Independence Day ni 2 hita (Naga leh meilhei ten ama ama Independence...

Independence Day ni 2 hita (Naga leh meilhei ten ama ama Independence day kinit jingtau)

108
0
SHARE

Independence Day ni 2 hita
(Naga leh meilhei ten ama ama Independence day kinit jingtau)
Lhang phong tah a ni 2 kijom thel’a Independence chuom-chuom kimanna hi North East a Nagaland leh Manipur ahung hitai. India dia August 15 hi Independence Day ahi alen aneovin ahet ahi. Ahin India sung’a um kiukeova 14 August jong “keiho Independence Day ahi” tia kimangji hi abol hon aboljohsah uleh nikhat leh hung boilo maithei u ahi. Manipur leh Nagaland a Independence Day August 14b ni’a mangji ho hi govt hetpehna ahilou vang’a akitoh theilou khat umjeng ahi. Hichu, India gamsung’ah ka umpoi tina ahi. India leh Pakistan nin thakhat chetna Independence anamu lhon vang’a Pakistan nin 14 August hi Independence Day a anit ahi.  India kivaipohna leh govt nuoija um kiukeuva India sang’a nikhat masa a chamlhatna kanamu ahitai kiti hi India govt chouna tobang jong ahi. Kumdang’a bang’in Nagaland leh Manipur a jong Naga leh meilhei hon August 14 nikhon ama ama independence Day ana nit uve. Naga Students Federation ho vailona’a Nagaland leh Manipur a Naga hon independence day anit got u Nagaland leh Manipur State govt tenin adon cheh lhon ah jahdana thupeh ananei lhon’e. Ahin abol hon abol chabep u akibol thou thou kit uve. Manipur phaicham’a meilhei hon jong meilhei lengpa jingun hina’n Manipur independence day 14 August ni’n ana mang uve. Hiche independence day nikho chom’a kimang hi amin maimai hijongleh chamlhatna ponlap, gamtum kahi tia ponlap tum kikhaidohji hi angai hilou ahi. Mizo independence Movement kipat til laija MNF hon chamlhat kahitaove tia Aijawl khopi’a MNF ponlap anakhaidoh uleh Indian Airforce hon Aijawl khopi bomb analhah khumlo u ahi. Tua Manipur leh Nagaland a independence day kanitne tia ama nam ponlap khaidohji ho donlouva kikoi hi govt kihetmosah hijongleh chapang kichep dan’a agel jong hidi ahi.
India in chamlhatna amukal kum 72 jouva tukum August 15 ni’a India Independence kimanna ajatchom behna hi Jamu & Kashmir (J&K) leh Ladkh a India ponlap kihaidoh chu ahi. Ladakh gam jaona’a J&K chu India nuoija State khat anahi vang’a adang dang ban’a ponlap tum ananei u chu Article 370 kiladoh a Union Territory ahung hipat uva agam uva India ponlap agam hung kikhaidohpan ahitai. North East a thingnoi thingchung Independence day Boycott bol loi aumji jong angaina khat ahitai. Ahin Assam a thingnoi hon boycott bol’a koima jaolou dia aseivang uva Assam Journalist Association hon koiman kichatna neilouva mijousen Independence day kimanna a ajaodiuva anasei u ahi. Manipur a Babysana thi thua Thangmeiband AC MLA Kh. Joykisan nin tuchung India Independence day kimanna’a kajaolou di (boycott) anatia ajaolou chu kon thupitah a ageldi jong ahilou jeh in amale ama kisuneo bep tithei ahi. Manipur a ana kibol khalou district phabep kilhendoh hoa Independence day program a chief guest dia Minister/MLA loikhat ana kisol chu ahi. District thah ho lah a Tengnoupal leh Kakching a Minister kisol’a district thah dang hoa DC chief guest kihisah chu ipi kibolna ahikit tadem ti hi ahi. Thingnoi loikhat nin boycott abolna mun umjeh a Minister/MLA kisol lou ahileh datmo umtah ahi. Ipiham khat kijep hile kilom jeng ahi.