House in Dk. 218,09,293,881 lhing Supplementary Grant phatsahna neita

House in Dk. 218,09,293,881 lhing Supplementary Grant phatsahna neita

158
0
SHARE

House in Dk. 218,09,293,881 lhing Supplementary Grant phatsahna neita

Imphal, Feb 17(ET): 11th Manipur Legislative Assembly 10th session ni-ni channi a House in dangka 218,09,293,881 lhing Supplementary Grant kilungtoh tah a phatsahna anei tauvin ahi.

Phatsahna kinei Supplementary Grant hohi – State Legislature – Rs. 7,81, 64,000, Secretariat – Rs. 24, 32,65,000; Land Revenue, Stamps & Registration and District Administration – Rs. 2,60,23,000; Finance Department -Rs. 58,48,24,000; Transport – Rs. 20,57,95,000; Police  – Rs. 43,07,44,881; Public Works Department – Rs. 69,23,76,000; Education – Rs. 268,92,07,000; Health and Family Welfare – Rs. 98,77,16,000; Municipal Administration Housing And Urban Development – Rs. 101,02,62,000; Department Of Tribal Affairs And Hills Development – Rs. 208,62,51,000; Consumer Affairs Food And Public Distribution – Rs. 1,14,85,000; Agriculture – Rs. 15,39,00,000; Animal Husbandry and Veterinary Including Dairy farming – Rs. 22,96,53,000; Environment and Forest – Rs. 432,06,08,000; Commerce and Industries – Rs. 2,69,12,000; PHE – Rs. 164, 97,72,000; YAS – Rs. 12,06,68,000; Administration of Justice – Rs. 3,19,55,000; State Excise – Rs. 3,35,11,000; Fire Protection and Control – Rs. 74,14,000; Jails – Rs. 1,48,00,000; MI – Rs. 107,73,59,000; Fisheries – Rs. 33,43,000; Pachayat – Rs. 75,84,50,000; Water Resources Department – Rs. 37,74,77,000; Art & Culture – Rs. 5,75,54,000; Horticulture and Soil Conservation – Rs. 1,04,36,000; Social Welfare Department – Rs. 124, 29, 23,000;  MOBC – Rs. 163,90,38,000; Relief and Disaster Management- Rs. 82,14,08,000  chule IT – Rs. 18,60,00,000 ahi.

Question House sunga House lamkai leh CM N Biren Singh in sorkar in  April, 2017 a kon January 2020 sunga Manipur Police/MR/IRB personnel 1,13,957 a dinga uniform thil issue abol ahitai, tin aseiyin ahi. Akipe thil holah a hi Ankle Boot Black, Beret Cap (OG), Combat Coat, Drab Angola Shirt, Ground Sheet, Leather Shoe Brown (ASI), kangkal Khaki, Terry Cotton (Khaki),Terry Cotton (OG), Jungle Boot (OG), Woolen Socks (OG), Woolen Socks (Khaki), Woolen Blanket, Web Belt (OG), Waterproof Rain Coat Khaki, Leather Belt Black leh Leather Shoe Black WPC pang ahi.

Finance portfolio jong tuh a Biren in 2015-2020 kum sunga 14th Finance Commission a gamsunga dinga deficit grant hi dangka crore 10,227 ahi’in, hiche lah a crore 10066 hi India sorkar in transfer abol ahitai, ati. 15th Finance Commission a dinga jong aseiyin, State in agom a Pre-devolution revenue deficit hi dangka crore 83,205 propose abol ahi, ati. 2020-21 kum a dinga projection hi dangka crore 13,968 ahi, ati.

Start-up scheme akiphudoh a kon hiche noiya register kibol hi 5682 ahi, tin CM in aseiyin ahi. Start-up scheme a dinga fund sanction, allot chule akimang ho year-wise a detailed report apeh in, 2017-18 kum a dangka lakh 3000 allot kibol lah a 3000 lakh sanction kibol a chule 1009.94 lakh kimang ahi, ati. 2018-19 kum a allot kibol dangka lakh 3000 lah a lakh 3000 sanction kibol a 319.07 lakh kimangcha ahi. 2019-20 kum a dangka lakh 2500 allot kibol ahi, tin aseiyin ahi. 2017-18 kum a target kisem 338 lah a 312 kimu a, 2018-19 kum a target 798 lah a 709 kimu a chule 2019-20 kum a target 774 kikoi ahi, ati.

