Imphal East noiya um Itam khosung mihon ama deilhen hou ajui theilou...

Imphal East noiya um Itam khosung mihon ama deilhen hou ajui theilou diuva khosung dan um

111
0
SHARE

Imphal East noiya um Itam khosung mihon ama deilhen hou ajui theilou diuva khosung dan um

Imphal, Jan 13(ET): India Constitution a hou thu a chamlhatna dinga thaneina kipe akitongkha e, tia India gamsung pumpi in kinelkalna anei laiya Imphal khopi a kon km 10 vel a gamlha Itam Nungoi kho, Imphal East district, Lamlai police station a khosung mihon khosung a cheng hon ama deilhen hou ajui diu aphal peh pouvin ahi.

Achesa October nisim 18 nikho a Itam Nungoi Village Development Committee in lekha peh (leaflet) ahop nauva khosung a cheng kho mihon itobang hou ajui diuham ti asodoh u ahi. “Itam Nungoi khosung a cheng khosung mi koi tobang Meitei/Meetei leh Hindu hou panna a pu pa in anajui hou tailou Islam, Christian, Bodha leh adang dang hou juiya auma ahileh thina ahilouleh kin anei teng ule khosung in pan alah louding, akithopi loudiu ahi”, tia lekhapeh ahop nauva kisei ahi.

Hou dang jui ho khosung lhanmol a akivui ding phal lou dinga committee in asei ahi’in, India Constitution toh kitoh louva khosung mihon abol diu leh abol loudiu dan khoutah tah adang dang jong apeh u ahi. Chule khosung a kitungdoh ‘Itham Nungoi Baptist Church’ hi khosung mihon abulu a, asuhset maithei ahi, tia ginmona aum jeh a houin mun hi police phabep in anga a aventup ahi.

Hiche houin a Pastor anahi khat tu naicha khosung a kon anodoh uva chule Village Committee in asem dan juilou aumle dan a koiding a jong gihna aneiyu ahi. Khosung hi Lamlai police station a kon km 5 vel a bou gamlha ahi’in, India constitution hi Itam Nungoi kho a aphatchomna umlou ahi.

Tungjoy kho mipin IRB post umding ngehna nei

Imphal, Jan 13: Senapati district sung a um Nagaland gamgi toh kinai Tungjoy kho mipi hon police station gangtah a sahchai ding le IRB post hondoh ding angaicha lhe tauvin ahi.

Tungjoy kho hi gamgi thu a Nagaland toh ana kiboi jing sa, 2014 a kisapan police station jong tugei a kichai lou lai ahi.

Tungjoy kho chairman masa Th David in police station sah beh hi kichai theng le mipi jong lungmong dom ding ahi, ati. Tu a hi wireless room le compound fence bou vat ahitai. Nagaland Khezakheno kho toh akiboi a pat Tungjoy kho hin IRB post umding ngaichatna hi aneipan ahiuve tin David chun aseiye.

David in asei na ah Tungjoy kho mi ho chu Nagaland Armed Police hon avoh jiu a chujongle kichot tona lampi jong Khezakheno kho hon ningkum Hornbill golnop a chu ana lai u ahi e, ati. Chule David in state government in tunaicha a gamgi boina ana vet a amudoh cheng atohdoh jong le boina hi suhtoh jong hithei ahitai, ati.

David in aseikitna ah Tungjoy kho a tukum BSEM class X themvetna pang ding simlai mi 13 aumvang in Tungjoy Government High School a government hilkung 4 bouseh aum in, hilkung lhahsam behseh jeh in math le science hilkung lha a Rs 10000 le subject dang hilkung ho lha a Rs 8000 agom in hilkung 6 akigoi in, chule primary health sub-centre ho staff quarter sahding jong government in agelkhoh angai e, ati. Chule PWD Senapati Division AE office 2003 a hondoh ahivang in staff khatjong tunichan in aumnaipoi tin David chun aseiye.

