India gam a Coronavirus case thah 22 kimudohbe; Gamsung’a photchenna kinei case...

India gam a Coronavirus case thah 22 kimudohbe; Gamsung’a photchenna kinei case 28 alhingtai

149
0
SHARE

India gam a Coronavirus case thah 22 kimudohbe; Gamsung’a photchenna kinei case 28 alhingtai

New Delhi, Mar 4: India gam a coronavirus natna neiya photchenna um case athah 22 aum’e, tin Union Health Minister Harsh Vardhan in aseiyin ahi.

Case athah ho pum a gamsunga hitobang case agom a 28 lhing ahitan chule hiche lah a Kerala gam a natna neiya photchen hi mithum ho akijenna a kon damdoh a hospital a kon asoldoh u ahitai. Case athah kisei 22 lah a 16 hi Jaipur a ahi’in, Jaipur a hi Italy gam mi 15 leh India gam mi khat in natna anei ahi. Italy gam a kon hung kholjin hohi ‘holiday’ mang a hungu ahi’in, chule India gam mipa hi amaho po a pang bus driver pa ahi, tin Vardhan in aseiyin ahi.

Tu masanga natna neiya photchen hi a adamlou mikhat a kon amaho hin natna akilahson u ahi. New Delhi a jong athah a case 6 photchen ahitan, Vienna a kon ahung kile jouva Agra vil a che pasal khat insung mite ahi. Ministry in abol Integrated Disease Surveillance Programme (IDSP) mangcha a mi 66 test kibol ahitai.

Tu masanga Health Ministry in ‘high viral load’ neiya mi 6 hetdohna anei ahi’in, National Institute of Virology, Pune a sample test abol jou uva natna aneiyu photchen hi ahi. Abon uva tua hi New Delhi khopi a um Safdarjung Hospital a isolation ward a akoiyu ahi. Tua hi sorkar in gamdang a kon hung lhung passenger jouse ‘universal screening’ apat ding ahitai.

Tu masanga chu China, Hong Kong, Japan, South Korea, Thailand, Singapore, Nepal, Indonesia, Vietnam leh Malaysia gam a kon hung ho bou check abol u ahi. Delhi a um public hospital jouse case tamcheh jen dinga akigin diuvin sorkar in thuhilna aneibe in ahi.

Centre in aboipi list a hi Iran asangpen a um ahi’in, India in Iran gam a COVID-19 screening test hondoh ding jong agot ahi, tin Vardhan in aseiyin ahi. Scientist khat Iran a che ahitan, scientist adang thum chule test bolna manchah ho Iran gam a asol kit diu ahi’in, Iran tosotna sorkar in athum ahi, ati.

Manipur gam a tuchan a hi ginmo phabep aum vanga coronavirus case photchenna kinei umlou lai ahi. Tuchan a test kibol hohi abon a ‘negative’ hijing nalai ahi, tia Manipur State Health Directorate in asei ahi.

Manipur University Registrar in Vice Chancellor thah kilhenna ding natoh apat dinga MHRD in thuhilna nei

Imphal, March 4(ET): Manipur University Registrar in MU VC anahi Prof. Adya Prasad Pandey apanmun a kon akilahdoh a kon a ong a um Manipur University Vice-Chancellor panmun kilhen nadinga process February 21 a kon apat dinga Ministry of Human Resource Development, India government in thuhilna anei ahi.

Vijay Kumar, Under Secretary to Government of India in soi akaina MHRD lekhathot a chun, Registrar, MU in aganna thei pen a University Executive Council ho meeting akou ding chule MU Vice Chancellor panmun kilhenna a panel sem nadinga MU Executive Council in nominee 2 (ni) Committee member apeh dinga jong asei uvin ahi.

Statute 2(1), Manipur University Act 2005 dungjuiya Vice-Chancellor hi Committee in recommend abol mithum chunglang umna panel a kon Vistor in alhen ding ahi. Statute 2(2), Manipur University Act, 2005 a hi Committee a mithum pang ding, hiche lah a ni hi Executive Council in nominate abol ding chule khat hi Visitor in nominate abol ding ahi’in, Visitor in alhendoh nominee hi Committee convenor hiding ahi.

