Imphal-Mandalay kah a huikong Nov 23 a pat leng pan tading

Imphal-Mandalay kah a huikong Nov 23 a pat leng pan tading

1206
0
SHARE

Imphal-Mandalay kah a huikong Nov 23 a pat leng pan tading

Imphal, Nov 8(ET): Manipur le Myanmar kikah huikong a November 23 a pat leng mat pan ding ahitai. Hiche hi ni 7 sung chelha ding Sangai golnop  umding kon a leng pan dia kigong ahi e. Chule hiche tohgon hi chief minister N Biren Singh lung a umjing tohgon khat chu ahi in jannia chu online ticket portal hondohna jong anei ahi.

Imphal le Mandalay kah a leng ding huikong chu Yangon a pansa Air KBZ te huikong hiding, Imphal Bit Tikendrajit International Airport a Wednesday le Saturday seh a lengdoh ding, ticket man hi Rs 14000 a kipan ding ahi e tin thulhut chun aseiye.

Hiche E-Booking Services hi Department of Transport, Government of Manipur vetkol nanoi a umding ahidol jong Singh in twitter a atahdoh ahi.

Manipur transport director Mercina R Panmei in huikong len pat ding hi South-East Asia gam a kinaitah a ahin umsah ding ahi e, ati.

Geldoh ding chu Imphal-Mandalay huikong len sah dia KB Enterprise le Air KBZ in July 3 nia chu kinoptona aneilhon ahi.

Hetding chu Mandalay International Airport hi domestic huikong 11 le international huikong 19 soldoh thei ahikit e.

Imphal Airport hi international airport ni channa Guwahati bantah a chule Northeast a dia airport mitamna athum channa, 2010 a pat Mandalay ho pa domestic passenger 20 percent le international flight a tou jong kumkhat sung a 60 percent phajou ahi.

RN Ravi in Army Chief kimupi

New Delhi, November 8: India sorkar leh Naga thingnoi kiloikhom hon gamsunga thingnoi natoh suhthip nadinga kihoulhahna asem masang uva Indian Army Chief of Staff in Thursday nikhon Nagaland Governor kouna aneiyin ahi.

General Bipin Rawat in Nagaland Governor leh Centre leh NSCN-IM kihouna a Interlocutor a pang RN Ravi akimupi in ahi. “Chief of Army Staff pa hi Lieutenant General Anil Chauhan, Army Commander, Eastern Command in ahin kilhonpi ahi. Akholjin na a senior military officer leh ceasefire monitoring group chairman jong akimupi e”, tin Eastern Command a Public Relations Officer in aseiyin ahi.

Gamgi juiya security chungchang hojong aseikhom uvin ahi. Centre in October nisim 31 nikho a Nagaland thingnoi hotoh kihoulhahna anei loulai ahi’in, kinoptona thuchaina akisem  masanga Assam, Manipur leh Arunachal Pradesh gam a stakeholder jouse dohna anei masat ding ahi. Nagaland gam a um thingnoi kiloikhomna lenpen NSCN-IM hotoh Centre sorkar in kihoulhahna anei thei loulai ahi. Ravi in kihouna asuhsao be jing ahi, tia NSCN-IM hon ngohna jong aneiyu ahi.

Sinlung Hills Council member hon kihahsel na ana nei tao

Aizawl, Nov 8: Sinlunh Hills Council a kilhendoh member ho chu tuni in kihahsel na akinei sah in ahi. Member ho chu phat chom khat ading a council speaker ding a kilhengdoh HC Lalmalsawma in kihatsel na ana nei sah ahi. Hiche council sung ahi member 12 lhendoh na kinei ahin, kihahsel na kingon chu Aizawl DC office mun a ana kibol ahi.

Lalthlamuana Hmar,  Mizo National Front (MNF)-Hmar People’s Convention (HPC) alliance candidate, Sakawrdai North constituency akon chu council  Chief Executive Member (CEM) ding in lhendoh na ana kinei in ahi. SHC in Lalmalsawma Darngawn chairman ding in lhendohna ana nei uvin chuleh Lalvenhima Hmar  chu deputy chairman dingin lhendoh na ana nei uvin ahi.

Lhendoh na kinei jou in Lalthlamuana Hmar in H. Lalengzauva, C. Lalnuntlanga le Ricky Lalremsanga, MNF akon ho chu Executive Member ding in lhendoh na ana nei in chuleh HPC akon a Executive Member khat lhendoh na kinei be ding ahi akiti. Council election masa pen kibol na achun MNF-HPC alliance in seat 10 lam a goljona ana nei uvin chuleh independent candidate 2 jong ana kai doh in ahi.

