India a Covid-19 ‘recovery rate 28.17% a akal vang’a nikhat sung’a natna...

India a Covid-19 ‘recovery rate 28.17% a akal vang’a nikhat sung’a natna kisei thah atamna pen hi

57
0
SHARE

India a Covid-19 ‘recovery rate 28.17% a akal vang’a nikhat sung’a natna kisei thah atamna pen hi

New Delhi, May 5: Sorkar in Tuesday nikhon achesa nidan 24 sunga Covid-19 case athah kisei hi nikhat sunga dinga atamna pen ahitai, tin asei uvin, ahin, government official hon gamsunga natna kon kijen dam hi 28.17 per cent a akal e, tin asei uvin ahi.

“Achesa nidan 24 sunga natna jeh a thi chule natna nei akihedoh thah hi tuchan geiya dinga atamna pen ahi’in, aphat cha report bol a case ho vettup ding hi thupi mong mong ahi. State phabep a gap aume”, tin Lav Agarwal, Joint Secretary, Health Ministry in Covid-19 chungchang a thuso miho akihoupi na a aseiyin ahi.

Natna neiya hi agom a 46,711 lhing ahitan, hiche lah a hi active medical supervision noiya adamlou 32,138 um ahi. Achesa nidan 24 sunga case athah 3,900 kiseiya chule natna jeh a thi 195 lhing ahi. Natna jeh a thi agom a 1,568 lhing ahitai. Chule achesa nidan 24 sunga adamlou 1,020 natna a kon adamdoh toh kilhon a, adamdoh jat 13,160 lhing a chule recovery rate hi 28.17% lhing ahitai.

Gamsung pumpi a lockdown hi March 25 ni a kon kipat ahi’in, tua hi phase athum channa ahitan, May nisim 17 chan chejom ding ahi. ‘Lockdown kichepi hi aphatna um ahi, doubling time hi lockdown masanga 3.4 days a machal ahitai”, ati. Chule natna nei hon akimuto pi ho hetdoh ding hi thupi ahi, tin jong aseiyin ahi.

“Adammo hon akimupi ho jouse hetdoh angaiyin, SARI le ILI symptoms surveillance hi containment zone ho a bol ngai ahi”, ati. Union Health Minister Dr Harsh Vardhan in nikho kipat til a India in coronavirus pandemic avesui jouvin, community transmission asodoh sah poi, tia asei ahi. Maharashtra gam a Covid-19 active case 14,541 aumtoh kilhon a India gam a natna akisei sang napen hijing nalai ahi. Agam sunga tuchan a natna jeh a mi 583 thi a chule mi 2,465 damdoh ahitai.

Gujarat a case 6,000 nailam a chule Rajasthan a 3,000 val ahitai. New Delhi khopi a mi 4,898 positive hi a chule ni phabep sunga mi 1000 val in natna anei kihetdoh be ahi. May nisim 1 a kon nisim 3 sunga case athah 1,030 kisei ahi. Mumbai, Pune, Thane (Maharashtra gam), Delhi le Gujarat gam a um Ahmedabad le Surat hi gamsunga dinga natna akisei khohna pen khopi ho ahi, tia statistics in asei ahi.

Ahmedabad a hi case 4,000 val um a, Gujarat gam a agom a case 5,804 um ahi. Mumbai tilouva Maharashtra gam a Pune khopi jong natna in sangtah a asuhboi ahi. Khopi hi ‘Red Zone’ tia kihe a case 2,000 val um ahi. Tamil Nadu gam a um Chennai khopi a jong coronavirus case 1,700 val um a, Tamil Nadu gam a agom a case 3,550 kisei ahi’in, hiche lah a mi 31 natna jeh a thi a chule mi 1,409 natna a kon damdoh ahitai.

Kangpokpi a juiding Lockdown 3.0 ‘guidelines’ kisodoh ta; police le KYU hon dan palkeh ho man

Kangpokpi, May 5(UNA): Kangpokpi district a Lockdown 3.0 palkeh a Auto Rickshaw 30/40 vel Kangpokpi police hon Kangpokpi Youth Union toh kitho in tunin aman uvin ahi.