MAHUD Minister Th Shyamkumar in Patsoi MLA AK Mirabai Devi in Street Vendors Act chungchang a thudoh anei adonbutna’a, Manipur Urban Development Agency (MUDA), MAHUD noiya state sorkar in Support to Urban Street Vendors (SUSV) kiti National Urban Livelihood Mission (NULM) noiya 2014 kum a kon achepi ahi, tin aseiyin chule Street Vendors Act hi May 1, 2014 ni a kon kichepi pan ahi, ati. Lamlen a thiljoh ho venna dinga sorkar in Manipur Street Vendors (Protection of Livelihood and Regulation of Street Vending) Rules, 2016 leh Manipur Street Vendors (Protection of Livelihood and Regulation of Street Vending) Schemes 2018 asemdoh ahi, ati.

Imphal, Thoubal, Kakching, Mayang Imphal leh Nambol a survey bol dinga thuhilna um a, hiche a dinga fund kisodoh ahitai, tin Minister Shyamkumar in aseiyin chule Thoubal leh Andro in SUSV, NULM noiya street vendor survey ajo ahitai. Town Vending Committee (TVCs) hi Thoubal, Kakching, Nambol, Bishnupur, Andro leh Jiribam a kisemdoh ahi, tin aseibe in ahi.

Gam leiset kichoh leh registration suspend akibol thu a thudoh Revenue Minister Karam Shyam in adonbutna’a, achesa January nisim 10, 2020 ni a office memorandum kisodoh ahitai, ati. Bengal Eastern Frontier Regulation 1873 Section 7 noiya ‘registration of sale and purchase of land’ a dan kisem hi akisuh ol nadinga Thangmeiband MLA Joykishan in Revenue Minister Karam Shyam henga ngehna aneiyin ahi.

Dan kikha na aumjeh a sumkol veina ahilouleh kivah nadinga enterprise dang dang bol pan nom a bank loan ngaicha hon hiche jeh a hahsatna lentah ato ahi, tin Joykishan in aseiyin chule Minister pa in hiche hi phat chomkhat a dinga kibol ahi’in, a olsah ding dan kive ding ahi, tin adonbut in ahi.

Khangabok MLA Okram Surajkumar in thudoh anei Chief Minister in adonbutna’a, 2018-19 kum a 14th Finance Commission in 2015-20 sunga post devolution revenue deficit grant hi dangka crore 10,227 dinga recommend abol ahi, tin aseiyin chule India sorkar in 2015-16 a kon 2018-19 sunga akum sim a dinga recommend kibol jat transfer abol ahitai, ati. 2019-20 kum a dangka crore 1932 recommend kipe lah a dangka crore 1771 bou transfer kibol ahi’in, dangka crore 161 lhasam ahi, tin aseiyin chule avat jat hi March 2020 teng mu ding aginchatna thu jong aseibe in ahi.

House in ‘Governor’s Address’ phatsahna nei ta

Imphal, Feb 17 (ET): 11th Manipur Legislative Assembly in 10th session ni-ni channi a Governor’s Address ‘Motion of Thanks’ phatsahna anei tauvin ahi.

MLA P Saratchandra Singh in Governor’s Address Motion of Thanks kihouna apohdoh a, MLA Awangbow Newmai in seconded abol ahi. Alangkhat a Budget Estimate thu aseikhom nauva CM Biren Singh in gamsung department jousen aman ding sorkar in corpus fund dangka crore 2000 asem ahi’in, Centrally Sponsored Scheme hi state share jong kibang ding ahi, ati.

