chungchang agelkhoh ding in jong government temna aneiye.

Xxxxxxx

KKL-GHQ makai na’a a 5 vei channa ding’a Chassad kho’a relief material anakithah lhung

B.Lalboi Gangte

CCpur. August 2(ET) : Kuki Khanglai Lawmpi (KKL-GHQ) in Chassad kho’a relief material gathah ho ahung kile kit utoh lhon’a tunin (Sept. 2) KKL President Kamthang Haokip in Press/Media ho mangcha in panpi na hin pekhom ho jouse chung’a kipa thu aphongdoh in ahi. Chassad kho ding’a panpi ho pehdoh ding’a KKL GHQ President, Kamthang Haokip lamkai na in lamkai 25 in KKL Complex mun’a janni (Sept.1) anakipan doh uvin nilhah nidan 8:40 vel in Chassad kho alhung uvin relief material ho asolhah jou  nidan 9:30 kim vel in ahung kipan doh uvin tuni jingkah nidan 4:00 vel in Ccpur alhung tauvin ahi. Hiche relief material ho chu Public Carrier 2 leh ADCC Truck khat, KKL GHQ lamkai ho touna ding Bolero 2 leh Car khat toh anakondoh’u ahi. Chassad kho alhun uvin  Chassad Haosa, Thangjahao Haokip, Haokip Bul-pipan vailhun na anei in chule Pastor. Mangjapao Haokip, KBC Central Church, Chassad Pastor in kipa thusei naleh inn damtah’a  KKL lamkai ho alhun kit thei nading uvin taopeh na ananeiyin ahi.

KKL GHQ in Chassad kho a panpi na relief material ho 5 vei channa ding in Sept. nisim 1 nikho anathah uvin chule tuchung’a panpi na ding’a kipo thil hochu ann-chang bag 612, dal bag 31, chi bag 4, ankam thao litre 204, blanket 100 leh sil le-chen chule insung von poimo ho ahi. Chule tukum sung’a panpi na thilho khat-vei beh pehdoh kit ding KKL lamkai hon adeisah nao atahlang in ahi. KKL lamkai hon aseinao’a phat dang lai sang’a Chassad kho mite kimanchah dan adomjang khai thei tan, khosung’a Village Authority, Youth Club thah tundoh in aum tan, khosung mun chom chom’a meivah (electric bulb) avahtan, School kaithei ahiteng manthei ding in School building jong akichai theng tobang ahi tan, khosung’a von kining lhing tah’a koi um hih jong leh dukan kimkhat muthei ding jong aum pantan ahi ati.

xxxxxxxxxxx

JLF hi tahsanthei ahipon, Naga solution adia pan kila jindi ahi: NPF

Dimapur, Sep 2: Naga People’s Front (NPF) in Nagate lungtup molso a aum nadia pan nasatah in akila jingin, gangtah a solution semdoh loidi hi akidei e, tin tuni thuso miho hetsahna anei uvin ahi.

NPF akon thuso chun ipidia Nagaland Joint Legislative Forum (JLF) chu anadalhah ham tijong hilchenna aum in ahi. NPF legislator hon JLF adalhah u NPF in hetpehna anei tai.

Party jouse kigomkhom JLF hi Indo- Naga solution kithopi dingle santhei dol thulhuh aum nadia ana kisem ahi. Hinlah ruling People’s Democratic Alliance (PDA) in Indo- Naga solution hi agelkhoh poi, hiche jeh a hi JLF a na kitongkhom thei ponte, tin thuphon chun aseiye.

NPF in aseibe na achun JLF kiphu a kipat in NPF in Nagate dia phachom ding ahile tin hatah in ana kilhai in, hinlah Naga solution adin gelkhohna a kibang poi tin lhaset nathu jong aphong in ahi.

Alangkhat a, JLF akon NPF legislators hon haina nei tajongleu, Political Affairs Mission (PAM) aki phutdoh tan, hiche a kiloikhomna kineia Naga solution adia hatah a kipang jingdi ahi, tin NPF thuphon chun aseiben ahi.