Auto rickshaw hi atamjo gamkai miho a ahi’in, Kangpokpi DHQ a lhai ahi. Chule phabep hi Senapati, Nagamapal, Imphal le adang dang a kon ahi’in, Brig. Thomas Ground, Kangpokpi a akoi uvin, chomkhat jouva aleusah uvin alhadoh tauvin ahi. Lockdown 2.0 jouva Kangpokpi District Headquarter angai tobang dinmun ahi kit tan, jingkah nidan 6 a kon nilhah nidan 4 chan Monday nikho a kon dukan ho kihong pan ahitai.

District police hon akilha ong gari ho , kailhang le adang dang vetkolna chule social distancing le mask vetkolna a hahsatna lentah atoh uvin, vengsung khangthah hon police ho akithopi uvin ahi. Kangpokpi District Magistrate/DC Lalithambigai Kalidas, IAS in Lockdown 3.0 sunga Kangpokpi district a chepi ding ‘guidelines’ thah ho asodoh in, Secretariat: Home Department, Manipur government in asei toh kilhon a ‘A’ tia marked kibol hohi Kangpokpi district pumpi a tuni a kon kichepi pan ahi.

‘B’ tia kijih akilha ong hojong asodoh in, Covid-19 management toh kisai ahi. Guidelines thah a ‘A’ tia kijih ho a hi thuso aumkit kah a akikhah thil ho jouse kipe a chule ‘B’ tia kijihna a hi district sunga juiding Covid-19 vetkolna dinga thupeh ho ahi.

‘A’ kiti dungjuiya kailhang hohi jingkah nidan 6 a kon nilhah nidan 4 chan kihong ding chule jan nidan 6 a kon jingkah nidan 6 sung ‘public curfew’ umding ahi. Bus, taxi, auto rickshaw kiti public transport jouse kiphal lou ahi. District sunga government office jouse kihong dinga kiphal ahitan, natong hohi 50 percent attendance hiding chule school/college/themjilna mun ho kikhah ding, online-distance learning bou kiphal ahi.

Hotel, restaurant le adang dang ho health/police/government official/health workers/tourist atangden/quarantine facility a kimang ho tilou adang se kikhah ahi. Pathen hou mun, hou thu a kikhopna jouse jong kikhah nalai ahi. Private office hojong akihon ding akiphal in, ahivanga ‘social distancing’ ajui diu ahi.

State home department in phalna apeh tilou public transport ho kikhah ding ahi. Sam kitan na, spa le salon, sports, entertainment, academic, religion function, gym, bar, auditorium, assembly hall, swimming pool chule mipi kikhopna ho kikhah ding ahi.

Guidelines thah a ‘B’ kiti na a hi public place a mai kitom ding/mask bol tei dinga kisei ahi. Mipi kikhopna mun a mopohna neihon Ministry of Health and Family Welfare in apeh guidelines dungjuiya ‘social distancing’ kijui avettup diu ahi. Mi nga kalval kikhom theilou ding chule golvah kibolna kin ho a social distancing jui ding, atampen a akikou mi 50 kal hithei louding ahi.

Thi lhahna kin gon ho a jong social distancing juiya chule mi 20 kalval akikhop ding kiphal lou ahi. Milah a chil set ho akipe dan dungjuiya leu diu, ju don, kuwa, gutkha, khaini neh ho mipi lah a kikhah ahi’in chule ju, gutkha, tobacco le adang dang joh hon feet gup mi akikah tei nading uva avetsui uva chule dukan sunga mi nga kalval aumthei loudinga avettup diu ahi.

Natohna mun ho a mask kibol tei ding, chule social distancing jui ding ahi. Mi chom chom umna mun ho alutna le achedoh na a thermal screening, sanitizer le hand wash ho koi ding, natohna mun sanitize bol jing ding ahi. Chule private le public sector a natong jousen Arogya Setu aman tei diuva jong kisei ahi. Hiche app hi natong hon aman tei nadinga ama ama organization a lamkai ho mopohna kipe ahi.