Finance in charge jong hi a Biren in 2020-21 budget hi ‘deficit budget’ ahi, tin aseiyin, ahivanga ahop soh budget ahi, ati. Budget hi numei pasal, hou khenna umlouva mipi jouse a ding ahi, tin aseiyin ahi. Government department in ngaichat anei ho kigel a budget kisem ahi, tin House lamkai CM in aseiyin chule budget hi numei douna ahipoi, ajeh chu numei tha kipeh nadinga pan kila a chule numei chunga thilse soh ho gangtah a seilhah nading Fast Track Court jong kihongdoh ahitai, ati.

Sorkar in Fast track court sem be dinga jong tohgon anei ahi, tin aseiyin ahi. Gamsunga khantou machal nadinga na kitong hohi Centrally Sponsored Scheme a kon ahivanga gamsung in jong share kibang cheh a apeh ahi. Tua state sorkar in scheme ho gelkhoh dungjuiya corpus fund kisem ahi’in, sorkar in share kibang apeh ding ahi, ati.

Gamsunga sum lah nading lampi alen cheh cheh e, ati. Manipur Appropriation (No. 1) Bill, 2020 jong pohdohna aneiyin ahi. Bill apohdoh masanga , “Manipur Appropriation (No.1) Bill, 2020 a phengmai 4, Demand No 40, Water Resources Department hi dangka 34,74,77,000 hilouva dangka 37,74,000 joh hiding ahi’, tin suhdihna aneiyin ahi.

 

Imphal-Ukhrul lampi a bandh bol hon Jessami SDO gari suseu; police hon tear gas akap na a mi 4 kisukha

Imphal, Feb 17(ET): Mapithel Dam- Affected Headmen Chiefs and Elders Organisation (MDAHCEO) in Imphal-Ukhrul lamlen a nidan 48 bandh abol sung’u Monday nikhon SDO Jessami gari bandh toson hon asuse uvin chule police hon tear gas akap nauva milham 4 akisukha in ahi.

Vaipo hon ‘rehabilitation and resettlement’ peh dinga thumna um khohsahna aneilou jeh a February nisim 16 jan kim a kon MDAHCEO in Imphal-Ukhrul lamlen a nidan 48 bandh abol ahi. Shikiphung Junction a bandh bol ho nomang nadinga police hon tear gas akap nauva mi 4 akisukha in ahi.

SDO Jessami in Imphal a kon Ukhrul ajot na a bandh toson hon song chule gophel a akap jeh uvin gari ase’e, tin thulhut in aseiyin, window glass leh amailang windshield se ahi, ati.

MDAHCEO thalheng hon tunin authority ho akimupi uvin, ahin, March nisim 5 a dinga meeting avochon uvin ahi. Ahivanga bandh toson hon Imphal-Ukhrul lamlen akhah jom uvin, amun a um police hotoh jingkah a kon bandh toson ho Shikipung Junction kom a akinoto uve, tin Ukhrul Police hon asei uvin ahi.

Hiche bandh chu Mapithel Dam project in atohkhah kho 23 hon Sunday jankim akon abolpat u ahin, Tuesday jankim chan achelhahpi diu ahi.

Government in Mapithel Dam in atohkhah kho a thumna abulhitlou jeh a hiche bandh chu chelha ahin, Chief Minister N Biren in Mapithel Dam in atohkhah khoho muding packages pehdoh ding’a achesa 2018 kum’a kitepna anei ahin hinlah kum 2 jouva jong hiche packages kilhadoh loulai ahi. Hiche thu’a achesa January 24, 2020 a MDAHCEO in Chief Minister leh concerned department khutna achesa November 19, 2018 kum a Memorandum of Agreement kisemna anapeh ahi. Hinlah tuni chan a hiche thu’a donbutna kimulou ahi tin Riha kho haosa Wungreishung Mahong in aseiyin ahi.

MDAHCEO bandh bol hi CSOs chom chom AMUCO, ANSAM, KSO, ATSUM leh TMNL hon jong atosot ahin chule bandh nidan 48 kibol jouva jong government in nahsah a akoilouva ahileh tua sang’a khohjo a kiphinna bol ding in khosung mihon government gihna aneiyin ahi.