Xxxxxxx

Union Cabinet in Kashmiri, Dogri le Hindi J&K a official language ding’a phatsahna nei

New Delhi, Sept 2: The Union Cabinet in Wednesday nikho chun bill thah phatsahna aneiyin, hiche bill noiya chun masanga ana umsa Urdu leh English toh chekhom ding in Kashmiri, Dogri leh Hindi chu union territory of Jammu and Kashmir sunga official languages ding in approved ana nei un ahi. Hiche bill ki passed toh kilhon chun Union Minister Prakash Javadekar in Jammu and Kashmir Official Languages Bill, 2020 hi ahunglhun ding  Parliament Monsoon Session a kipolut ding ahi ati.

Prime Minister Narendra Modi in jong hiche bill hi parliament a seikhomna kibei ding ahi ati. Union Minister Jitendra Singh in jong government in gamsung mipiten ana ngaichat jing Jamu & Kashmir a official language a chon sah dinga adei jingu Dogri, Hindi and Kashmiri hi ahi. Hiche hi gamsung mipi te ngeh jing khat suhbulhit peh keu hilouva agamsunga jat le nam khen na aum lou na dinga thil thahbeh tohgon kinei ahi tinjong thulhut chun aseiyin ahi.

xxxxxxxxxxx

Centre in Metro train lhaipat na ding toh kisai chepi ding dan sem

New Delhi, Sept 2: Ahunglhungding Sept nisim 7 akon a metro train ho lhaisah ding tohgon akinei toh lhon in jui ding le chepi ding dan ho centre in phondoh na ahin nei uvin ahi. Ahunglhungding Sept nisim 7 nikho le metro train ho lhaipan ding, baan neicha a lhai ding u ahi toh lhon a abon a lhai louding chuleh nisim 12 nikho akon a angai bang a lhai pan ding u ahi akiti. Metro train hin containment zone hopdung mun ho ajot pa lou ding ahi akiti. Daan kipe dungjui in station dung a mi kite nah o um thei louding, hiche ho chungchang a phate a vetsui ding ahi tin jong hetsah na ahung kinei in ahi. Centre in metro train ho lhaisah ding tohgon anei vang in Maharashtra govt in agamsung a aphal loulai ding dan hetsah na ahin nei uvin ahi. Thuso kimu dungjui in Mumbai Line-1 le Maha Metro  vang October lha akon kihong meithei ahi akiti. Maban a train lhai le lhai lou ding thu a state govt in thupeh ahin nei ding ahidan tahlang na ahung kinei in ahi. Hetthei khatchu Union Home Ministry in ministry of housing and urban affairs toh kitho a hiche thuso chu ahin nei u ahi. Social distancing hop hate a jui na ding a station ho vetsui na phate a kinei ding ahi akiti. Metro a tou ding ho in phate cha a maitom ahin kitom uva daan kipe ho ajui soh kei na ding uvin jong hetsahna ahung kinei in ahi. Sanitizer ho a station lut na jouse a akikoiding dan jong tahlang na ahung kinei in ahi.

Xxxxxxxxxxxxxxxxxxxxxxxxxxxx

Manipur High Court in court touna ding chung changa hetsah na nei

Imphal, Sept 2: High Court le akisai pi court ho a touding daan chung chang a tuni in Manipur High Court in thupeh ahin nei uvin ahi. Court ho a touna hi ahunglhungding Sept nisim 15 chan a kisem toh ding ahi akiti.  State sunga court jouse in case toh kisai natoh na jouse video conferencing a abol ding u ahi akiti. Case toh kisai a video conferencing bolna thei lou dinmun aum le covid daan phate a jui a kibol thei ding ahi akiti. Hiche video conferencing bolna ding toh kisai a kijang ding mobile app chu ‘Jitsi Meet’ hiding chuleh case thah lahlut na hi court a hard copy kipehlut le bou kisan peh ding ahi akiti. Containment zone ho akon case hung um ahi le vang email a thot thei ding ahi akiti. Thuso kimu chun asei na a high court a natong superintendent chan in phate a office kaina anei ding u ahi akiti. Cpurt natoh na ahi section khat a natong 66 percent cheh um u ngaiding ahi akiti. Court sung a natong containment zone a um ho vang suti kipe ding ahi akiti. Containment zone a um ho in lekha ahin peh uva suty ahin ngehna ding uvin jong hetsah na ahung kinei in ahi.

