Imphal khopi sung’a Bazar ho kikhah kit tading; Gampam a tangden ho...

Imphal khopi sung’a Bazar ho kikhah kit tading; Gampam a tangden ho train ticket man sorkar in pohdoh dinga cabinet in kilolna nei

74
0
SHARE

Imphal khopi sung’a Bazar ho kikhah kit tading; Gampam a tangden ho train ticket man sorkar in pohdoh dinga cabinet in kilolna nei

Imphal, May 6(ET): Guwahati Manipur Bhavan a tangden tu naicha gamsung a ahin puilhung hou bus bahara man sangtah akila e, tia demna thu tamtah akisei jouva State Cabinet in Wednesday nikhon Northeast chan hung lhun nadinga train ticket man jouse pohdoh dinga kilolna anei tauvin ahi.

Chief Minister’s Secretariat mun a Chief Minister N Biren Singh lamkaina a state cabinet in tuni jingkah a meeting anei ahi’in, opposition Congress party in hiche thu a sorkar demna aneijing ahi. Congress lamkai Sonia Gandhi in mi gam a natong a che ho ama ama gam alhun thei nading uva bahara ho pohdoh peh dinga ana phondoh ahi’in, hiche jouva Narendra Modi sorkar in bahara 86% hi India sorkar in apohdoh ding ahi, tia asei ahi.

Imphal khopi a jong opposition lamkai hon bus bahara sangtah akilah jeh a state sorkar demna thu aseijing ahi. Cabinet in tuni a akihou nauva Northeast gam chan bahara kipodoh ding, hijong le Manipur gam hunglhun nadinga alut ding ho amahon akipohdoh ding uva thulhuhna anei ahi.

Alangkhat a, state Cabinet in doctor hon special pay a Non-Practicing Allowance apeh ding uva thumna anei ujong sanpeh dinga phatsahna anei tauvin ahi. Chule gam dang dang a atangden gamsung miho hung kile diu ahijeh le kivenna dinga Imphal khopi a um Ima Market, Paona bazar le Thangal bazar chule kailhang len len ho kha dinga jong Cabinet in thulhuhna anei tauvin ahi.

Thinglhang gamkai ho ‘lockdown’ a kon kingaijang ding ahi. Gamsunga Qauarantine center ho kivetkol dan thu jong Cabinet in aseikhom in, gampam a kon hunglhung Covid-19 hidinga ginmo hilou chule symptom neilou ho dan dungjuiya ‘home quarantine’ bol ding a asei uvin ahi. Ahivanga aveng in Home quarantine bol ding ajahda/aphal louva ahile amaho hi Community Quarantine a umdiu ahi.

Community Quarantine Center a lupna touna, lhunna ding hohi abon a vengsung club, village authority le adang dang hon ama ama MLA le Deputy Commissioner panna a agon tup diu ahi. Hijong le state sorkar in Community Quarantine Center a umho hi nikhat a aneh achah ding uva dangka 200 cheh ato ding ahi. Deputy Commissioner hon local club ho a kon center a umho neh ding agon peh diu ahi.

Cabinet in Lockdown phase II a kiphongdoh akikhah ho jui jom dinga tu masanga thuphon anei ahi’in, ahivanga May nisim 17 chan hi Sunday nikho tilou nidang jouse a wholesale market ho kihong dinga dan semphatna aneiyu ahi.

Cabinet kilolna dungjuiya May 17 chan chepi ding Lockdown guidelines athah kisodoh

Imphal, May 6(ET): Disaster Management Act, 2005 section 20(2) 9 (a) noiya State Disaster Management Authority a State Executive Committee Chairperson thaneina akipeh dungjuiya, achesa May nisim 3 nikho a May nisim 4 nikho a kon kal ni sung juiding guidelines thah ho ana sodoh u ahi’in, guidelines kisodoh masa hi State Cabinet in Wednesday nikho a gelkhomna aneikit ahi.