Kum 56 chunglang ho, natna chom chom nei, naovop chule chapang kum 10 noilang ho in a umthim diu, kin khoh ahiloule dammo thu tailouva achedoh lou diuva jong kisei ahi.

Doctor hon Non-practicing Allowance (NPA) kilahdoh jeh’a kiphinna bol u

B.Lalboi Gangte

Ccpur, May 5 (ET): Manipur State Cabinet in gamsung’a Doctor hon Private Clinic ah atohlou na ding uva Non-Practicing Allowance (NPA) anakipe ji ngah ahi nung in tun NPA pehthah ahi kit ding nona in Manipur State sung pumpi’a kiphinna achelha in ahi. Manipur State Govt. in All Manipur Health Services Association in NPA um thah kit ding phutna in achesa 28 July 2019 leh 22 April 2020 in nona anei uvin ahi. Chuleh NPA ngehna Govt. in apompeh lou jeh in Doctor jouse in achesa May nisim 1 nikho chun kiphinna tobang in Badge vom kito pum in na anatong uvin ahi. Hiche nachung chon’a ngehna kinei ho pompeh ahilou leh tunikho (May 5) akon Surgical operations leh OPD services jouse kikhah ding ahi tin Govt. gihna anei uvin ahi.

Hiche toh lhon’a Churachandpur District sung’a Doctor hon jong office kai phatsung in Badge vom kibol in natohna anei uvin chuleh  gamsung pumpi’a Coronavirus jeh’a Lockdown sung in OPD service kha ahi jong leh Emergency tilou tuni chan in Doctor hon natoh ding nei hih jong leh angai bang in office akai jing uvin ahi. All Manipur Health Services Doctors Association in angeh hi State Govt. in apompeh’a aphat ding phongdoh hih lai jong leh Cabinet in maban’a vel vet thah ding leh koithah ding in agong uvin ahi. Hetthei khat chu NPA hi tu naicha dung’a chelha pan hi jong State sung in lahdoh in aum pai tan ahi. Ahin State Government in Doctors hoheng’a NPA peh ding chung chang’a condition chom chom apohdoh got ahi. Hiche chu Doctor khat chung’a NPA peh ding chu 20 percent hi ding ahi vang’a Doctor khat in NPA alah nomlou leh Government Doctor hina suboi louva private leh Clinic chom chom toh atohkhom thei ding ti’a State Cabinet in hiche hi chelhah peding in akigong uvin ahi. Chuleh Doctor jouse in NPA leh Private practice hi anop joh joh’u akilhen uva Bond khat sign sah ding ti’a agon ahi. Manipur Services (Revised Pay) Rules, 2010 (6th Pay) dungjui in achesa April 1, 2010 apat Doctor jouse NPA ading’a basic pay akipat 25 percent hi Chief Secretary lamkai nanoi’a kibol doh Fitment Committee in January 16, 2018 kum’a meeting aneinao’a Doctor ho kom’a NPA kipekha ahi. Hiche Fitment Committee thulhuh nachu State Cabinet in June 27, 2019 in phatsah na anapeh ahi in ahin  7th Pay Commission thutan nabang’a Doctor ho lhalo hi pre-revised ROP 2010 sang’a anem joh jeh in Doctor ho lhalo nasatah in asukhah tah jeh chun All Manipur Health Services Doctors Association in State Government heng’a July 28,2019 leh April 22,2020 in NPA hi koithah kit  ding in ngehna ananei kit uvin ahi.

Alangkhat’a Manipur toh kinai Nagaland leh Mizoram a Doctor ho Central NPA rate peh ahivang in Assam leh Meghalaya ah vang NPA pelou in Private a tong thei ding in phalna ape uvin ahi. Tuhin Manipur State sung’a Doctor Sanctioned posts pha jat hi Grade-I ah 20, Grade-II ah 151, Grade-III ah 675 leh Grade-IV ah 1617 ahi.

