I MLA u khat thuso’a kisosal leh kipanpina

I MLA u khat thuso’a kisosal leh kipanpina

245
0
SHARE

  Tu kahlah chun MLA khat chunga lungphatmo jeh-a thusoa asosal loi leh ahuhloi (apanpiloi) kinielna ahung umdoh-e. Khat in khat aseiset leh apahchadiloi jong umkit thou, group (kiloikhomna) khat nin adang khat aseisetleh khat nin adonbut kit, athua kikaptona achejom teng thilse soh cheh cheh jilo ahijeh in ‘media’ (thuso) mandan hi ihetlou u thil khohtah ahi. Tulai hi ‘Media’ (thuso) khang ahidungjuiyin Internet kimanna Electronic media – Facebook, Whatsapp hojong eilah jeng’a jong khangthah langho dehdeh in ahamantan, society a kitonadi leh machalnadi leh themjilna lang’a mangcha sang’in kinielna lang’a mangcha atamjo ahitai ti thei ahi. Ahin Print Media –Newspaper leh Magazine hovang hi Electronic media bangkhat ho sang’a amopohna leh athupina sangjo teitei ahi. Facebook leh Whatsap a thu kiso holah-a ‘propaganda’, kidemtona, kinielna hohi koiman ‘serious’ (sangtah) a alahlouna chan umji ahin Newspaper’a kiso hovang ‘News Item’ hihen, ‘Advertisement’ ho hileh ‘record’ a umjing thei, govt leh Court injong ahimong’e ti vetsahna (proof) a amanthei ahijeh-a jatchuom ahi. Newspaper hi govt a register kibol ahijeh a society sung’a chamna leh kitona umtheina dia mopohna lentah jong anei ahijeh-a khat sosalna thu ham, kinielna thei, kitomona thei thu le la ho ahitheichan’a kisolou ahi. Achohdohsa dan’a khat nin khat demnadi leh pachatnadi ham’a Newspaper mango loi, thingnoi thingchung kitilou vannoi leiset popa dan’a adeidan chet leh adeina mun (page) chetna news sodi tiloi umji ahi. Thuso’a khat demgopdi, khat goleh chung’a dopsangdi (pachatdi) ti hi mipi phatchomnadi ahilou hetna pha ahi. Thilpha bol khat mipi hetdia akisoleh kitilkhouna ahibang’a thilse bol khat jong thuso’a akisoleh thilse aban abolbe louna dia kichihthei nadi ahijeh in thilse bol (thilpha bollou) khat mipi hetdia tahlang jong ahimo dehpoi. Ajeh chu ‘press/media’ (thuso) hi society a dia phatvet ahi. Ahin mi khat le ni lunglhainadi ham’a thilpha bol leh thilse bol khat thusoa tahlangdi kiti hi angaina ahipoi.
  MLA hohi mipi soh (public servant) ahilam uhi amaho (MLA ho) tahbah injong Election lai lebou ahetjiu, mipi natohdi leh kithopinadia sum pehdi ahitengleh mipi joh asoh u dan’a agel jiuva anople apehdiu, anople apehda diu ti dinmun hidoh ahi. Hiche hi igam uva ‘democracy’ chedan ahijeh in MLA khat nin kithopina’a sum le thil ahopda jongleh koiman ima aseitheilou tobang ahidoh-e. Ei society a hi mihao, mineijou sangtah aumlou jeh-a imajousea MLA holeh govt officer len hohi kiloikhomna jousen kimaina’a anei u ahijeh-a MLA hodia jong ahahsatna umdi ahi. Chuleh thilkhat semdohnadi, sahdohnadi ahi ngal louleh golnop bolnadi hoa MLA ho koma sum thum jong hadihbeh loudi ahi. Ahin MLA khat dia kiloikhomna khat in sum agathum leh themkhat beh pejongleh a-inchen atohkhahlomdi jong hideh kitlou ahi. MLA khat hi mipi thalheng khat ahijeh a mipi masanga kisosal jong hithei ahi.