Manipur gam pam a tangden ho ahung kile dingu chule gam kinaipi ho a dinmun ho cabinet in avetkhom a thulhuhna athah aneikit uvin ahi. Hiche toh kilhon a State Cabinet in thulhuhna anei dungjuiya, Chairperson, State Executive Committee, State Disaster Management Authority hina a tha kipeh Governor in amanchah a sung pumpi a Lockdown phondohna aneiya chule Annexure I a kipe hobou Lockdown a kon kingaijang ahitai. May nisim 17 chan ahiloule thupeh aumkit kahse a kichepi ding ahi’in, Annexure II a hi Covid-19 Management thu hita chule Annexure III a hi Standard Operating Procedure (SOP) a ‘social distancing’ kipe ho thu pang ahi.

Governor in Wednesday nikho a thuso aneihi nisim 3 nikho a thuso khel a kijui ding ahi. May nisim 6 a kon nisim 17 sunga kichepi Lockdown sunga akiphal ding thil phabep hohi- angaicha khoh (essential goods) ho supply kibolna ahi’in, hiche a hi home delivery (essential commodities), niseh a kimangcha grocery thil ho kijohna, Sunday nikho tilouva nidang jingkah nidan 6 a kon nilhah nidan 2 sunga district jouse a me kijohna, thei, nga le ahsa ho kijohna hon ding jong pang ahi. Mipi lah a che doh hon mask akibol teidiu chule ‘social distancing’ ajui diu ahi.

Wholesale dukan ho Sunday nikho tilouva Deputy Commissioner in phalna apeh dungjuiya ‘retail dukan’ bol ho kom a thil ajoh thei nading uva kihong ding, chule gari a che le hi ‘pass’ neiho tilou adang kiphal lou ahi.

Anichanna a thil kipohna (cargo le goods) ahi’in, thil pohna gari jouse Mao, Jiribam le Jessami interstate border agalkai diu kiphal ahi. Thil kipohna truck ho a driver ni le helper khat kiphal ahi. Gamdang a kon gamsung hunglut a truck driver hole helper hon Standard Operating Protocol ajui tei ding uva Home Department in April nisim 7 nikho a thupeh anei ahitai. In hung koitobang aumle Health Department thuhilna banga ‘Home quarantine’ a umding ahi. Highway a truck semphatna ding chule cha kijohna (dhaba) hon ‘social distancing’ ajuiya akihon ding kiphal ahi.

Athum channa a Lockdown a kingaijang hi tahsa dammo na thu toh kisai ho ahi. Hospital, nursing home, clinic le dispensary ho kihong ding, pharmacy le lou kijohna jouse (Jan Aushadhi Kendra le Medical equipment shop panna) kihong ding, Medical laboratory le collection centre ho, veterinary hospital, dispensary, clinic chule pathological laboratory, vaccine kijohna le supply kibolna toh kisai jouse kiphal ahi.

Alichanna a mipi manchah jing akhoh ho ahi’in, hiche a hi LPG (home delivery) a akihopna, postal service, Telecommunication le internet service, waste management sector/water/sanitation, petrol pump ho (hiche a dinga order achom kisodoh ding ahi), phailei bol na toh kisai ho, thinglhang langa loubol miho natohna, phailei bolna dinga angaicha thil ho lahna a pang agency ho jong kilha ong ahi.

Fisheries, nga kul kivahna le nga mat, fish feed plants, animal husbandry, bongnoi thil kilahna, kisem le kijohna, ahcha, vohcha kivahna le dairy development, gancha an kisemna hojong pang ahi. Finance sector a RBI le RBI regulated financial market ho, bank branch le ATM chule Business correspondent ho kihong ding chule social sector a chaga, chatmo, lunggel bukimlou, tehse, meithai, chenna ding neilou ho dinga kihong Home ho, observation home (juvenile home), Old Age Pension/widow pension/freedom fighter pension ho, Anganwadi centre (neh kihopna) ho ni 15 sunga khatvei kihong ding, chule beneficiary ho a inmun a thil athah pehdiu ahi.

Themjilna mun jouse kha dinga thupeh aumvang a online teaching kiphal ding ahi. Thinglhang gam a MNREGA natoh kiphal ahi’in, ahivanga mask akibol cheh uva chule social distancing ajui diu ahi. Print le electronic media, courier service, private security service, food processing unit, mineral water manufacturing and distribution, restaurant le outlet ho home delivery service jong kiphal ahi.

