India gamsung’a Coronavirus case masapen Kerala gam’a photchen hi; Kichatna ding aumpoi...

India gamsung’a Coronavirus case masapen Kerala gam’a photchen hi; Kichatna ding aumpoi tia Health Minister in thuso nei

688
0
SHARE

India gamsung’a Coronavirus case masapen Kerala gam’a photchen hi; Kichatna ding aumpoi tia Health Minister in thuso nei

New Delhi, Jan 30: Wuhan University, China gam a lekhasim Kerala gam mi khat India gam a ahung kile in, coronavirus natna nei ahi hetdoh ahitai, tin Health Ministry in January 30 nikhon photchenna aneiyin ahi.

Twitter a Ministry in thuso aneina a damlou pa dinmun aboipon chule doctor hon avet jing ahi, ati. Kerala Health Minister KK Shailaja in simlai pa tahsa dinmun alel khoh ahipoi, tin asei uvin chule kichat nading aumpoi, tin aseibe uvin ahi.

China gam a kon hung kile simlai ho thu Shailaja in aseina’a, “January nisim 30 nikho a NIV a kithot sample 20 lah a 10 hi negative ahi’in, 6 hi ginmo a kikoi ahi. Hiche gup lah a simlai pa sample hi positive ahi, ti photchenna um ahi”, ati. Naovop numei chule atahsa damlou ho akigin them diuvin health Minister in aseiyin ahi.

Directorate of Health service a control room kigong a chule Thrissur Medical Hospital a hitobang emergency ho a dinga isolation ward kikoi ahi, ati. Kerala gam a mi 400 val hi virus lah a um maithei ahi, tia vetkolna aneiyu ahi’in, Delhi leh Mumbai khopi panna a khopi dang dang a um hospital isolation ward a kikoi case adang jong um ahi.

Wuhan hi nat kipatna ahi’in, doctor hon nat jen dam nading lou ahol jing nahlaiyu ahi. Coronavirus jeh a thi mi 170 lhing ahitan chule China mainland a natna neiya case 7,700 nailam hi ahitan, natna hi Asia chule vannoi gam dang dang a jong chal jing ahi.

Coronavirus hi natgol tobang ahi’in, Wuhan khopi, China gam a seafood leh gancha kijohna kailhang a kon kisei pan ahi. Sorkar in India gam a hung adeh a China leh South East Asia gam a kon ho phatah a kholna anei ahi. Thailand gam a jong coronavirus case photchenna kinei 14 lhing ahitai.

Alangkhat a Delhi khopi RML Hospital a pasal thum observation a akoi hou natna test abol nauva negative ahi uve, tin Health Ministry official hon January 30 nikhon asei uvin ahi. China in gangtah a kitol natna (virus) suhtang nadinga pan alahjing’a, Union Health Ministry injong India gam mi ho China gam a akholjin lou diuva January 29 nikho a thuhilna anei ahi.

Kiginna dinga India in airport ho a thermal screening akoi jong sagi a kon 21 a akalsah ahitai. Athah a screening kikoina airport holah a Gaya, Guwahati, Vizag, Varanasi, Goa, Bhubaneshwar leh Lucknow jong pang ahi. Health Ministry in NIV-Pune a sample test kibolna tilouva laboratory adang li jong manchah dinga asem be ahi’in, Alleppey, Bengaluru, Hyderabad leh Mumbai khopi a sample test bol nading lab facility li kikoi ahi.

Cabinet Secretary Rajiv Gauba in achesa January nisim 28 nikho a virus douna dinga sorkar kigotna ho velvetna aneiya chule Wuhan a kon India gam mi ho puidoh dinga ngehna jong anei ahi. Wuhan a tang den atamjo simlai hi a gamsung miho India in puidoh dinga tohgon anei ahi.

ULFA(I)  toh kihou ding hi thil boitah ahi: Himanta Biswa Sarma

Guwahati, Jan 30:  Assam health and finance minister  Himanta Biswa Sarma in tunin United Liberation Front of Assam(ULFA) – Independent toh kihou khomna nei ding hi thilboitah ahi tin ana sei in ahi. Minister pan aboi jeng vang a phat lam amano dan thu jong tahlang na ana nei in ahi.