Framework Agreement in gamsung atohkhah nalou ding’a mun phabep a human chain leh kiphinna jat chom chom kibol jing

Imphal, Nov 8(ET): Naga Framework Agreement in gamsung kipumkhatna ahin tohkhah ding dinmun ho’a kon kivenna leh kigin tohgom in COCOMI in chamtah in kiphinna leh kalsonna jatchom chom aboljom jing’in ahi. COCOMI kalson tosot vetsahnan Patsoi part 3 cheng mipiten KBS Makoi Langjing brick field a natong ho, Langjing, KBS Brick Plant Langjing, KBS Industry Patsoi Lamkhai leh Patsoi Meira Paibi hon toumun kiphin abol uvin chule Patsoi area kimvel a kijotna jong aneiyuvin ahi.

Apunba Yaipha Thourang Nupi Lup, Uripok Mayai Leikaigi Nupi hon Deputy Chief Minister Y Joykumar chenna inn anokhum uvin ahi. NSCN-IM leh India Government kah Peace Talk kithulhuhna hin gamsung ahin tohkhah louna teiding’in State Assembly toukhomna kouloi hen tin aseiyuvin ahi. Deputy Chief Minister pa akimupi jou uvin nupi kiloikhomna hon Manipur gam kisukeh theilou ding ahi tin kholhang asam uvin ahi.

COCOMI kalson tosot vetsahnan Johnstone Higher Secondary School a simlai hon tunin School gate a kipat in human chain asem uvin ahi. Hiche a chun NSCN-IM leh Centre kah Peace Talk kithulhuhna in iti jongle gamsung kipumkhatna ahin tohkhah theilou ding ahi tin kholhang jong asam uvin ijem tia kithulhuhna in Manipur kipumkhatna ahin tohkhah a ahile kiphinna khoutah kibol ding ahi tin hiche School a dia Social & Culture Secretary Manichand in gihna aneiyin ahi. Inspire Science Academy leh Bhaktivedanta Institute Mission Higher Secondary School simlai honjong Tiddim Road gei ah human chain asem uvin “Manipur kipumkhatna kitongkha theilou ding ahi”, “Manipur hingsot hen” ti thucheng hojong asam uvin ahi. Bishnupur Public School simlai honjong Tiddim Road National Highway No. 150 gei ah human chain asem uvin, lamlen keh langkhat akhah uvin ahi.

Konung Mamang a um Lamyanba Shanglen gate a jong Leimarolsinggi Seirol kiloikhomna ho makainan Peace Talk in Manipur gam kipumkhatna ahin tohkhah theilou ding ahi ti ngehnan kigin tohgom in toumun kiphin abol uvin ahi. Kum tampi hung chelha Naga Peace Talk thuchaina umding hi lemna akineiyin ahinlah hiche hin Manipur kipumkhatna ahin tohkhah theilou ding chule hiche chung chang a COCOMI kalsonna jouse kitosto jing ding ahi tin Leimarolsinggi Seirol a General Secretary Ningthoujam Premila in aseiyin ahi.

Sana Konung Meira Paibi Lup holeh Maharaja Budhachandra College simlai honjong Konung Mamang a um Govindaji Gate ah kigin tohgom in toumun kiphin abol uvin ahi. Akiphin nauva chun “Manipur kipumkhatna kisukeh theilou ding ahi”, “Manipur hingsot hen” tiho asam uve. Kongba kailhang ah jong Kongba Keithel, Apunba Nongthombam Leikai honjong kigin tohgom in toumun kiphin abol uvin ahi.

Keibi High School simlai holeh jilkung honjong NSCN-IM leh Centre kah a Peace Talk kithulhuhna in gamsung kipumkhatna ahin tohkhah louding ngehnan Human chain asem uvin ahi. Gamsung mipite deilou kithulhuhna umlouna ding’in aseiyuvin, Manipur kipumkhat kisukeh theilou ding ahi tiho jong asam uvin ahi.

Sugnu area a cheng mipiten jong nitin natoh ho bol louvin jingkah nidan 10:00 a kipat chun kigin tohgom in toumun kiphin abol uvin ahi. Sugnu kailhang akikhah in, bank leh Oil pump hojong akikhah’e. Sugnu area sung’a um school leh themjilna mundang dang hojong akikhah sohkeiyin ahi.