MSME noiya thinglhang gam (municipal corporation limit pam) a lamlen chule railway project kisahna natoh ho chelha ding, natong ho amun a um hiding, apam (natohna mun pam) a kon kipolut louding ahi. Sorkar natong ‘exempted category’ hole emergency service ho private gari alhai ding kiphal ding ahi. Government office jouse kihong ding, Under Secretary noilang rank ho rotation a office che diu, attendance 33 percent hiding ahi. Office a visitor kiphal louding ahi.

Annexure-III a hi Office, factory, natohna mun ho a Social Distancing jui ding thu kipe ahi’in, hiche mun ho a building lutna gate, cafeteria le canteen, meeting room, toilet, lift, manchah le adang dang ho abon a ‘disinfect’ kibol ding ahi. Natohna mun lut le potna a thermal scanning, chule natong ho medical insurance, khut sopna ding mun lut le pot na a koiding, mi 10 kalval panna meeting bol louding, touna mun alhompen a feet 6 a kikah ding, chule lift a mi 2/4 kalval kiphal louding (size dungjui), gutka, dum thil ho kha dinga jong kisei ahi.

Anaivel a um COVID-19 damlou ho kijenna dinga authorized kibol hospital/clinic ho het a, natohna mun a hospital ho list aphat tin a koi dinga jong aseibe uvin ahi.

Guwahati a tangden mi 42 tuni Imphal khopi hunglhung diu

Imphal, May 6(ET): Guwahati, Assam a tangden gamsung miho puidoh be nadinga Sagolband Ward No VII a Municipal Cooperator RK Jiten Singh in Sagolband MLA RK Imo Singh chenna inmun a konin Tuesday nikho chun bus ho vailhahna anei tan ahi. Amaho hi May nisim 7 teng Imphal khopi hung lhung ding ahiuve.

Sagolband Constituency Progressive Committee (SCPC) in MLA RK Imo Singh lamkaina noiya thuso anei dungjuiya, Lockdown sunga Sagolband miho phatchomna dinga pan chom chom kila ahi, ati. Gamsung mi tamtah achesa March nisim 25 nikho a kon Lockdown jeh a gam chom chom a tangden ahi. Amahon hahsatna sangtah ato hou kive a, Imo in Guwahati khopi a tangdeng Sagolband Assembly constituency a cheng mi 42 puidoh nadinga bus 2 asol ahi, tin thuso chun aseibe in ahi.

Bus hi ‘hired’ kibol ahi’in chule atangden ho puidoh nadinga state home department a kon angaicha phalna ho kila ahitan, sum lut nading hohi Imo Singh in apohdoh ding ahi, ati. State Health department in guidelines asodoh dungjuiya, amaho hi ahunglhun teng ule bol dinga lom ‘quarantine procedure’ hojong kibol ding ahi, ati.

Phase aban a Sagolband Assembly constituency MLA in Northeast stat chom chom panna a gam dang dang a tangden ho nungpui nading tohgon anei ahi. Kota, Rajasthan a tangden ho puidoh nadinga angaicha permit ho lah nadinga natoh chelha ahitai, tin thuso chun aseibe in ahi.

Covid-19 positive aume tia jouthu kithan jeh a mipi kichatna anaum; jouthu seithang mikhat police hon man ta

Imphal, May 6(ET): Kwakeithel a numei khat coronavirus positive ahi e tia thulamleng um a chule mikhat in social media a tuni a photchenna neilouva jouthu atahdoh in, gamsung mi tamtah lungjinna anasem doh in, mi tamtah in thuso miho henga athu dohna chan aneiyu ahi.

Hiche chungchon a Covid-19 positive case aume ti ginmo thu akisei jeh a Imphal khopi a Thangal le Paona bazar jong apet pet akhah tauve, tia jong kisei ahi. Ahivanga, thu kisei hohi abon a jouthu ahi kiedoh ahi. Kwakeithel munvel, Tiddim road a numei khat atouna gari in accident ato jeh a ambulance a apoh ule, hiche a kon numeinu hi Covid-19 positive ahi tia jouthu kithang pan ahi.

Alangkhat a WhatsApp group a voice note khat upload akibolna a, Thangmeiband a Covid-19 positive case aum’e, tia kiseiya, hiche jeh a Covid-19 frontline worker hon thutah kholna aneiyu ahi. Voice message hi kum 38 a upa Irengbam Amu @ Amuyaima Singh, Thangmeiband Meisnam Leikai a cheng pasal khat in upload abol ahi’in, athusei hi thutah ahilou kihedoh ahitai.