Xxxxxxxxxxxxxxxxxxxxxxx

Tengnoupal district a covid-19 positive 33 lhingta

Tengnoupal, Sept 2: Tengnoupal District sung Beaularam kho a mi 121 lam RT-PCR Sample lah an ahi a tetst ana kibol toh lhon in mi 16 positive ana kimu be kit in ahi. Kh. Gojen singh Chief Medical officer (CMO) Tengnoupal District vetsui nanoi a jani a khosung mi ho chu test ana  kibol u ahi. Hiche test chu Dr. Feiga Luckson, District Surveillance Officer, integrated Disease Surveillance programme Tengnoupal District, Dr. Kodiarson, Dr.  Angdun, Dr. Sobita, Dr. Rocky le staff dang ho in ana bol u ahi.  Tu jingkah lam a jong tetst kibol jing na a  Khokarthil kho akon numei khat positive hetdoh in aum kit in ahi akiti. Tu channa district sung a positive um jat hi mi 33 lhing ahitan ahi. Tuni a positive ana hinu chu ambulance a Moreh Sug district hospital chan in poh in ana um in ahi. Tu le tua district sung a covid natna nei hi mi 17 ahi.

xxxxxxxxxxxxxxxxxx

NSF le ENSF in SSA le RMSA noi a jilkung ho suhtoh dia Nagaland Government gihna nei

Imphal, Sept. 2: SSA le RMSA noi a 2010 le 2013 jilkung ho dinmun cabinet kinoptona ni 30 sung a tohdoh ahiloule kiphinna sangtah chelhah pi ding in Naga Students’ Federation (NSF) le Eastern Naga Students’ Federation (ENSF) hon tunichun Nagaland government gihna aneilhon tan ahi.

NSF President, Ninoto Awomi le ENSF President Sepili L. Sangtam in SSA le RMSA noi a 2010 le 2013 jilkung ho dinmun suhdet pehding a cabinet in achesa October 3, 2018 phatsahna anei a October 5, 2018 nia asodoh ni 30 sung a atohdoh lou le kiphinna chelhahpi ding a aphondoh lhon ahi.

Achesa June 12, 2018 nia hiche chungchang thu a Nagaland School Education Department, Nagaland Sarva Shiksha Abhiyan teachers’ Association, NSF le ENSF hon kinoptona aneisa banjom a tohgon anei u chu ahi.

Department in 2010 le 2013 SSA jilkung ho chungchang a suhkhel ho asuhdih dia kinoptona athumna a chu aseilhah uva chutolhon a SSA le RMSA noi a 2010 le 2013 jilkung ho School Education department a lahlut dia cabinet secretariat in memo vide No. CAB-2/2013 (Pt) jong October 5, 2018 nia ana sodoh ahitai.

xxxxxxxxxxxxxxxx

YPA Anti-Drug Cell in khamnathei joh mi 4 anamandoh

B.Lalboi Gangte

CCpur. August 2(ET): Young Paite Association (YPA) General Headquarter in Operation Lamka min pansa in YPA Anti-drug Cell chung chon’a panlah na anei jing utoh lhon’a zalen tah’a kamnathei ne leh joh’a sumkol vei ho tunin (Sept. 2) New Bazar area jaonan khopi sung mun chom chom’a duty anei phatsung uvin kamnathei joh mi phabep amandoh uvin ahi. YPA Anti Drug Cell in amatdoh hochu Kamminlien (28) S/o Lienkhogou of Lontang village, Paulemmawi (30) S/o (L) G. Chinzagin of ZMA road Vengnuam, New Lamka, Niangbiakkim (40) D/o (L) Nengdou of Go Chin khup veng, New Lamka, Thanglalmuan (21) of Lanva leh Paungaihlian (22) s/o (L) Jamkholal of Mualsan ahi.

Hiche toh lhon’a Kamminlien akon in No.4 chun 15, Paulemmawi akon No.4 chun 18, Syringe 3 leh Horse Blade 2, Niangbiakkim akon No.4 chun 26 chule Thanglalmuan akon No.4 chun 65 anamandoh uvin ahi.

 xxxxxxxxxxxxxxx

CCpur District a Covid +ve case thah 5 kimudoh, agom’a case 684 lhingta

B.Lalboi Gangte

CCpur. August 2(ET) : Integrated Diseases Surveillance Programme (IDSP) CCpur District in Covid-19 report asodoh na’a tunin CCpur District sung’a Covid +ve case thah 5 akimudoh toh lhon’a mi 5 lah’a 3 hi travel history neilou ahin adang mi 2 returnees ahi ati. Chule returnees 2 lah’a khat hi Bangalore akon adang khat hi Jammu & Kashmir akon hung kipandoh lhon ahi. Travel history neilou mi 3 ho hi Salem veng Area akon ahi.