NDFB cadre phabep in meipum pehdoh na ana nei utoh lhon a kingon khat ana kiman na a minister pa in ULFA faction ho toh kihou na aphalam amano dan le Paresh Baruah kihou na ding a temna anei dan tahlang na ana nei in ahi. ULFA(I)  toh kihou na a panla ding a temna akinei jing vang in chamlhat na bou athum jeh uvin ahah in ahi ati.

Hetthei khat chu Paresh Baruah in tu naicha a thuso miho toh akihou limna a chamlhat na peh ding a government in kigel lhah na anei lou le kihou ding aphat chomna aumpoi tia ana sei ahi. Hetthei khat chu achesa January nisim 27 nikho  a government in NDFB faction jouse toh kihou lhah na ana sem toh lhon a Paresh Baruah jong kihou pi ding a temna ana nei u ahi.

ADC Election ‘Party less system’ a bol ding’a thulhuh na um

B.Lalboi Gangte

CCpur. 30 Jan (ET): T. Thangzalam Haokip, Chairman Hill Areas Committee, Manipur lamkai na’a achesa Jan. nisim 16 nikho’a Hill Areas Committee in Manipur thinglhang gam kivai homna ding’a kimangcha Autonomous District Council Election um ding chung chang thu’a houlim na anei nao’a hiche nikho’a kithulhuh na alah bang uvin HAC Meeting a Resolution No. 34/2020 (HAC) dungjui’a maban’a ADC Election chelha ding hi Party less system man ding in thulhuh na ananei uvin ahi.

Chuleh Manipur State sung’a ADC Election hi June leh July lha a ana kibol chu kim khat ding’a boina tam tah alhun sah jeh’a mijouse  ding’a boina imacha umlou na ding in November lhasung’a nei ding in kithulhuh na anei uvin ahi. Hiche kithulhuh nahi State Election Commission in maban’a ADC Election um na ding’a achelhah pi ding in recommend jong abol uvin ahi.

Tatbung kho a kon district police outpost chon dinga village authority in avel a DC henga memorandum pelut

Imphal, Jan 30(ET): Jiribam police hon police outpost asem nau mun hi Tatbung kho, Tousem sub division, Tamenglong district hopsung ahi’in chule JIribam police hon kagam u hectare 2 chunglang alah uva alo u ahi, tin Tatbung Village Authority in Deputy Commissioner, Tamenglong henga memorandum avel a apelut kit uvin ahi.

Akisei outpost jeh a kho haosa chule khosung miho avel vel a angaichat na louva kisugim jing ahi, tin haosa/Chairman Hemkhojang, Tatbung Village Authority, Tousem Tamenglong district in memorandum apehna a aseiyin ahi. Hiche chungchang a office in pan alah dinga temna jong aneiyin ahi.

Tatbung kho a kon Leingagpokpi Jiribam district police outpost chon dinga avel a memorandum apeh nau sagi vei channa ahitan, chule mopohna nei authority hon hiche thu a boina asuhlhap louva ahileh kiphinna sangtah bol dinga civil society organization, CSO ho henga temna jong anei uvin ahi.

Faction 3 a kon NDFB galguh 1,615 Assam government kom a kipelut

Guwahati, Jan 30: Bodo galguh kiloikhom 9 ban a centre le Assam government in kinoptona asemdoh nikhat jou in National Democratic Front of Bodoland (NDFB) faction 3 a kon galguh mi 1615 lhingdeh hon jannichun Guwahati mun a state government khut ah galmanchah toh akipelut tauvin ahi.

Guwahati Medical College and Hospital (GMC) Auditorium a Assam Chief Minister Sarbananda Sonowal kom a jannia kipelut ho chu NDFB (Progressive) a kon 836, Ranjan Daimary a kon 579 le Saoraigwra a kon mi 200 agom a galguh 1,615 ho chu galmanchah 178, meichang 4803, grenade 14 le 2-inch mortal khat toh kipelut ahiuve.

Ama hohi CM Sonowal, Assam health and finance minister Himanta Biswa Sarma, director general of Assam Police Bhaskar Jyoyi Mahanta le Indian Army lamkai len ho umpet a chelha ahi.