MU a kiphinna sottah aum jouva VC anahi Prof AP Pandey suspend kibol a chule High Court in October 11, 2018 ni a thutanna anei dungjuiya MU VC panmun natoh tong ding chule Administrator dinga Jarnal Singh IAS lhendohna um ahi. Administrator Jarnail Singh in atuh sunga teaching leh non-teaching staff post 209 lah nadinga advertisement kisodoh a chule phabp jong kila ahitai.

Recruitment process ho a adihlou akibol e, tia adoudal na jong um ahi’in, hehna kisem University Grant Commission (UGC) in adonbutna’a, MU Registrar in ‘recruitment process’ ho avetlhah a chule dan dungjuiya action kilom tah a alah dinga thuhilna apeh ahi’in, action kila hohi hehna sem (complainant) chule UGC henga report apeh dinga asei ahi. Ahivanga UGC thupi hi Manipur University in tuchan a ajui loulai ahi, tin thulhut in aseiyin ahi.

ATSUM in ADC election thu a kiphinna bol dinga sorkar gihna nei

Imphal, Mar 4(ET): State sorkar in Autonomous District Council (ADC) election vohchon dinga kilolna anei alahdoh louva ahileh trival civil voluntary organization adang dang toh kiphinna bol dinga All Tribal Students Union Manipur (ATSUM) in gihna thuso anei uvin ahi.

General Secretary, ATSUM, Seiboi Haokip in thuso aneina a, March nisim 4 ni a gamsung niseh thuso ho a state Cabinet in election vohchon dinga phatsahna apeh thu kisei demna sangtah aneiyin chule tukum June lha teng sorkar in election abol dinga temna aneiyin, hiche hi ADC election nukhah ana kibol phat ahi, ati.

Achesa January nisim 16 nikho a Hill Area Committee (HAC) in November lha a election voh chon dinga kilolna anei chule HAC in party less system election bol dinga recommendation apeh na ajeh thudoh anei uvin, hiche hi kisang louding ahi, tin aseibe uvin ahi.

Manipur State Cabinet in ADC Election lha 6 a ding’a vochon

B.Lalboi Gangte

CCpur. March 4 (ET) : Manipur State sung’a Autonomous District Council 6 Election chelha na ding in State Cabinet in aphat chon ding in phatsah na anape tan ahi. State Cabinet in March nisim 3 nikho chun Chief Minister’s Secretariat mun’a Chief Minister N. Biren Singh lamkai na in hiche thu seikhom na ananei phatsung uvin aphat voh chon ding’a thulhuh na alah ho State Government spokesperson leh Education Minister Th. Radheshyam in thuso miho heng’a tahlang na anei in ahi.

Hiche kingon phatsung’a Radheshyam in Hill Areas Committee (HAC) in ADC election ding toh kisai’a thuso anei State Cabinet in meeting phatsung in ngaito naleh seikhom na anei nachung chon’a thulhuh na ana kila ahi ati. Manipur (Hill Areas) District Councils Act, 1971 dungjui’a ADC election chelhah phat ding lha 6 chan ding in voh chon ahi. Hetthei khat chu Manipur a ADC 6 tichu Churachandpur, Sadar Hills, Chandel,Tamenglong, Senapati leh Ukhrul ah ADC election kichai napen hi June 1, 2015 a kinei ahi in hitobang’a neijom ding hi leh June 2020 masang’a ADC election achelhah ngai ding ahi. Hill Area Committee  in achesa Jan. nisim 16 ah ADC election nei phat ding toh kisai seikhom na ananei uvin hiche phatsung achun ADC election chu June/July lha sung’a chelha hi chuh lai ahi jeh in kho phat lai November lha lang’a nei ding in thulhuh na anala uvin ahi. Chuleh hiche chung thu State Cabinet ah seikhom ding’a thupeh anei dungjui uvin lha 6 jou teng chelha ding’a kithulhuh na Cabinet in nakisem ahi tinjong aseibei.

March 18 teng Minister Shyamkumar ‘Disqualification case’ a hearing umding

Imphal, Mar 4 (ET): Minister Shyamkumar ‘disqualification case’ thu a final hearing ahung lhung ding March 18 teng umding ahi, tin Wednesday nikho thulhut in aseiyin ahi.