 

CCpur Dist. HSLC Exam Centre 5 a KSO-CCpur Flying Squad in duty bol

B. Lalboi Gangte

Ccpur, Feb 17 (ET): Board of Secondary Education, Manipur (BOSEM) tohgon nanoi in Feb. nisim 17 apat March nisim 5 sung chelha ding HSLC (Class-X) Examination 2020 anakipan tan ahi. HSLC exam toh kisai in CCpur District sung’a Exam Centre 10 aum na lah’a chun Ebenezer Academy Centre A & B ading in exam kipat masang in Ebenezer Academy a Exam ding simlai ho Rev. L. Khaikhansong, DS/EBC Lamka South Division in taopeh na leh Exam hondoh na ananei in ahi. Chuleh Donbosco Hr. Sec. School Centre A achun OC in M. Chaoba Stanley; Don bosco Hr. Sec. School Centre B ah Kimbiaksang; Ebenezer Academy Centre A ah Pumshong Hangshing; Ebenezer Academy Centre B ah Vashti; Children’s Training Hr. Sec. school Centre ah Lalthakungi; Young Learners School ah TS. Mangcha Haokip; Grace Academy ah Mary Grace; GM English School ah H. Khaithanlian; Rengkai Govt. Hr Sec school ah Lalthalur Infimate leh Phungkhothang Govt. High School ah N. Shyamkesho Singh ho cheng chu OC in anapang in ahi.

Hiche toh lhon’a CCpur District sung’a HSLC Examination Centre chom chom ho’a tunin Children’s’ Training High School Centre : simlai 401 (1 absent); Grace Academy Centre : simlai 324; Don Bosco Hr. Sec. School (A) : simlai 348 (3 absent); Don Bosco Hr. Sec. School (B) : simlai 288; Ebenezer Academy (A) : simlai 325 (1 absent); Ebenezer Academy (B) : simlai 306 (2 absent); Phungkhothang Govt. High School : simlai 318; Rengkai High School : simlai 439 (1 absent); Gandhi Memorial High School : simlai 277 (1 absent); Young Learner’s School : simlai 156 ahi. Hetthei khat chu Manipur state sung pumpi’a simlai 38,664 (pasal 19,824 leh numei 19,040) in themvet na anei in chuleh Examination Centre 140 ahi. HSLC themvet na boina ima umlouva achelhah  theina ding in Control Room jong hondoh ahi naban’a State sung pumpi’a top 10 position holder leh subject tin’a mark tam mu pen ho mipi deina bang’a BOSEM website a kitahlang ding chuleh kumlui a bang’a Science leh Social Science paper ho kichom khen ding ahi.

Alangkhat’a tuchung 2020 Class X leh Cl- XII themvet na sung’a CCpur District sung’a KSO-CCpur in Board of Secondary Educarion & Council of higher Secondary Education Manipur toh kithokhom in themvet na boina um louva achelhah ding deina jal in KSO-CCpur Flying Squad team hon exam Centre munpi jouse’a duty apo uvin ahi. Hiche phatsung in Don Bosco Hr. Sec School ‘A’ & ‘B’ Examination Centre mun’a Lh. Jamkhomang Khongsai lamkai na in Kamkhojam Gangte, T.Goulungmon Haokip, Nancy Chinneilam, Solomon Mate ho duty apo uvin, Ebenezer Academy ‘A’ & ‘8’ Centre mun’a Lienminlal Gangte lamkai na in Lalngaisang, Thangminlen Touthang, Hatneilhing Haokip, Lunjakai Baite; Phungkhothang Govt. H/S & Children’s Training H/S Exam Centre mun’a  T.Samuel Guite lamkai na in Thangminlal Khongsai, D. Jangminthang Haokip, Ngamkhogin Haokip, Helamboi Baite; Rengkai High School & Young Learners School Centre mun’a NJ. Haoneo Baite President KSO-CCpur lamkai na in Doulalson Chongloi, M.Seikhogin Haokip, Lien Neihsiel, Seitinthang Lhungdim; Grace Academy & Gandhi Memorial High School Cente mun’a T.Letminlen Haokip lamkai na in Florence Lhingneineng, Seiminthang Haokip, Paotinchon Singson, Bempu Chongthu  hon vetchil na ananei uvin ahi.