CM Sonowal in galmanchah koilha a government toh kihou ding hin gel galguh ho pachatna apeh ban a Bodo Peace Accord hi akigong bang a khatjong dalha lou a kitongdoh ding ahi, ati.

Assam health and finance minister Himanta Biswa Sarma in government kom a kipelut galguh ho dia state government in tohgon chom chom akigong in chujongle Indian Paramilitary a lahlut nading lampi jong akiholkhom jing lai ahi, ati.

Hiche kingon a pang het thei ho chu Assam chief secretary Kumar Sanjay Kishore, joint secretary to Union ministry of home affairs Satyendra Garg, Assam water resource minister Keshav Mahanta le Bodoland Territortial Council luboh Hagrama Mohilary ahiuve.

IPS officer khat ki engbol na case jana nei tah a akibol dan Assam Rifles in hetsah na nei

Tengnoupal, Jan 30(ET): Achesa January nisim 19 nikho a Khudengthabi check post munna IPS  officer khat ki engbol na chung thu kholchil na kinei jing lai a kiloikhomna phabep in thuso ho a Assam Rifles mo ahin chan sah jing na u chung Assam Rifles in nopmo asah dan ule vangset umtah ahi dan tahlang na ahin nei uvin ahi.

Hetthei khat chu hiche kholchil na hi state police in jong abol u ahi. Hiche case toh kisai a evidence ho kholchilna nei ho le court in hetsah na ahin nei teng ule bou pehdoh ding le lhadoh ding in Assam Rifles in hetsah na ahin nei uvin ahi. Hiche evidence lhadoh lou na chu IPS officer nu dinmun kive a jana kipeh natoh kisai a kibol lou ahi tin jong Assam Rifles akon thuso kimu chun asei in ahi. Assam Rifles ho thalheng dingin MSCW ang a advocate khat in thilsoh ho chung a hou limna ana nei in ahi.

Thuso kimu chun asei na a Manipur akon Assam Rifles lahdoh ding, Khudengthabi a PVCP lahdoh ding ahilou le Assam Rifles natoh ho state force ho ang a pehdoh ding kiti hi mi phabep lungdei a natoh ahi dan jong hetsah na ahin nei uvin ahi. State sung a government in khamnathei a kivei na chung chang thu nasatah a doudal na anei toh lhon a hitabang a mip ihuh na ding a natoh na kinei ahi dan tahlang na ahin nei utoh lhon in achesa 2019 kum bouseh a khamnathei crore 500 lam man ana kimat doh dan jong hetsah na ahin nei uvin ahi. Mi phabep in Moreh lampi a khamnathei a kivei na anei jing utoh lhon a hlai mun akon a Assam Rifles lahdoh ding thu ana hasei jing u ahi ati. Khudengthabi PVCP a check kibol na mun hi Highway a manchah mantam tah tah Ministry of Home Affairs akon jang a thil ki cheh na mun achangseh ahi dan jong Assam Rifles in tahlang na ahin nei utoh lhon in mip boilheh jong le gamsung ding gel na a hitabang natoh na kinei ahi dan phondoh na ahin nei uvin ahi.

Gammang kihuhbit hi khangkit a ding ho kipa thilpeh lentah kipe toh thakhat ahi: Chief Conservator of Forest

Imphal, Jan 30(ET): Khonung ding gelkhohna jal’a gammang kihuhbit hi thil thupi pen leh ahunglhung ding khang ho kipa thilpeh lentah kipe toh thakhat ahi tin Chief Conservator of Forest, Forest Department, Th Mohendra Pratap in tuni Haraorou a um Khuman Eco Tourism Park hondohna kingon kimanna ah aseiyin ahi.

Hiche Eco-Tourism Park umna mun hi kum 20 masang chun manchah lou mohseh a anakikoi molbeh (barren hill) khat mei mei anahi in ahinlah Haraorou Village Development Committee leh Youth Modern Club hon thingkeh atu uva phate’a ahin vetkol uva kon’a Eco-Tourism Park a sodoh thei’a um ahi tin aseikit’e. Kingon a chun Khundrakpam Zilla Parishad member Th  Angoubi, Haraohou Tangkham Gram Panchayat a Pradhan L Kullachandra, Kangpokpi DFO Chingpilhing Kipgen leh midang dang hojong apang uvin ahi.

