IAS pension che khat nehguh jeh a kiman (Moreh lampi Compensation Sum...

IAS pension che khat nehguh jeh a kiman (Moreh lampi Compensation Sum akinemange kiti)

276
0
SHARE
IAS pension che khat nehguh jeh a kiman
(Moreh lampi Compensation Sum akinemange kiti) 
   Tengnoupal DC anahi IAS officer pension che A.Tombikanta kimat hin service bol laija nehguh jeh a pension chejou nung’a jong kiman thei ahidan tahlangna khat ahi.  Kihehto, ki engset to, politics a phulahna  jeh jong himaithei ahi. Tombikanta kimat hi Manipur state govt mat hijongleh Centre a Ministry of Home Affairs (MHA) thupeh dungjuija kibol ahidan jong akiseitha e. Modi lamkaina BJP govt hin abul’a pat ‘corruption’ (sum nehguh) suhmangdi, doudi ti ana kihaseipeh ahi. Hapta/kal masa langjep jong chun Centre govt noija service bol IRS (income tax) department a officer mi 15 langjen sum nehguh thua ngohna to kilohon’in service a kon ana kihaisah uve (forced retirement). Govt service bol ho dia gotna (punishment) hi Suspension jong anasaloi ahitan hinlah ada achamlouva service a kon kihaisah (compulsory/forced retirement) kiti hi asangpen ahitai. Tombikanta pension achejou nung’a kimat hi ngohna ho photchetna aumleh ada achamlouva Jail lutdi, akhohleh sum anehdoh ho aledit di hung hidi ahi. Hitobang officer pension chesa khat chung’a natoh hi tua service bolnalai ho dia kinlapna leh kichih theina hidi ahi. Ahin govt service bol holeh pension chesa ho chung’a hitobang hung sohji hohi asung thu jatchom beh jong um maitheiji, hoitah in kiveleh politics lut jong himaitheiji ahi. Govt service bol hon sum ijat nejongleu Ruling party kithopina a anei uham, politics a ahuh ding mi anei uhamleh matna umdehlou tobang ahi. IRS officer service a kon kihaisah holoi jong chu aning akah akihetlou thu ahin akhohleh tuchung Lok Sabha election a opposition party lang anasot u himaithei ahi. Manipur a pension chesa officer len khat jong kum masa lang’a chu service anabollaija anabolkhel khat thua nungkholna ana um’a achaina’a a pension sandi gei kikhah ahi.
Nehguh chahguh thua moltum nekhaji hohi koima dang sang’a avum aval’a ne hidehjilou u, bolchah a umlou hojong anelouhel leh nolna bei hisohkei dehlou diu ahi. Ahin khat chung’a hehna (complaint) ahung um’a kholna ahung umlevang govt ninjong amohvet theilou ahi. Tombikanta tua sumne’a ki-ngoh a matna aum vang’a Tengnoupal DC ahilaija khatvei Burmese sepai ho Manipur gamgi sung Km 3 vel langpi hunglut uva Tengnoupal district sung Khodengthabi kho kom’a gamgi hetna Border Pillar kitung khat chu lahlou ahi tia anapan jeh a pachatna ana chang ahi. Akimatlonapen hi Tengnoupal DC ahipet mama a Pallel leh Moreh kikah lamlen kehletna (highway expansion) dia ‘compensation’ sum dangka Crore 4 lang mi khat le ni toh kihoutoh in ama bank account ah ana kihet lutne ti ahi. Hiche nghona hi adih bul le bal umlou ahi tia suhthenga hung um maithei ahi. Chuleh Tombikanta hin chohdoh thei thei ahinchohdoh a hung sohcha maithei jong ahi. Centre a BJP hon vai ahinpoh uva pat State hoa sum kipe ho adih a kimang hinam ti avelhi keudi mi Centre a kon hung kisolthaji dan’a akiseijeh in aban koi koi chung’ah thih tenggol ahung kidomdem ti ahi.