Congress MLA K Meghachandra leh Mohammad Fazur Rahim in Manipur High Court a 10th Schedule noiya Forest Minister pa disqualify bol dinga ngehna anei ahi. Shyamkumar hi Andro constituency a kon assembly election nukhah pen a Congress ticket a election kai doh ahi’in, ahivanga chomkhat jouva BJP a lut a, Biren lamkaina BJP sorkar noiya Minister panmun atuh ahi.

Kamjong area Kuki CSO hon IHRA panlah na chunga kipathu sei leh suhthengna thuso neiyu

Kangpokpi, Mar  4(UNA): Kamjong district a cheng Kuki ho chunga ‘human rights’ kipalkeh na sangtah umho tahlang nadinga International Human Rights Association (IHRA) in pan alah Chassad area, Kamjong district a Kuki Civil Society Organisation hon akipa nau thu aphong uvin ahi.

Chassad, Kamjong district a cheng Kuki hohin tu masanga jong kigimbol na anato jing ahi, tin Kuki CSO hon achesa thilsoh umchan ho asei uvin, chule IHRA panlahna ho pachatna le kipana thu asei uvin ahi. Ahin, IHRA in 31 Assam Rifles tia asei hi 31 AR ahipon 42 Assam Rifles ho joh ahi, tin suhthengna aneiyin, Chassad a tu le tua jong amaho posting hiu ahi, ati. Chule Commanding Officer in nam khat deilhen chom chule adang bungkhenna aneina akimupon, hiche jeh a hiche chungchang thu a ama min akiphah poh hi gamkai miho leh Assam Rifles ho kikah a kitahsan to na aboina hithei ahi, tin suhthengna anei uvin ahi.

Commandant, Chassad Battalion, 42 Assam Rifles in lhang miho toh kiloikhomna phatah a asem ahi, tin asei uvin chule thutah ahilou jeh a IHRA in Commanding Officer thu alahdoh diuvin temna jong aneibe uvin ahi.

Muoltluong haosapu NSCN-IM hidinga ginmo hon apuimang a sum a akilhatsah u HAS in demna thuso nei

Imphal, Mar 4(ET): Hmar Students’ Association (HAS) hon achesa February nisim 23 (Sunday) jan nidan 8 don a NSCN-IM hidinga ginmo thingnoi hon Muoltluong (Molong Diphucherra) kho haosa upa Siemthang Hmar akaimang uva chule sum a akilhatsah u demna leh kidang sahna thu asei uvin ahi.

Lalringsan Darngawn, Secretary, Information & Publicity, Hmar Students’ Association, General Headquarter in thuso anei na a, NSCN-IM thingnoi hidinga ginmo hohi Muoltluong Hmar kho, Cachar, Assam alhun lhun uva Siemthang Hmar in khosunga um in jouse a kai (house tax) adon dinga thupeh aneiyu ahi. Siemthang Hmar in anop louna thu aseileh ama chule khosung a Hmar Youth Association (HYA) vice president hi a Lalbieksang Hmar toh apuimang u ahi.

Ahivanga Lalbieksang hi ahin lhadoh pai uva, kho haosapu kilhadoh nadinga sum ahin poh dinga thuhilna aneiyu ahi. Muoltluong khosung miho jong Dima Hasao district noiya um N Hmarlusci kho chan che uva, haosapu kilhadoh nadinga dangka 50,000 apoh u ahi. Sum amu jou uva thingnoimi hon Hmar kho haosapu alhadoh kit uva, ahivanga ahung lhung ding lha ni sunga 2020 kum a dinga ‘house tax’ dangka 50,000 apeh kit diuva aseipeh u ahi.

Jinam Ghat a posting hi a 37th Assam Rifles hon amaho vetkolna noiya hitobang thilsoh alhunsah a, aphatchomna beiya aum nau Hmar Students’ Association in aseiyin chule NSCN-IM leh adang dang hon sum thum, Hmar miho a kon sum chom chule Cachar leh Dima Hasao district, Assam gam a cheng chamna ngailu a Hmar ho agih uva asuhgim lou diuvin temna aneibe uvin ahi.