Khundrakpam Zilla Parishad member Th Angoubi in ahoulimna ah Village Development Committee, Local Club holeh Meira Paibi hon kilungtoh tah leh thakhat tah’a pan alahkhom uva, kho semhoina dia thudih tah’a na atohkhom pou uva ahileh khangtou jengding ahi tin aseiye. Mohendra Pratap in aseibena ah Eco-Tourism Park vetkolna leh semhoina lampang’a Forest Department in jochan a kithopina ahin pehjing ding ahi ati.

Khantou machalna lampi komu hi themjilna ahi: Minister Nemcha Kipgen

Ccpur, Jan 30,(ET): Gamsung khantou machalna lampi a puilut le komu lah a themjilna hi apoimo pen khat ahi e tin Social Welfare and Cooperation Minister Nemcha Kipgen in Churachandpur Henglep gamkai Leimata hopsung L Gelmol kho a Kuki Students’ Organisation Leimata Silver Jubilee kingon a Jin-Gun hina dol a tunia houlim aman pet a asei ahi.

Jin-Gun a pang Nemcha in gamsung kikhelna polut thei ding themjilna lam machalsah jing ding le golseh lam jong khohsah jing ding in KSO Leimata ho temna jong aneiye.

Nemcha in gamsung khantou machal nading seikhom na ho a jong ngailutna nei pum a numei ho jong apan jing angai e, ati.  Chule Government tohgon Go to Village le Go to Hills a kisei le kiphongdoh government noi a chanvou ho seiphong le a mipi hetsah ding le government phallou kani lei bollou helding in Social Welfare Minister in ahungkhom mipi ho temna jong e.

Kingon melchihna a kitungdoh Jubilee song jong Minister Nemcha Kipgen in hondohna anei e. Chule Chairman, Hill Area Committee (HAC), T. Thangjalam Haokip, MDC, Khousabung,  Seilenmang Khongsai le MDC, Leimata, Thangboi Haokip ho chu Jin-Ja-Um le Kin-Nei a pang ahiuve.

Malaysia a Tripura khangthah khat thina, Coronavirus toh akimat lou dan insungmiten hilchetna nei

Agartala, Jan 30: Malaysia gam a kum 23 a upa Tripura khangthah khat in thina ana to chu Coronavirus akon ahipoi tin hilchetna ahung kinei in ahi. Tunin a thipa Manir  Hossain insung mite in thuso kinei chu adih loudan hilchetna ahin nei uvin ahi.

Malaysia akon Sultanah Aminah Hospital in athina jeh lekha pehdoh na ahin neina uva “Epilepticus Secondary Meningoencephalitis’” akon thina toh ahi akiti. Thina toh pa sopi Misan Miah in thuso miho toh akihou limna a Malaysia akon Corona virus jeh ahi dan hetsah na im ahung kinei pon ahi ati. Ka sopi pa hin Malaysia gam achesa 2018 kum a ana jot ahin, restaurant mun khat a na atoh a tu naicha a dammo na ana nei toh lhon a eihung kihetsah u ahin, athi thu khatvei ni chun hetsah na ei hung kinei uvin ahi ati.

Hetthei khat chu jani nikho ho a kum 23 a upa thina toh pa chu Corona virus jeh ahi tia ana kisei ahi.  Thuso miho ang a ka sopi pa thina chu Corona virus jeh ahi kati le government in thilong ahin poh ding u ahi akiti in hinlah hiche thu toh kisai in ima cha akija hih lai in ahi ati. Alangkhat a state secretary of health Dr Debashish Basu in hiche thu toh kisai a Malaysian government akon thuso ima akijah lou laid an tahlang na ahin nei toh lhon in thuso chu bul le bal neilou ahidan hetsah na ahin nei in ahi.

Aumtalou Manir Hossain hi Purthal Rajnagar, Sepahijala district, Tripura  akon ahin, ama hin ji anei a, anu le apa toh asopi nit oh um a restaurant a natong a Malaysia a che ahi.