Hiche toh lhon’a Salem veng Area akon Covid-19 case thah 3 akimube toh lhon’a CCpur District sung’a District polam’a umkha mi 72 akon +ve case akimudoh tan ahi. Hiche 72 lah’a Salem Veng Area akon case 33 aphatan ahi. Sept. nisim 1chan’a Salem veng a Covid-19 +ve 30 ahin tuni thum kimudohbe toh agom’a 33, Khumujamba leh New Life IRCA Torbung ah case 6 cheh, CCpur Police personnel akon 5 leh Rengkai Area ah case 5 ahi. Case dang kimudoh namun ho chu Advance Diagnostic Centre a natong 1, Hospital Campus sung’a Pharmacy bol 1, MSF driver 1, District Hospital Isolation Ward a duty Nurse 3, Tuilaphai khomi 1, Rengkai Bible Hill ah 3, Zion veng New Lamka ah 2, Loktak Project acheng 1, Neihsial Veng khomi 1 leh Central Lamka sung acheng mi 3 ahi. Tuni chan’a CCpur District sung’a case agom’a 684 alhing tan ahi.

Xxxxxxxxxxxxxx

Assam Rifle hon lekha kisuh nei louva bim hinpo truck 2 mandoh

UKHRUL, SEPT. 2 (ET) : Assam Rifle hon tunin Shangshak junction akon in daan in aphallou bim (timber) hung kipo anamandoh uvin ahi. Hetthei khat chu Assam Rifle hon thuguh pole ho akon thulhut amu dungjui uvin Shangshak junction mun’a Mobile Vehicle Check Post (MVCP) khat jingkah lam nidan 11 vel in akoi sunkim nidan 12 vel in Tata truck bearing registration no. MN-01-2017 leh MN-04-2494 hin tol driver Tomba Singh leh Herojeet Singh in Gamnoum akon Imphal lam hin jon ding chu kholchilna anei uvin ahi. Hiche achun bim hung kipo ho kholchilna aneinao’a bim 860 cubic feet pohdoh nading document kisuh anei lou jeh uvin anaman uvin ahi. Hiche bim hung kipo hohi a sum a sei ding in Dk. Lakh 8 vel man hiding in akisei in ahi.

Hiche toh lhon’a matdoh’a um thil hung kipo holeh driver teni chung thu kholchilna nei ding in Shangshak Police Station khut’a anapelut tauvin ahi.

xxxxxxxx

Assam Rifle hon Company Operation Base chom chom’a tree plantation drive anachelha pi

IMPHAL, SEPT. 2 (ET) : HQ IGAR (South) vetsui nanoi’a um Assam Rifle hon Company Operation Base mun chom chom’a nikho 4 sung chelha ding Tree Plantation Drive kingon ananei uvin ahi. Chule hiche tree plantation drive chu Imphal khopi sung mun tin ajong anachelha in ahi.

Hiche toh lhon’a Mantripukhri Battalion in Mantripukhri Garrison, Chingmeirong, Koirengei leh Yaingangpokpi Company Operation Base mun’a tree plantation kingon ananei uvin ahi. Chule Keithelmanbi Battalion in Andro, Lilong, Canchipur Company Operation Base mun’a anei nao ban’a Tamenglong leh Noney Battalion in jong ama ama Company Operating Base mun’a plantation drive achelhah pi uvin ahi. Hiche kingon achun sepai 1,259 in Mega Plantation drive a pan anala uvin chuleh thingnou jat chom chom 32,796 jong anaphutdoh uvin ahi.

Xxxxxxxxxxxxxxxxx

DIPR in thuso miho manchah ding’a hand sanitizer le face mask homdoh

IMPHAL, SEPT. 2: Dy Director (DIPR) L. Ashok Kumar in tunin Manipur Press Club mun’a thuso miho manchah ding in AMWJU President Bijoy Kakchingtabam heng’a hand sanitizer 20 leh face mask 300 anape in ahi. Chule hiche thilkeu kihopdoh ho jouse hi AMWJU makai nanoi’a thuso miho jouse hopdoh na anei ding ahi.