Imphal West Officer in-charge le ama team hon mipa aholdoh uva tuni jingkah a amat u ahitai. Alangkhat a, Thangal bazar le Paona bazar a mipin ‘social distancing’ ajuilou police team hon avettup joulou jeh a mipi anocheh a, dukan ho kikha lo ahi. Mi tamtah mask beiya hungdoh ahi’in, sorkar thupeh toh kitohlou ahi. Sorkar in niseh ngaichat ho kichoh thei nadinga lockdown relaxation abol vanga, dan juilou atamval jeh a police hon alona je ahetlou phat a dukan akha u ahi.

‘Verification process’ kichai teng MGNREGS beneficiary dihtah hobou passbook peh dinga Minister Biswajit in bank official ho thuhilna nei

Imphal, May 6(ET): Rural Development and Panchayati Raj Minister Thongam Biswajit Singh in Gram Rojgar Sevaks in beneficiary ho verification process ajo jo teng le Mahatma Gandhi National Rural Employment Guarantee Scheme noiya beneficiary dihtah ho bank passbook asodoh peh diuvin bank official ho Wednesday nikhon thuhilna aneiyin ahi.

Imphal West, Imphal East, Bishnupur, Thoubal, Kakching le Jiribam (phaicham district) a um bank ho chule Rural Development Panchayati Raj department official hon meeting anei nauva Minister pa in thupeh anei ahi. Meeting a, nikho tha man lamdih louva kilahna umho venna ding tohgon semding ho thu jong asei uvin ahi.

Card holder ho verification akijo tengle pass book peh ding, chule niseh tha man lahna dinga beneficiary ho amaho tah, job card, ATM card le bank passbook ho official hon angaisah diuva aseiyin ahi. Micro ATM booth jong vengsung jouse akihon theina dinga meeting a asei uvin, card nei dihtah hon lockdown sunga sum akilah nauva hahsatna ato lou nadiiu ahi.

District Programme Coordinators (DPC) in natohna mun a government guidelines le protocol ho akijui tei nadinga avettup diuyvin Minister Biswajit in aseiyin, chule natong hohi face-mask, hand sanitizer hop peh ding, dan dungjuiya social distancing ajui diu ahi, ati. Panchayati Raj Institution member hon Gram Rojgar Sevaks hotoh verification process aumsunga kithu to na anei diuvin temna aneibe in ahi.

Avel a vetphatna (cross checking) akibolna a Verification process a adihlou a thil kibol aum akihetdoh a ahile mopohna nei GRS ho chunga action khoutah lah dinga jong aseibe in ahi. Tuni a um ‘co-ordination meeting’ a Additional Chief Secretary MH Khan, DPC ho le RD & PR official chule adang dang jong pang ahi.

Private school hon staff ho lo apeh diuva simlai kiloikhomna hon ngehna nei

Imphal, May 6(ET): Simlai kiloikhom hon Lockdown sunga private school a jilkung ho, non-teaching staff chule van le bus service bol ho private school hon lo apeh diuvin temna anei uvin ahi.

Apunba Ireibakki Maheiroi Singlup (AIMS), All Naga Students’ Association Manipur (ANSAM) le Democratic Students’ Alliance of Manipur (DESAM) in thakhat a thuso anei nauva, private school a natong staff tamtah in gamsung pumpi lockdown ahijeh a hahsatna lentah ato u ahi’in, private school a staff ho gentheina hi mopohna nei school authority le state sorkar in agel nem peh loudinga temna jong anei uvin ahi.

Lockdown sunga tuition fee le van fee kilah hi kisang louding ahi. Hijong le private school a staff ho lo akipeh louhi amaho dinga hahsatna lentah ahi. Hiche jeh a school authority le state sorkar in dinmun agelkhom a chule athu aseikhom a, alampi asem dinga temna kinei ahi, ati.

Private school staff hohin ama ama school a lo lhomcha cha bou amu u ahi’in, hiche jeh a mopohna nei authority ho kithopina angaichat u ahi, ati.

