High Court in June 5 teng BJP toson Congress MLA 7 ho...

High Court in June 5 teng BJP toson Congress MLA 7 ho ‘disqualification case’ thu a ‘hearing’ neiding

47
0
SHARE

High Court in June 5 teng BJP toson Congress MLA 7 ho ‘disqualification case’ thu a ‘hearing’ neiding

Imphal, June 3(ET): Manipur High Court in Congress MLA 7 ho ‘disqualification case’ thu toh kisaiya June nisim 5 teng hearing abol diu ahi.

“Party alangni lunggel ngailhahna aum jouva court in application thu toh kisaiya June nisim 5 teng hearing abol ding ahi. Respondent hon objection file abol nomle Thursday (June 4) teng abol theiyu ahi”, tin Justice Singh, Manipur High Court in Wednesday nikhon aseiyin ahi. Applicant ho thalheng a senior advocate Kapil Sibal pang a chule respondent ho thalheng a Senior Advocate HS Paonam le Chittaranjan ding ahi.

Speaker’s Tribunal in disqualification case thu a thutanna (preliminary objection a ding) a hi June 6, 2020 teng um dinga jong aphat atep ahitai. Diqualification case kisem khum BJP a lut Congress MLA hohi- Oinam Lukhoi Singh, Ksh Biren Singh, Paonam Brojen Singh, Sanasam Bira Singh, Ngamthang Haokip, Ginsuanhua le Yengkhom Surchandra ahi.

Hetthei khat chu Supreme Court in Congress a kon BJP a lut (unofficial) MLA 7 ho ‘disqualification’ case hi Manipur Legislative Assembly Tribunal Speaker in asuhtheng dinga thupeh anei ahi. Ahivanga case hi tuchan geiya Speaker’s Tribunal a seilhah lou (pending) a um nalai ahi. Rajya Sbha seat khat a dinga election notification aum jouva Congress party in Manipur High Court a miscellaneous case chom chom 7 asem uva, ‘disqualification case’ seilhah masat ding ahiloule party a kon jam doh a MLA 7 ho state Assembly complex a alut diu phal lou dinga ngehna aneiyu ahi.

Election Commission of India in June 19 teng Manipur Rajya Sabha Election um dinga notification aso ahi. BJP, Congress le NPF candidate khat cheh in nomination apehlut ahi’in, ahivanga NPF candidate in nomination apehlut akilah doh ahitan, Congress candidate T Mangibabu le BJP candidate Leishemba Sanajaoba bou sangtah a kitet dinga umlhon ahi.

Achesa May 28 ni a Manipur Legislative Assembly Speaker Tribunal in Congress a kon jam a BJP a lut MLA Thounaojam Shyamkumar Singh ‘disqualify’ anabol ahi. Supreme Court in achesa January 21 nikho a hiche case a Speaker in thutanna anei vah loujeh a alunglhai louna thu asei jouva Speaker in hitobang thulhuhna anei ahi.

Court sangpen, Supreme Court hin achesa March 18 nikho a Shyamkumar hi state assembly a lut sah louding chan a thupeh aneiya chule BJP sorkar noiya Minister panmun atuh na jong alahpeh ahi. Shyamkumar hi Town Planning, Forest, Environment Minister anahi ahi’in, Supreme Court thutan jou March 26 nikho a House a kon haina anei ahi.

Supreme Court in tukum January lha a Singh chungchang a hehna kisem hi kal li sunga Manipur Speaker in asuhtheng dinga thupeh anei ahi’in, Speaker in hiche thu a thulhuhna ima aneilou jouva court sangpen in Shyamkumar Minister hina alahpeh a chule Legislative Assembly a alut ding jong akha na thuso anei ahi.

Parents Assn., CCpur in CCpur District Private School Assn., ho heng’a online class leh tuition fee chung thu’a ngehna nei

B.Lalboi Gangte

Ccpur, June 3(ET): Themjil simlai chapang ho hasatna nikho leh amaho thalheng’a thusei ding’a kisemdoh Parents Association, Churachandpur, Manipur akon Secretary, Information & Publicity Syama Tungdim in tunin Churachandpur District Private School Association heng’a simlai nu leh pate ho hahsatna ahetthem peh ding in ngehna anabol in ahi. Hiche achun gamsung pumpi Covid – 19 jeh’a mitakip in hahsatna ato toh lhon’a themjil na inn jong akikha naban’a simlai chapang hon jong adeibang tah uva themjil na anei thei lou’u hi thilkho tah khat ahi tan ahi ati. Hijeh chun Covid-19 in mitakip asuhboi nachung chon’a simlai nu leh paten hahsatna ana toho ahetthem peh ding uvin ngeh na aneiyin ahi.