Hetthei khat L. Ashok Kumar in thilpeh anei ho ho Deputy Commissioner, Imphal East Dr. Rangitabali Waikhom, IAS in District Food Bank akon anapehdoh ahi. Chule thilpeh kinei nachung’a AMWJU President in Director, DIPR leh DC, Imphal East District heng’a kipathu jong aphongdoh in ahi.

Xxxxxxxxx

Lockdown palkeh mi 101 anakiman

Imphal, Sept 2: Manipur Police in tuni in lockdown daan palkeh mi 1010 lam ana man uvin ahi. Akiman ho chu maitom kitom lou jeh le social distance juilou jeh a kiman ahi akiti. AKiman ho chu phate a tilkhou na le hetsah na ana kinei jou in ana kilha doh tan ahi akiti. Tuni a daan plakeh ho kileu sah na toh kisai in fine in dangka 18.500 lam ana kimu in ahi akiti. Police akon thuso kimu dungjui in lockdown daan jui lou ho gotna kipe jing ding ahi akiti.

xxxxxxxxxxxxxxxxxxxxxxxxxxx

IAS/MCS phabep transfer kibol

Imphal, Sept 2: Manipur govt akon thuso kimu dungjui in IAS officer phabep transfer ana kibol in ahi. Tranfer kibol ho chu  Dr. Rajesh Kumar, IAS chu Chief Secretary  (DP/Home/Finance/IT/PHED) le Chief Vigilance Commissioner akon Chief Secretary  (DP/Home/Finance/ny Cabinet) le Chief Vigilance Commissioner, M.H. Khan, IAS chu Additional Chief Secretary (Forest & Environment/Fishery/Relief & DM/AR), DG, SAT le OSD Manipur Bhawan, Delhi akon  Additional Chief Secretary (Forest & Environment/Rshery/Relief & DM) le OSD Manipur Bhawan, Delhi, Paulunthang Vaiphei, IAS  chu Principal Secretary (Transport/Horticulture & SC/ GAD) & Member Secretary, EBADA & BRDVB  akon Principal Secretary (Transport/ Horticulture & SC/Works) & Member Secretary, EBADA & BRDVB, Vumlunmang Vualnam, IAS chu  Principal Secretary (Health & FW/RD & PR) akon      Principal Secretary (Health & FW/ GAD/AR) & DG, SAT in addition, R.K. Dinesh Singh, IAS chu Commissioner-cum-Secretary (Works/Revenue) akon Commissioner-cum-Secretary (Textile Commerce & Industries/Revenue/ Cooperation), Nidhi Kesarwani, IAS chu Commissioner-cum-Seaetary (Agriculture/Sericulture/Cooperation akon Commissioner-cum-Secretary (Aqriculture/Sericulture/RD & PRJ, Devesh Deval, IAS chu Commissioner-cum-Secretary (Tourism/Textiles, Commerce & Industries/Planning) akon Commissioner-cum-Secretary (Tourism/Planning/PHED), Chiphang Arthur Worchuiyo, IAS chu Special Secretary (TA & Hills), Director (TA& Hills/TRI/Transport), MD/MTDC le OSD to Chief Secretary on Skill Development & Employment akon Special Secretary (TA & Hills), Director (TA& Hills/TRI), MD/MTDC le OSD to Chief Secretary on Skill Development & Employment, Haulianlal Guite, IAS  chu Addl. Secretary (WR/MI) & CEO/State Health Agency in addition akon Addl. Secretary (Labour & Employment) & CEO/State Health Agency in addition),  Dr.  Nivedita Lairenlakpam, IAS chu Director (Edn-U)/Ex-Officio Registrar, Dhanamanjuri University akon  Joint Secretary (Hr. & Tech Edn) & Ex-Officio Registrar Dhanamanjuri University le Director (Transport) in addition, Lalithamtxgai Kalidash, IAS chu Joint Secretary (MAHUD)/Director (MAHUD) le OSD/IT to the Chief Seaetary, Government of Manipur akon  Joint Secretary (Textile Commerce & Industries) le OSD/IT to the Chief Secretary, Government of Manipur, Lourembam Bikram, IAS, Director (Trade, Commerce & Industries/Vigilance), Joint Secretary (Vigilance) le MD. MANIDCO akon  Director (Trade, Commerce & Industries/Vigilance) le Joint Secretary Vigilance/DP, Khumanthem Diana, IAS chu Joint Seaetary (Hr. & Tech Edn./TA & Hills) akon Joint Secretary (TA & Hills) & Director (Edn-U), Mamom Doley, IAS chu SDO (Porompat) & EO, Govindajee Temple Board & BDO (Imphal East) akon SDO (Porompat) & E/O, Gov.ndajee Temple Board, Mercina R. Panmei, MCS  chu Joint Secretary (Labour & Employment) & Director (Printing &  Stationery) akon Joint Secretary (WR/MI) & Director (Printing & Stationery),  K. Bono Singh, MCS chu Joint Secretary (Election/ I PR/Works) & Deputy Labour Commissioner akon Joint Secretary (Election/IPR/Worte),  Shamlm Ahmed Shah, MCS chu ADC/Imphal East & CEO/Wakf Board akon ADC/Imphal East, Dr. Thounaojam Charanjeet Singh, MCS chu Deputy Secretary (Home) akon Deputy Secretary (Home/MAHUD),  Dr. Yumnam Suraj Singh, MCS chu Deputy Secretary (Tourism)  akon Deputy Director(Tourism) in addition Deputy Labour Commissioner & Deputy Secretary (OBC & SC), Md. Feroj Khan, MCS chu Deputy Secretary (Agriculture/YAS) akon Deputy Secretary (YAS/Works), Bisheswar Khumukcham, MCS chu Under Secretary (Edn-S) akon    Under Secretary (Edn-S) & Deputy Director (OBC & Sg), Sheikh Abdul Hakim, MCS chu Under Secretary (Works) akon  Under Secretary (Works) & CEO/Wakf Board, Dangmei Manglem, MCS chu Deputy Director (TA & Hills) akon Deputy Director (TA & Hills/Tourism), Bijananda Chabungbam, MCS  chu OSD/Anti-Corruption Cell & Deputy Director (Minorities) akon OSD/Grievance Cell & Deputy Director (Minority Affairs), Lanjoy Thoudam, MCS chu  Deputy Director (OBC & SC) akon Under Secretary (OBC & SC) BDO/Imphal-East –II, D. Meidinbui, MCS chu  AC to DC, Tamenglong akon  AC to DC, Tamenglong & i/c CEO/Tamenglong Autonomous District Council chuleh Th. Harikumar Singh, MCS chu CEO/Imphal Smart City Ltd. l/c Director (MAHUD) akon CEO/Imphal Smart City Ltd. Ahi.