 

 

Sorkar in semphat dinga kitepna anei vanga Machi High School a alhasam tamtah um

Imphal, Feb 17(ET): AMSU team hon Total Education campaign abol utoh kilhon a government school ho a inspection abol nauva Machi High School, Tengnoupal district, Manipur a school thil/manchah alhahsamna chule jilkung alhahsam amudoh uvin ahi.

AMSU Thoubal District Committee in thuso aneinauva school campus leh classroom ho lim kilahdoh na video jong athot uvin, sorkar in education sector semphat dinga kitepna anei abulhit lou avetsah uvin ahi. Class 1 a kon class 10 chan simlai 146 um ahi’in, jilkung 5 bou um ahi. Jilkung 5 lah a primary teacher 4 hi a chule Graduate teacher 1 bou um ahi, ati.

Machi High School building hi December 4, 2006 kum a CM anahi Okram Ibobi Singh leh Education Minister L Nandakumar in hondohna anei ahi’in, school indan masa hi ‘maintenance quality’ ahoilou jeh a ima a kimangcha theilou ahi. April nisim 8, 2018 ni a tua Education Minister Th Radheshyam in school avil’a, vetlhahna anei jouva angaicha ho peh dinga kitepna anei ahi’in, ahivanga tuchan a ima kibol loulai ahi.

Sorkar in kitepna anei banga ‘education sector’ ho asem hoi dinga AMSU in temna aneibe uvin ahi.

 

BOSEM noiya HSLC Exam center 140 a kipan; mi 8 kinodoh

Imphal, Feb 17(ET): Board of Secondary Education Manipur in abol High School Leaving Certificate Examination (HSLC) tunin akilhengdoh center 140 a akipan tan ahi. Exam masapen nikhon Centre 6 akon Simlai mi 8 akinodh on ahi. Akinodoh ho chu, Tengkhojang Hr Sec School Noney akon mi 2, Pishakmacha Mandir centre akon mi 3, Kumari High School, Hiyangthang leh Morning Star English School leh Sekmai Khumbi High School akon mi 1 cheh ahi.

BOSEM in asei dungjuiya tukum HSLC exam peh nadinga simlai 38664 in form apehlut ahi’in, hiche lah a simlai 19040 hi pasal hi a, 19624 numei hi a chule disabled candidate khat bou um ahi. Answer script landscape a kon portrait format a akikhelna masapen ahi’in chule Education (S) Director in aphon banga ‘margin’ kikai ahi. Chule science leh social science answer script a ama ama subject watermark kipe ahi.

Exam masapen hi a English subject abol uvin ahi. Answer script a margin akikai jeh a line kaina a phat akisuhmang loujeh a thuso miho kihoupi a simlai hon asei uvin ahi. Keishamthong Model School leh Ibotonsana Girls school hohi lamlen pam a um ahijeh a school kom a gari tamtah akingah leh lamlen lhung a traffic asuboiyin ahi.

Simlai ho olna dinga vaipo hon pan alah diuvin achate ngah a nu-le-pa phabep in thuso miho henga asei uvin ahi.

 

Committee on Operation Lamka in CCpur khopi sung’a khamnathei joh mi 6 mandoh

B. Lalboi Gangte

Ccpur, Feb 17(ET): Young Paite Association YPA-GHQ lamkai na’a kisemdoh “Committee on Operation Lamka” hon khopi sung mun chom chom’a Operation achelhah pi jing lai uvin tunin New Bazar kimvel’a khamthei joh leh ane mi phabep anamandoh uvin ahi. Matdoh’a um hochu Kapmuanlal (27) S/o (L) Kamkhanpau of Ngoiphai; Pauhauthang (30) s/o Chinzadou of Khominthang; Chingkhanlian (27) D/o Thangkhanmung of Pangzawl; Thangkhanmuan (27) S/o Pumkhanmang of Kanan Veng; Thangkhan suan (39) S/o Sutzathang of Dorcas veng, New Lamka; Khamthansang (23) S/o Kamgoulian of Dorcas Veng chuleh Chinsuanlal (32) S/o Thuamkhohau of Gochinkhup Veng ahi akiti.