Lockdown lhakang ahi sung’a jui ding guidelines kisem CCpur Dist. mipin juilou

B.Lalboi Gangte

Ccpur, May 5 (ET):  Government in lockdown alhakang jep toh lhon’a dukan chom chom honthei ding akiti tah toh lhon in tunin (May 5) CCpur khopi sung adeh’a Tedim Road tou’a dukan chom chom akihong pan tan ahin Govt. in daan juiding’a thupeh anei ho mipi ajui analhom lheh in ahi.

Dukan honding toh kisai’a janni (May 4) chun CEO ADC CCpur lamkai na in DTC Hall, Tuibong mun’a dukan neiho jouse toh kihoukhom na ananei uvin hiche achun dukan neihon ajui ding’u daan anasempeh vang uvin tunin hiche daan ho jui’a dukan hong koima anaum pon ahi.

Alangkhat’a nilhah nidan 4:00 chan Khopi sung’a dukan hong ding’a thupeh aum vang in nidan 4:00 jou jeng ajong gari lhai le Kailhang mun ho akihong nalai jeh in CCpur District Police ding in hahsat na sang tah alhuh tan ahi.

Tu din mun vet in Manipur State hi Green Zone ah um ahi in Coronavirus Free State ah kiphongdoh hijong leh kivenbit na lam habol ding ti ahilai tah in Ccpur District sung akhohchet tan ahi.

State sorkar in Covid-19 ‘testing capacity’ kehlet ding ngaito

Imphal, May 5(ET): State sorkar in coronavirus natna a kon houidoh nadinga COVID-19 testing kibol na suhlet ding tupna anei ahi, tin senior official hon asei uvin ahi.

Manipur gam a natna nei mi 2 natna a kon adamdoh a Covid-19 nat umlouna gam ahitah vanga state sorkar in kigotna dinga ‘testing strategy’ anei ahi’in, gamsunga natna nei aum tahbeh hetdoh nading jong ahi, tin asei uvin ahi.

Tuesday jan nidan 6 chan a Covid-19 test kibol mi 608 lhing ahitan chule gamsunga state surveillance officer Dr I Tomcha Khuman, Integrated Disease Surveillance Project (IDSP) in status report apeh dungjuiya coronavirus screening kibol mi 2,00,515 lhing ahitai. Lilong a kon kum 65 a upa adammo pa adammo na a kon adamdoh a Regional Institute of Medical Sciences (RIMS) hospital a achesa April 21 nikho a ‘discharge’ ahi jouva kon gamsunga Covid-19 case athah kisei lou ahi.

Manipur gam a Covid-19 natna nei ho kijenna dinga JNIMS le RIMS, Imphal a isolation bed agom a 126 um ahi. Alangkhat a, Manipur gam pam a tangden ho gamsung a nungpui nading thu jong Chief secretary J Suresh Babu lamkaina meeting a aseikhom uvin ahi. Imphal khopi a meeting abol nauva Director General of Police LM Khaute le Administrative secretary hojong pang ahi.

Chief Secretary in asei dungjuiya, swab test le testing equipment mangcha ding mi ngaichat be ahi, ati. Chule ngaichat ahile Covid-19 nat jenna dinga manchah hi Chief Minister N Biren Singh phatsahna kila a lahbe thei ahi, tin jong aseibe in ahi.

KKL GHQ in UCM khut a thinglhang me pehdohna nei

Imphal, May 5(ET): Tunin KKL-GHQ in Imphal khopi sung’a UCM khut a thinglhang me jatchom chom truck khat pehdoh na anei uvin ahi. Hiche kingon chu “Extending Solidarity- a gift of love and passion for Hingminnasi Eikhoi” ti thupi noiya kibol ahi.

Hiche pehdohna kingon a chun KIM President Khaimang Chongloi le KKL GHQ Advisor Khailet Haokip in jong pan alalhon in houlimna jong aneilhon in ahi.Hiche program lolhinna ding’a pan la KKL block, Unit le Organisation adang dang ban a ADCC Churachandpur hon annche/annme pohnading a truck atodoh jal uvin KKL GHQ in kipathu jong aseiyin ahi.