Cachar district leh Dima Hasao district, Assam gam a cheng, thinglhang gamlha tah tah a um Hmar kho a cheng themmona neilou India gam mi ho venbit nadinga state government machinery, NSCN-IM lamkai chule civil society group hon pan alah ding’a Hmar Students’ Association, General Headquarter thuso chun aseibe in ahi.

Minister Letpao in Department Engineer hon anatoh u report bolding a sei

Imphal, March 4(ET): Union Home Minister Amit Shah in March 15 nikho leh Manipur gamsung ahung vil ding toh lhon in government department chom chom hon hiche a anatoh phat hou chungthu report apeh theina ding uvin aki gong uvin ahi.

State Government in kum thum sung a anatoh phat hou tahlatna neiding a kigong him uh ahi. Hiche ding toh lhon in Water Resources Minister Letpao Haokip in tuni chun Secretariat Conference hall ah WR department hon ipi pi vetsah thei ham ti seikhomna anei uvin ahi.

Minister pan official holeh Engineer ho heng ah department noiya kibol dam leh multi-purpose project ho report bolding a kingong ding in asei in ahi. Tuni meeting achun WR department a secretary Jacintha Lazarus, IAS, Chief Engineer Songput N Albert chule engineer dang dang hon jong pan ala uvin ahi.

 

Gamdang a cheng Manipuri ho ILP noiya ‘relaxation’ kipe ding ahi: CM Biren

Imphal, Mar 4(ET): Chief Minister N. Biren in India gam chom chom a um Manipuri ho Inner Line Permit system a kon ‘relaxation’ phabep kipe ding ahi, tin aseiyin ahi.

Lamargram kho, Cachar district, Assam gam a World Meetei Convention 2020 masapen CM Biren in Wednesday nikho a hondohna anei na a asei ahi’in, kikhopna a gam chom chom a kon delegate aja a sim apang uvin ahi.

Ajeh chom chom jeh a South East Asian gam ho chule India gam Assam leh Tripura gam a Meilhei (Meetei) tamtah akichon doh hi pohnat umtah ahi, tin CM in ahoulimna a aseiyin chule eiho society hi vannoiya akhangtou pen society khat ahi, ati. Kum 2000 val thusim ijih uhi kithang at pi umtah ahi’in, pao le hao, lekha jem, chon le khan chom chule hou eiho a achom a ineiyu ahi, ati.

Gamsung mi dihtah ho amanthah louna ding a Centre in tu naicha Manipur gam a Inner Line Permit System (ILPS) achepi ahi, tin CM in aseiyin chule Prime Minister Narendra Modi leh Home Minister Amit Shah lamkaina a Assam gam a jong Centre in Assam Accord Clause 6 chepi ding nasatah a angaito ahi’in, Assam gam mi dihtah ho huhna ding ahi, ati.

Assam gam a Manipur gam mi hon pao leh ham, chon le khan achintup jing akipapina thu CM in aseiyin, Manipuri hon hahsatna anei houhi Assam sorkar henga hetsahna kanei ding ahi, tin kitepna aneiyin ahi. Manipuri tamtah Assam gam a achen thu CM in aseiyin, Assam CM Sarbananda Sonowal henga Assam Public Service Commission (APSC) in abol exam ho a subject list a Manipuri language pansah ding thu a kakihoupi ahitai, ati.

State sorkar in Manipuri Diaspora (gam mi) ho kithopina dinga bol thei chan abol ding ahi, tin aseiyin chule Cachar a Manipuri Guest House kisa vahding ahitai, tin kitepna aneiyin ahi. Imphal khopi a jong Manipur gam a ahung sung uva akichol nathei diu hitobang Guest House kisa ding ahi, tin CM Biren in aseibe in ahi.

ILPS chungchang thu CM in ahilchenna a ILPS noiya gamsunga hung ding Manipuri pao tho ho ‘relaxation’ phabep kisem peh ding ahi, ati. Convention hi Meilhei ho kipunkhom nading, khantou nadinga Pan Meetei Convention leh Assam Manipuri Progressive Front in agon ahi. Convention noiya Manipuri literary meet, cultural meet, entertainment meet leh interaction program hojong umding ahi.