Lions Club in gam meikahna Australia sorkar Dk. crore 22 a kithopi ding; Gamsunga hahsa genthei ho machine leh anchang kg 10,000 hop peh u

Imphal, Jan 13(UNA): Lions Club International founding father Melvin Jones in, “Midang a dinga thil ibol pat kah a gamlha tah kilhung joulou ding ahi’, ti achepi toh kitoh a club in achesa kum som a sim sunga gam meikah kisei khohpen Australia gam kithopi dinga pan ala uvin ahi.

District Governorfor Manipur Region Praveen Agrawal in thuso miho akimupina’a, gam meikahna a Astralia sorkar kithopina a dangka crore 22 lhing hi kal khat sunga pehdoh thei dinga kigong ahitai, tin aseiyin ahi. Australia gam meikah jeh a tuchan a mi 28 thi ahitan, New South Wales (NSW) state a bou inmun 2,000 val ase ahilouleh amangthah um ahitai.

Birth Anniversary toh kitoh a tohmun neilou chule hahsatna neiya numei hon amaho kivahna ding sum akihol nathei diu ponkhuina machine 52 leh anchang kg 10,000 jong kin gon a ahomdoh uvin ahi. Kin gon a gamsung mun chom chom a kon Lions thalheng ho, Secretary S Dumbeshore leh President, Lions Clubs, Imphal East, Napolean Rajen jong apang uvin ahi.

Mi jousen traffic daan ajui cheh na ding’a traffic daan palkeh ho leusah ngai ahi, ti’a Chief Secretary Suresh Babu in sei

Imphal, Jan 13 (ET): Department of Transport, Government of Manipur in tunin Dewlahland aum ISBT mun’a 31st National Road Safety Week 2020 hondohna ananei in chuleh kingon achun Chief Secretary Dr J Suresh Babu, Director General of Manipur Police LM Khaute, IPR Commissioner M Joy, Transport Director Mercina R Pamei, Traffic Police SP K Sharma leh Department a official luboh hon pan anala uvin ahi.

Kingon kimantoh lhon’a Road Safety Mascot of Manipur jong anahondoh uvin hiche kingon achun road traffic boilouna tei ding gelkhoh na jal’ in police personnel holeh traffic police ho panlah nachung’a kipa thilpeh jong anape uvin ahi. Traffic DSP Rameshwor heng’a Wheel Clamp pehdohna jong anei uvin ahi. Chief Secretary J Suresh Babu in houlimna aneina’a traffic police ho natoh pipen hi mipiten toset ato thei na akon vendoh ding hi ahi. Chuleh mi jousen traffic daan ajui cheh na ding uva koitobang traffic daan palkeh hochu daan toh kitoh’a aleusah’u ngai ahi ati. Road Safety week kimantoh lhon chun free health camp a ding in cycle rally jong anabol uvin ahi.

Bihar a NRC akichepi nading thu aumpoi, tia Bihar CM in sei

New Delhi, Jan 13: National Register of Citizens chungchang a Bihar Chief Minister Nitish Kumar in Monday nikhon adinmun avel a aseikit in, gamsunga NRC akichepi nading thu aumpoi, tin aseiyin ahi.

State Assembly mun a Nitish in, “Bihar gam a NRC chungchang a thudoh aumpoi. Assam gamsung thu a kihouna ahi. Prime Minister Narendra Modi injong asuhchen ahitai”, tin aseiyin chule Citizenship Amendment Act, 2019 thu a kihouna achom a bol ding, NRC toh seikhom louding ahi, ati. Agam a NRC chepi lou dinga lhangphong tah a seiya NDA camp a kon Nitish hi Chief Minister masapen ahi.

Nitish in hiche thu aseitoh kilhon a jat leh nam lhom ho kei noiya koima kibolse louding ahi, tia jong kitepna anei ahi. Tuchan geiya West Bengal, Odisha, Andhra Pradesh leh Kerala gam in CAA leh National Register of Citizens chepi ding deilouna a kiphinna abol u ahitai.