MCPCR in RTI Act jana pe louva First Appeal application san pehlou

Imphal, May 5(ET): Manipur Protection of Child Rights (MCPCR) in Right to Information (RTI) Act 2005 jana ape pouvin, statutory body henga fund kipe thu toh kisaiya thu kidohna application asan louvu ahi. MCPCR staff hon asei dungjuiya, Chairperson, Commission in RTI application asanpeh lou ding uva thupeh anei ahi, ati. Ahivanga thuso mihon amu thulhut dungjuiya, RTI act kipalkeh na hitobang order kisodoh theilou chule RTI a kon thu kidohna application kisan peh lou hi gamsung dan kija louna ahi. Akisei RTI hi Naoremthong Laishram Leirak a cheng Khumanthem Dhanachandra, RTI activist in Manipur Commission for Protection of Child Rights (MCPCR) in January 1, 2020 ni a apeh ahi’in, NCPCR le Social Welfare Department in sum asodoh chungchang dohna aneiyu ahi. March nisim 18 nikho a activist pa hi MCPCR a hiche thu toh kisaiya First Appeal application pe a che ahi’in, staff khat in application alahpeh nomlou ahi. Dan dungjuiya, ni 30 sunga RTI application donbutna pe louva ahiloule RTI application sanglou/lalou Public Authority hohi themmo akichan a ahile sum phabep leu thei ahi.

Dhanachandra in thuso miho akimupi na a, MCPCR in application asan/alah loujeh a Manipur Information Commission douna a hehna kasem ding ahi, tin aseiyin ahi.

InSIDE North East le FC Goa Striker Seiminlen Doungel in Orphanage Home 4  kithopina nei

Imphal, May 5(ET): Covid-19 Emergency Humanitarian Relief Service banjom in InSIDE North East Organization in inko 200 val chung’a kithopina ananei ban jomg in Orphanage Home 4, Zion Home – Saikul, Loagos Home – Saparmaina, Royal Home and Stephenos Home, Leimakhong ho vilna leh kithopina jong ana nei uvin ahi. Hiche a chun ISL Football Star Player Seiminlen Doungel in jong sumle paiya pan alah chungchon in ama tahsa tah in thil hom in jong apangin chule nu le pa neilou changpang ho jong ngailutna neitah in tilkhouna le Covid-19 chung chang’a hilthemna jong ana neiyin ahi.

InSIDE North East leh Seiminlen Doungel in kithopina apehdoh ho chu Orphanage Home khat Anchang Kg. 100, Dal Kg. 30, Chini Kg. 25, Ahlu bag khat, Chi Kg. 15 Savon leh hand sanitizer aho ahin chule Comprehensive Covid-19 awareness banner poster khat cheh jong toh present anabol thauvin ahi. “InSIDE North East le Seiminlen Doungel FC Goa striker ten LOAGOS CHILDREN HOME nei hung vil uva chule kangaichat laitah uva Neh le chah a nei hung kithopi nao chung’a kakipah uvin Pathen phatthei na boh uhen” tin Kim, Incharge, Loagos Children Home, Saparmaina in ahoulimna in aseiyin ahi. Chule Nema chongloi SBCH, Chaiperson in aseina ah “Kahahsat lai tah uva neh le chah neihung kithopinau chunga kakipanau seijoulou kahin phonguve” ati.

“NGO InSIDE North East le Indian Star Soccer Player FC Goa Striker Seiminlen Doungel in Royal Children’s Home neihung vil uva kangaichat laitah uva neh le chah thalhing set neihung kithopinau chunga kipathu kahin phonguvin chule Chapang hotoh jong ngailutna neitah a nakihoulim nau chun chapang ho hatah in atilkhouvin alunglen chomlheh uve tin Thangboi Lupho, Head of Royal Home in akipana thu anaseiyin ahi. Rev. Paongam Chongloi, Zion Children Home, Saikul in aseina ah “Zion children home hi funding ima neilouva ngailutna le Pathen natohna a kibol ahin Covid-19 lockdown jeh a hahsatna sangtah kato laitah uva InSIDE North East le Seiminlen Doungel in ngailutna neitah a neihung vil nao kakipah uve tin kipathu aseiyin ahi.