Hiche toh lhon’a akimandoh Kapmuanlal akon in No. 4 chun 3 leh WY chang 60; Pauhauthang akon in No. 4 chun 31; Chingkhanlian akon in No. 4. chun 3; Thangkhanmuan akon No. 4 chun 13, Thangkhansuan akon No.4 chun 8, Khamthansang akon No.4 chun 3 leh Chinsuanlal akon No. 4 chun 2 leh Syringe 1 anamudoh uvin ahi. Mat’a cheng chu thuhil na hoitah anei jou nung uvin insung mite khut’a anapedoh tauvin ahi.

 

Numei khat panna a RPF thingnoi hidinga ginmo mi 3 bomb thil toh kiman

Imphal, Feb 17(UNA): Imphal West Police Commando hon Monday nikho a frisking abol nauva bomb thil toh RPF/PLA thingnoi hidinga ginmo mithum aman uve, tin police hon asei uvin ahi.

Imphal West SP K Meghachandra in asei dungjuiya NH 103 juiya RPF/PLA thingnoi ho aum’e, ti thuguh amu jou uva Imphal West CDO leh Woman Police hon tuni sun nidan 1.30 don a Singjamei Parking a ‘mobile check post’ akoiyu ahi. Gari ho akhol nauva van kang khat (MN0189757) Kakwa lang a kon speed hattah a hunglhai khat alamtin uva, asung a um teni kholna aneiyu ahi.

Thudohna anei nauva mi ni teni hin Samukcham Mobi Singh (35), s/o S Iboyaima Singh, Khagempalli Panthak Leirak Macha a cheng chule Huidrom Ningol Lairenlakpam Ongbi IBemcha Devi (38), w/o L Indrakumar, Mongjam Mayai Leikai a cheng chule tua Langol Warok Leikai a cheng kahi tia aseilhon ahi. Van akhol ule bomb a kimang ji 1.5 Volt battery 8 polythene vom a kisel amudoh u ahi.

Thudohna anei ule battery hi Robertson kiti PLA thingnoi khat in Tamu, Myanmar kache lhonna a eipeh lhon ahi, tia aseidoh lhon a chule battery hohi NRL Telapati city 1 Oil station a Bhumeshwor kiti mikhat kapeh lhon ding ahi, ati lhon ahi. Police team hon apet pet a thao pump adellut uva Lourembam Bhumeshwor Singh (48), s/o (L) Ningthemjai, Khurai Thangjam Leikai a cheng amat u ahi.

Ama thudohna anei jou uva NRL Telepati store room a kon claymore IED khat, remote control khat, transistor khat, 9 Volt battery 2, 1.5 Volt battery 8, detonator 1, 9 mm 1 chule mobile phone khat amudoh u ahi. Akiman hohin akimudoh bomb hohi Telepati vel a ol a koi dinga tohgon aneiyu jong aseidoh uvin ahi. Tu masanga jong RPF/PLA natoh adang dang a pan alah thu aseidoh uvin ahi.

Akiman numei nu hi Ibemcha Devi ahi’in, BT Flyover noiya anche/me ho ajoh ji ahi, tin SP in aseibe in ahi.

 

NEC fund noi’a kisem District Science Centre & Planetarium leh Siktui Farms & Resorts (SFR) Bihar MP RP Mandal  in vilna nei

B. Lalboi Gangte

Ccpur, Feb 17 (ET):  Churachandpur District hopsung Lamzang kho kom’a North Eastern Council funding nanoi’a kibol District Science Centre & Planetarium leh Siktui Farms & Resorts (SFR) mun chu tunin RP Mandal, Lok sabha MP Bihar in vetlhahna ananei in ahi. Hiche phatsung in NEC funding noi’a kibol Science Centre & Planetarium jotheng ahi loulai vang in nakitong doh ho chung’a alunglhai nathu aphongdoh in chuleh RP Mandal chu Hangkhanpau Taithul, President Janata Dal (united) Manipur, Ngamhao Touthang MDC, Hausuanthang MDC leh Gouzamang Guite MDC hon ana kilhonpi uvin ahi.

