Hmar Autonomous Council (Autonomous Council ho alolhing umbehlou)

Hmar Autonomous Council (Autonomous Council ho alolhing umbehlou)

475
0
SHARE

Hmar Autonomous Council 

(Autonomous Council ho alolhing umbehlou)

Achesa 1980s kim lang’a Hmar thingnoi kiphinna ana umdoh a pat itihleh Hmar nam mi ho dia kivaipohna tum neokhat ahung umdohdem ti chu tun Mizoram’a Hmar hon Sinlung Autonomous (Development) Council ahinmu uto kilhon’in Election jong bolchai ahung hitan Council govt (ministry) jong sempat din aumtai. Sinlung Hill Council (SHC) hi Mizoram’a Hmar ho tamna gamkaija dia kiboldoh ahijeh in Manipur leh Assam a Hmar hon vang ahinphatchompi behsehlou maithei u ahi. Hmar thingnoi gal bolna’a agenthei leh ahathipen hi Mizoram Hmar ho sang’a Manipur leh Assam Hmar ho himaithei ahi. Ahin Hmar nam mi kitiin phatchomna aneithei pouleh Mizoram Sinlung Council in ahuop phahlouna gam hoa Hmar hon engset sumselna anei diu tahsan aumpoi. Hiche hi hoilai State sung hileh Hmar nam mi ho chu thisan khat ahijeh a Mizoram sung’a Hmar hon aphatchompi jongleh State dang’a Hmar hon apha thouve atidiu tahsan um ahi. Ahin Hmar hon achol sang’in amang neh atuijoi ti pom jongleu Naga thingnoi gal bolna a Nagaland Naga honbou aga ahinkilo uleh Manipur Naga honvang kipah tah a apomlou diu ahi. Manipur’a hi chi le nam’a kikhenna jat khat aumjeh a phaicham mi hon vang achenkhompiu thinglhangmi hon Autonomous Council amudiu jong sumselna um ahidan thuguh hitalou ahi. Hmar thingnoi HPC (Hmar Peoples’ Convention) hi Manipur Hmar ho patdoh tithei ahin Mizoram mipi hon chi le nam’a kivaipohna min tum umthei ponte anati jeh uva Hmar Autonomous Council ti sang’a nam min jaolouna Sinlung Development/Autonomous Council dia kihoulhahna hi achesa 1994 kum langpeh a ana umsa ahi. Ahin hiche Sinlung Council hi thaneina kipehlou jeh a aumlouto thakhat anahijeh a HPC-D Faction jong ana umdoh a galguh bol jong anachejom thou thou ahi. Tua hi athah beh a kinoptona hung umkit tolhon’a SHC Election jong hung um’a HPC jong political party khatna umdoh a election jong atet, MNF toh SHC govt hi asemkhom lhon dia jong um ahitai.
Bodo Territorial Council (BTC) tobang (model) hi Manipur Naga holeh Kuki ho ‘Territorial Council’ (TC) peh dia kisei chu ahi. Ahin BTC jong hi Bodo ho kinepna bang ahidehlou jeh a Bodo hon Bodo State ati thou thou kit u ahi. West Bengal a Darjeeling Development Council jong Gorkha State khel’a ana kipe chu thaneina dihtah akipehloujeh a ‘separate Gorkhaland State’ ti demand hung umdoh kit thou thou ahi. Hiche chet hi Manipur phaicham mi hon akichatpen u chu hikit ahi. Manipur thinglhangmi ho Autonomous Council kipeleu chomkhat jouleh State tum delna’a pansatna’n hinnei unte ti ahi. Ahin Ipi Council hileh ahididol tah a thaneina akipeh a mipi alunglhaileh koiman aban amol aseibedi jong tahsan umlou ahi. Territorial Council malah Manipur thinglhang district hoa Sixth Schedule kivaipohna aum’a MDC hojong thaneina lhingset kipeleu koiman Separate State, TC ho dia kiphingunlou maithei ahi. SHC hi thaneina dihtah ahung kipehleh hung lolhing ding, amasa’a bang’a ahung duhdah kitlouleh MNF thingnoi khang kichaija chamna State a kithang Mizoram State hi thingnoi boina hung beidehlou di ahi.