Achesa January nisim 12 nikho a JD(U) vice president Prashant Kishor in CAA leh NRC hi ama gamsunga kichepi louding ahi, ati ahi. Friday nikho a sorkar in gazette notification asodoh na’a Pakistan, Afghanistan leh Bangladesh gam a kon December 31, 2014 masanga India gam a hung chenglut a Hindu, Buddhist, Sikh, Jain, Parsi leh Christian ho citizenship peh nading CAA kichepi pan ahitai, tia aphondoh ahi.

Achesa December 11 nikho a Parliament in aphatsah CAA douna a Congress panna a opposition hon kiphinna abol jing u ahi’in, Muslim douna ahi, tia aseiyu ahi. Hiche jeh a PM Modi, Home Minister Amit Shah leh BJP lamkai hon avel vel a CAA tosotna a suhthengna aneiyu ahi.

Govt in Christian ho lahlut ding thu aseiyin ahin Jesu milim semding ajah dauve tia Javed Akhtar in sei

Mumbai, Jan 13: Lachang jih  Javed Akhtar  in Karnataka a Jesu lim sem ding government in ajah da na chung a BJP demna ahin nei in ahi.

Akhtar in asei na a CAA noi a Christian ho gam thum akon lah lut ding thu asei uvin hinlah Jesu lim semding jah dan na anei uvin ahi ati.

Hetthei khat chu BJP le Rashtriya Swayamsevak Sangh ho in Jesu lim semna lou ding a toumin kiphinna ana nei u ahi. Hiche milim chu Harobele kho a  sah ding kiti ahin, khosungmi ho in adei dan u phondoh na ana nei utoh lhon a kisa kigo ahi.

Hiche milim chu Congress lamkai DK Shivakumar,  hiche lhangsung a MLA makai na noi a kisa kigo ahi. Hiche milim hi Rio de Janeiro a um Jesu lim semthu sang a sang jo ding ahi akiti.

10th & 11th IRB Jemadar Written test um ding

Imphal, Jan 13(ET): Achesa kumlui (2019) a 10th & 11th IRB Jemadar Physical Efficiency Test (PET) lolhinna neihon ahunglhung ding January nisim 30 (Thursday) nikho teng Khuman Lampak Main Stadium a Written test abol diu ahitai tin Thangkhanlal Guite, IPS, ADGP, Manipur Chairman, DPC min ah order kison aseiyin ahi. Thulhut in aseibena ah candidate written test a pang ding hon akisei nikho jingkah lam nidan 9:00 leh exam kibolna ding mun a report apeh diu chule plain clip board, black/blue pen leh admit card tilou thildang exam sung’a pohlut phal hilou ding ahi ati. PET lolhing candidate hon jingkah lam nidan 10:00 akon nilhah lam nidan 4:00 sung’a 1st MR Drill set a Written examination a ding Admit card akilah thei diu ahi tai. Hiche Admit Card kilah ding nikho chu Ukhrul, Kamjong, Tamenglond, Noney, Chandel, Tengnoupal, Churachadpur, Pherzawl, Senapati leh Kangpokpi district hon 17th leh 18th January nikho teni a akilah diu Imphal West, Imphal East, Thoubal, Kakching, Jiribam, Bishnupur leh state pam hon 19th leh 20th January nikho teni a akilah diu chule hiche nikho kipe ho a kilah manlou candidate hon 21st January nikho teng akilah thei diu ahi.

Ration money dk 1000 kal ding

Imphal, Jan 13(ET): Manipur government in Manipur rifles, IRB, Civil Police, Manipur police telecommunication organization, central motor transport workshop le VDF ho ration money chu lha khat a dangka 1000 akon in dangka 2000 in akal sah uvin ahi. Hiche hi cabinet kihou na dungjui a kikal sah ahi akiti.