xxxxxxxxxxxxxxxxxxxxxxxx

COVID-19 jeh a Bengal a candidates 75% in JEE exam bolthei lou

Kolkata, Sept 2: West Bengal Chief Minister Mamata Banerjee in Wednesday nikho chun candidate 25% bouvin JEE adangse in Covid-19 jeh in abolthei tapoi ati.

Centre in phat chomkhat gamsunga natna hilen um jeh in College leh University Exam phabep leh NEET leh JEE exam ho bolda tadi hen tin ngehna ana kinei in hinla centre in ngaisah a aneilou toh kilhon in mitamtah ading in boina asodoh naban ‘ah atamjo deibang in exam ana bolthei tapon ahi tin West Bengal Chief Minister Mamata Benerji chun aseiyin ahi.

Banerjee in aseibe na ah agoma 4,652 JEE exam bol ding lah ah mi 1,167 bouvin Covid-19 jeh leh chele va le kham ahijeh in exam abol thei hamham un ahi  “Exam bol ding ho ading in toh gon leh exam abolthei tei nading uvin pan akila in hinla lunggel bangtah in exam bol atam jou pon centre in simlai ho makhankho ding agelpeh lou ham” tin jong aseiyin ahi.

Simlai hon hapta khat sung bou voh chon ding in ngehna ana nei un hinla sanpeh ahi pouvin ahi. Kon thunei na apeh uva centre in simlai ho makhankho ding susethei leu a thuneina achoithei uham tijong centre government dohna ana neiyin ahi.