Hitobang thilpha kiboltheina hi Goonj, Delhi, KFB-Austria, Youth Involve le individual donors ho support jal ahin chule Lalithambigai, DC Kangpokpi in Curfew Pass eipeh uva chele vale boilouva thilpha kaboltheinau chunga jong kipathu kasei uve tin Hejang Misao, Director InSIDE North in aseiyin ahi.

Police hon gucha mi 2 man

Imphal, May 5(UNA): Achesa April nisim 24 le 25 jan a Thoubal district noiya um Lilong Haoreibi Awang Leikai Tera Makhong Upper Primary School a thil chom chom gu a pang mi ni Lilong Police station a police team hon Tuesday sun nidan 10 don a aman tauvin ahi.

Hiche thu toh kisaiya Lilong police station a FIR akijihlut jouva police hon mi 2 amat u ahi. Akiman teni hi Syed Rizwan (27), s/o (L) Md. Habibur Rahaman, Lilong Haoreibi Awang Leikai a cheng le Md. Feroj Khan @ Atollei (30), s/o (L) Md. Anwar Ali, Lilong Haoreibi Chegaipokpi, Thoubal district a cheng ahi. Police thulhut dungjuiya, mi ni hi Inspector O Ajit Singh, OC/ Lilong police station lamkaina chule SI Md. Isha Khan, Lilong Police station kithopina a police team hon amat u ahi. Police team hon Lilong Haoreibi Awang Leikai Tera Makhong Upper Primary School a kon kigudoh a gas cylinder 1, gas stove 1, plate (kong) 50, bucket 1, electric bulb 7, thil agoidi na le akoina 1 chule ceiling fan 1 aman uvin ahi.

Hetthei khat chu school akichomna thilsoh jouva school authority hon Lilong Police station a themmona neiho akimat nadinga hehna asem u ahi. Hiche jouva police team hon themmona neiho mat dinga ahol jingu ahi.

 

Khamnathei ‘heroin’ gram 590 kiman

Imphal, May 5(UNA): Lockdown sunga Churachandpur police hon Sugnu-Churachandpur lamlen a Monday nikhon dan in aphal lou khamnathei tamtah chule khamnathei po a mi 2 aman uvin ahi.

Akiman thil holah a hi heroin powder kikoina savon case ni le plastic khat pang ahi. Akiman teni hi Paominlen (29), s/o Jangneilun, Moreh Ward No. 2 le ajinu Nengdeidim (28) ahi. Police thulhut dungjuiya, Sugnu lamlen, Churachandpur Town lang jon a Monday nikho teng Bolero gari a khamnathei kipo ding ahi ti thuguh police hon amu masat ahi.

Additional SP (Ops)/Churachandpur le OC Churachandpur police station lamkaina a Churachandpur police team holeh Women Police hon SP Churachandpur Amrita Sinha thuhilna noiya mun chom chom a mobile check-post asem u ahi. Jan nidan 7.50 don a ginmo Bolero gari akang (registration number MN06LBO817) khat Red Cross Road mun a amu uva, khol dinga akha u ahi. Asunga tou ho aginmo jeh uva Churachandpur police station a apuiyu ahi.

Gari phatah a akhol uve team hon gari amailang touna a polythene vom amudoh u ahi. Thudohna anei ule akipo khamnathei hi Red Cross Road a Manneihoi (44), w/o Zamkholian peh ding agot u aseidoh u ahi, tin thulhut in aseibe in ahi.

Khamnathei apeh nading nu kiselmang thei ahijeh a police team hon women police team ho panna a apet pet a Manneihoi holna a operation apat pai uva, a inmun a kon amat uva, police station a apuiyu ahi. Thudohna anei be ule khamnathei akiman hi amaho a ahi aseidoh u ahi. Akiman khamnathei heroin hi gram 590 a gih ahi.

Thil kipohna Bolero gari chule heroine powder amat uva, chule FIR ajihlut u ahitan, aban a thukholna chelha jing ahi, tin thulhut chun aseibe in ahi.