Moreh Hospital akon Suspend kibol doctor hon thupeh nitlou

Tengnoupal, May 6(ET): Manipur govt in suspend ana bol jou nung a suspend jou a jong hospital munna um ding a thupeh ana nei jeng vang in suspend kibol Dr N. Upen singh, Specialist (Anesthesiology), Dr. Ph. Angkhong Rongmei Specialist (Surgery) le Dr. Th. Bharat singh specialist (Bio-chemistry) hon thupeh nahsah lou a akoi utoh lhon in tu chan in hospital a ahung hih lai uvin ahi akiti.  Hetthei khat chu state govt in duty bol lou leh a posting namun uva natna len laitah a umlou jeh a doctor thum ho chu suspend ana bol u ahi. Doctor ho in thupeh anitlou na u chung a tuni in Moreh khopi sung a um nam chom chom kiloikhomna lamkai ho in kihoukhomna khat ananei uvin ahi. Kihou khomna achun  lamkai ho in govt in Moreh khopi sung a mipi ding gel khoh na a hospital asah a hiche a ana ho vesui ding a doctor ahin koihon, thupeh nitlou a gamsung mipi ding gelkhoh lou a aum uhi vangset umtah ahi tin ana sei uvin ahi.

Lockdown guidelines mipi atamjon ajuilou jeh’a dukan ho aphat louva kinung khasah

B.Lalboi Gangte

CCpur, May 6(ET): COVID-19 toh kisai’a Manipur State hi Green zone a phon ahitoh hon’a lockdown sung’a gahna kinei ho phabep lhakang in aum in ahin Imphal khopi aum Nagamapal, Ngari Galli leh Ima Market tilou bazaar dang jouse jingkah nidan 6:00 akipat nilhah nidan 4:00 sung chan angai bang’a hon ding phal ahi vang in bazar kihon phatsung in dukan neiho leh mipin Social Distancing ajui lou leh COVID-19 protocol jui lou jeh chun tuni jingkah nidan 10:00 akipat in State sung pumpi’a District Headquarter leh Imphal khopi sung’a Kailhang umho abo in akikhasah kit tan ahi. Alangkhat’a CCpur District sung’a jong mipin jui ding’a thupeh kinei ho tichu social distancing, passenger po gari jouse in seat capacity val’a apohlou ding’u ti ahi vang’a koiman ajui lou jeh chun tuni jinglam nidan 10:00 akipat in CCpur District Police in khopi sung’a Loud Speaker mangchan sumkol veina dukan jouse khah ding in thuphon anabol uvin ahi.

Kpi DHQ a mask kibol lou ho police hon gotna pe

Kangpokpi, May 6: Mipi lah a chedoh nadinga mask kibol tei dinga thuhilna aum jing vanga Kangpokpi DHQ a mask beiya vah le a mi phabep aum jing nalaiyin ahi.

Kangpokpi Youth Union le senior journalist Kaybie Chongloi in mipi lah a mask bol ding athupi dan hilna ding bidoi neiya ‘Mask Kangpokpi’ kiti campaign apat doh a chule tuchan geiya mask 700 val ahop doh u ahitai. Hiche tilouva lunggel kibahpi ho le thilpha deiho chule Social Welfare and Cooperation Minister Nemcha Kipgen injong campaign kithopina a Renu Handloom and Handicraft Co-operative Society Limited Mask a kon mask tamtah jong kithopina a apeh ahi.

District police hon ‘Mask Kangpokpi’ campaign choisang nadinga bolthei chan a tosotna le kithopina aneiyu ahi’in, ahivanga, mi tamtah in mask bol ding athupi dan kihilna ho nahsah louva akoi nahlai ahi. Hiche jeh a Kangpokpi Police hon Addl. SP (Ops) Lalminlen Misao le ASI Hemminlun lamkaina a mask kibol louva milah a hungdoh ho aman uvin, milah a ‘push-up’ 50 vei abol sah uvin ahi.

Hiche dan juilouva numei hojong khoutah a gihna anei uvin ahi. Dan palkeh jouse abon uva police team hon cotton face mask ape uvin ahi. Alangkhat a, Kangpokpi Youth Union in ni phabep sunga mask hop kit dinga kigel lhahna anei uvin chule dan palkeh hojong khoutah a action lahkhum dunga thulhuhna aneibe uvin ahi.