Kin gon a Deputy Speaker  K. Robindro, MLA K. Meghachandra,  L. Sushindro, L. Rameshwor Meetei, Manipur Food Industries Corporation  Ltd. Vice Chairman K. Sarat, Union Minister anahi SK  Purkayasthya, Cachar district DC leh SP jong apang uvin ahi.

MLA L Rameshwor Meetei in ahoulimna a nam in chon le khan, thusim chule pao leh adang dang atuhchah teng Meetei hohi vannoiyin ahet ding ahi, tin aseiyin ahi. Manipur gam hi sports langa talent nei atamjeh a ‘Power house of sports’ tia kihe ahi’in, ahivanga Assam gam a Meilhei ho kichep golseh a alhahsam hi vangset umtah ahi, ati.

Assam gam a cheng Meilhei numei hon achalpang uva ‘sindhur’ anu angah diuvin temna aneiyin, Sanamahism juiya Meilhei ho chonna ngai ahipoi, ati. Hindu ahilouleh hou dang nadei deiyu jui uvin, ahivanga Meilhei numei in ‘Sindhur’ aman hi san thei ahipoi. Meilhei banga hing uvin, tin aseiyin chule Cachar a Sanamahi temple ahilouleh cultural park sah nadinga Manipur sorkar in kithopina apeh ding ahi, tin aseibe in ahi.

 

HLSC & COHSEM exam candidate phabep kinodoh

Imphal, Mar 4(ET): H.S.L.C exam Mathematics subject kibol nikho 5 channa tunin mikhel a exam bol centre 6 akon mi 32 leh centre 3 akon copy bol mi 6 ana kimandoh in ahi.

Mikhel a exam bol kimandoh ho chu Parizeau Maranatha Academy, Kangpokpi akon mi 5, M.G. Evergreen Hr. Sec. Shool, Pallel akon 12, Lolong Hr. Sec. School, Lilong akon mi 1 chule Yairipok Govt. H/S akon mi 6 ahiuve. Chule candidate copy bol jeh a kinodoh ho chu Lilong Hr. Sec. Madrassa leh Cosmopolitan High School, Chingkhu akon mi 1 cheh leh STNABA High School akon mi 4 ahiuve. Amaho chung’a FIR jong jihlut ahitan ahi.

Alangkhat ah COHSEM noiya Class XII exam Science Stram Anthropology subject kibolna in Yaingangpokpi akon mi 1 exam hall sunga mobile phone manjeh in ana kinodoh in ahi. Hiche candidate nu chun subject avat cheng abol thei tahlou ding ahi jong akiti.

Achesa February 22 nikho a Physics subject kibol nikho ajong exam hall sung’a Mobile phone man jeh in Kumbi College centre leh St Joshep’s Hr. Sec. School akon mi 1 cheh leh Sugnu Hr. Sec. School a Arts Stream a kon mi 1 ana kinodoh ahi.

Manipur Assembly Election aumkit teng MLA 20 sang a tamjo neiding a NPP in kigotna nei

Imphal, Mar 4(ET): Tu le tua Manipur Government semlah a jao National People’s Party (NPP) MLA li hon Minister panmun atuhsoh kei utoh lhon in maban a MLA kitetna kum 2022 a umding ahi MLA 20 sang a lhomjo amulou ding uh ahi thu asei in 20 chung neidoh tei nading a kigotna anei uh ahi dan thulhut in asei in ahi. Tuni a party worker ho heng a Depurty CM chule NPP lamkai Y Joykumar in aseina achun tuni akipat athu a seitho bou hilou a mite ho tahsan theina ding a muthei anatoh pan ding in asei in ahi.

Tuni a NPP phutdoh a anapang Purno Agitok Sangma thi kal kum li lhina kingon NPP Manipur unit office a aman nauva asei ahi in PA Sangma natoh phat jeh in tuni hin NPP hi National level party ahidoh tan anatoh phat ho kisumil theilou hel ding ahi ati. Hiche kin ahin Manipur Health and Family Welfare minister L Jayentakumar, Unit President Thangminlen Kipgen chule party worker phat in pan ala uvin ahi.