Hetthei khat chu gamsung pumpi Lockdown jeh in themjil na inn ho akikhah tan chuleh simlai chapang School kai thei nading alemchang tahlou jeh in inn cheh’a jil thei na ding in Online class Government deisah nabang in ahung kipandoh thei tan ahi. Ahin hiche online class jong hi School phabep in apat tah vang in abol lou lai jong aum nalai in ahi. Hiche Online class ding’a poimo Phone hoi jep ngai ding ahi jeh in anei jou lou insung ding in hahsatna asohdoh kit in ahi.  Chuleh Online class ahi teng chapang ama leh ama aki-vetthei lou tamtah jong um in hiche naban’a tulai’a technology sang tah tah ho minu leh pa moltah hon chapang ho deibang’a abolpeh theilou’u ahidan jong Syama Tungdim in atahlang in ahi. Alangkhat’a lockdown jeh’a minu leh paten deibang tah’a na atoh theilou jeh uvin chapang ho Monthly Tution Fee ding sum leh pai holnalam’a hahsat na ato utoh lhon’a ahetthem peh ding uvin jong ngeh na aneiyin ahi.

ADC Churachandpur a member ho kah a thu nei kichuna aum kiloikhomna chom chom in demna nei

Imphal, June 3(ET): Joint Student Bodies of Churachandpur- Zomi Students Federation General Headquarters, Kuki Students’ Organisation Churachandpur, Hmar Students’ Association Joint Headquarters Churachandpur le Mizo Zirlai Pawl Headquarters Manipur in Churachandpur Autonomous District Council a Member ho kah a tha neiding kichuna aum kidang asah nau le phamo asah nau thuso anei uvin ahi.

Covid 19 pandemic sunga mipin boina ato laiya amaho kah a tha neiding kichu na aumjing jing hetthem ahah e, tin kiloikhomna chom chom in thuso anei nauva asei uvin ahi. Chule Covid 19 pandemic laitah a District Council sunga hitobang aumhi dei umlou tah chule kimoh vetlou ding ahi, ati.

Churachandpur a simlai kiloikhom hon lamkai (mipi thalheng) hon hitobang abol demna sangtah aneiyin chule mopohna nei authority hon kibungkhenna ding phat pe louva natna hise douna a pan alah diuvin temna aneibe uvin ahi.

QC a khamnathei supply bolgo kimandoh

Imphal, June 3(ET): Tuni chun Nambol PS a HC K. Tiken Singh makaina in IQC a kimang Nambol Hr. Sec. School campus kom a checking abol nauvin QC sung a khamnathei supply bolgo mithum amandoh uvin ahi. Akiman ho chu Ningthoukhong Bazar, W/No.11 a cheng Rk. Victor Singh (25), Ningthoukhong Mayai Leikai W/No.12 a cheng Konthoujam Rohe Singh (27) chule Ningthoukhong Bazar, W/No. 11 a cheng Rk. Bhubonsana Singh (27) ahiuve. Amauho hin hotcase sung a Ganja, Ju, win cigarette bom khat, Khaini ho ahin jaosah uvin ahi. Hiche thil ho chu QC sung a um Sapam Sunil Singh (25), Khwairakpam Ashinikumar Singh (25), chule Khwairakpam Mona Singh (25) ho ding a ahin gonpeh u ahi. Akiman ho chu Nambol Police ho khut a aum uvin ahi.

Delimitation thu’a KIM le abahkai hon kihoukhomna nei; Sub-Committee khat semdoh ding’a kilolna neiyu

Imphal, June 3(ET): Kuki Inpi Manipur le Kuki Inpi district lamkai cheng in tunin Kuki Community Hall, Langol Phaipijang a jingkah lam nidan 11:00 akon nilhah lam nidan 1:30 sung in ‘Delimitation’ chung chang thu’a kihoukhomna ana nei uvin ahi.

KIM President Khaimang Chongloi in kihoukhom kibollona chung leh Kuki nampin Chassad kho thah tundohna ding’a pan kilah dan le tuchan insah natoh ho dinmun thu chule Covid-19 lockdown jeh a genthei hahsa ho kithopina dinga Kuki Inpi Manipur in pan alah dan ho thu’a houlimna anei in ahi.

Kihoukhom na a chun Dr. T. Lunkim le Benjamin Mate in jong pan anala lhon in houlimna jong aneilhon in ahi.

Hiche kihoukhomna a chun ‘Kuki Inpi makai nanoija gangtah a Sub-Committee on Delimitation semdoh ding leh Delimitation le Kukite dinmun chule panlah ding dan gelkhomna le seikhomna (wider consultation) agang theilam a neidin ting kiphatsah na anei uvina hi.