Hiche Science Centre vetlhah na kichai in Siktui Farms & Resort vetlhah na ananei pai uvin hiche achun M. Gouzamang Guite, MDC in Khuga akipat  nga hing lai Kg. 6 agih kipa thilpeh in RP Mandal ape in chuleh Khuga Dam kimvel’a resort umho avetnom dan jong MP pan aphongdoh in ahi. Chuleh May lha vel leh Bihar Chief Minister Nitish Kumar jong  Siktui Farms & resort vetlhah na anei sah nom dan thu jong aphong doh in ahi.  Siktui  Farm & resort  ah tuhin Cage Fishing apan uvin ahi. M.Gouzamang Guite, MDC in aseina’a Manipur acheng mi Lakh 25 val in nga akiha neh jeh in nga vah na jong aki-ha bol in chuleh kum seh in nga 32.3 thousand Metric tonnes tobang akipendoh sah jou in ahi. Ahin hiche ajong chun State in kum seh’a angai cha jat (Annual consumption) jong asu lhing jou chom pon hijeh chu Myanmar, Assam leh State chom chom akon in 81,800 Metric tonnes tobang akipolut (Import) ji in ahi ati. Khuga Dam mun’a IFCD in twi lentah eihin tin peh uhin twi pam acheng mi hon aphachom pi ding chuleh tourism leh economic activity chom chom leh nga vah nalam ajong nasatah’a pan lah ding apoimo lheh in ahi tinjong aseibei.

Hetthei khat chu RP Mandal hi Bihar gamsung Jhayharpur Lok Sabha Constituency akon MP ding’a lhendoh ahi toh lhon’a amahi Lok Sabha MP ahi nachung chon’a  Ministry of DoNER noi’a NEC ah Member khat jong ahi.

Gamsunga hung kile mi 11 ‘screen’ bol

Imphal, Feb 16(UNA): China, Thailand leh Singapore gam a kon Manipur a hung kile a mi 11 Imphal International Airport a coronavirus natna po thei ahijeh uvin state Health official hon Monday nikhon screen abol uvin chule mikhat thisan sample lab test bol dinga athot tauvin ahi.

Hiche toh kilhon a China, Thailand leh Singapore a kon hung kile mi 248 hi Home Surveillance a kikoi ahitai. Tuchan geiya mi 9 sample test bol dinga athot u ahi’in, hiche lah a sagi hi ‘negative’ hi a chule sample result ni kingah nalai ahi, tin Dr L Arke Singh, Additional director (Public Health)/SSO, IDSP in aseiyin ahi.

Hetthei khat chu Central Health Ministry in China, Thailand leh Singapore a kon hung ho abon uva screening bol tei ding chule ‘surveillance’ noiya koi dinga thuhilna anei jeh a State Health official hon screening abol uva chule ‘home surveillance’ a akoiyu ahi.

Doctor khat demand kibol ZRA in demna nei

Ccpur, Feb 17(ET):  Zomi Revolutionary Army (ZRA) Defence thuphon khat in aseina achun tuchung Dr. Thangminlian Shoute, Proprietor, Nazareth Nursing Home heng a SoO group jong hilou Liberation Tiger of Tribal (LTT) kiti hon sum a demand uleh amau (ZRA) operational area sung a sum demand kibol na chung a lunglhailou ahi thu aphong uvin ahi. Hiche tobang natoh bolho chung a gotna sangtah peh ding thu jong asei uvin chule koiman mo achankhum louna ding un jong asei uvin chule mipi hon gamsung a hiche tobang aumkitlou nading a pan lakhom ding in jong asei uvin ahi.